MARCH 2023, MIZO(RAM) DIARY

 

1st. Wednesday :   YMA Inkhawmpui lian 2023 thlengtu tur Biate khua chu Khawzawl DC leh SYMA Khawzawl hruaitute chuan an tlawh. 

2nd. Thursday : Group of Twenty (G20) Business Meeting chu Tanhrila Mizoram University-ah ţan a ni.MZU a G20 Business Meeting huaihawtah hian Union Minister of State for Commerce and Industries Som Parkash leh Minister of State for External Affairs Dr R K Ranjan Singh, Chief Minister, Pu Zoramthanga leh sawrkar hotu lute an tel a, ram hrang hrang 17 atangin palai  an lokal bakah, state pawn atangin palai 16 an lo tel bawk.  

3rd. Friday : Covid-19 leng vanga kum hnih chhung mipui pungkhawm zawnga hman theih a nih loh hnuah Chapchar Kût chu Mizoram pumah hlim taka hman a ni. A hmanna pui ber, Aizawl-a chuan Sipai Lammual-ah chuan Assembly Speaker, Lalrinliana Sailo chu kut thlengtu a ni a, Chief Minister, Zoramthanga Kût Pa a ni.

4th. Saturday : Mizo Zaimi Inzawmkhawm (MZI) Gen. Hqrs-in AR Lammual-ah Chapchar Rimawi Kut – Live music hlang hmangin an buatsaih a, mipuiin an hlut hle.

5th. Sunday : Buarchêpa sipai duty, Havildar Bimal Kanti Chakma chuan a duty pui, Hav. J Lalrohlua (kum 51) leh Hav. Indra Kumar Rai (kum 53) te chu a kap hlum.

6th. Monday :Chalbâwiha Junction Khankâwn police checkgate-a Champhai police duty-te chuan heroin kg. 2 leh gram 853 (hâwng 249); international market-a chêng vaibêlchhe 14/- man hu an man.

7th. Tuesday : Special Narcotics PS team-te chuan Kulikawnah heroin gram 18.08-a rit chu Lalchhanchhuaha (23), Champhai Bethel Vêng nia inchhâl kut aṭangin an man.

8th. Wednesday :   Longpuighat khuaah Chakma sakhaw hmun pawimawh, mandir chu electric kal sual avângin a kâng a; engmah chuh hman lovin in panga kâng ral a, puithiam pakhat – kum 107-a upa, Upandita Mahathero Chakma chu a kânghlum bawk.

9th. Thursday : Zo hnahthlâk Mara Kûtpui ‘Lyuva Khutla’ vawi 21-na chu district lâmmual, Siahaah ropui taka lawm a ni a; MADC CEM, Pu M. Laikaw chu Kût Pa niin kût puanzâr a pawt pharh.

10th. Friday : Mizoram State Legal Services Authority chuan awlsam zâwk leh sum leh pai sên ngai lova thubuai remna ‘Lok Adalat’ a huaihawt a, Rs. 27,77,585/- hû chin fel a ni.

11th. Saturday : Pu HC Rinpianga (56), Ṭialdawngilung khua chu a lo hâl, insaseng a tumna lamah khâmah a tla a; insaseng zo lovin a kâng hlum.

12th. Sunday : Zirtawpni zan atanga Darlawn khuaa neih Zoram Kohhran Hmeichhe Inkhawmpui lian vawi 50-na chu a tiak ta. He inkhawmpui-ah hian mi 10,077 zet palai inziaklut an awm a ni.

13th. Monday : Țiau leh Khawmawi atanga 7th Day Adventist thalai Revival camping nei tura kal zinga bike pakhat chuan Haimual Local Defense force-te bomb kam an chil puak a, bike a chuan mi pahnih te chuan hliam na tak an tuar.

14th. Tuesday : Bualte khua chuan a  khaw ram chhunga an lo vah chu an hal.  

