*BIAKIN RAWK : January thla laihawl vel khan BCM Ramhlun North Biak In dar chu ruk bo a ni. Biak in sak ṭhat lai a nih avangin dar khaina tur mumal taka an siam hma a ni a, kohhran hall bul remchang laia an dah lai a ni.
Tin, February thla khan Zotlang Presbyterian Kohhran godown chu misual in an rawk bawk a, electric khawl pathum (Pakhat Rs.20,000/- chuang man) ruk bo a ni.
Mimal thil bo hi chu a la hriatthiam theih. Sakhaw biakin thil thlenga a bo ta fo mai hi chu a mak ngawt mai.
* THLAWHNA CHESUAL : January ni 23 khan Mizorama Burma sipai tangkhang pur tur thlawhtheihna Lengpui airport a rawn tum chu a runway-ah a chesual. Thlawhtheihna hi runway sira ruamah tlain mi chuang 14 zinga in 8 in hliam na vaklo an tuar. Thlawhtheihna hi passenger 100 vel phur thei chi a ni.
Kum 1998 a airport hawn a nih atang khan thlawhna a tumhnih chetsualna chiah a ni. Kum 2011 khan NE Shuttle, thlawhtheihna te chi chu runway-ah tlan tlangin khamah a tla tawh bawk a nih kha.
* RUHRO LAI CHHUAK : Changpui, Lunglei district a Ni za inhlawhna a thawk te chuan mihring lu ruhro ni ngei a hriat chu January thla khan an lai chhuak. He thil hi a lian hle niin an sawi.
Hetih lai hian July ni 29 khan Champhai District a Lungphunlian khaw daia kham puk chhungah mihring ruhro ni ngeia rin tam tak hmuh a ni bawk.
Ruhro te hi khabe ruh, ngal ruh, ha leh lu ruh te niin a lang a, hlumbel a vawn that ve thlap niin a lang. Hei hi bel keh darh tawhte an hmuh atangin a rin thiam theih a ni.
Tun hma lamah pawh helai hmunah hian ruhro them tlem azawng chu hmuh a ni tawh thin a, tun hmain (1912-1915) mihring an chen tawh thin avangin heng ho sulhnu hi nia rin a ni.
* rMIZO NAUPANG GUINESS WORLD RECORD-AH : Naupang kum 11 mi, Samuel Lalbiakhlua s/o
MS Dawngzuala, Saitual khua chu March ni 17 khan Bir Billing, Himachal Pradesh-ah parachute hmangin tluang takin a thlawk a. Heti hian P2 zir zovin paragliding pilot certificate a dawng.
Guiness World Record-a paragliding pilot naupang ber record awm mek hi kum 12 a ni a, Samuela hi kum 11 chauh a la nih avangin hetiang lama khawvela naupang ber a ni ta a, Guiness World Record-ah Mizo naupang a lang thei dawn niin a lang.
* TOP GRADE ARTIST THI : Pi Vanhlupuii, Mizo zinga All India Radio Top Grade Artist awmchhun chu kum 77 mi niin Marh ni 29 khan a thi.
Vanhlupuii hi kum 1950 vel aṭangin a zai ṭan a. Zaithiam avanga ram hrang hrang fang kual tawh, zai intihsiakah pawh lawmman pakhatna vawi tam lo la tawh a ni. Kum 1957 aṭangin Radio-ah hla a record ṭan a, kum 1969 ah Grade ‘A’ ah a kai chho a. Mizo zaithiam kan neih zingah All India Radio (AIR) Top Grade Artiste kan neih chhun a ni zui ta a ni.
* MP (LOK SABHA) INTHLAN : April ni 19 khan Parliamentary Constituency no. 1 - Mizorama Lok Sabha General Election 2024 chu Mizoram pumah buaina leh harsatna lian tham awm loin neih a ni. Inthlan ni hian vote 487103 tla in Postal ballot leh EPBS hmang in vote 4233 a tla bawk.
Tun ṭum inthlanah hian candidate paruk an awm a; chu'ngte chu - Vanlalhmuaka (BJP), Lalbiakzama (INC), K Vanlalvena (MNF), Richard Vanlalhmangaiha (ZPM), Rita Malsawmi (PC) leh Lalhriatrenga Chhangte (Independent)-te an ni.
