1st. Sunday : Tunlaia ruahsur nasa avanga chhiatna tam tak a thlen avangin Mizoramah thil thleng ngai lo tak a thlengin kohhran eng emaw zatin Pathiannia inkhawm hrang hrang chu an thulh.
2nd. Monday : Disaster Management & Rehabilitation Minister, Prof. Lalnilawma leh Horticulture Minister, Pu C. Lalsawivunga ten tunhnaia ruahsur nasat vanga Aizawl khawpui chhunga lei chet nasat deuhna hmun hrang hrang an tlawh.
3rd. Tuesday : Chief Minister, Lalduhoma chuan Mizoram tlawha lo zin mek, Ajay Tamta, Union Minister of State for Road Transport & Highways chu a kawm a, Silchar - Aizawl 4 lane laih mekah Kawnpui leh Sairang inkar hnathawhna tur sum pe chhuak rang turin a lo ngen.
4th. Wednesday : Northeast Frontier Railway hnuaia Sairang rel station leh Hortoki inkar rel kawng enchhinna 'Speed Trial' chu neih a ni. He speed trial an neih ah hian rel hi vawithum tlan chhin tir a ni a, a hmasa berah hian 50 km/h a chaka tlan tir phawt niin, a vawihnihna ah hian 75 km/h a chakin tlan tir leh a ni a, a hnuhnung berah hian km 110/h a chakin tlan tir a ni.
5th. Thursday : Sairang Dinthar Community Hall-ah Prof. Lalnilawma, Hon’ble Minister, Disaster Management & Rehabilitation Department chuan, tui lian avanga chhiatna thleng thina nunna thapa chhanchhuah hna thawk thin tu, Sairang mite hman turin
Chhanchhuahna Lawng (Inflatable Rescue Boat leh Outboard Motor) chu Sairang Village Disaster Manangement Committee leh Sairang Dinthar Village Disaster Manangement Committee te hnenah a hlan.
6th. Friday : Serchhip District Planning Committee te chu Serchhip DC, Pu Paul L Khuma hoin DC Meeting Hall-ah an thukhawm.
Meeting-ah hian line department hrang hrang te an tel a. District Adminstration-in heng department tinte hi project thehlut tura a lo hriattir tawh angin chung an thehluh te chu bawhzuiin agenda atan chhawpchhuah a ni.
7th. Saturday : Muslim Ni pawimawh Id-Ul Zuha a ni a, hemi puala tawngtai rualna Aizawl West -II Joint YMA Field-a neihah mi 2,500 vêl an pungkhawm.
8th. Sunday : Kristian-te ni pawimawh “Pentecost Sunday/Thlarau Thianghlim Thlen Ni” a ni a; Mizorama kohhran hrang hrangte’n urhsûn takin an hmang.
9th. Monday : Bîlkhawthlîrah Excise & Narcotics Department, Kolasib chuan heroin gram 33, Akbar Hussain Lashkar (35) Silchar leh a nupui anga a kawl Ramtharmâwii (30), Saipûm Field Vêngte kut aṭangin an man.
10th. Tuesday : Bairabi leh Sairâng inkâr rel kawng phah zawh tak chu a him tâwk tih puan a ni a; ni ruk chhûng Bairabi leh Sairâng inkâr rêl kawng en dik hna (tlan chhintîrna) an neih chu zawh fel a ni.
11th. Wednesday : Green Mizoram Day pualin Mizoram hmun hrang hrangah thing ṭiak phun a ni.
12th. Thursday : Directorate of Information & Public Relations chuan Mizorama YouTuber-te pualin social media-a thu thar thehdarh leh an thil chhuah chungchanga fimkhurna tur leh a kaihhnawih awm theite zir hona, ‘Media Sensitization for YouTubers’ chu Lianchhiari Run, I&PR Conference Hall-ah a buatsaih.
He hunah hian Prof. Irene Lalruatkimi, HoD, Department of Mass Communication, Mizoram University chu resource person niin social media pawimawhzia a lem nena entirin tunlai khawvela YouTuber-te pawimawhzia a sawi a, YouTuber-te chu khawtlang siam tha theitu, hnam nunzia leh Mizo tawng humhalhtu an nih theih bakah sawrkar khalh ngiltu an nih theih dan te, thu thar theh darh leh thil post chungchanga fimkhurna tur thil pawimawh hrang hrangte a sawi.
13th. Friday : District Special Branch (DSB), Sêrchhîp leh CID-te ṭang kawp chuan Sêrchhîpah Lalnunsiama (36), New Sêrchhîp Vêngthar kut aṭangin heroin hâwng 8 an man.
