1st. Friday : Synod Conference Centre, Aizâwlah Mizo zepui nunpuitu hnêna pêk ṭhin “Rokunga Award - 2024” chu Pu C Thangmâwia, Sihfa hnênah hlan a ni. He award hian award trophy, tangkapui (medal), thuchei (citation) leh chêng sîng nga (50,000/-) a keng tel.
2nd. Saturday : Roman Catholic Kohhran tân khawvêl pum huap “All Souls’ Day” a ni a, he nî hi Mizoramah pawh Roman Catholic kohhrante’n urhsûn takin an hmang.
3rd. Sunday : Kolasib District Jail-a tang mek, R. Biakthansanga (52), Lungdai, chu Kolasib District Hospital chung zawlah thia hmuh a ni a, a inawkhlum nia hriat a ni. R Biakthansanga hi POCSO Act vanga jail tang a ni a, pum lam fel loh avangin Kolasib District Hospital-ah admit a ni. Amah vengtu hnenah inthiar a dil a, a let har deuh avang an ngaihven nak chuan hetiang hian an hmu ta mai a ni.
4th. Monday : Mizoram Football Association chuan Mizoram Premier League Season 11-ah khan match fixing a awm ngei tih a hria a, uluk takin CID te nen an chhui hnuah mi player 24, coaching staff mi 3 leh club pathum a hrem. Club pathum, Sihphir Venghlun FC, FC Bethlehem leh Ramhlun Athletic FC te chu kum 3 chhung atan hrem an ni a, football thila inhnamhnawih thei lo tura hrem an ni hlawm. Coaching staff zingah, Robert Laldinthara (Sihphir Vengthlun FC) chu kum 5 chhung atan hrem a ni a, Danny Lalduhawma (Ramhlun Athletic FC) chu kum 3 chhung atan hrem a ni a, Johny Ramthansanga (FC Bethlehem) chu kum 3 chhung atan hrem a ni bawk. Hremna na ber chu damchhunga football-a inhnamhnawih thei lo tura hremna a ni a, Chanmari FC player, Lalnunzama leh FC Bethlehem player L. Lotha te chu damchhung atan hrem an ni bawk.
5th. Tuesday :
Sinlung Hills Council (SHC) inthlanpui vawi hnihna neih a ni. SHC-ah hian voter 23,794 an awm a, mipa 11,875 leh hmeichhia 11,914 an ni.
6th. Wednesday :
Mizoram Agricultural Marketing Board chuan IPR Auditorium-ah 'Bána Kaih Sensitization cum Consultation Meeting on Thlai Thar Market' an buatsaih. He hunah hian chief minister, Lalduhoma chuan, thlai hralhah harsatna a awm loh nan sum an inrin reng tawh thu a sawi.
7th. Thursday : Governor, Dr. Hari Babu Kambhampati chuan Brahma Kumaris Mizoram kaltlanga ruihhlo do hmalakna kalpui tur 'Nasha Mukh Bharat Abhiyaan (NMBA)' chu Durbar Hall, Raj Bhavan-ah a hawng. Hemi puala inkhawm buatsaihah Mizoram Governor Dr. Hari Babu Kambhampati chuan Mizoram chu hmun ralmuang tak niin hmasawnna tehfung hrang hrangahte pawh titha thin viau thin mah ila, ruihhlo leh a kaihhnawih hrang hrangte'n thalai leh zirlaite nun thuk taka a luhchilh leh a chim buai chu pawi a tih thu a sawi.
8th. Friday : Assam Rifles leh Excise & Narcotics Department-te ṭang kawp chuan heroin gram 129.35, chêng nuai 90.54 hûa chhût chu Champhai Zote-ah Zolâwmsânga (24), Myanmar ni a inchhâl two wheeler taxi khalh aṭangin an man.