Tichuan, ZPM candidate, Richard Vanlalhmangaiha chuan vote 206181 hmu in MNF candidate, K. Vanlalvena chu vote 66,852 laiin a khum a ni.
* MISS MIZORAM : Zonet buatsaih in, Miss Mizoram chu thlan a ni leh ta. Miss Mizoram 2024 thlang tur hian kum hmasa lama lo tih tawh angin, district tinah District MJA-te kaltlangin thlan phawt a ni a, district-a Miss atana thlan chu an district aiawhin Miss Mizoram thlanna-ah an tel a, Aizawla Open Audition buatsaihah an tel a ngai tawh lo a ni.
April 26, 2024 zan khan Saizahawla Arcade-a City Sky Hall-ah Miss Mizoram 2024 Grand Finale hi neih a ni a, Contestant 18 atangin Top 10 thlan chhuahte zawhna zawh niin, heta tang hian Top 5 thlan chhuah leh an ni.
Top 5-te hian zawhna inang vek chhangin, an zing atang hian Miss Mizoram 2024 atan Jennifer Lalrınzuali Renthler chu thlan a ni ta a ni. Miss Mizoram 2024 atana thlan hian lawmman ah Rs 2,00,000/- bakah Vespa Scooter a dawng a ni.
* PADMA SHREE DAWNG : India rama civil mite chawimawina sang, Padma Shree award chu TNT dintu, Sangthankima hnenah President, Draupadi Murmu-i chuan Delhi-a Rashtrapati Bhavan-ah May ni 9 khan a hlan.
Pu Sangthankima hian Thutak Nunpuitu Team (TNT) hi kum 1988, November ni 14 khan Champhai khuaah dinin ngawlvei, fahrahte leh mi â ten enkawlna tha an dawn theih nan theihtawpin hma a la thin a, kum 30 chhung zet awmna tur nei lo leh ngawl vei te tan hma lo la tawhin Mizoram mai bakah North east hmun hrang hrangah leh Myanmar-ah pawh TNT hi a din a ni.
* UIIN THISEN PE : Ui, Browny tia koh hi Dr. Vanlalsawma, Kulikawn West vulh lai niin kum 12 vela upa a ni a, tilmu cancer natna vei a ni.
June ni 14, Blood Doners Day pual khan Ramhlun South a ui pakhat, a hming Rio, kum hnih a upa chuan a thisen mamawh tawk chu The Pet Division, Kulikawn-ah a pe.
Ui hian blood group 13 vel an nei anga sawi a ni a, chutihrualin, International standard-ah chuan Blood Group pariat pawm a ni thung. Hei vang hian a in mil hmuh mai pawh thil har tak a ni. Amaherawhchu, Rio leh Browny te thisen hi test a nih hnu-ah a lo inmil hlauh a, an inpe thei ta a ni.
* CYCLONE REMAL : May thla tawp lama Cyclone Remal avanga thli leh ruah thawk avangin Mizoram hmun hrang hrangah chhiatna a thleng nasa hle. Mi 34 velin nunna chan in ruang hmuh loh pawh a awm hial a ni.
Melthum leh Hlimen inkar tlang chim chuan helai bawra cheng Mizo in pathum leh quarry-a thawk hnamdang te chenna in a hnawl chhe vek a, mi 18 laiin nunna an chan a ni. Cyclone Remal avanga nunna chan hnem ber khua an niin a lang.
* MIZAWN INCHUH? : May ni 29 khan Hlimen mi pakhat chu ZMC, Falkawn-ah a boral a. Zoram hmun hrang hrangah ruahsur nasa avangin leimin a awm lai a ni. Falkawn (ZMC) panna kawngah pawh leimin a awm nual a, chumi avang chuan lirthei tlan tlang theih a ni lo a ni.
Tichuan, Falkawn aṭang hian Motor-in a theih chin chin kalpui a ni a. Motor kal theih chin aṭang hian Melriat Branch YMA te chuan lo la chhawng ve lehin, an ni hian Hualngo Branch YMA te kutah an hlawn chhawng ve leh a. Tichuan, Hualngo khua te hian Hlimen ṭhalai te kutah an hlan ta a ni.
A ni chauh lo pawh hetianga ruang zawn hi an awm nual a, tunhma Zonun ze mawi tak kha min hriat chhuah tir nasa hle.
