1st. Wednesday :
Mamit Sub. Headquarter YMA chuan an district huam chhung Mamit Bial leh Dampa Biala MLA independent candidate (Lalpa Chhiahhlawh Intelkhawm) Lalramdingngheti lakah Mamit Police Station-ah FIR an thehlut.
2nd. Thursday : Pu Mangrelphira, Zokhawthar, tuna Ramhlun South a an chhungte In a khawsa mek chu Zotlang thlanmual a transformer 11Kv banah lawnin Current hian a man a, a hnungzangah na takin a kâng.
3rd. Friday : Pachhunga University College chuan an College Auditorium-ah kum thum dana an hman thin, Cultural Day cum Music Day an hmang a. He Day-in a ken tel, thu leh hla hmanga Mizo hnam insuihkhawmna kawnga ziak mi langsar, B.Lalthangliana hnenah ‘Laisuih Award 2023’ hlan.
4th. Saturday : Kar leh Thawhlehni, November ni 7 khi Mizoram assembly inthlan lo awm tur atana vote thlak ni tur a nih avangin party hrang hrang te chuan campaign an khar hlawm.
Inthlan campaign hun hi naktuk tlai dar 4-a tawp tur ni mah se, naktuk hi Pathianni a nih avanga khar hlawm an ni.
5th. Sunday : Women's Asian Champions Trophy 2023, Ranchi, Jharkhand a khelh zawh takah India chuan defending champion, Japan chu 4-0 a hnehin a vawihnih nan an champion. Final-ah hian Mizo nula, Lalremsiami chuan goal khat a khungve nghe nghe.
6th. Monday : General Election to Mizoram Legislative Assembly, 2023 atana Polling Station hrang hranga duty turte chu khawl nen venhimna hnuaiah tirhchhuah (dispatch) an ni hlawm.
7th. Tuesday : Mizoram Assembly Inthlanpui chu tluang taka neih a ni a; Mizoram puma voter 852088 zingah vote 685352 a tla. Sorkar hnathawk, (election duty tur) tar leh rualbanlo ten a hmaa vote an thlak (postal ballot) 15061 nen rampumah vote 700413 a tla a ni.
8th. Wednesday : November ni 2 a Patiala, Punjab a boral, Lalnunthiangi (33), c/o TT Zothansanga, Mission veng ruang chu Aizawl rawn thlenpui a ni.
Lalnunthiangi hi Thapar University (Thapar Institute of Engineering and Technology), Patiala, Punjab-a Biotechnology-a doctor of philosphy ti mek a ni a, October 28, 2023 atanga chin hriat loa a awm hnuah thia hmuh a ni ta mai a ni.
9th. Thursday :
Jammu & Kashmir, Samba district ramri-a India leh Pakistan sipai inkahnaah BSF sipai, Lalfamkima (50), w/o Lalzarliani, Durtlang chu kah hliam a ni a, a hnu deuhah damdawiin ah a thi.
10th. Friday : MLA inthlan ni a Aizawl South-III bial huam chhunga Muallungthu Polling Station-a EVM a hmaa enchhinna an lo clear felloh avangin inthlan that a ni. He vote thlak that naah hian vote 943 (mipa 459 leh hmeichhia 484 (86.99 a tla a ni.
11th. Saturday :
Zonunsanga (15), Lunglei Theiriat chu ram an kalnaah lengkirah a tla a, damdawi in panpui a nih hnuah a hliam tuar loin a thi.
12th. Sunday : The Leprosy Mission (TLM), Mizoram pum huap inkhâwmpui vawi 14-na Baptist Church of Mizoram Biak In, Hnahthial Electric Vênga November ni 10 aṭanga neih chu a ṭiak.
13th. Monday : Aizawl khawpui chhûnga lîrthei chêt vêl dân khâwl hmanga thununna - Adaptive Traffic Control System (ATCS), traffic signal light (a sen, a eng leh a hring) hmanga lîrthei tlân dân enkawlna chu a hmasa ber atân hman chhin a ni.
14th. Tuesday : Minister hlui, Pu Lalbiakzuala (67), Châltlâng chu cancer avângin a boral.
15th. Wednesday : Mara rama Sâp missionary hnuhnung ber, Rev. Violet Louise Anne Mark (Pi Vaili), ni 13 (Thawhṭanni)-a boral chu Saikao-a missionary thlânah vûi liam a ni.
16th. Thursday : I & PR Auditorium, Treasury Square-ah I & PR department leh MJA, General Headquarters ṭang kawp huaihawtin National Press Day (Chanchinbu mite Ni) hman a ni.
17th. Friday : Tunlaia Mizote zinga thuhriltu lar ber pawl, Bethel Ministry speaker, Tv Frederick Lalrindika lehkhabu ziah, 'Meialh Thiltithei' tih chu Vaivakawn Cultural Centre & Auditorium-ah Rev. Dr. Vanlalbela'n a tlangzarh.
18th. Saturday : KṬP, Tlangnuam West Branch chuan ZMC tan an kohhran hall-ah thisen unit 37 an pe a, petute mipa 25 leh hmeichhia 12 an ni.
19th. Sunday : Mizoaram Baptist Kohhran Ni Pawimawh, ‘Naupangte Ni’ a ni a. Kumin Naupangte Ni thupui chu “Tho la, naupang kha kaitho la, i kutin chelh rawh” (Gen. 21:18) tih a ni. Tualchhung Kohhran hrang hrangah he thupui hmang hian thuchah ngaihthlak a ni.
