Airport checking ka paltlang zo thawthang tawh. A hnuhnung ber a passport an en zo chuan, 'Sawtah sawn lo va thu lawk rawh,' an ti ta mai. Hun engemawchen ka thut vang vang hnu chuan sipai pakhat hian 'Noam, ata lo yakhol latus' a rawn ti ta mai. Manilomaha hawn/zin chak ve nak alai a.
Israel ramah hian mi zawng zawng hi sipai kal vek tura tih (compulsory) a ni a, naupang chu kum 18 an tlin veleh kalin kum thum chhung an kal a, pem lut ho erawh kum a upat deuh chuan hei aia reilo deuh pawh an kal a, chawlhkar khat chauh kal an awm bawk. Infiammi leh sakhaw lam zir mi erawh kalloh dan a awm thung. Mi ang pangngai, harsatna bik (a chunga sawi ang) nei lemlo chu kal vek tur a lo ni. Rambuai deuh reng mai a nih avang hian ral do mai thei tura inrin leh thiam turin an duh tlat a ni. Keipawh airport atang chuan let lehin Jerusalem a sipai hmunpuiah ka chanchin te ka hriattir hnuin zin ngei ngei ka ngaih thu ka sawi ve takah chuan thla hnih zin theihna min pe in chumi hnu erawh chuan sipai zawm ngei tura tih ka ni ve thung. Khatia airport a min lo dan mai chhan kha puitling chin chu sipai kalloin rampawnah a kal theihloh a lo ni. Hun hmasa lama kan unaupa airport a an lo dankir tak thu rilruin a hre rauh rauh mai.
Thlahnih chhung ka zin hnu chuan Tel Aviv-a sipai hmunah chuan ka va in hriattir ta a lawm. Chuta an zawhna 'Lo thi palh ta la pawisa khawiahnge kan dah ang' an ti chuan rilru a ti kalthui hle.
Tichuan, thil te tifelin ka lo ngaihsan em em thin, Israel sipai chu ka ni ve ta rup mai. Pemthar ho awmna bik, Galili dil bul lawka Mikveh Alon khua-ah chuan traning chu kan bei ta a ni. Zing parade paha Galili dil lo lang chuan nun a ti hlim thin hle. Chawlhkar khat chauh ka la awm tihin thawh ka'n hai pek a nih kha. Israel ram hi India anga a len ve lemloh avangin chhuti lak tehchiam a ngai velo a, chawlhni hmangin tul bik thil a awm a nihloh chuan a hawn theih ziah tho a ni. Ka thawh hai avang khan a hrem nan ka haw theilo ta a, hremna ka tawh hmasak ber a ni. Amaherawhchu, tihtur tehchiam awm chuang heklo. A hrehawm lemlo hle. Chubakah, Sihphir tlangval pakhat leh Aizawl lam mi, Mizoram atanga ka hmelhriat hi hrem zingah an lo awm ve hlauh mai a, hrem tawke tiloin kan hlim ta phian.
Thlathum hemi hmunah hian kan awm hnuin mahni line tur a kal darh a tul dawn tak avângin intihhlimna te kan nei a, kan basis a Indian awm ho in India ram chanchin presentation a kan entir bakah India hnam hla kan sa bawk. Hetiang bawk hian ramdang atanga kal te pawhin an ram chanchin an sawi ve hlawm bawk. Vai ngaisang lemlo leh sap/foreigner ngaisang si tan chuan an awhawm thei khawp mai. Football kan khelh tumin alawm an thiamlo ve hlawm bawka, Brazil lakah goal ka'n thun ve zan kha! Hei hi chu ka sawi ve fo mai.
Tichuan, Rishon leTzion, Tel Aviv khawpui kiang lawkah sipai nun tak tak bei turin ka awm ve ta. Ka vanduai nge ni dawn hemi hmuna ka awm hi khawihli in min tibuai tlat mai a, damdawi in te ka lut ve hial. Ka nun'a hriatreng tur thil tam tak ka tawn phah a, ka lawm letling hle. Mak tak maiin civil damdawiin ah min dah a, cabin-ah awmin TV min chhawpsak bakah chanchinbu chi thum nitina rawn dahin sipai lam ayangin tlawhtu ia nei teng bawk. Keini mai mai heti taka min ngaihven hian an mite an voh zia min hriattir phah. Thlakhat chauh hemi hmuna kan awm avang leh natna in min tlakbuak ve reng si avangin hemi hmuna awm chungchang sawi tur a tlem hle.
