1st. Tuesday : All India Radio, Aizâwl senior announcer (Retired), Pi Lalhmerliani Fânai chu Greenwood Hospital, Aizâwlah a boral.
2nd. Wednesday : Excise & Narcotics Department chuan Champhai district-a Chhûngte khaw bulah heroin gram 71.7 leh a neitua puh, Lalhriatzuali (23), Champhai Tlângsâm nia inchhâl chu an man.
3rd. Thursday : BJP Mizoram State President thar, Dr K Beichhua MLA chuan Governor, General (Retd) VK Singh chu a chenna in, Raj Bhawan Aizawl-ah a hmu a, State pachhia leh hnufual tak a nih avangin Mizoram in kawng hrang hranga hmasawnna a neih theih na tur a hmalakpui tur leh tandun pui turin a sawm.
4th. Friday : Excise and Narcotics Department leh Assam Rifles-te ṭang kawp chuan New Dâwn leh Hnahthial inkârah heroin gram 109.08-a rit, chêng nuai 81.81 hûa chhût chu F Lallianzuali (40), Malsâwmtluanga (33), Lalhmunsiami (43) leh Lalmuansânga (25)-te kut aṭangin an man.
5th. Saturday :
Archaelogical Survey of India Director, (Monument) AMV Subramanyam chuan Lianpui khuaa pipu sûlhnûte tlawhin, ram chhûng hmun pawimawha puan a nih theihna tûra hma lâk ngai te a enfiah.
6th. Sunday : Larsap, General VK Singh chu English Congregation Church, Mission Vengah a inkhawm a, Mizo thalaite chu ruihhlo leh a kaihhnawih reng rengah inthiar fihlim a, an hma hun atana hma thlir tha tak nei turin a chah.
7th. Monday : Governor, Gen. VK Singh chuan Chakma Autonmous District Council-ah (CADC) sorkar a kal mumal theih loh avangin thla ruk chhung atan Governor Rule-ah a puang. 11th CADC hi March, 2023 a thlan a ni a, dan pangngai ang chuan kum 2028-ah an term tawp tur a ni.
8th. Tuesday : Zaithiam hriat hlawh tak, Rebecca Lallawmsangi leh rapper & singer, Nicky Lalchhankima (Lil Kiki) te chu Bualpui Presbyterian kohhranah an innei.
9th. Wednesday : Mizo film star hmasa, a hunlai a Mizo film lar tâk tâk 'Hling zinga rose par, A Tlai Zo Ta, Luiral Rammawia ah te lo chang tawh, Vanlalruata Chhangte (Maruata) kum 48, chu BN Hospital, Kulikawnah stroke avangin a boral.
10th. Thursday : Laldawngliana Rawite, kum 68 h/o Duhchhungi, Sihphir chu 'Zunthlum' natna avangin Trinity Hospital-ah a boral.
11th. Friday : Mizoram Baptist Kohhran pastor neih tawha kan chhuanvâwr ber te zinga mi, hlaphuah thiam lar, Rev Dr. H Killuaia chu Trinity Hospital Aizawl-ah awmlaiin a boral.
12th. Saturday : Central Jail, Aizâwl aṭangin Lianhmingthanga (36), Thingsulthliah leh Malsâwmdawnga (28), Fârkâwn-te chu inchung rangva ti chhia in an tlân chhuak. Lianhmungthanga hi POCSO Act case nei a ni a, Malsawmdawnga hi ND&PS Act case nei a ni thung.
13th. Sunday :
Miss Grand India 2025 Finale chu Zee Studion, Jaipur, Rajasthan-ah neih a ni a, Mizo nula, Vanlalnuntluangi, Ṭhuampui Veng, Aizawl chu 1st runner up a ni. Mizoram aiawhtu, Vanlalnuntluangi hian Best Swimsuit leh Miss Social Media Queen lawmman a dawng bawk a ni.
14th. Monday: Chief Minister, Pu Lalduhoma chuan Prime Minister, Pu Narendra Modi chu a chenna in, Delhi-ah a hmu a, Thenzawl Peace City Project chungchang te , Aizawl to Thenzawl kawngpui National Highway a siam chungchang te, Handholding Policy hmalakna chungchang te an sawi.
15th. Tuesday : Aizâwl Electric Vêng home stay-a awm, Saizâmpuia (29), s/o H. Lianzual Khawkawn P/A Khatla, Aizawl chu Electric Vêng leh Chhînga Vêng inrîna kawrah thia hmuh a ni. A awmna, home stay atanga tla nia rin a ni.