20th. Monday : Directorate of Ayush, Health & Family Welfare Department, Government of Mizoram hma laknain TS Luaia Middle School, Rengtekawn, Kolasib-ah 8th World Ayurveda Day pualin hun hman a ni. He hunah hian District Hospital Kolasib aṭangin Senior Medical Officer (Ayush), Dr C. Vanlalhlimpuia hovin doctor leh thawktu dangte thawk chhuakin, TS Luaia Middle School-ah Ayurvidya (School Health and Education Programme) buatsaih a ni a. SMO, Dr C. Vanlalhlimpuia chuan Ayurveda chungchang leh hriselna kawnga hriat tur pawimawh hrang hrangte a sawi.
21st. Tuesday : Chief Secretary, Dr Renu Sharma hovin CS Conference Hall MINECO-ah sorkar thar lak luhna, ‘Swearing in Ceremony’ neih dan tur sawihoin sorkar hotute an thukhawm.
22nd. Wednesday : Bairabi leh Sairang inkar rel kawng siam meka Kawnpui Rel Station tur bulah Hitachi hmangin kawng chhak lam laih a ni a, khawl hnathawh bak mihring tha hmanga lei an laih rem laiin ko pang chu a min thut a, hnathawktu hnam dang pahnih, Dipak Datta, kum 27 leh Prasad Passi, kum 53, Assam lam mi ve ve chu insaseng hman loin leimin hian a chhilh a, lak chhuah an nih chuan an lo boral hman tawh a ni.
23rd. Thursday : School of Nursing Thingdawl (SONT) chuan an School Auditorium-ah General Nursing & Midwifery (GNM) 7th batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) leh 4th batch SONT aṭanga zir chhuakte certificate hlanna hun (Graduation Ceremony) an buatsaih.
He hun hi Mizoram Sawrkara Health & Family Welfare Department Principal Director, Directorate of Nursing Director ni bawk, Dr Vanlalsawma chuan hmanpuiin, zirlaite leh zir chhuak tate fuihna thu a sawi a. Damlo enkawltute'n damlote tana kan tih theih sang ber chu ṭawngka leh chetziaa hmangaihna lantir a ni tiin, damlote rilru taka hmangaih leh duhsak a pawimawh thu a sawi. School of Nursing, Thingdawl hi December 2017 khan zirlai 20 awma bul ṭan niin, batch 4-in an zir chhuak tawh a ni. Tun ṭumah hian 4th batch aṭangin zir chhuak (graduate) mi 20 (mipa 1 leh hmeichhia 19) awmin, 7th batch 1st year zirlai 20 (hmeichhia vek)-in thu tiam an la thar ve thung a ni.
24th. Friday : New Delhi a cham mek, Tourism Minister, Robert Romawia Royte chuan Union Civil Aviation Secretary, Vumlunmang Vualnam hmuin, Aizawl atanga thlawhtheihna chuan man sang lutuk tih hniam a nih thuai theih nan hmala turin a ngen. Kolkata to Aizawl ticket man, cheng 4500 leh 5000 ni thin chu tun hnaiah cheng 14000 leh 15000 te a ni ta a ni.
25th. Saturday : Hnahlan Forest Range a Range officer, Staff leh Wildlife Protection Squad te chuan dan lova Sazuk tihhlum ruang an halral. Sazuk hi Ningani khan Tualcheng leh Hnahlan inrina, Thangpui luiah ramvak thenkhat ten a thi tlaw hi an hmu nia sawi a ni.
26th. Sunday : Mizoram Baptist Kohhran – Area Baptist Council (ABC) Rorel leh Inkhawmpui Zirtawpni zan atanga hmun hrang 17 a neih chu a tiak ta.
27th. Monday : Kolasib Vengthar branch YMA chu an veng chhunga hmeithai in sa in an hnathlang. Tuntuma hmeithai in sak sak hi enkawltu nei lo, chhungkhat laina hnai pawh nei lo a ni a, tunhnai khan sorkar laipui scheme kaltlangin insak tanpuina 'Housing for All' a dawng a. YMA te hnenah insak sak tura ngenin Kolasib Vengthar YMA te hian a ngenna an tihhlawhtlin sak ta a ni.
28th. Tuesday : National Highway-54 kawngpui laih mekah Serchhip district huam chhunga sorkarin ram a lak fel tawh, dan anga zangnadawmna dawng tawh, in la thiat duh lo, Chhingchhip Venghluna, Lalthuthlunga Hnamte in chu khawl hmangin thiahsak a ni.
29th. Wednesday : SAD Conference Hall, MINECO-ah tunlaia China rama pneumonia hri leng mek chungchang leh he hrileng laka Mizoram a him theihna tura hmalak dan tur te sawiho a ni a, he hun hi Health Department Principal Secretary, Pi Esther Lalruatkimi chuan chuan a telpui.
30th. Thursday : MFA leh Tlangnuam Games & Sports Association buatsaih D.Buanga & Son's Inter Village Futsal Tournament 2023 chu a hmawr bawk a ni ta. Final-ah hian Sihphir Venghlun VC team chuan Electric Veng LC team chu 4-3 a hnehin an champion.
Comments
Post a Comment