(Facebooker te hmalakna in rah tha chhuah ngei teh se)
Kan hriat theuh angin Champhai police chuan ruihhlo zawrh kaihhnawihah Henry Lalbiakzinga Chhundeng, Aizawl Dinthar veng mi chu March ni 15 khan an man a nih kha. A ni hi mi tawnghmang thiam leh rualpawl thiam tak niin a lang. Mi satliah mai nilo in mi challang tak tak pawh a pawl thiam zel mai niin MLA result puan zana a lawm au video darh atang te pawh khan kan hre thei ang.
Kha video avang khan facebooker thenkhat chuan (opposition lam pawh an tel maithei e) a ni (Henry-a) kha kan rulling MLA thenkhat nen thawkho-ah riak an puh nghe nghe a nih kha. Kha inpuhna kha rulling party hruatu te chuan nihlohna puia inpuh tiin police lamah thubuai (FIR) an thehlut zui ta nghe nghe a nih kha.
'Kan ramah hian mi hausa chuan thil an tisual ve theilo. An tan ve pawhin rei an tang thei tak tak lo' kan ti fo. Ngaihdan awm tak pawh niin a lang. Mi tam takin kan hlauh leh kan lo ngaihven ruk chu Pu Henry-a kha a tang rei angemle? tih hi a ni awm e.
Pu Henry-a kha mi hausa tak a ni tih chu a in leh lo atangin kan hre thei ang. A awmna veng lam te pawhin mi pangngai chung lamah an dah tih pawh a lang reng mai. Kan rulling MLA thenkhat nen pawh an in ti tha viau tih a rin theih nghe nghe.
Hemi avanga mi thenkhat pawhin an thawh ho ring kha an ni reng a. Rulling lam lungawi lohna pawh hi a awm viau tho mai bawk.
Kum kalta lamah Pu Henry-a damdawi an man zatve pawh tlinglo chu a hremna kum sawm lungin tan leh cheng nuai khat chawi a ni a, hetiang thuaka hremna hi damdawi case dangah pawh a awm nual in a hriat. Heta tang ringawt pawh hian Pu Henry-a hi chhuak thuai tur chi niin a langlo. Jail-ah a hun pum hmang tawh se pawh kan ti hial maithei.
Hetia mi thenkhatin party in beihna anga an la hian thatna tam tak a nei in a lang. A chhan chu kan rulling MLA thenkhat nen heti khawp hian an in hre tha a nih chuan he famkim lohna khawvelah hian a case tihnep sak dan pawh ngaihtuah sak duhna thinlung an pu maithei. Hetianga inpuhna a awm tak avang hian rulling lam pawhin opposition bengchhen lutuk hlauh vang ringawt pawhin a case hi nghet hle se an tih ngei zawk a rinawm tlat a ni. Chuvangin, facebooker thenkhat hmalakna hian rah tha a chhuah ngei pawh a beiseiawm.
Kan khu-ah hian ruihhlo zuar hi an awm nual nia hriat ani a, heng ho hi an huatthlaawm takzet a, social reform leh YMA mai bakah veng chhung welfare hrang hrang te pawhin do hna theihtawpin kan thawh tlang. Hetianga damdawi thalo zuar te hi kan ram hmelma tih hriaa kan theihna zawn theuha do hna thawh hi kan za a mawhphurhna a ni e.
(Sawiremtlang editorial)
Comments
Post a Comment