Chhim lam khawpui Beer Sebha lamah insawn phei lehin helai boruak zet chu thlaler hmun a ni bawka a boruak pawh a dang zar mai. He hmun thar ka pan dawn hian alawm ka awmna tur tak ka hre mai silo, sipai pakhat fel zet mai ka tawng a, ka lukhum kokia kan dah mai thin chu ka tibo mauh mai a, ka tihbo thu mangang taka ka sawi nak chuan a lukhum chu min pein cold drink leh pawisa min pe tehreng a nih kha, ka van lawm tak e aw. Sipai tan chhung hian mifel dang pawh tam tak ka tawng a ni.
Thlaruk chauh sipai ka tan chhung hian thil tam tak ka tawnga, lawmna leh zah chem chemna ka tawng hnem hle a, hmun hlauhawm leh hahthlak tak tak ka tawn laiin hlimawm leh tun thlenga la hriatreng pawh ka tawng nual. Thian tha tak tak, vawiin thlenga biak zui theih ka tawng a, tlawmngaihna kawngah pawh Mizo te aia an hniam bikloh zia hmu chiang hle in ka inhria. Silai kah kan zir ngawrh hle a, chand kap hian a khattawkin kan chhuak reng a, kahban leh kahpup bak la kap ngailo ka ni naa, reilo teah ka kap thiam ve mai. Hetia ramhnuai lama chettlat tak foah chuan khang kan silai te kha awh rum rum chang ka ngah mai. A hmaa kan tlawh ngailoh hmun tam tak kan tlawh a, sakhaw hmun mai bakah sorkar hmunpui te kan tlawh bakah hmar thlang chhim chhaka ramri kan tlawh chipchiar hle. Labanon ramri kan tlawh tum hian alawm, U Sangzuala (samsei thin) Tlangveng tawng ka hre reng mai. Kan kal ngei tih hriat nan'a ek ngei a duh thin thu a sawi ngaihtuah chhuakin ek a rem miau siloh avangin thirhung ka'n zun tlang hram kha. Lebanon ramah ka zung chiang alawm.
Hmunphiat, ei rawngbawl, silai kah, hmun pawimawh ven kan ti ve vek a, motor awmkhauh pui pui bakah tank-ahte hial kan chuang a, hlauhawm deuh tawn chang lah a tam. Tumkhat motor chhungah bomb rawn tla lutin a puaklo hlauh mai. Tumkhat leh pawh pahnih zela kan duty tumin thianpa ke an rawn kap tliak hnup mai a nih kha, hlauhawm fia fia tak a ni.
Duty sawi takah chuan hmun pakhata ka duty naah hian Mizotawng thuziak ka hmu nawlh mai a, 'helai hmunah hian Mizo tlangval ka khawhar hle ' tiin, a hnuaiah Mizoram a an khua a ziak bawk. Ka lunglen thu ka'n ziah hnan ve tak kha. Mizo dangin hmu ve leh tawh tak ang maw.
Sorkarin hetia a mite nunchan a zirtir vek chhan hi rambuai reng reng an nih avanga raldo thei reng tura an duh vang a ni a, boruak a muan deuh hunah pawh a khattawkin a mite hi traning turin a ko (miluim) fo bawk. Keipawh tumkhat chu kal ve lehin Beer Sebha thlaler hmunah puanin kaihin kan awm a, eitur kan keng tam silo. Rin aia kan cham rei tak siah chuan chhangthawp zailep khat lek leka eiin ril a tam duh raih raih hle. Helai hmunah hian engmah kan tilo. Amaherawhchu, hmelma te rawn kal rinna a awm avanga duty kan ni a, min hmuh avang khan an lo kalloh phaha, a tha ve khawp mai.
(Tuna ram a'n buai tak viau-ah hian ka nunhlui ka han thaikawi mai mai a ni e. Ka lawm e.)
Comments
Post a Comment