1st. Friday : Lal Thanhawla Auditorium, Congress Bhawan-ah MPCC Executive Committee Meeting neih a ni a. He hunah hian MPCC Vice President atan Lalnunmawia Chuaungo, IAS (Rtd) chu ruat belh a ni.
2nd. Saturday : Guwahati High Court, Aizawl Bench building thar sak chu Chief Justice of India, Justice, D.Y. Chandrachud chuan MINECO-ah a hawng.
3rd. Sunday : North East Zone Shooting Championship Shillong a neih zawh taka Mizoram aiawha 10 metre Air Rifle Sub – Youth Category a Gold Medal latu, Cindy B. Lalchansangi leh Pu B. Zirchungnunga fanu leh Bronze medal latu Malsawmsangi te chuan an khua, Lawngtlai thlengin Lai Women Association, Gen. Hqrs huaihawtin Areopagy-ah ropui taka lo hmuah an ni.
4th. Monday :
Chawngte a Mizo leh Chakma tlawmngai pawl hrang hrang intel khawm (All NGO) chuan Chawngte khawchhung kawngpui chhiat avanga lungawi lohna lantir nan kawng an zawh. Kawngzawhna ah hian mi 500 chuang telin Chawngte football ground atanga SDO office thleng kawng hi an zawh a ni. Kawngzawhah hian mipuite chuan sorkar na taka nawrin kawng siam a nih loh chuan inthlan thlenga a nghawng tur thu an sawi a, ‘No road, No vote, No election’ tih thuziak te an keng tel a ni. All NGO kal khawmte chuan Mizoram sorkarah Chawngte SDO (C) kaltlangin memorandum an thehlut nghal.
5th. Tuesday : Teachers Day vawi 52-na a ni a. Zirna-in hrang hrangah zirlaite'n an zirtirtute an chawimawi hlawm.
Chief Minister, Pu Zoramthanga chuan Mt. Carmel shool in an hmanna, AR lammualah a hmanpui.
6th. Wednesday : Sekhum ramchhung a lui pakhatah mihring ruhro ni a hriat hmuh a ni a, Lunglei police ten la in, thil awmdan an enfiah mek. Ruhro hi chakai khawrh a kal ten an hmuhchhuah a ni.
7th. Thursday : Central YMA Committee Room-a NGO Coordination Committee, Mizoram kaihhruaina hnuaia Manipur-a Zohnahthlak pawl hrang hrang hruaitute inhmuhkhawm chuan lungrual takin pawl pakhata an inkhaikhawmna tur 'Zo United' tih kalpui an rel. Hun remchangah hruaitu tur an la inruat fel ang.
8th. Friday : H. Lalchhanchhuahi (27), New Capital Complex chu Lungleiah auto rickshaw-a chetsualna avangin a thi.
9th. Saturday : Lallawmvela S/o
Dohneha, NE Tlangnuam chu
Tuivai luiah a tlahlum.
10th. Sunday : Presbyterian Kohhran hnuaia naupang Sunday School department hrang hrang te chuan inkhawmpui an hmang.
11th. Monday : NHIDCL hnuaia Keitum khaw chhunga kawng siam mekah lei min thutin, a hnuaia hnathawktu, Tripura lam mi, Jhonriang (19) chu a delh hlum.
12th. Tuesday : September ni 3 atanga khelh tan, Hero Sub Junior Boys National Championship, West Bengal a khelh mek chu a hmawr bawk a ni ta a, final-ah hian Mizoram chuan 3-0 in Manipur an hneh.
13th. Wednesday : Ramchung hmun dang rualin Mizoramah ramchhunga hriselna beihpui thlakna Ayushman Bhav Campaign tan a ni a, he hun hi President of India Droupadi Murmu-in Gandhinagar-a Raj Bhawan atangin video conferencing atangin a hawng a, Mizoramah chuan Larsap Dr Hari Babu Kambhampati an State Level program huaihawtna hmun, Legislative Assembly Annexe building atangin Video Conference kaltlangin a chhim a, Mizorama hman ve turin a hawng ve nghal a ni.
