“Double Standard” tih hi mahni in'a zawm tum chuan loh dan leh dun bakah policy te mi dangte zawm tura beisei tlatna nun a kawk a, mahni ina hman tum loh tehkhâwng mi dangte hmang tura beiseina leh mahni tana kal dan ṭha leh hamṭhatna siamte mi dangte neih ve phal loh sawina a ni ber awm e.
Heti a nih chuan Mizoram Kristiante pawh hi sakhaw dangte thlirna tlang aṭang chuan kan lêm bik chuang awmlo e. Anmahni duhthlanna mah ni se, Kristian sakhua aṭanga sakhaw danga (Hinduism, Islam, Buddhism, etc.) inlet an awm chuan kan lawm lo hle ṭhin a, anmahni duhthlanna bawka sakhaw dang aṭanga Kristiana lo lut an awm erawh chuan kan lawm hle thung. Tin, Kristian rau rau-ah pawh kan kohhran chhuahsan chu kan hmu nikhualo viau a, pawl dang atanga lo pakai te erawh fing kan ti leh viau si. Politic chungchangah pawh kan inthlan hma phei kha chuan party bansan leh inlawmluh thawm a ring hle a nih kha.
Kohhran/Party danga memberte chu chhandam ni lo tur emaw party dang mi chu kan ngai mawl hu thin a nih hi.
Politician zingah pawh opposition an nih laia ruling thiltih dik lo leh ṭha lo hmu thei hle si, ruling an nih ve huna anmahni thiltih dik lo leh ṭha lo hmu leh thei miah si lo te hi double standard dik tak a ni.
Chuvangin, double standard neih hi a democracy loin a Pathian thu lo hle tih hria ila, kan Pathian thuin “In chungah miin ti se in tih ang ngeiin mi chungah pawh ti ve rawh u,” (Luka 6.31) a tih angin, Kristiante chuan kan Kristianna leh politics kan kalpui danah te hian double standard nei lo leh hman loh hram i tum ang u.
Comments
Post a Comment