1st. Saturday : Union Home Minister, Amit Shah chu Mizoramh a rawn zin a. Aizawl a Assam Rifles Battalion hmun thar Zokhawsanga mi leh project dang hrang hrang a rawn hawng.
2nd. Sunday : Lal Isua khawvela a len laia chawimawi na a dawn awmchhun, tumkau ni champha a ni a, kohhran hrang hrang te chuan Lal Isua chawimawiin kawng an zawh hlawm.
3rd. Monday Lunglei Municipal Council inthlan hmasa ber a vote tla te chu chhiar a ni ta a, ZPM candidate mi 11 te chu an tling vek.
4th. Tuesday : Harhna thlenni champha a ni a, kohhran hrang hrang te chuan programme siamin an hmang.
5th. Wednesday : Zoram hmun hrang hrangah kum 2023-2024 academic session atan zirna luh tan a ni. He hunah hian uniform inang tlang kalpui nghal a ni.
6th. Thursday :
Mizoram State Planning Board Vice Chairman, Pu H.Rammawi hovin SEDP Family Oriented thawh hnihna (Phase II) kalpui dan tur Aijal Club-ah sawiho a ni.
7th. Friday : Mihringte chhandam tura Isua Krista Kraws-a khenbeh a nih champha Good Friday a ni a. Kohhran hrang hrangten urhsun takin an hmang.
8th. Saturday : Buichali kiangah Bolero pakhat chesual in Tlawngah a tla lut a, hetah hian Pu Lalremsiama, Luangmual, Kolasib a SDHO, Horti.Dept.a Joint Director hna chelh lai mek chu a thi.
9th. Sunday : Kohhran Thianghlim biakin 'Davida Bawkte' chu Lunglei Ramthar vengah Pi Lalzirliani (w/o Dr. LB Sailo), Chairman, Executive Committee, Mizoram chuan Lalpa lokal leh hma zawng ami te chen nan tiin a hawng a, Souvenir a tlangzarh bawk. Biakbuk building zau zawng hi 60ftx60ft=360 Sq.ft niin kum 2009 khan sak tan na ni.
10th. Monday : Chief minister, Zoramthanga chuan Mizo Hnam Run inkhawmah tunhnaia
Lunglei Municipal Council inthlanah MNF candidate te an tlak fai vek avanga rilru a hrehawm thu a sawi a. "Lungleiah Sorkarin kan tihtur kan tih loh te, tih loh tur kan tihte avangin pawi kan ti a, an hriatthiamna kan dil a ni," a ti.
11th. Tuesday :
Mizoram KVI Chief Executive Officer hlui, Pu Lalsawmzuala chu pawisa hman khawloh leh sawrkar lehkha pawimawh tih dik loh leh lehkha dik lo siam thu-ah Court-in thiam loh a chantir.
14th. Friday :
ZPM Serlui Joint Block Conference chu Vairengteah hman a ni a, ZPM Leader, Lalduhoma chuan a hmanpui.
15th. Saturday : Bru hnam te Kût ngaihhlut ber, Bru Boisu Wai chu Vaivakawn-ah Chief Minister, Pu Zoramthanga’n a hmanpui. CM chuan Bru hnam tana hun pawimawh tak a telpui thei chu lawmawm a tih thu sawiin hlawk taka hmang turin duhsakna a hlan.
16th. Sunday : Lalfakkimi (Makfaki) kum 34, Pathian fakna hla satu chu Republic Vengchhaka a in luahah thi a hmuh a ni.
17th. Monday : Aam Admi Party (AAP) zirlai pawl, Chhatra Yuva Sangharsh Sami (CYSS) te chuan Aizawl Press Club-ah thuthar thehdarhtute kawmin sorkar sikula lut, pawl riat hnuai lamten zirlaibu an la dawng kim lo chu tha lo an tih thu sawiin pe thuai turin Mizoram sorkar an phut.
18th. Tuesday : Lunglei Jail atangin mi 5 an tlanchhuak.
Heng tang tlanchhuak te hi Ward No 2-a awm an ni a, ek in bang brick rem chu mihring leng tawka tichhiain an chhuak a, jail hungna lungbang sang tak chunga thirlen zamah an put chhuak a ni.
19th. Wednesday : Lawngtlai DC Conference Hall-ah Lawngtlai Bawrhsap, District Election Officer ni bawk, Pu David Lalthantluanga hovin Chakma Autonomous District Council (CADC)-a Member of District Council (MDC) Inthlanpui, 2023 lo awm tur chungchang ngaihtuahho a ni a. Inthlan chungchanga hriat tur pawimawh hrang hrang inhrilhfiahin, inthlan felfai leh muanawm tak a awm theih nan'a hma lak dan turte sawiho a ni.
20th. Thursday : Pu Tawnluia, Dy. CM chuan Ramhlun North Community Centre sak mek chu a tlawh. Dy.CM chuan Ramhlun chu Aizawla Veng lian leh veng hlun, mihring pawh tamna, veng changkang a ngaih a ni a. Community Centre an nei thuai tur chu a lawmpui thu a sawi.
