Skip to main content

VAWIH

 

 

‘A van uih e’


Ni e, a uih a ni. Mi ṭhenkhatin ‘vawih hi a uih lova; ama rim ve reng a ni’ an ti ṭhin. A rim chu alawm uih le.


Vawih kan tih bera hi kan mawng aṭanga boruak rimchhe tak lo chhuak hi a ni bera; a ri leh rilovin a lo chhuak theia; a ri a a lo chhuak a nih pawhin rik dan hrang tam tak a awm. Hnam hrang hrang vawih dan a dang chuang lova; a mihring a zirin a uihin a uih lo mai a ni.


Vawih hi a mawi lo em ema; puipunnaah phei chuan thil zahthlak tak a ni. Ṭhenkhatin insum ṭha a an hriat laiin ṭhenkhat erawh chuan ṭul an ti lo thung. Insum ṭhalo tite ṭan chhan te:


1, Vawih theihloh hi a pawi em em a ni. Vawih insum hian ruh a nget thei bawk si.


2, Kan thil eiah hian air kan ei tel ṭeuhva; chu kan thil ei chu awlsam taka pai ṭawih theih a nih loh chuan chutiang thil ṭawih tur chuan gas a siam a ni. Thil a lo ṭawihin amah kha a lo riral tihna a ni a, mahse, amaha gas awm kha a riral ve ngawt thei lo.


Tin, ṭawih tura a inbuatsaihna lamah khan gas a pe chhuak ve hrim hrim bawk. Chu’ng gas-te chuan taksa aṭanga chhuah an tum a; an chhuah dan chu, chung lamah irh, hnuai lamah vawih a ni mai. Chhuak thei lo se kan thi mai ang. Vawih theih hi thil lawmawm tawpkhawk a ni.


3, Mi hrisel leh puar entirna a ni.


4, Thlasik lai phei chuan vawih hian mawng a rawn ti lum deuh thar thar ṭhin a, nuam ve deuh a nia.


Vawihah hian boruak chi hrang hrang heng: Nitrogen 59%, Hydrogen 12%, Methene 7%, Carbon Dioxide 9% leh Oxygen 4% inpawlh hi an awm a. President emaw Prime Minister emaw Super Model emaw pawh nise ni khatah mihring hi litre khat vel kan vawih ziah ṭhin. Vawih uih nachhan chu gas hrang hrang kan sawi takte leh Hydrogen Sulphur inpawlh vang a ni. Tin, vawih uih leh uih loh hi ei leh in hian a hril hle bawk.


Keini Mizote chuan vawih hi thil zahthlak takah kan ngaia. Vawih rik ngat phei chu thil zahthlak tawpkhawkah kan ngai. Tlangvalin an nula rim lai lo vawih palh ta se a zah an hlauh avangin hre awm pawhin an lang duh ngai lova; an thil sawi lai an sawi zawm hmiah hmiah zel. Hetiang hian hla pakhat pawh a awm nghe nghe:


Leng tuaitirte, I mawng ar ang a khuang e,

Nam rum rum, Vala’n ka do dai e,

tiin.


VIP hi vawiha inpuh kan tifiam bawk ṭhin. Vawih lo pui vawiha inpuh nat ṭhinzia kha.


Hetiang a nih deuh nuai avang hian vawih hun ṭha kan sawi ange:


1, Mahni chauhva two wheller a chuan laiin, lo uih deuh pawh nise tuartu an awm dawn loh bakah nangpawn I tlansan nghal daih dawn avangin. Thawmhnaw inbel azir erawhin a chamin a cham lo thei tih erawh hre tel ila.


2, Mi vawih laia a ri lova lo vawih hi a ṭha hle bawk. Lo uih deuh pawh nise, I hma chiaha mi vawihah khan an puh vek mai ang. Amah pawhin a ma vawih uih ngeiah a ngai hmiah bawk ang.


3, Inkhawmna hmunah I vawih a chhuak a nih chuan zai hun nghak hram hram rawh. Zai lai a nih chuan lo vawih ring deuh pawh nila tuman an hre dawn lo che. A uih viau erawh chuan a inthlahrunawm deuh mahna.


4, Lungngaih (ṭah) lai / thinrim lai, hetih hun laia I vawih a nih ngat chuan I ngaihtuahna kha engemawchen a kal bo ngei ngei ang.


5, Ek paha vawih tluk a awm lo. Vanduai thil thua vawih leak hi a awm ve chawka; ek inah erawh chuan a pawina a awm lo.


Kawpuar vawih hi a nuam hle bawk. Ṭumkhat mitthi lumennaa ka kal ṭum pawhin ek chhuakin min tur avangin ek in hnai berah ka ṭhu khar maia; ka vawih char chara; ka ek chhuak zawk zawng a reh vek.


Vawih nawm hun lai te:


1, Kawng kal pah: A ṭhing angreng fu naa; pen zawnga a’n ri zaih zaih mai chu a nawm dan a dang ve zar a nia.


2, Zun lai: Zuna san laia vawih rik pawp nawm zia hi. A chunga tarlan tak anga vawih leak palh erawh a hlauhawm fu.


3, Nuih lai: ‘Nuih vawih’ kan ti mai ṭhin, nuih na tur a tam phah lehzual. Zun han cheh tel ngei bawk ila.


Naupan laia ṭhenawma TV ena kan ṭhut laia vawih palh hlauhawm zia kha, luh dawnah vawih lo turin kan intiam tawh si, red card kan hmu em lo a nih pawhin yellow card tal chu kan dawng ṭhin a nih kha. A eng card zawk zawka pawh kha ni se next match chu kan miss hrim hrim.


Biak In / puipunna hmuna I vawih ri palh zauh a nih chuan I bula ṭhu kha en la; nuih vur vur rawh. Mi’n kha I bula mi ah khan an ngai hmiah mai ang.


Mutthluk laia vawih hian kan harh chawka; kan muhil der zui chawk bawk.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more