1st. Friday :
Mizoram leh Assam ramri buai chungchangah State pahnih aiawhte chu internet kaltlanga inbiaiin ramri-a chetna thleng lo tura boruak vawnhim zel an duh thu an tarlang.
Inbiakna ah hian Mizoram lam atangin Home Minister, Pu Lalchamliana leh Sawrkar mi pawimawh te an tel a, Assam lamah Border Area Development Minister, Atul Bora leh mi pawimawh dang an tel bawk.
2nd. Saturday :
Junior hockey World Cup, South Africa a khelh tan ah India chuan an first match ah Wales 5-1 in an hneh a. Squad a Mizo tel pathum te an start vek piah lamah Lalrindiki'n goal hnih a khung a. Lalremsiami'n goal khat a khung bawk
3rd. Sunday : Excise & Narcotic Department leh YMA, Pukpui Branch, Lunglei District te thawkdun chuan Pukpui leh Zotlang inrina, Ramrikawn-ah Heroin gram 234.940 (hawng 17) leh he Heroin manna a inhnamhnawih nia puh mi pathum an an man.
4th. Monday : Ni 15 chhung awh (March 21 – April 4) nu naupai leh naupangte hriselna leh an tana chaw tha chungchang tlangauna programme ‘Poshan Pakhwada’, Women & Child Development Department huaihawt chu Aijal Club a The Terrace (4th Floor) ah khar a ni ta.
5th. Tuesday : Hripui avanga hun rei tak zirna in khar anih hnuah hripui lengin ziaawm lam a pan tak avangin zirna in hrang hrangte hawn leh ta.
6th. Wednesday :
Mizoram Kohhran Hruaitute Committee (MKHC) chuan thuchhuah siamin kut tling lova sum lakluh leh duhamna tha lo laka inveng fimkhur turin ram hruaitute leh mipuite an ngen tih an tarlang a, Dan lova ram pawn atanga bungraw lakluh leh hmasawnna ruhrel thawhna leh kawng danga dik lo taka sum siam te chu tumah ti lo tura ngenin, ramngaw leh luidung ngaw te tha taka humhalh a nih theih nana theihtawpa hma la zel turin an ngen bawk.
7th. Thursday : Mizoram IOCL Transporters' Forum (MITF) leh Indian Oil Corporation Ltd. (IOCL)-te oil phurh man chungchanga an thu inhmuh loh avanga hun eng emaw chen oil-ah harsatna a awm hnuah, mipuite harsatna hrethiamin MITF chuan oil phurh an chawlhsan chu an titawp lailawk.
8th. Friday : Ni 14 awh tur, State Handloom Expo chu Aijal Club Park-ah Commerce & Industries Minister Dr. R. Lalthanglianan a hawng. He Expo hi sorkar laipuia Development Commissioner for Handloom pisa bultum niin Handloom, Textile & Handicrafts Wing, Commerce & Industries Department in a buatsaih a ni.
9th. Saturday : India rama performing arts lama chawimawina sang ber, Sangeet Natak Akademi Award (Purushkar) chu Prof. Laltluangliana Khiangte, Mizoram University a thawk lai chuan New Delhi-a Vigyan Bhawan-ah Vice President, M Venkaiah Naidu hnen aṭangin a dawng. Prof. Laltluangliana Khiangte hian playright huang chhungah Sangeet Natak Akademi Award hi a dawng a ni.
10th. Sunday : Lal Isua ropui taka Jerusalem-a a luhna ni champha 'Tumkau ni' a ni a, Zoram hmun hrang hranga Kristian te chuan Lal Isua chawimawiin Tumkau chawiin kawng an zawh.
11th. Monday :
Assam Rifles Serchhip Battalion te chuan Champhai district-a Hruaikawn khuaah ralthuam tawlhruk ni a hriat eng emaw zat an man.
Assam Rifle te hian an thudawn bawhzuiin Hruaikawn khuaah hian dan lova ralthuam lakluh ni a hriat an inhlan chhawng tur lai hi an nangching a ni. A tawlhtu ni a rinhlelh te erawh chu Myanmar ram chinah an tlanbo hman thung.
12th. Tuesday : Kolasib Bawrhsap, John LT Sanga chuan Vairengte tlak lam Aitlang rama ramri kawng laih te a tlawh a, ramri a duty Mizoram Police ten harsatna an neih leh neih loh te a zawt nghal.
13th. Wednesday : Pi Biakmawii (L) leh Pu Chalkhuma (L) Chhiahtlang te chuan fa 5, hmeichhia 3 leh mipa pahnih neiin, an fate hi kum 70 chunglam vek ni tawhin an la dam kim vek a, Pathian malsawmna dawngin tu leh fa 77 an nei nghe nghe. Hemi avang hian an in pui Chhiahtlangah Pathian malsawmna leh venhimna an dawn lawmin lawmthu sawina ruai an kil ho.
14th. Thursday : Champhai Police, Chalbawiha Junction Khankawn Police Check Gate a duty-te chuan Heroin No.4, grams 184, sahbawn bawm 15 chhunga thuhruk, international market-a cheng nuai 92/- man hu Manthanga (44) Sanmiau Satawm, Myanmar kut atangin an man a. Champhai police ten thubuai an siamsak nghal a ni.
15th. Friday : Vanduaithlak takin KT Jokebedi (25), Siaha chu COVID19 vangin ZMC -ah a boral. March 25 khan hri a kai tih hriatchhuah niin hemi ni vek hian admit a ni a. Natna dang nei tel a ni.