21st. Friday : Mizoram Pradesh Congress Committee (MPCC) Treasurer, Pu Zodintluanga, MLA chuan party-a a nihna atanga a banna Party Office-ah a thehlut. Pu Zodintluanga chuan party-a a nihna bansan mahse, Congress Legislature Party Leader a nih angin, party erawh chhuahsan lovin a la awm reng tih a sawi.
22nd. Saturday : Mizoram Pollution Control Board leh Mizoram EIACP Hub tangkawp chuan ‘Earth Day 2023’ denchhenin Mizoram sawrkâr office awmna hmunpui, Mizoram New Capital Complex (MINECO), Khatlâ-ah hmankhat daih sarâng bawlhhlawh then fai hnatlâng a huaihawt a. He hnatlângah hian MPCB staff 45 an thawk chhuak thei a ni.
23rd. Sunday : K. Malsawmzela (14) S/o K.Sakhawliana (L) Darlawn chu Khanpui khaw hnuai, Hmunnghak khaw piah lawka National Highway kawng laih thar sira tui tlingah a tla hlum. He lai hmunah hian Darlawn mi tleirawl thenkhat tuiah an chenga, an rin aia tui a lo thuk avangin tuia cheng zawng zawng mi 6 te hi an in vai buai nghal vek a, harsa takin midang an in vai chhuah laiin K.Malsawmzela hi a vanduai ta a ni.
24th. Monday : Health Minister, Dr R.Lalthangliana chu Asia Pacific Leaders Conclave on Malaria Elimination, Hyatt Regency, New Delhi-a neihah khual zahawm (Guest of Honour) niin a tel. Khualzahawm a nihna angin Dr.R.Lalthangliana chuan thu sawiin, "Mizoram chhunga Health Department hnuaia district then hran pakua te zing a panga chu Malaria umbo mai thei dinhmunah a ding tawh a, chutih rualin district pali - Lunglei, Lawngtlai, Mamit leh Siaha district-ah te hian Malaria vei kum tinin an la awm thin a, hmasawnna chak zawk kan neih theih nan National Vector Borne Disease Control Programme (NVBDCP), New Delhi kaihhruaina hnuai-ah Mizoram Sawrkar chuan hma chak takin a la mek," a ti.
25th. Tuesday : K.Lalrinliana, LAD Minister chuan a Office Chamber-ah National Panchayat Awards - 2023 'Nanaji Deshmukh Sarvottam Panchayat Satat Vikas Puraskar (NDSPSVP)' lawmman pakhatna dawngtu, Ngopa Village Council te, Press mi te leh Local Administration Department Officials te lengah sawmin thingpui a inpui. Minister chuan rama Panchayat 255000 chuang zinga NDSPSVP category-ah lawmman pakhatna dawngtu Ngopa Village Council chu Mizoram tihmingthatu an nih avangin chhuanawm a tih thu a sawi.
Ni 17.04.2023 khan Ngopa Village Council hian Pi Droupadi Murmu, President of India hnen atangin New Delhi-ah lawmman hi an dawng a ni.
26th. Wednesday : Mizo Academy of Letters (MAL) chuan kum 2022 chhunga Mizo tawng Lehkhabu chhuak tha ber atana thlan, Dr. Zohmangaihi ziak 'Daidanna Bang Phena Thuruk' chu
MAL din champha lawmna inkhawm, Central YMA Hall-a neihah khuallian, R.Lalzirliana, Art & Culture Minister chuan a hlan.
27th. Thursday : Chief Medical Office, Kolasibah John LT Sanga, DC hovin Covid-19 hrileng lak a mipui kan him theih nana inpuahchahna duansa te thlir ho a ni.
28th. Friday : PC Party Policy ziahna Pamphlet chu Aizawl khawpui chhûngah sem ṭan a ni. Pamphlet sem ṭanna programme Vanapa Hall kawta neihah hian Lalrinzuala Chawngthu, Sr.Vice President chuan, Pamphlet-a thu inziak sawiin, "Pu Ṭhena'n, mamawh mila "Six Basic Needs" a siam sa leh hun inher zel mila mamawh bulpui 12 te-a innghat, Industry leh sumdawnna hmunpuia Mizoram siam kan tum dan, kan Economic Policy - "Khawlhnuh hmasawnna : Mi tin tan In leh hna" behchhana kan sawifiahna tlângpui kan tarlang," a ti.
29th. Saturday : Health Minister, Dr. R.Lalthangliana chuan Vaphai, Samthang leh Khawbung khuate tlawhin, khawtlang hruaitute leh Official-te a kawm. Dr. R. Lalthangliana chuan hripui leng avangin hun engemawchen hmasawnna hna thawh a khaihlak thu sawiin, damkhawchhuah theih nana hripui do kawnga thahnemngai taka Sawrkar tawiawm thintu mipui, khawtlang, NGO leh Kohhrante chungah lawmthu a sawi.
30th. Sunday :Michael Lalhruaizela (18) S/o Lalnunmawia Vaivakawn chu Sairang Tlawng (Chanmarikawi) ah a tlahlum a, C. Lalrinmawia (32) S/o Zoramnghinga Siahatla chu T. Ferry kaiah a tlahlum bawk.
Comments
Post a Comment