Kar hmasa Inrinni khan Tuirial Airfield kawngah Petrol phur Tanklorry, MZ 01W-3251 a chesual a. A petrol phurh te nasa taka a buak avangin mipuiin petrol bua hi an dawh/thal nasa hlawm hle. A hmuna awm te mai bakah kawng dung te a lo ni bawk nen chutianga motor accident lo awm leh mi lo zi ta hut hut chu chinchang ngaihvenin a kal apiang an ding zel. Oil bua an lo la sup sup mai bawk nen, bur ruak nei chuan an la mai zel niawm tak a ni. Motor accident hun hi chawhnu dar hnih vel nia sawi a ni a, driver hi a rui hle niin an sawi bawk. A tlan chak em avanga kawng kawia kual zolo niin a lang. A ke sir ding lam pawh feet hnih vel laiin a kang nghe nghe niin chetsualna thlenna hmuna rawlthar pakhat chuan a sawi. Chetsualna avang hian driver leh handyman (hnamdang ve ve) hian hliam na an tuarlo hlauh. An tlanbo zui ta niawm taka sawi a ni.
Khawtlang hruaitute pawh chhiatna thlenna hmunah hian kal ve nghalin mipui ten petrol an la sup sup chu khap ve bawk mah se an in khap hleithei lo. Aizawl lama sorkar thuneitu te pawh hriattir nghal an ni a, beisei ang erawh chuan an kal mailo!
Darkar li vel zet a liam leh hnu chuan khua a thim ruai ruai tawh. Mipui pawh an tlem tan. Oil bua la leh chinchang ngaihven erawh an la awm nual tho. Thawklehkhatah kangmei a lo chhuak ta phut mai.
A hmuna awm naupang pakhat sawi danin khatia khua a lo thim khan thil hmuh chian theih heklo, pa pakhat lokal chuan a lighter chu a talh ta mai a, petrol boruaka chambang a lo tam tawh bawk nen, he kangmei rapthlak tak hi a lo thleng ta a ni. He kangmei avang hian mi pali chu thi nghalin mi 16 in hliam an tuar a, a bula in (thlam) pakhat bakah taxi pakhat leh two wheeler pathum te a kang ral a ni.
Hliam tuarte hi damdawi in hrang hrangah a remchan dan angin kalpui nghal an ni. Hliam tuarte zinga pahnih hi Nilaini khan an thi ve leh a, a hnu-ah kan khaw tlangval ngei mai chuan a zui ve leh ta a ni.
Rinchhana boral dan : Tv Lalrinchhana hi auto rickshaw driver niin Seling leh a chhehvelah hian sumdawng hruaiin a kal fo a, tuntum pawh hian kan veng thenawm mi (Venghlun nu) hruaiin a kal a ni. An kal lam hian motor accident hi a lo awm tawh a, rei vaklo chin ngaihvenin ding bawk mah se lam hla zawk kal tur an la nih avangin an kal zel. An tihtur te tifela an lo kir leh lama motor chetsualna a mi an lo la awm nual avangin an ding khawmuang ve ta a, Rinchhana hi motor awmna lamah kalin a mi phurhi erawh thenawm hnai-ah a lo kal thung. Khatia kangmei a lo chhuah tak phutah khan Pi Kimi (passenger) chuan a driver chu a ngaihtuah hle. A motora a lo mu a hmuh meuh chuan a mangang takzet. Sihphir lam be pawp nghalin, hei hi Sihphir lamin kan hriatna bul a ni ta a ni.
Hliam tuarte hi sawi tak angin a remchan dan ang angin damdawiin hrang hrangah dah an ni hlawm a, Rinchhana hi Civil Hospital-ah kalpui a ni. A tir chuan ngaihtuahawm lutuk ni lovin an sawi. Kekawrbul leh kawr banbul a hak avangin, a khup hnuai lam leh a ban, a kiu chin a kang a, a taksa lam erawh a him hlauh niin hriat a ni.
Mahse, a kawchhûng lam a lo khawih pawi deuh avangin a tuk Pathianni-ah ZMC-ah lakphei a ni a, Ningani chawhnu dar 3:45-ah thachhuak leh mai tura beisei a nih laiin thihna kutvawt chuan a man ve ta a ni.
Chhanhim veng tlangval, Tv Lalrinchhana hi Pu Vanlalrawna leh Pi Lalremruati te fa pathumna niin kum 23 na hmang mek a ni a, tlangval hmeltha leh nungchang tha, a chhungte paw'na an en bik, chhungkaw eizawngtu tangkai tak ni bawk a ni. Hetianga a liam ta mai hi a uiawm takzet a ni. A thlarau muang ten chawl teh se.
Comments
Post a Comment