14th. Thursday : Serkhan Health & Wellness Centre chu Tuirial Bialtu MLA, Commerce & Industrial Development Board Vice Chairman ni bawk, Pu K. Laldawngliana'n a hawng. Pu K. Laldawngliana chuan hriselna pawimawhzia sawiin, hriselna kawnga mipuite'n hma an sawn theih nan'a Serkhan khuaa sawrkar thuneitute'n Health & Wellness Centre an dah chu lawmawm a tih thu a sawi a. Khawtlang mipuite'n ṭangkai taka an hman theih nan duhsakna hlanin, uluk leh dimdawih taka enkawl zui tur leh thawktute pawh duat thiam turin khawtlang mipuite chu a chah.
15th. Friday : District AIDS Prevention and Control Committee (DAPCC) leh Mizoram State AIDS Control Society (MSACS) ṭangkawp huaihawtin Vaivakawn Cultural & District Level Red Ribbon School Quiz Competition buatsaih a ni a. He intihsiaknaah hian Presbyterian English School, Republic Veng chu pakhatna an ni.
16th. Saturday : Tunkar Thawhlehni a Tuikual lui lianin a lak, Pu Lalhmingmawia, kum 54, Dinthar veng a cheng ruang chu Sairang Dinthar huamchhung, Tlawng lui kamah hmuh a ni.
17th. Sunday : India state hmundang rualin Vanapa Hall-ah PM Vishwakarma scheme hawnna hun huaihawt a ni.
He huna khuallian Union Minister of State for Development of North East Region (DoNER) Pu B.L Verma chuan Sorkar laipui-in hmarchhak state te chu a ngai pawimawhin hmalakna hrang hrang a kalpui a ni, a ti a. Mizoram bikah kum 10 kalta chhung khan project 103 cheng vbc 544 leh nuai 19 man chu NEC kaltlanga thawh a nih thu leh kum 2021-22 chhung khan road project 4 NESIDS hnuaiah sanctioned a lo nih tawh bawk thu a sawi.
18th. Monday : Siaha Jail atanga a tlan chhuah hnu a, central jail a man, chumi hnu a police te kut atanga tlan chhuak a mi In rawktu, Vanrampana (24) chu Rangvamual lam, Asenchi lane an tihah Bawngkawn police ten an man a, mi in rawk thubuai a neihna Vaivakawn police te kutah hlan a ni.
19th. Tuesday : Keifang aṭanga Aizawl lam 11Kms velah Eco Van,
MZO4 2782 Champhai kal tur chu kawng thlangah 200m vel a lumin a chesual a, motorah hian a neitu (Driver) Pu Lalnunsanga (46)
s/o R.Liansanga, Tuithiang veng leh a fapa te chuangin hliam na an tuar lo hlauh.
20th. Wednesday : Myanmar ramchhung buaina avanga Mizorama sahimna zawnga rawn raltlan, Zohnahthlak Van Dawt Lian Sang, Kum - 14, s/o Thang Hung, Hriphi khua, Thantlang Dist, Chin State a mi chu Brain Tumor natna avangin NEIGRIMS, Shillong-ah enkawl a ni a, beidawnga rawn haw pui a nih mek laiin Silchar daiah a boral. Central YMA Hall Tuikhuahtlangah a ruang nghah a ni.
21st. Thursday : Mizoram Police hotu lu ber, DGP Anil Shukla chuan Siaha tlawhin Circuit House-ah Mara Autonomous Dist Council hotute, Police leh Sipai hotute bakah NGO hruaitu thenkhat te nen an inkawm. DGP chuan Siaha chu international border niin hel leh ralthuam bakah ruihhlo tawlh ruk a hluar hle niin a sawi a. Hemi ven hna hi Assam rifle te bakah police ten theihtawp an chhuah tih a sawi a. VDP, NGO hrang hrang leh mipuite tawiawmna an mamawh thu sawiin thawhpuiah a sawm a. Inthlanna felfai leh thianghlim tak a awm theihna turin tanho a pawimawh thu a sawi bawk.
22nd. Friday : LPS Comedian Search, ignite studio a neih chu a hmawr bawk a ni ta a, he hunah hian Vanmalsawma, Tuikual North chuan lawmman pakhatna lain cheng 1,00,000/- (Nuaikhat), Suzuki Access 125 scooter, TV leh 1.6kW Solar Hybrid Power Backup System a dawng a ni.
