PATHIAN RAM THILPEK

  (Sawiremtlang editorial & Logor article)

Ringtu te'na tih makmawh a kan ngaih, Pathian Ram thilpek, sawma pakhat kan tih bawk hi tunlai chu sawi a tam hle mai. Naktuk Pathianni lo thleng tur khi kan lakkhawm hun a ni leh dawn a, thahnemngai taka pe leh theuh turin in buatsaih ang u. 

Sawma pakhat pek chungchang hi Malakia chuan a sawi na hle mai a, kan pelo a nih chuan Pathian ta kan ruk sak ang hialin a sawi a ni. Malakia vek hian ei tur kan neih theih nan pek a tul thu sawiin kan pek erawh chuan malsawmna kan dawn tur thu a sawi thung a ni. (Mal 3:8-10) Malakia hi thuthlung hlui hun laia zawlnei a ni a, chuvangin, a thusawi hi thuthlung hun ami te hnena sawi a ni a, thuthlung thar mite tan tih ve kher ngailo ang dawn dawna sawi a awm fo. Amaherawhchu, kan tih ve ngei ngai a ni tih hriat thar a tul khawp mai. Kan pek dan tur chungchangah tirhkoh Paula chuan 'Mi tinin ui chunga pe lovin pek loh theih loh anga ngaia pe hek lovin thinlunga an tum ang zelin pe theuh rawh se, Pathian chuan hlim taka petu a ni a hmangaih ni’. (2Korinth 9:7) a ti a, hei vang tak pawh hian Pathian ram thawhlawm hi kan pe ngei tur niin a lang.

Malakia hian eitur kan neih theih nan leh malsawmna kan dawn theih nana pe turin ringtute min sawm a ni a, pek hrim hrim hi a that rualin beisei neih vanga pek erawh a dik zanlo deuh maithei e. Paula thusawi, ui chung a pekloh tur a nih thu leh lohtheihloh a ngaihloh tur thu pawh hi sawi zui tur tam tak a awm thei ang.

Kan aia mi chhe zawk te thil engpawh kan pe a, kan paih dawn tho leh kan mamawh vak tawhloh thil kan pek ai chuan kan la mamawh leh kan la ui em em te kan pek chu anmahni-ah a dawnsawn dan a dang ngei in a rinawm. 

Pek lohtheihloh chungchang pawh hi Bible in pek tur a tih miau avangin kan pe tur ni maiah ka ngai. 

A pek dan chungchangah pawh hian ngaihdan hrang hrang a tam thei in a rinawm. Thenkhat chuan damlo leh mi harsa te hnenah an pe a, a tha reng mai. A aia tha a awm chuang kher awm lo e. Mahse, mi harsa te kan pekin pek reng a harsa maithei. 'Tuntum chu kan harsa deuh em mai, pe rihlo mai ang' tih pawh hi a ri zing fu thei tlat. Kohhran a kan chhun miauloh chuan kohhran mipui ten kan pelo tih hre dawn heklo. Mihring hi mahni takngial pawh kan inhre chiang silo a. Chubakah, sawma pakhat tling lo deuh pek pawh thil awl tak a ni thei ang.

Kohhran mi kan nih chuan Bible sawi angin sawma pakhat chu kohhranah chhung lut phawt mai ila, tanpui ngai dang kan hria a nih tak leh a dang pakua atang khan pek mai a fuh in a rinawm. Chubakah, kohhran a kan pek hian keimahni-ah kohhran hmangaihna pawh a lian zawk in a rinawm.

Ka lawm e.