* MIZO IN FOOTBALL THIAM BER : July 19, Zirtawpni khan New Delhi-ah infiamna khawvel aṭanga icon tam tak telna, AIFF Award Night ropui takah Lallianzuala Chhangte chu a vawihnihna atan
Football Players' Association of India (FPAI) in a buatsaih, Indian Football Award-ah India player tha ber 'Indian player of the year' atan thlan a ni.
LZa hian session liamta (2023-'24) khan Indian Super League Cup chu a club, Mumbai City FC chu chawipuiin goal 11 a khung a, goal 7 a siamsak bawk. ISL-a Indian player goal khung hnem ber a ni. June thla khan FIFA World Cup Qualifiers-ah Doha-ah Qatar lakah goal a lo khung ve tawh bawk.
LZ-a chauh hi Mizo player FPAI chawimawina dawng a ni lova, Odhisa FC winger, Isak Vanlalruatfela chu Young Player of The year atan thlan a ni bawk.
* INAWKHLUM LAI THLA LA : October ni 11 khan Emmanuel Lalthutaka (30), Chikhur, Hmarkhawlian, Cachar district. Zemabawk Dinthar venga min luaha awm mek chu inchhungah inawkhluma hmuh a ni. A ni hi inawkhlum dang ang lo takin a inawhhlum lai leh a hma lam tlem a fon video in a lo la a, heta tang hian a inawhhlum chhan niawm chu a hriatthiam theih.
A ni hian kum 2022 atang khan tuna a in luah lai hi a luah tan a, motor khalh a eizawng niin a nupui, kum sawm vel a neih tawh nen an inthen lai a ni. Fa an nei lo.
Video hmutu te sawi danin a inawhhlum chhan hi rilru hah vang niin a lang a, a chhungte hnenah thuchah pawh a sawi nghe nghe nia sawi a ni.
* MINISTER DANG : October ni 17, 2024-ah Minister (i/c Power & Electricity etc.) F. Rodingliana leh a hote chu Zemabawk thlangah Assam Rifles sipaite'n an lo tiding a, hun eng emaw chen an inhnial buai. Chief minister a inrawlh hnu-ah an chhuak thei hram a ni.
Minister hi a hmain AR sipaite'n Kawlbemah an lo tiding tawh a, Ngopa dai-ah pawh tihdin leh an tum a, mahse, ding duh loin an tlân tlanga sawi a ni bawk.
Hetianga state sorkara hotu sang tak mai AR mi leh sa, officer tenau tak ho a an lo tiding hi a mak angreng khawp mai a, thil thleng àwm lo taka ngaih theih a ni. Minister hi Mizorama AR hotu lu ber nen pawh order of precedence-ah an la insan hleih viau a; eng emaw avanga minister leh a team-te lirthei enfiah ngei a tul a nih pawhin, officer sang tak hoin minister zah tak chungin leh hawihháwm takin enfiah an dil tur zawk ni awm tak a ni.
* COUNCIL MEETING LUNGLEI-AH : July ni 2 khan Council of Minister Meeting chu Lunglei-ah neih a ni. Hei hi Aizawl pawna Council of Minister Meeting neih hmasak ber na a ni nghe nghe. Hei hi inthlan dawna ZPM Manifesto zinga tel a ni nghe nghe a, party hruaitu te chuan Council of Minister Meeting hi district dangah pawh neih zel an tum thu an sawi nghe nghe.
He hunah hian agenda 14 chu sawi ho a ni a, paruk pass a ni. Aizawl atangin official hi Chief Minister atanga peon thlengin mi 134 an ni.
Aizawl pawna meeting hi a tul em tih hriatthiam a har hle mai. A thlirtu a zirin a danglam thei ang chu. Hautak leh hmundanga tih hi tullo ti an tam hle in a lang a, a dawngtu district tan erawh a lawmawm viau thei tho maithei e.
* DEPARTMENT CHHUN FIN : Taxation Department chu Mizoram sawrkar hnuaia Department atanga paih in Department hrang anga awm tawhlo in Finance Department hnuai-a awm tawh tura tih a nih thu governor chuan September thla khan a puang.