14th. Saturday : KTP General Conference a mak tak a lam thin, KTP general conference ti hlu tu an tih mai thin, Pu Ngokama (90) w/o Niangzaawii (L) Sesih khua chu a thi. Pu Ngokama hi kum 1978 Khawzawl conference kha a kal hmasak ber niin kum 2020 Serchhipa conference thleng khan vawi 27 zet conference -ah a kal a ni.
15th. Sunday : Pu Lalrammawia, kum 65 h/o Laltlanmawii, Sihphir, Ningani a a ramchhuak a hawn mai loh avanga khawtlang anga zawn chu Sihphir ram chhung, Sarepkawn zau-ah thi a hmuh a ni.
16th. Monday : Chakma Autonomous District Council-a Pu Molin Kumar Chakma, CEM kaihhruai BJP sawrkâr chu rin tâwk lohna motion hmangin paih thlâk a ni.
17th. Tuesday : Champhai police-te chuan Champhai Police Checkgate, Chalbawia Junction-ah Pahlîra, Bûkvânnei nia insawi khalh aṭangin heroin kilogram 1.124 leh Lalramngaia, Champhai Dinthar Vêng Champhai nia insawi khalh aṭangin heroin gram 98-a rit an man
18th. Wednesday : Joint YMA, Bîlkhawthlîr leh Bîlkhawthlîr police-te ṭang kawp chuan North Chhimluang leh Bîlkhawthlîr inkârah Assam registration auto rickshaw aṭangin heroin bagha cap 560 vêl an man a; auto rickshaw driver-te hian auto rickshaw hi kalsanin, an tlân bo.
19th. Thursday : Sihphir VC leh NGO hrang hrang te tangkawp chuan vai motor, TATA Intra AS 11EC 0679 atangin zu tam tham tak an man a, driver hi a tlanbo hman. Zu an man te hi Rs 4,99,500/- man hu vel a chhut a ni a. Heng zu an man te hi leih buak nghal vek a ni.
20th. Friday : Excise & Narcotics Department-te chuan Khawzawl Road, Tuipuiah heroin gram 418.400 (hâwng 43) leh a neitu, Rebecca Nianglunchingi (28), Champhai Vêngthara khawsa nia inchhâl chu an man.
21st. Saturday : India hmun dang rualin Mizoramah pawh International Yoga Day hman a ni.
22nd. Sunday : Tuipâng leh Zâwngling inkâr kawngah KT Beirahu, Siaha hnên aṭangin sakei hâ pathum (chêng nuai 4.5 hûa chhût), silai zên gram 150 leh 07 shotgun mu an man.
23rd. Monday : Central YMA Executive Committee chu an pisa-ah neih a ni a, heta an thurel zingah hian kumina YMA Inkhawmpui lian neih chungchang chu a tel. Inkhawmpui hi a vawi 75-na tur a ni a, October ni 21-23 chhunga neih tur niin, Sakawrdai-ah neih a ni ang.
24th. Tuesday : NHIDCL kawng laih avangin Ngopa Damdawi In tlang-ah nasa takin lei a min a, leimin hian In pahnih chu bungrua engmah chuh hman lohvin a hnawl tel.
25th. Wednesday : National Academy of Television Arts & Sciences (NATAS) bultuma neih, News & Documentary Emmy Awards chu Times Square, New York (USA)-ah sem chhuah a ni a, chawimawi na hi Akashvani Aizawl News Editor pahnih, Pu HC Vânlalruata leh Pu Isaac Zoramsânga-te’n an dawng ve.
26th. Thursday : Mizoram University hnuaia Under Graduate exam result tih chhuah a ni a, zirlai exam zînga za zêlah 75.75 an pass. ,
27th. Friday : Champhai Police-te chuan Chalbawiha Juction, Khankâwn Police Checkgate paltlang lîrthei pakhat chu ûm zuiin heroin gram 67; chêng nuai 2.01 hûa chhût chu lîrthei khalhtu Lalruatkima (35), Mamit Hmârvêng leh passenger–Jimmy Lalnunmâwia (42), Vênghlui, Aizâwl leh Thangzamuana (18), Champhai Zote nia inchhâlte hnên aṭangin an man.
28th. Saturday : Mizo hmeichhe zinga thisen pe hnem ber, Rebecca Saimawii chuan chuan a tum 87-na atan Civil Hospital, Aizawlah thisen a pe.
29th. Sunday : Hun rei tak Covid-19 in min tihbuai avanga Pathianni a bus service a mumal loh hnuah Aizawl City Bus te chu an service leh tan.
30th. Monday : Indian Air Force a thawk mek, Squadron Leader, Lalrinchhana Zote, Bethlehem veng, chu Squadron Leader atang Wing Commander-ah a kàisàng. Amah hi Fighter Controller branch officer ni in an hna ber chu Air operations (Defensive leh Offensive) ni in, Air Defence Radar leh Air Defence weapon hran hran hmanga India ram boruak venhim leh ràl beih a ni.
Comments
Post a Comment