1st. Tuesday : Khawvêl pum huap upate nî (International day of older persons) pualin National Programme for Health Care of the Elderly (NPHCE) bultumin Central YMA Conference Hall Tuikhuahtlang, Aizâwlah hun hman a ni. He hun hi Health secretary, Sangchhin Chinzah chuan a hmanpui.
2nd. Wednesday : Volleyball Federation of India hnuaia national referee, J Lalramropuia Tlau (40), Bâwngkâwn Aizâwl chu Greenwood Hospital, Aizâwlah thin thalo avangin a boral.
3rd. Thursday : October ni 18 thleng awh tûr, Champhai Nature Conservancy huaihawtin Mizorama Hnahsin Kût hmasa ber chu Champhai phaizâwlah Adviser to CM, Pu TBC Lalvenchhunga'n a hawng.
4th. Friday : Kolasib District Fasi Track Court-a judge, R Vanlalena chuan judgement & order a tichhuakin July 22, 2023 mipa naupang pawngsual tu a puh, Asgat Ali s/o Akash Ali, Lakhipur, Cachar district, Assam chu kum 20 chhung tang turin a chungthu a rél. Asgat Ali hi Assam atangin Mizoramah cement mistiri hna thawk tura rawn lut a ni a, an riahna camp bul hnaia mipa naupang kum 10 mi leh a thianpa khawlai lêngte chu a man bet a; naupang pakhat zawk a tlanchhiat theih laiin, pakhat zawk chu a pawngsual ta a ni.
5th. Saturday : Vawk natna, ASF avângin vawk 12 a thi a, vawk 84 tihhlum a ni bawk.
6th. Sunday : Zirtawpni atanga chin hriat loha bo,
Lalremruata (Tàwinoa) kum 29 S/o Lalrinsangi Sakawrdai chu an khaw tlak lam lengkir hnuai-ah thi a chhar a ni.
7th. Monday : Sinlung Hills Council inthlanpui lo awm tûrah ZPM party leh MNF party chuan an party candidate tûr an puang a; ZPM-te’n bial 8 an chuh dâwn a, an thawhpui, HPC-te’n bial 4-ah; tin, MNF-te’n bial 10 leh an thawhpui HPC (R)-te’n bial 2 an chuh dâwn a ni.
8th. Tuesday : Pathianni kalta aṭanga bo, Lalrinpuia Sailo (41), North Sêrzâwl khua chu an khaw kianga Phûnglui tuikhuahah a thi a hmuh a ni.
9th. Wednesday : Lungpho khaw mi, Lalthanmawii (29) w/o Lalhunruata chu an fehna-ah JCB lung tih lum in fuh palhin hmunpui lam panpui a nih laiin a boral. Lung hian a hma in a (Lalthanmawii) nu leh an fehpui, Rosangi te chu an lu-ah a deng fuh a, hemi buaipui tura a kal chu a aia lian zawk in a deng fuh ta a ni.
10th. Thursday : Assam Rifles leh Excise & Narcotics Department chuan Zote, Champhaiah Rângzangêna (33) hnên aṭangin ganja kilogram 7.36, chêng nuai 5.44/- man hu an man a; chumi hnûah Champhai Vêngsângah Myanmar mi nia inchhâl, Thanpmanglian (38) hnên aṭangin pawisa chêng nuai 90/- an man bawk.
11th. Friday : Hapta khat awh tûr, Right to Information chungchâng theh lâr tûra hma lâkna, RTI Week chu district hrang hrangah hawn a ni. A vawi khatna atân RTI Excellence Award 2024 sem a ni a; Mizoram Public Service Commission (MPSC), General Administration Department (GAD) leh Department of Personnel and Administrative Reforms (DP&AR)-te’n lawmman la in Consolation Prize hi Administrative Training Institute (ATI) leh Information Communication Technology (ICT)-te’n an dawng thung.
12th. Saturday : Tuithiang Vêng Branch YMA, Kumpuan Sub-Committee-te chuan an vêng chhûnga ruihtheih thil an man khawm – heroin hâwng 3, rakzu ûm 48, royal stag ûm 3 (750ml.), blenders 1, beer can 49 leh alprazolam strip 6-te an ti ral.
13th. Sunday Ningani atanga tan, Presbyterian kohhran hnuaia presbytery inkhawmpui chu a tiak.
14th. Monday : Chhippui khua a Pu Rina te chu buh phurh tuma lo a an kal chuan an thlam lo kang ral vek mai an hmuh chuan an rilru a na hle. Thlam kangah hian thlam bungrua leh buh seng sa phur 37 vel a kangral a ni.
15th. Tuesday : Planning & Program Implementation Department Conference Hall, Aizawlah Mizoram State Policy Coordination Committee Review Meeting hmasa ber neih a ni a. Pu KC Lalmalsawmzauva, Adviser to Chief Minister, Vice Chairman, MSPCC ni bawk chuan hun kaihruaiin 'Bana Kaih Scheme' kalpuitu tur department 16 atangin Nodal Officer leh Assistant nodal officer-te an tel.
16th. Wednesday :
MZP hruaitute chuan scholarship chungchangah Ministry of Tribal Affairs-a scholarship hotute Delhi-a an pisa-ah an hmu a, zirlaite mamawh dan sawipuiin, pawisa release thuai tûrin an ngen. Anni chuan scholarship sem hmabak aṭangin cheng vbc. 24 an sanction leh thuai dawn thu leh hei hian zirlaite mamawh zawng zawng a la daih dawn lo deuh tih an lo hrilh.