Tin, December thlaa Cabinet Room-a Cabinet Meeting chuan
Information & Public Relations Department leh Printing & Stationery hi chhun fin ni se, a hming atan Information, Public Relations, Printing & Stationery (IPR&PS) tih a ni dawn tih sorkar thuchhuah chuan tarlangin Local Administration Department (LAD) pawh Rural Development (RD) nen kaihkawp a ni dawn a, Tribal Affairs leh Art & Culture Department chu chhunfin tur a ni bawk tih an tarlang bawk.
* GOVERNOR CHUNGCHANG : Larsap Dr. Hari Babu Kambhampati chu chuap lam fellohna avangin Hyderabad damdawi inah September ni 9 khan dahluh a ni. Damdawi inah hian chawlhkar khat vel awmin a theih loh chhung hian Tripura larsap, Indra Sena Reddy Nallu chuan min rawn hmui.
Hetih lai hian Odisha Governor chu a van thut avangin Mizoram governor, Dr. Hari Babu term a lo tawp ve dawnchiah bawk nen, Odisha Governor atan hian ruat zui a ni a, union minister hlui, General (Dr.) VK Singh, PVSM, AVSM, YSM, (rtd) chu kan Governor thar a ni thung ang. A ni hi January ni 9-ah lakluh tura ruahman a ni.
* INAWKHLUM LAI THLA LA : October ni 11 khan Emmanuel Lalthutaka (30), Chikhur, Hmarkhawlian, Cachar district. Zemabawk Dinthar venga min luaha awm mek chu inawkhluma hmuh a ni. A ni hi inawkhlum dang ang lo takin a inawhhlum lai leh a hma lam tlem a fon video in a lo la a, heta tang hian a inawhhlum chhan niawm chu a hriatthiam theih.
A ni hian kum 2022 atang khan tuna a in luah lai hi a luah tan a, motor khalh a eizawng niin a nupui, kum sawm vel a neih tawh nen an inthen lai a ni. Fa an nei lo.
Video hmutu te sawi danin a inawhhlum chhan hi rilru hah vang niin a lang a, a chhungte hnenah thuchah pawh a sawi nghe nghe nia sawi a ni.
* INDIAN SUPER LEAGUE : October ni 26 khan India rama a vawi
khat nan Urban Downhill Event chu Aizawlah
Red Bull nen tang kawpin neih a ni.
Thîrsakawr hmanga infiamna, Redbull Urban Downhill Biking Event hi Republic Vêngah buatsaih a ni a. He inelna-ah hian Taiwan mi, Chiang Sheng Shan chu pakhatna a ni a, Indonesia mi, Rama Teguh Adi Pratama chu pahnihna niin Yawar Ali Khan, Jammu & Kashmir-a mi chu pathumna a ni thung.
Redbull Tlang Ruam Aizâwla neihah hian intlansiak mi 21 an tel a; ram pâwn aṭangin mi pali telin Mizo pathum an tel bawk.
* KOHHRAN INPUMKHATNA : June 11 khan J.M. Lloyd Hall, Synod Office-ah Mizoram Kohhrante Inpumkhatna Joint Committee Kohhran hrang hrang paruk - Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran (Ng) te chuan Council of Churches in Mizoram din an rel.
Tichuan, October ni 27 khan Rev. R. Vanlalnghaka, Synod Moderator, Joint Committee chairman ni bawk chuan a hawng ta a ni. Council-ah hian Rev. Dr. R. Lalbiakliana, BCM, General secrectary chu President atan thlan a ni.
* MATCH FIXING : Mizoram Football Association chuan November ni 4 khan Mizoram Premier League Season 11-ah khan match fixing a awm nia hriain CID te nen an chhui a, player 24, coaching staff mi 3 leh club pathum, heng : Sihphir Venghlun FC, FC Bethlehem leh Ramhlun Athletic FC te chu kum 3 chhung atan hrem an ni a, football thila inhnamhnawih thei lo tura hrem an ni hlawm. Coaching staff zingah, Robert Laldinthara (Sihphir Vengthlun FC) chu kum 5 chhung atan hrem a ni a, Danny Lalduhawma (Ramhlun Athletic FC) leh Johny Ramthansanga (FC Bethlehem) te chu kum 3 chhung atan hrem an ni bawk. Hremna na ber chu Chanmari FC player, Lalnunzama leh FC Bethlehem player L. Lotha te lakah lekin damchhung atan hrem an ni bawk.