16th. Wednesday : Vânlalhnûna (51), h/o Lalremmawii (L) Bâwngkâwn chu Felix Lalthansânga (25), Vaivakâwn, Aizâwl kut a thlak avangin a boral.
17th. Thursday :
Secretariat Conference Hall-II, MINECO-ah Pu Lalnunhlua, Additional Secretary, Social Welfare, Women and Child Development Department kaihhruainain State Level Social Justice Assembly neih a ni. He assembly-ah hian Social Welfare, Women & Child Development Department Director, Pi Lalhriatzuali, IAS bakah Department pahnih officials te, NGOs leh Home hrang hrang enkawltute an tel.
18th. Friday :
Chawngte Area Anti Drugs Squad-te chuan May ni 3, 2025 aṭanga July ni 18, 2025 chhûnga an ruihhlo man, no. 4 chêng 4,92,000/- hûa chhût leh ganja chêng 2,06,000/- hûa chhût chu an hâl ral.
19th. Saturday : Tipa (Tuipâng) aṭanga Kâwlchâw pana kal tripper (909) pakhat chu missionary, Violet-i gate an siamna bul kawng thlangah tlan liamin, lîrtheia chuang–Subita Lalkhawngaihsângi (30) leh L Siabei (29), Tipa ‘V’ - III-te a hmunah an boral.
20th. Sunday : Parliament Monsoon Session 2025 inbuatsaihna atan All Parliamentary Floor Leaders Meeting neih a ni a, thusawina hun pek a nih angin MP, Pu K. Vanlalvena chuan Mizoramin airport kan neih chhun Lengpui Airport leh Delhi inkar thlawhtheihna chuan man to lutuk chungchang a sawi. Hei hiam MP dang te beng a verh hle.
21st. Monday : Dampa bialtu MLA, Pu Lalrintluanga Sailo (65) h/o Lalbiakthuami, Luangmual chu MAX Super Speciality Hospital, Delhi-ah rannung seh avangin a thi.
22nd. Tuesday : Wai Wai noodles siamtu, CG Foods (India) Private Limited te chuan Aizawl Press Club-ah chanchinbu mite an kawm a, an thil zawrh ngai hlutu Mizo mipui te chungah lawmthu an sawi a, Mizorama plant din chungchang te pawh an rilru-ah a awm thu an sawi.
23rd. Wednesday : Chaltlang Lily Veng, Sairang road tipper dinna bul khâm awihlai takah Tv Lalruattluanga (21) s/o Vanlalpianga, Vaikhawtlang, Bawngkawn South a khawsa mek chu a tlahlum.
24th. Thursday : Chawhma dâr 10 vêlah T Lalliannghâka (41), Khawlailung khua chu airtel tower-ah wifi connection signal an buaipui laiin, electric current man vângin a thi a; chawhnu dâr 3:30 vêlah Sêrchhîp Bazar Vêngah electric wiring hna thawk, Lalhruailiana (48), New Serchhip North chu electric current-in a man avangin a boral bawk.
25th. Friday : Thekte bul, Ṭiau luiah ruang chhe tawh tak mai (lu bung) hmuh a ni a; hemi rual tho hian hmun hran daihah lu bung hmuh a ni bawk. Mihran nia hriat a nih avângin a hran ve ve a phûm a ni.
26th. Saturday : Kum 1999-a Kargil War-a India-in hnehna a chan hriat rengna leh chumi indonaa sipai huaisen nunna chân tate hriat rengna ‘Kargil Vijay Diwas’ pualin BJP Mizoram chuan an office, Mipui Rûn-ah hun an hmang.
27th. Sunday : Lalchhuanawma (38), Mission Vengthlang chu a nupui, Lalremruati chuan a muthilh laiin a nghawngah hruia vetin a that.
28th. Monday : Chaltlang Lily Vêng, Sairang road-ah mipa, tu tih hriatloh ruang chhar a ni.
29th. Tuesday : ZPM thupuangtu, K Laltluangkima chuan Aizawl press club-ah thuthar thehdarhtute kawmin CM car thar chungchang a sawi a, CM car thar chu state khat CM chuanna atan chuan car pangngai mai a nih thu leh mi ramah chuan mi satliah car, hmeichhe khalh tawka ngaih, naupang football khel tur hruaina tawk a nih thu a sawi.
30th. Wednesday : Lalriliani w/o Lal Thanhawla, Ex CM chu Ebenezer Medical Center-ah admit a ni.
31st. Thursday : Mizoram Cooperative Apex Bank din champha vawi 44-na a ni a, he mi pual hian Aizawlah man awm loin City bus 20 service tir an ni.
Comments
Post a Comment