23rd. Saturday : Young Lai Association (YLA), Lawngtlai Vengpui Branch te chuan YLA Day vawi 49-na an hmang a, hemi pual hian February 9, 2023-a an thlanmuala tunge anih hriatchhuah theih tak loh ruang an phum chu thlanlung nalh leh mawihnai tak siamin an phun sak. YLA Lawngtlai Vengpui Branch ten vawiina tunge anih hriat loh thlanlung an phun sak hi kumin February 6, 2023 a Melthum daia ruang chhe tawh tak an chhar, Lawngtlai Vengpui nula, Zahleipari ni a hriat a nih avanga February 9, 2023-a Lawngtlai Vengpui thlanmual a vuiliam tak, a hnu February 28, 2023-a Zahleipari a ni lo tih hriatchhuah leh tak ruang kha a ni.
24th. Sunday :
Sivikala Bahadur kum 72 w/o Khum Bahadur, Sihphir chu an chenna Inah 'Stroke' natna avangin a boral.
25th. Monday : Chanmari Kohhran Biak Inah September
ni 4 atanga ni 23, 2023 chhunga Synod camping center, Sihphira Chhanchhuahna Camping neih kharna inkhawm neih a ni. General Secretary Report a tarlan danin tuntum camping-ah hian Campers inziak lut hi mi 507 niin, a tawp thlenga awm hi mi 192 an ni. Camping-ah hian speaker chu
Tual Upa Jerry Laltanpuia, Speaker, Krista Remna Palai Team a ni.
26th. Tuesday : Chief Minister, Pu Zoramthanga chuan a pisa-ah tun hnaia Mizoram University-in post graduate result a tihchhuaha Gold Medalist leh ICFAI University Result chhuaka topper, a bial chhung a mi te chu chawimawina a hlan. Gold Medalist pahnih chawimawina a hlan te hi Lalmuanzuali Royte d/o Lalthlamuana Royte, Sihphir; MA English, 1st Position (Distinction), ICFAI University Mizoram leh, Vanlalkroshlua Ngente s/o Vanlalhruaia Ngente, Sihphir; IMBA, 1st Position (Distinction), Mizoram University, Mizoram te an ni a. Chief Minister hian Lehkhapui (Citation) leh Laptop Computer a hlan a ni.
27th. Wednesday : Chief Minister, Pu Zoramthanga hovin CM cabinet meeting room-ah Council of Ministers chu sawrkar department hrang hrang atanga thu pawimawh lutte ngaihtuahin an thukhawm.
28th. Thursday : Directorate of Revenue Intelligence (DRI) official lemchang nia puh – Laltharzêli, New Champhai; PB Rozâmliani leh a pasal Johny Lalthlamuana, Kahrawt Champhai-te chu man an ni.
29th. Friday : Mizoram sawrkar ruahmanna hnuaia a hmasa ber atan Mim Kut pualin Vanapa Hall-ah hun urhsun tak hman a ni. Mim Kut hman dan ruahmantu, State Level Steering Committee Chairman, Er. Lalrinawma, Social Welfare & Tribal Affairs Minister chu kut thlengtu a ni. Thu sawiin Minister chuan vawiina Mim Kut puala hun buatsaih a ni ta chu lawmawm a tih thu sawiin hmangaih kal ta te puala remchang taka hun buatsaih chu tih thanah neih zel a beisei thu a sawi.
30th. Saturday : Ni hnih awh, 13th Mizoram Inter-district Power lifting Championship, Republic Vengthlanga neih chu zawh a ni ta a,
Women Category-ah
Emily C Roluahpuii, Lunglei district Power lifting club,
Men Category
59kgs : David R.K Lalnunmawia, Thor's Powerlifting Club
66kgs :
Samuel R Vanlaltanpuia, Thor's Powerlifting Club
74kgs :
Lalthangmawia, Origin Powerlifting Club
83kgs :
Lalremruata, Origin Powerlifting Club
93kgs : Lalhmangaihsanga, Thor's Powerlifting Club 105kgs :
Abraham Lalthakima, Origin Powerlifting Club leh
120kgs :
David Lallawmkima, Power Macho Powerlifting Club te chu pakhatna theuh an ni.
Comments
Post a Comment