1st. Sunday : Ningani atanga Saitual a tan KTP general conference chu a tiak.
2nd. Monday : Kanan venga Pu Rina, Mamit inhmun JCB a laih mek chu a chim a, lei laitu, JCB bakah JCB a chuang lai, naupang pathum te chu leimin hian a chhilh. Rang taka chhanchhuah hna thawh nghal a ni a, hliam tenau thenkhat chu awm bawk mah se vanneihthlak takin thi an awmlo hlauh.
3rd. Tuesday : Mizoram history a a hmasa ber ni turin Sairang Sihhmui Rel Station-ah Mizoram mipuite ei tur FCI buhfai phur Rel wagon 42 a lo thleng e.
Tunhma zawng chuan Bairabi thleng chauh Rêl hian a rawn phur thin a ni.
4th. Wednesday : K Zoramchhana (56) h/o C Lalbiaksangi, East Lungdar chu an lenna Sailulak a tlang pakhat atanga tla in a thi.
5th. Thursday : Kum 1966 March ni 5-a India sorkar-in Jet Fighter hmanga Mizoram a beih champha, Zoram Ni chu MZP chuan an Conference Hall-ah an hmang.
6th. Friday : An in aṭanga chhuaka chin hriat loha awm zui ta, JH Sama (86), Thingdawl Hmâr Vêng chu an khaw chuanhnuai khâmah thîa hmuh a ni.
7th. Saturday : India Vice President, Pu CP Radhakrishnan chuan Mizoram University (MZU) Convocation vawi 20-na a hmanpui a; MZU hnuaia zirlai 6,385 hnênah degree hlan nghal.
8th. Sunday : Hmeichhiate Ni (International Women’s Day) a ni a, The Salvation Army Home League chuan corps hrang hrangah a lawmna buatsaihin, Kohhran chhunga hmeichhe thawk tha leh entawn tlak te, chawimawina pek an ni.
9th. Monday : Tunhnaia an party ti hmingchhe zawnga beihna nia hriatna a awm avangin Zorama Hmar inti lakah ZPM Secretary General, PB Lalsawmliana chuan Cyber Crime Police Station-ah FIR a thehlut.
10th. Tuesday :
Zaithiam, Rosy K Remsangpuii chuan Durtlang tlangval, C Lalrammawia chu Durtlang Presbyterian Kohhran Biak Inah pasal atan a nei.
11th. Wednesday : Aizawl College NSS chuan an hmunah thisen pek rûnpui an huaihawt a, Civil Hospital, Aizawl Blood Centre tan thisen unit 250 an pe a, petute mipa 203 leh hmeichhia 47 an ni.
12th. Thursday :
Lunglei District Bawrhsap, Pi Navneet Mann chuan National Highway-54 & 302 kawngpui laih zauh leh siam ṭhat hna thawh meka Theiriat–Hrangchalkawn leh Lungpuizawl–Zobawk huam chhunga hma lakna hrang hrang leh harsatna awmte chu a hmunah kal chilhin a enfiah.
13th. Friday : Mizote kût ropui leh ngaihhlut hlawh ber Chapchar Kût chu hmun hrang hrangah hman a ni. A hmanna pui ber, lammualah chuan chief minister, Pu Lalduhoma chuan kutpa niin a hmanpui.
14th. Saturday : Pu Lalramzauva, Myanmar lam mi, GOP Bamboo Factory, Sairanga Chowkidar hnathawk lai chu Sairang Dinthar area, Tlanvawng kawn liamah a ruang chu hnathawktuten rel kawngah an hmu. Rel chilhlum ni ngeia ngaih a ni.
15th. Sunday : Mizoram Presbyterian Kohhran ni pawimawh, ‘Chanchin Tha thlen Ni’ a ni a, Kohhran hrang hrangah he ni pual hian hun hman a ni. He ni hi Mizoram-a Chanchin tha rawn puang hmasa bertu, Rev. William Williams-a’n Mizoram a rawn thlen ni champha (March 15, 1891) a ni.
16th. Monday : Chief minister, Lalduhoma chuan Assembly Annexe conference hall-ah Mizoram Universal Healthcare Scheme (MUHCS) 2.0 leh MUHCS-a hriat chian duh leh harsatna neite tana thlenna tur call centre ‘MUHCS Chhàwntu’ a tlangzarh.