Hemi hnu, November ni 20 khan players pariat hrem belh an ni leh bawk.
* THIRSAKAWR IN INDIA FANG : “Ride to Clean Air” tih thupui hmangin Pu Vanlallawmzuala Varte (Lz Varte) s/o V. L. Chhuanawma, Mission Veng, chuan thirsakawrin India ram a fang chhuak! Ni 204 zet zet thanga state zawng zawng a tlawh hnu-ah November ni 5 khan Aizawl a lo thleng leh a ni.
Kan chenna boruak leh leilung humhalh tura zirtirna pe tura zin LZa hi Mizoram Pollution Control Board chuan, ‘Clean & Green Sustainable Lifestyle Under Mission Life’ hnuaiah sponsor-in MINECO, New Capital-ah MPCB chairman, Pu Liankima Lailung chuan January ni 25 khan a vailiam a ni.
Pu LZ-a hian Tripura khawpui, Agartala-ah bultanin thla kua chuang hnu-ah India ram State hrang hrang, 17,403 Kms vel a zet chu a tlan ani.
Vanlallawmzuala Varte hi ram leilung humhim nan leh plastic hmang tlem tura zirtirna pek nan nikum May thla khan Lailapur, Assam atangin Mizoram chhim tawp, Khaikhy thleng kein a lo kal tawh bawk a ni.
* WOMEN'S ASIAN HOCKEY CHAMPION : November 11-20 chhunga Rajgir, Bihar a Women's Asian Champions Trophy (2024) khelhah Kolasib nula, Lalremsiami Hmar khelhna, Indian Women Hockey team chu China 1-0 a hnehin an champion a, The 2024 Women's Hockey Junior Asia Cup Muscat, Oman a December 7-15, 2024 chhunga khelah Mizo tleirawl pahnih - PC Lalrinpuii, Hnahthial leh Lalthantluangi, Kanghmun South te telna India team chu Women’s Junior Asia Cup, 2024 Muscat, Oman-ah China tho hnehin an champion bawk.
Hetih mek lai hian Asian Arm Wrestling International Cup 2024 October 19-26 a Mumbai khawpui a neihah ITI tlangval, Denic Lalruattluanga chuan kg 80 huangah Islam Nurmanov, Kazakhstan mi chu hnehin gold medal a dawng a, Laldinsanga Ramthar veng, Lunglei chuan Novemni 30 khan Bangalore-ah WBC final khel in Michael Decardi Nelson, Ghana chu bantamweight huanga hnehin a champion bawk.
* CHIEF SECRETARY THAR : Chief Secretary ni lai, Dr Renu Sharma chu November 1 aṭanga Superanuation pension-in a châwlh tak avangin Mizoram Chief Secretary thar atan Pu
Khilli Ram Meena, IAS ruat a nih thu November ni 21 khan Union Ministry of Home Affairs chuan ati chhuak.
Dr Renu Sharma a chhuah a, a thar tur a rawn thlen hma hian H. Lalengmawia, IAS chuan CS hna hi a lo chelh lailawk a ni.
Tichuan, November ni 21 khan Pu Khilli Ram Meena chuan a hna hi a rawn zawm ta a ni. A ni hi kum 1993 IAS Batch niin, AGMUT Cadre a ni.
* VAWK HRI : February ni 9-ah Champhai district Leithum khua-ah vawk pul hri (African Swin Fever) avangin vawk a thi a. Hetatang hian Zoram hmun hrang hrangah vawk thi leh suat a tam chho malh malh hle.
March 2021 atang khan Lunglei district-a Lungsen khua-ah chhan hriat loha vawk thi a awm tan a, AH & Vety department-in an zir chian hnu-ah, sorkar laipui chuan April 15, 2021 khan Mizoramah ASF a léng tih a puang. Hemi kum hian Mizorama khua/veng 272-ah ASF vangin vawk 29,824 a thi a; ni 35 chhung ASF vanga vawk thi a awm loh hnuah, February 4, 2022 khan Champhaiah ASF vangin vawk a thi leh tan a, a ziaawm chhoh leh viau hnuin kuminah heti khawp hian kan tuar nasa leh ta a ni.
Comments
Post a Comment