17th. Thursday :
P&E minister, Pu F. Rodingliana leh a mah zuitute chu Champhai atanga Aizawl pana an hawn na kawngah Bungbangla thlang kawngpuiah Assam Rifles chuan zahlo takin an lo dang a, minister ngei pawh a lungawi lo hle. Chief minister a inrawlh hnu-ah an inthen thei hram a ni. A hma in minister hi sipai ho hian an lo dang tawh nghe nghe.
18th. Friday :
Trained Nurses' Association of India (TNAI), Mizoram Branch chuan an pawl kum 60 tlin lawmna hun hmun hrang hrangah an hmang. TNAI Mizoram Branch hi kum 1964 khan din niin tun dinhmunah TNAI Life Member 4053 awmin, Mizoram Branch bikah Member 2751 an awm mek a. District Branch 10 awmin, Mizoram pumah Nurse zirna in 17 a awm mek bawk a ni.
19th. Saturday : LBS Suzuki Youth Icon 2024 thlanna chu a hmawr bawk a ni ta. Youth Icon 2024 atan hian Bawktlang tlangval, Lalsangliana (Taitea) thlan a ni.
Youth Icon 2024 Lalsangliana hian lawmmanah pawisa fai, Rs 2,00,,000/ leh trophy a dawng a, hei bakah hian Suzuki Burgman leh Bosch Washing Machine a dawng bawk.
20th. Sunday : Zirtawpni zan atanga tan, Masihi Sangati Convention vawi 33 na, Saitual Kohhrana neih chu a tiak. Convention-ah hian speaker chu Rev Darrema Hlawndo i/c Aizawl North bial a ni a, thupui chu 'Tidamtu Isua' tih a ni thung. Convention-ah hian mi 3839 zet kalin mi 40 laiin baptisma an chang bawk.
21st. Monday : Ram pum huap police boralte sûnna hun ‘Police Commemoration Day’ chu India ram hmun dangte rualin Mizorama Martyrs Memorial Stone, 1st. Battalion MAP Headquarters, Armed Vêng Aizâwlah pawh hman a ni.
22nd. Tuesday : Boruak a thianghlim theih nana mipuite koh eih tumin, ‘ride to clean air’ tih thupui aupui a state hrang hrang leh UT thenkhat tlawh a thang mek, Vanlallawmzuala Varte, Mission veng chuan Manipur thlengin thirsakawrin India rama state zawng zawng a tlawh chhuak ta. UT a tlawh tel nual bawk. LZ-a tia koh Vanlallawmzuala Varte hian January ni 25 khan Aizawl a chhuahsan a, ni 272 a thang bo tawh. Ni 272-ah hian ni 192 chu thirsakawr a khalh a, chu chu darkar 1215 vel a ni. Mizoram State Pollution Control Board sponsor niin, Central Pollution Control Board kaihhruaiin state tinah pollution control board te’n an lo buaipui a ni.
23rd. Wednesday : North East Zone Cultural Centre (NEZCC) Dimapur, Ministry of Culture, Government of India leh Art & Culture Department, Mizoram ṭang kawp buatsaihin India rama hnam hrang hrang inpumkhatna leh hnam ziarâng inhriat pawh tawnna leh châwi lârna ‘Bharat Ko Jano’ programme chu Vairêngte Joint YMA Playground-ah neih a ni.
24th. Thursday : YMA Rorel Inkhawm vawi 4-na chu R Dengṭhuama Hall, Mualpui-ah neih a ni. YMA Rorel Inkhawm hi Central YMA president, Lalhmachhuana'n a kaihruai a, YMA khawih agenda pariat leh sorkar khawih agenda panga an ngaihtuah. YMA khawih agenda pawm vek a ni a, pakhat chu tihdanglam hret a nih hnuah pawm a ni. Sorkar khawih agenda zingah pawm loh pakhat a awm thung.
25th. Friday : Central Young Chakma Association (CYCA) chuan Kamalanagar, Chawngte-ah YCA Day vawi 47-na an lâwm.
26th. Saturday : Thîrsakawr hmanga infiamna, Redbull Urban Downhill Biking Event, India ram chhûnga a hmasa ber chu Aizâwla Republic Vêngah buatsaih a ni a. He inelna-ah hian Taiwan mi, Chiang Sheng Shan chu pakhatna a ni a, Indonesia mi, Rama Teguh Adi Pratama chu pahnihna niin Yawar Ali Khan, Jammu & Kashmir-a mi chu pathumna a ni. Redbull Tlang Ruam Aizâwla neihah hian intlansiak mi 21 an tel a; ram pâwn aṭangin mi pali telin Mizo pathum an tel bawk.
27th. Sunday : Ni hnih awh, Mizoram Kohhran pariatte thawh hona tûr Council of Churches in Mizoram (CCM) inkhâwmpui Mission Vêng Presbyterian Kohhran Biak Ina hman chu a tiak. He CCM-ah hian Mizoram Presbyterian Kohhran, Mizoram Baptist Kohhran, Evangelical Church of Maraland, Isua Krista Kohhran, Lairam Isua Krista Baptist Kohhran, Independent Church of India, Evangelical Free Church of India leh Wesleyan Methodist Church, Mizoram-te an tel a ni.
28th. Monday : Ramchhûng hmun dang rualin Vigilance Awareness Week hman ṭan a ni.
29th. Tuesday : Mizoram Electoral Roll 2025 atana electoral roll ennawnna, Draft Electoral Roll chu district tinah district election officer-te'n an tlangzarh. Tlângzarh tâkah hian Mizoramah voter 858534 an awm a ni.
30th. Wednesday : Pathianni thleng awh tûr, UPC (NEI) ṭhalai pâwl, Penticost Youth Department general conference vawi 46-na chu Hnahthial North II VC ground-ah ṭan a ni.
31st. Thursday : Lalzara (72) leh Zopari (75) te nupa chu thil eisual avangin ZMC-ah an boral.
Comments
Post a Comment