17th. Tuesday : Durtlang Football Stadium, Mizorama Football Stadium tha ber tura duan chu UD&PA Minister, Pu K. Sapdanga'n a hawng. Stadium hi Aizawl Smart City Limited hmalaknaa din niin cheng 22,30,75,000/-senga sak a ni. Durtlang Football Stadium hi Field Management Committee, Durtlang Local Council Chairman-na hnuaia khawtlang hruaitu pawl hrang hrangte telna chuan an enkawlzui dawn a ni.
18th. Wednesday : Kolasib Deputy Commissioner, Robert C. Lalhmangaiha, MCS, kum 48 chu
Civil Hospital, Aizawl-ah Zunthlum leh thisen sang avangin a thi.
19th. Thursday : Diktawn monthly magazine bultuma kum tina thlan ṭhin “Miss Chapchar Kût – 2026” thlanna chu Vanapa Hall, Aizâwlah neih niin Tlângnuam nula, Celestina Lalchhandami chu thlan a ni.
20th. Friday : Dina Mamit-in R15 V-4 Bike a lei thar diai chu a zan khat kawl naah, in pawh a thlen hmaa a duty naa a ken nghal avanga a chhungte pawhin an la hmuhpui loh chu Mamit leh Bawngva inkara a hnathawhna hmunah misualin an hal sak. Mamit Police Station-ah FIR theh luh a ni a, Police-in an endik nghal a ni.
21st. Saturday : Mizo film, Nukawki Pasal leh Thih leh dam (I & II) ah te hnehsawh taka chang, Pu F Lalhlira (77), Lunglei Ramthar Veng chu a thi.
22nd. Sunday : Aizawl Traffic Police te chuan Aizawl veng hrang hranga hmun 41-ah kum tlinglo lirthei khalh venna leh an him zawk nan special drive an kalpui a, kum tlinglo lirthei khalh mi 80 zet an mana, dan bawhchhiatna dang avangin midang 148 lai man an ni bawk.
23rd. Monday : School academic session thar hawn ṭan niin school naupangte’n school an kai leh ṭan. Kumin hian December thla ah session hi a tawp anga, kumthar lam atangin January - December angin kal leh tawh tur a ni.
24th. Tuesday : Ngawr hri ûm bo tûra beihpui thlâkna ni, World TB Day chu Mizoram hmun hrang hrangah hman a ni.
25th. Wednesday : April ni 21, 2026-a Aizawl Municipal Corporation (AMC) inthlana chuh tûr a hming pekuh hun chu a tawp ta. Hetih chhung hian mi 68 hming an pe lut a ni. Aizawl Municipal Corporation (AMC)-ah hian ward 19 a awm a ni.
26th. Thursday : Lai Autonomous District Council Deputy Chairman thar atân, chuhtu awm lovin Pu C Lalneihkhûma thlan a ni.
27th. Friday : MZU Annual Sports Meet vawi 24-na chu zawh fel a ni ta a, a pumpuiah Government Hrangbana College, Aizâwl an champion.
28th. Saturday : Ni thum awh Champhai khawpui sîra Keilungliah tuikhuaha nghakuai chiah rûnpui neih chu khar a ni.
29th. Sunday : Lal Isua Jerusalem a lal anga a luh ni champha a ni a, kohhran hrang hrangin a tumkau chawiin Lal Isua chawimawiin kawng an zawh.
30th. Monday : PC Lalchuangkima s/o PC Thanhluma (L), Champhai Bethel Veng chuan Champhai District Hospital Blood Bank-ah thisen a pe a, thisen a pek vawi 100-na nia sawi niin, Champhai District Hospital, Association for Voluntary Blood Donation (AVBD) Champhai Branch leh Bethel Veng VC te chuan Mizo zinga thisen vawi 100 pe tling hmasa berah an chhál.
31st. Tuesday : Lalsiamkima Samte ziak, "Mi tin mil suh" tih bu chu Lalhruaitluanga Chawngte-in MZP Conference Hall-ah a tlangzarh. He lehkhabu-ah hian a ziaktu hian hringnun a thlir dan te, hnam a thlir dan te, khuarel lam te a ziak a, Rev Lalngurauva Ralte, Revd Chuauthuama, Mafaa Hauhnar, comedian Hriatpuia te thlahna thu a ziak bawk.
Comments
Post a Comment