16th. Saturday :
Home Minister, Lalchamliana chuan Falkland Veng-ah man chawia silai kahna hmun, Zakamlova Shooting Range chu a hawng. He hunah hian Home Minister chuan Shooting Range hawn thar chu silai kahna hmun a nih mai bakah Shooting Range enkawltu ten silai himna chungchang Course te an paltlang avangin silai him tak leh fimkhur taka chelek leh enkawl dan inzirtirna hmun a nih a beisei thu a sawi a. Aizawl-ah ringawt pawh silai leh silai mu zuartu Arms & Ammunition Dealer 16 lai an awm thu te sawiin, silai leh hriamhrei te hi hnathawh nan leh mahni inven nan thil tangkai tak a nih rualin a chelektute an fimkhur tawk loh avanga Sawrkar phal loh sapel leh ramsa vehte an intipalh fo leh hemi avanga nunna chan an awm chu thil pawi tak a nih thu a sawi bawk.
17th. Sunday : Easter Sunday a ni a, kohhran hrang hrangten Lal Isua tholeh an lawm.
18th. Monday : Ministry of Health and Family Welfare,, Govt. of India in a ruahmanna ang in India ramchhung a State zawng zawngah India Independence vawi 75-na Azadika Amrit Mahotsav denchhen a kar khat chhung- April ni 18 atang a ni 29 thleng Block tin ah Health Mela (Hriselna Kutpui) hman tur chu kalpui tan a ni.
19th. Tuesday : April ni 14 atanga chin hriatloha awm, Vanlalhmangaihzuali Fanai (30), D/o F. Lalrintluanga, Lunglei Electric Veng chu Aizawla a thlenna, Lushai Hills Residency Hotel-ah thi a hmuh a ni.
20th. Wednesday :
MLA Fund hmanga sak, Bawngthah High School Building thar chu Bialtu MLA, Pu Lalrintluanga Sailo chuan a hawng. Bawngthah High School Management Board secretary Lalenkawli sawi danin, Dampa Assembly bial chhunga mi, Bawngthah khua hian kum 2013 khan khawtlang ṭan ho na in High school hi an lo din tawh a, Primary school Building leh Middle School Building te ṭawmin kum 8 lai an awm tawh hnu ah Bialtu MLA hmalak sakna in School Building thar an nei ve ta a ni.
21th. Thursday :
Central YMA leh Cricket Association of Mizoram (CAM) tangkawp in a buatsaih, 11th Inter Branch YMA Cricket Tournament chu Central YMA Hall, Tuikhuahtlangah Central YMA President, Pu R. Lalngheta chuan a vaw hawng. Inelna hi April Ni 26 atangin khelmual pathum - Durtlang Playground, 3rd BN MAP Ground, Mualpui leh Ramhlun Sports Complex-ah te khelh tan a ni ang.
22nd. Friday : Ni thum awh tur Presbyterian Kohhran Pastor Bial inkhawmpui chu hmun hrang hrangah tan a ni.
23rd. Saturday : World Book Day a ni a, he ni pual hian MZP General Hqrs. chuan Aizawl-a MZP Conference Hall-ah hun hmangin he hun hi Human Resource Development Board Vice Chairman L. Thangmawia MLA chuan a hmanpui. Thusawiin pu Thangmawia chuan, 'Hnam fing leh mifing apiangin lehkhabu an chhiar nasa in an ngaihlu tih a sawi a, “Chhiar tam na na na chu kan thil tihna hrang hrangah thu lak nan kan hmang tlangpui a. Hemi kawngah hian thangthar ten tan kan lak a ngai a. Lehkhabu kan chhiar tam chuan ram leh hnam tana beihna kawngah a ni emaw, tawng hmasawnna tur leh tawng humhalhna kawngah nasa takin lungrualna min thlen ngei ka ring a ni,” a ti bawk.
24th. Sunday : Tlawngah Jerry Ramnunsanga(27) S/o Vanlalhruaia. Dawrpui Vengthar leh Lalfakzuala(25) S/o Lalrinzuala, Tlangnuam Aizawl te chu an tla hlum.
25th. Monday : Mizo Academy of Letters (MAL) chuan an din champha (Foundation Day) chu Assembly Annex Conference Hall-ah an lawm a, he hunah hian Book of the Year 2021 atana thlan 'Hnam Ropuite U Tho R'u Le' ziaktu Lalhruaitluanga Chawngte hnenah lawmman an hlan nghal.
26th. Tuesday : Chief Minister, Pu Zoramthanga chuan INTACH Mizoram Chapter lehkhabu siam "Built Heritage of Mizoram 2021", Mizorama building hlui ding lai chanchin ziahna chu CM Conference Hall-ah a tlangzarh. Lehkhabu tharah hian building hlui 71 tarlan a ni.
27th. Wednesday : Aizawl District Special Branch Team-te chuan heroin gram 65; sahbawn bâwm 5 chhûnga thuhrûk, local market-a ₹ 175,000/- man hû chu Malsâwmkimi (23), Aizâwl Armed Vêng South kut aṭangin Millennium Centre-ah an man.
28th. Thursday : Chawnpui venga RB Gurung in sak mek chu a chhak kopang a min thut avangin hnathawktu Lalmuanpuia(50) S/o PC Lalremmawia, Chawnpui veng chu a borala, mi pahnihin hliam an tuar bawk.
29th. Friday : Mizorama autonomous district council pathum – Lai, Mara leh Chakma-te din champhaphâk vawi 50-na, Golden Jubilee chu anmahni hmun ṭheuhah hlim takin an lâwm.
30th. Saturday : Ruah leh rial nasa tak a tlak avangin Phuaibuang khuaah in 200 chuang a deng chhia.
1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e. Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni. Feh haw'n kawngah lah hmeichhia chuan em khatin in lam mamawh an phur haw ...
Comments
Post a Comment