Hmanhmawh taka chhuak ka nih avangin duh ang pawhin ka in ti fai hmanlo. Kan hnathawhna hmun hi mawm khawih tamna a nih avangin kut vel ti fai tur hian beih fe angai thin. Tlai bana tih fai vek theih a nih thin loh avangin chawlhni (holiday) pawh hian kan kheuh neuh neuh mai thin reng a ni.
Theihtawpin tihfai tumin ka insil a, airport kan thlen hnu, boarding pass tihfel hma leh a hnu thleng pawhin ka kut chu ka kheuh neuh neuh reng mai a ni. Thlawhna chhunga thut luh hnu pawhin bula mi ten min hmuh hlauin kut ka dah chhuak ngam meuhlo.
Airport kan thlen leh hnu (kan thlawh a, kan tum leh hnu) chuan ka thlawh zelna tur (connecting flight) tur chu hun (gap) ka lo dah tam tawkloh deuh avangin ka nang ta hauhlo mai. Thawktu te chuan a tuk (darkar 24 hnu) ah chauh flight a awm tawh tur thu an sawi avang chuan chumi tur chuan ticket min tihfel sak nghal a. Ka lawm viau rualin lung erawh a awi chiahlo.
Zan rei lama airport hi lut ka nih avangin ka han mu ren rawn a, rilru hah avangin mut erawh a tui mawh hle. Hei vang hian ka awmna terminal chu ka fang chipchiar hle. An tuidehna-ah chuan kalin ka kut chu ka sil deuh reng a, bangah te tatin eng kil kil emaw tlang zum deuh lai-ah chuan ka tat nasa thei hle. Pawn lam hmuh theih takah chuan chhuak ila, pawnah chuan nawhlung tur a awm mial mahna tiin ka chhuak a. Mahse, chutiang atana hman mai tur a vang hle. Lei thilah te chuan tat nawk nawkin tih loh ai chuan zia tak a ni tho mai.
Hetia zanlai laia ka vei chhen mai hi airport a hmunphiat, hmeichhe pakhat chuan min lo be dinga, ka chanchin te hrilhin min khawngaih ve hle. Thingpui te min han in tir mai phei chu thil a to em avanga engmah ei in ngamlo nih lai a lo ni nen, lawm tak ka ni. Airport-ah hian thil hi a to thei em em mai a, kan insum hram hram hian nakinah thil leina tur kan neih phah dawn avangin keini ang tan chuan reilote riltam deuh pawh thil tha tak a lo ni. India leh an ram pawisa hlutna atanga chhut in. Israel awm lai, chhuah tum hnaih phei chuan hetiang hi kan hre fo reng a ni.
Ka thiani kha Ethiopia lam atanga hnathawka awm a lo ni a, Israel lamah Ethiopian thian ka lo nei nual nen, kan inkawm thei ta phian a ni.
He airport hi Italy a khawpui pakhat, Milan airport ani a, Malpensa International airport an ti. Malpensa tih hi Italy tawng niin 'ngaihtuahna thalo' tihna a ni daih mai a, mak ka ti hle. Malpensa Farm house hmuna airport hi din a nih avangin a hming pawh hi pu ta a ni a, kum 1909 a hawn niin kum 1948 atang khan civil mi te tana luah tan niin khawvelah airport lian 9-na a nih thu ka mihang thiannu hian min hrilh.
A tukah chuan tih tur teh vak awm chuang heklo, visa buaipui ngai chuang bawk lo nen, airport a tei nilen ngawt ai chuan tiin taxi la in Milan khawpuia khelmual hmingthang tak mai, khawvel huap ang pawha kan hriat lar pawl, San Siro ka va tlawh nghe nghe. India chu sawiloh, Europe khawmuala khelmual hrang hrang hi ka tlawh ve ta nuala, San Siro tlawh manhla bik riau chhan chu club pahnih in an intawm mauh mai hi a ni. Hunkhatah khelmual pahnih kan tlawh a nia, a manhla dan a danglam riau.
Thlawhna kha nangin lo tlang ta ila, airport ka fang hman hauhlo anga, ka hmun tlawh tak te hmuh chu sawiloh khawpui chhung pawh ka kal lek awm silo. Pathian thil rel dan hi a lo mak mang'e.
Hetia khawpui chhunga ka len luh takah hian ka kut bal kha ka hre reng mai. Bazarah chuan nawhlung ka'n lei ngat kha. Nge ni na vei.
Hemi ni hian India cheng nuai chuang ka hmang hial niin ka hria. Loh theih ni si heklo le. A hunlai khan uiin pawiti viau mah ila, tunah erawh tawnhriat hlu tak a ni ta.
Comments
Post a Comment