9th. Saturday : Excise & Narcotics Department leh Zemabâwk East, Aizâwl Joint Action Committee (JAC) thawk dun chuan Zemabâwk East, Kanan Thar vêngah heroin kilogram 2.557 leh a neitu nia puh, Thangmuansein (30) leh Thangkhansawm (22), Myanmar-a khawsa ve ve nia inchhâlte chu an man.
10th. Sunday : B Lalramchhuana (Beirachhua) kum 40, New Colony Siaha, Zirtawpni aṭanga bo chu naupang infiam ten luikawr (culvert) ah thi in an hmu.
11th. Monday : Central YMA hruaitute'n Home Minister, Pu K Sapdanga chu a pisa-ah hmuin thil pawimawh hrang hrang an sawi pui.
12th. Tuesday :
Sateek bulah Ingnis car, Lunglei atanga Aizawl pan a chesual a, driver,
T Lalthazawnga (52), Zemabawk North, Aizawl leh Mumbai lam mi, hnamdang (vai) pakhat a hmunah an boral a ni. Car chesual hi rental motor a ni.
13th. Wednesday :
AH & Vety. Minister, Pu C.Lalsawivunga hovin sawrkar flagship programme 'Hand Holding Scheme' hnuaia AH & Vety. Department kaltlanga pilot phase hmalaknate sawi ho a ni. Pu C. Lalsawivunga chuan hand holding scheme tihlawhtling tura Vety. Department-in chak taka hma a la chu lawmawm a tih thu sawiin, thawktute chu a tul anga hma la chhunzawm zel turin a fuih a ni.
14th. Thursday :
Bihar a Asian Women's hockey Champions trophy khelh mekah India chuan Thailand chu 13-0 in an sawp. India team a inlan, Kolasib nula, Lalremsiami chu ram tan a game 150 chiah a ni. He inkhelah hian goal hnih a khung ve nghe nghe.
15th. Friday : Tuikhuahtlang Presbyterian Kohhran Hall-ah Presbyterian Pastor Pension Fellowship (PPPF) ten intawh khawm programme ṭum 55-na an hmang. Programme hi session hnihah ṭhenin, chawhma leh chawhnuah te hun hman a ni. PPPF-ah hian member 136 an awm mek a, intawh khawmah hian mi 104 (Mipa 59 leh Hmeichhia 45) an kal a ni.
Presbyterian Pastor Pension Fellowship-ah hian Pastor pension apiang an tel zel a. Kum tinin intawhkhawm hi an nei ṭhin a, infuih tharna leh inpawh tlanna hun hlimawm tak an hmang ṭhin a ni.
16th. Saturday : Vanglaini chanchinbu chuan Aijal Club-ah Zoram Titi vawi 11-na a buatsaih a, thupui chu, 'Raltlan - Engtia dawnsawn tur nge?' tih a ni. Zoram Titi hi Vanglaini joint editor K Zothanpara'n a kaihruai a; resource person Dr Zonunmawia, Pachhunga University College-a Political Science assistant professor-in zirchianna aṭanga Myanmar buaina avanga sahimna zawnga Mizorama rawn ráltlânte dinhmun a tarlang.
Titi-ah hian panelist mi 10 an awm a, anni bakah hian PUC, J Thankima College, Mizoram University leh ICFAI University aṭangin zirlai 10, MZP aiawhte leh mi pawimawh dangte an tel bawk.
17th. Sunday : Chief Information Commissioner, Central Information Commission, Heeralal Samariya chuan ni hnih châm turin Mizoram a rawn tlawh.
18th. Monday : Sinlung Hills Council-a member thlan tlinte chu Aizawl DC Pisapui-ah rinawmna thu tiamtîra lâk luh an ni.
19th. Tuesday : Ni 22 thleng awh tûr, Mizoram Florists Association leh Horticulture Department ṭang kawpa buatsaih “Winter Fair cum Flower Show” Aijal Club-a buatsaih chu hawn a ni.
20th. Wednesday : Asian Champions Trophy 2024, Bihar a khelh mekah India leh China in final an khel a, India hian 1-0 a hnehna changin, inkhelah hian Mizo nula Lalremsiami Hmar chu Best Player-a thlan a ni.
