Kar hmasa Inrinni kha YMA (Young Mizo Association) din champha vawi 89 na a ni a, branch hrang hrangah hman a ni. He hun hmanpui hian Central YMA hruaitu te pawh an zin chhuak nasa hle a, President, Pu Lalhmachhuana chuan chawhma-ah ITI, chawhnu-ah Chungtlangah leh zanah Chaltlang Lily vengah te hun hmanpuiin chief minister, Pu Lalduhoma chuan Biate lamah a hmanpui bawk.
Sihphir branch YMA chuan he hun hi hun hniha thenin Zirtawpni, ni 14 zan kha 'urlawk zan' tia vuahin lengkhawm zai hmangin section tin te an inel a, section tin te hian chanvo dang pakhat theuh neiin sports meet kan hman zawh tak result puan nghal a ni bawk. He hunah hian Vana pa section chu pakhatna niin an leader, Pu RK Laltlanhlua chuan trophy a chawi a ni.
He hunah hian tunlai Zoram dung leh vanga zaithiam lar, Jaui chuan kalkhawm mipui min awi a, tualchhung zaithiam hrang hrang an inlan bawk nen hun hlimawm tak kan hmang a ni.
A day ni tak hi chawhma dar 10:30 ah tan a ni a, inkhawm hi president, Pu Lallianfala chuan kaihruaiin, adviser pahnih zinga Pu HV Lalhrangliana chuan hunserh a hmang thung. Hemi ni hian kumin chhunga kan member pui, chatuan ram pan ta mi 18 te sunna hun hman a ni a, branch report bakah section hrang hrang report ngaihthlak a ni bawk. Kumpuan thupui, 'Ram leh hnam humhalh' tih chu Branch Executive Committee member, Pu R. Lalduhzuala, CEC ni bawk chuan a sawi a, minister, Pu Lalthansanga (Chatea) chuan khuallian niin he hun hi min hmanpui bawk.
Pu Chatea chuan kut hnathawk taima tia Sihphir khua min fakin chawhmeh a Aizawl khawpui chawmtu kan nih thu a sawi a, a ma dinhmun te sawiin a eiruk ve loh avanga Zarkawt ang veng changkangah pawha rangva in tlem te zinga an tel thu sawiin thawhchhuah mila khawsa thiam turin member te min fuih. Sihphir khua in kan lui neih that em em, Kawrbel pump chhuah tum a hmalak a tum thu a sawi bawk. Minister hian Sihphir a rawn thlen hlim hian thlanmualah thing a phun nghe nghe. Kan chhun thingpui senso phuhruk nan cheng 10,000/- lai min pe a, hall thawm thatna tur kan lo dil ve chu theihtawp a hmalak a tum thu a sawi bawk.
Day hmannaah hian rampum huapa zaithiam lar kan neih, Pi Zomuanpuii leh Nl Siampuii ten zaiin min awi reng a, band dang pahnih awm bawkin YMA zaipawl in hla mawi tak min ngaihthlak tir bakah kum 20 chuang liam taa YMA zaipawla lo tel tawh thin ten zaia min han awi zet mai phei chuan hnuk an ti ulh rum rum thei mai. Day-ah hian YMA chhang lamin item hmuhnawm zet min entir bawka, an talent ropui zia hmuhsaktu an hruaitu te an fakawm takzet a ni.
Day-ah hian tunhnaia board hnuaia zirlai pass thar mi 58 lai te chu lawmpuina thilpek hlan an ni a, inhruipawh hmanga khua ti hming thatu te leh officer kan neih thar pali te chawimawi an ni bawk.
Day puala media & documentation leh library sub-committee tangkawp tena an buatsaih, article, essay leh thawnthu inphuah siak bakah lemziak hmanga inelna an buatsaiha lawmman sem nghal a ni bawk. (Column hranah lawmman latute hming tarlan a ni)
Hemi ni hian a kal zawng zawng te tan lucky coupon siam a ni a, fun rising lam ten lucky ticket an siam chu vawr nghal a ni bawk. (A man tute hi column hranah tarlan a ni a, lawmman te hi karkhat chhungin branch hruaitu te hnenah ngaihven tur a ni e)
Program te hman zawh a nih hnuah day ruai ropui tak theh a ni. Ruaitheh pawh kan thahnem viau mai a, a dik tak hriat fak theih nilo mah se thleng chuang atanga chhutin ruaitheh zat hi mi 568 zet kan niin a lang.
Mizoram chhungah hian YMA hi branch 767 zet kan ni a, Mizoram pawna awm te nen phei chuan branch 821 (hei hi chanchinbu lamah khan kan lo tisuala, min lo hrethiam teh u) zet awmin member hi 4,90,601 zet kan awm mek a ni.
Comments
Post a Comment