(Sawiremtlang report)
Pathianni kal ta khan Pu Lalrammawia, kum 65 h/o Laltlanmawii, Dinthar Veng chu amah zawnga ramchhuak khawtual tlangval te chuan thi in an hmu.
Pu Rammawia hi ramvachal tak niin, tunkar Ningani khan sa chan paha thangtung kheh tur zawngin a ramchhuaka, hemi tum hian Sarepkawn zau lam a pan tih hriat a ni. Hemi zan hian a haw mai lo na a, hun dangah pawh thlam remchang a awm chuan riah nghal mai chang a neih fo avangin a chhungte pawhin ngaihthat lohna an nei lemlo. A ni hi Sunday school inkhawm ngaipawimawh mi tak a nih avangin hetianga a ramchhuak a riah chang pawh hian Inrinni-ah a haw leh mai thin. Kumin pawh hian a la kaikim hial niin an sawi.
Hetiang mi a nih avang hian Inrinni-ah a lo haw mai turah a chhungte hian an ngai. Amaherawhchu, Inrinni-ah pawh a haw mai taklohah chuan chhung leh khat, thenrual tha ten chin ngaihven tha a hria in Pathianni zingkar khan mi thenkhat an huan daklalui leh a chheh vel dapin an chhuaka, an hmuh mai loh avangin tukthuan enkhamah mi thenkhat an chhuak ve leh. Fehrehsan a pelh rawk thleng pawha hmuh a nih tak mai lohah chuan amah zawnga ramchhuak te chu an beidawng ti tih ta. Khawtlang pun mai tha a hria in chawhma inkhawm ban chuan tlangau in min rawn auchhuak ta hlawm a nih kha. A hria apiang tlan nghal zelin, twin market-ah innghahkhawm a ni a, val upa ten chin lo sawiin an tlanliam nghal zel. Daklalui a a nuphal (Zoramliana) te thlamah tlangval te dawngsawngin thenkhat an lo awm a, chambang thenkhat awm bawk mah se a tam zawk an tlanliam nghal thung. Bangla mual atang chuan val upa ten a hlawp hlawpa insiamin 'nangni chulai hmunah' tiin a chipchiar thei ang ber dap turin tlangval ho an ngen. Hetianga mahni pan tur lam hawia tlangval te an in singsak mek lai hian kan beisei ber, Pu Rammawia chu hmuh a nih thu hriat a ni ta. Eng anga hmuh nge a nih chu mitin hriat chak a ni. Dama hmuh a nih kan beisei vek laiin a thih tawh thu in min deng zui.
An hmuhna hmun hi Sarepkawn piah, Khiangzawl tlang hnuai a, Pu Thangliana, Tlangveng te ram chhung a ni a, helai hmunah erawh hi chuan thlai an dah lo thung. An thlai hmun atang hian minute nga kal bak a ni awmlo e.
Chan insema hmun hrang hrang zawng tura insem zinga helai hmuna kal, a nuphal pakhat, F. Lalhmingliana te chuan kawngdunga thangtung lak sa lo awm leh zeuh thin an hmuh chuan a ni, thangtung kheh tur zawnga kal a nih thu an hre sa bawk nen, beiseina pawh an neih san phah hle. Tichuan, an beisei ber pu Rammawia chu fel taka lo thu mu in an hmu ta. Amaherawhchu, chhan tlak a lo awm tawhlo tlat mai. A lo awmna hmun hi hmun rem lai a nih avangin ral atanga 'a lum palh a niang' tih pawh chu a lum vanga hetiang a awm hi niin an hrelo a, chik taka a taksa te chu en velin hliam a neih awm hriat a nihloh bawk avangin a chauh tawngkhawng avanga thil thleng nia ngaih a ni. A thih hun thuah a taksa chhiat dan atangin a chhuah ni, Ningani hian a thih nghal a rinawm bawk.
Rang taka khaw lam leh ramchhuak dang te an hriattir hnu in a ruang te chu theih ang anga ti faiin tlangval tlawmngai ten an rawn zawn chho ta a, vantlang quarry panna kawng zawn chhuah a nih hnu in kuanga dah a ni a, amah hi a lo chhiat deuh tawh bawk si avangin in lamah pawh kuang hawn theihloh tura buatsaihin kuang nen chuan Sarepkawn thlenga zawn chhoh a nih leh hnu-ah motor hmanga phurh hawn a ni ta a ni.
Tarlan tak angin a lo chhiat hman deuh tawh avang hian hemi ni la la hian zan dar riatah bialtu pastor, Rev H. Lalzuiliana chuan YMA hall-ah a vuiliam ta a ni.
Pu Rammawia hi hi pa inngaitlawm leh tawng tamlo tak a ni a, naupang chhawnchhaih nuam ti mi tak niin naupang te ngainat pawh a hlawh hle. Hetianga mi a liam ta mai hi a lainatawm takzet a ni. Pu Rammawia hian a nupui Laltlanmawii bakah a fate pathum leh a tu panga a kalsan.
Lusun chhungte Pathianin awmpui rawh se.
Comments
Post a Comment