21st. Thursday : Union Ministry of Home Affairs chuan Pu Khilli Ram Meena, IAS chu Mizoram Chief Secretary atân ruat a nih thu a puang. Pu Khilli Ram Meena hi kum 1993 IAS Batch niin, AGMUT Cadre a ni.
22nd. Friday :
Ailawng Middle School chuan an kum 50-na, golden jubilee an lawm a, bialtu MLA Lalrintluanga Sailo-in a hmanpui. Bialtu MLA hian thu a sawi bakah, Ailawng M/S jubilee souvenir a tlangzarh a; sikul headmaster hmasa ber, K Zoliana'n thu a sawi bawk. Ailawng M/S hi kum 1974-ah din a ni a, zirlai naupang 44 leh thawktu 11 an awm mek a ni.
23rd. Saturday : Home Minister K Sapdanga chuan Champhai District Jail, Zokhawthar Police Station leh Land & Custom building sak tharte a tlawh.
24th. Sunday : Naktuk atanga tan tur, Parliament thlasik thutkhawm inbuatsaihna, All Parliamentary Leaders Meeting-ah Rajya Sabha, MP Pu K.Vanlalvena chuan thu sawiin Manipur buaina tihtawpna atan President's Rule a dah tul a tih thu a sawi chhuak. Pu Vena chuan Mizoram MP ni chunga Manipur chungchang a sawi leh thin chu member dangte hriatthiamna a ngen thu sawiin British lo luh hma atanga Mizo hnahthlak hnam hrang hrang te Manipura an chen tawh thu leh tunah pawh Mizo hnam peng hrang hrang nuaih ruk chuang lai Manipur a an chen mek avanga an harsatna te chu sawi chhuak thin a nih thu a sawi a. Nikum May thla atanga tun thlengin pawisawilo nunna tamtak a luan ral tawh thu leh Manipura Central sawrkar in direct-a hma a lak theih nan President's Rule a dah chu hna pawimawh hmasa nia a hriat thu a sawi bawk.
25th. Monday : Ni 2 chhung awh tur, Department of Political Science, Mizoram University leh ICWA, New Delhi te tangkawpin a buatsaih, National Seminar on “India’s Foreign Policy: Coping with the changing World” chu tan a ni. Seminar hawnna program hi I&PR Minister, Dr Vanlalhlana chuan khuallian niin a hmanpui.
26th. Tuesday : All Mizoram Village Council Association (AMVCA) chuan Dawrpui Multipurpose Hall-ah inkhawmpui an hmang. AMVCA hian VC term pawh tâwi a nih avangin Gauhati High Court, Aizawl Bench-ah Mizoram sorkar khin an rêl.
27th. Wednesday :
Chief Secretary thar tur, Pu Khilli Ram Meena chuan a hna rawn zawm ta.
28th. Thursday : CM, Lalduhoma hian Lungleia ZPM pisa-ah thu sawiin, nakkum 2025 February thla chawhnu lamah VC inthlan buatsaih tura ruahman mek a nih thu a sawi. Lalduhoma chuan, village council term chungchang chu sorkar thuneihna a nih thu leh VC term tihtawi vanga court-a sorkar khin tum an awm avangin buaina tur a awm loh thu a sawi bawk.
29th. Friday : Pu Laibuaia, kum 80, s/o 80 Kapdailova (L), Sihphir chu a chenna inah lungphuchawl in a boral. Amah hi Burma lam atanga lo tla thla niin a nupui nen an inthen hnu-ah mahni a khawsa zui ta a ni a, Sihphir khawtlang mai bakah Zo inspiration leh mi tlawmngai dang te lainat a hlawh hle.
30th. Saturday : Sihphir Pastor Bial KTP chuan Synod Hospital tan thisen unit 31 an pe. Sihphir kohhran chhungah hian kohhran pathumin awmin he hun hi Synod calender zulzuia tih a ni.
Comments
Post a Comment