15th. Wednesday :Chief Minister, Pu Zoramthanga chuan a minister pahnih hna chanpual a siksawi a. Pu Lalzirliana chu District Council and Minority Affairs chhuhsakin Pu Robert Romawia Royte a pe. Heti hian Pu R. Lalzirliana hian Power and Electricity, Art and Culture leh Land Resources, Soil and Water Conservation department te a la chang a. Pu Robert Romawia chuan Sports and Youth Services, Tourism, Information and Communication leh District Council and Minority Affairs department-te a chang dawn a ni.  

16th. Thursday : Vansangliana s/o Remmawia, Sihphir leh C. Lalhriatzuali d/o C. Lalthazuala, Sihphir te chu Sihphir Venglai Presbyterian Kohhran biakinah Pastor H. Lalzuiliana kutah an innei.

17th. Friday : Mizo film thar ‘Black Rose’ chu Vanapa Hall-ah Joseph Lalchhanhima, CK Hyundai chuan a tlangzarh.  Black Rose movie hi tunlai nun behchhana love story niin, hmangaihna an beisei loh dana pawh her a nih chungchang te lantir a ni.

18th. Saturday : Hrangsavunga (64), h/o Zaithanmawii (L), Sihphir chu an lo vau-ah thi a hmuh a ni a, mahnia chesuala boral a nih rin a ni.

19th. Sunday : Khawzawl Police te chuan  Khawzawl Vengtharah Truck, MZ-01/J-2434, driver Lalnunkima, Keifang nia inchhal hnen atangin Fertilizer (Urea) Bag 590 an man.

20th. Monday : Pu Lalliansawta, President, ZPM chuan zaithiam, Vanlalsailova chu midang engemawzat nen an party member ni turin a lawmlut.

21st. Tuesday :  Parliament Session neih mekah Union Minister of Ports, Shipping and Waterways Pu Sarbananda Sonowal chuan Mizoram Rajya Sabha MP, Pu K.Vanlalvena zawhna chhangin Assam rama Gharmura lei (bridge) NH 154 atanga intanin Khamrang rama NH 54 bul thlengin KM 87.136 a thui Tlawng lui chu National Waterway No 102 atana puan a nih tawh thu a sawi.  

22nd. Wednesday : Deputy Chief Minister leh UD & PA Minister ni bawk, Pu Tawnluia chuan Aizawl Smart City Project hnuaia sak mek Edenthar leh Tuivamit playground lungphum te a phum.  

23rd. Thursday : Kum 1977-a Kochi, Kerala a din, India ram pum huapa Electronics bungrua leh hmanraw lam bakah inchhung lam bungrua siamtu Company lian VGuard Industries Ltd. te chuan an company Corporate Social Responsibility (CSR) fund atangin  Central YMA hnenah tangkai taka Mizo mipui tena an hman atan Ambulance, Mahindra Supro ZX an hlan.

24th. Friday : Sihphir branch din champha vawi 85 na a ni a, YMA hall leh thlanmualah pawimawh hrang hrang thawka hnatlan a ni. Sihphir Branch YMA hi kum 1938, March ni 24 khan din a ni. 

25th. Saturday : World Water Day 2023 puala hmalakna kal zelah  Lungleiah ‘Nghasih Lui Thenfai Hnatlangpui’ neih a ni. 

Hei hi North East Initiative Development Agency (NEIDA), UD&PA, PHED, Project Save Tlawng, Clean Lunglei, KTP Venglai Branch, YMA Sub Hqrs Lunglei leh YMA Ramthar Branch te tangkawp hmalakna a niin a, mi 100 chuang hnatlang hian an thawk chhuak a ni.

 

26th. Sunday : 

Prime Minister Narendra Modi chuan All India Radio Mann Ki Baat  programme vawi 99 na thuchah a sawi a. He hunah hian PM chuan a ram mipui te chu taksa peng mamawh leh nghaktu tamtak an awm thu leh chu'ngho tana thahnemngai lehzual turin mipui min ngen. Prime Minister thusawi hi AIR, Aizawl chuan Mizo tawnga lehlinin an chhunzawm nghal. 

27th. Monday :  Vaseikai leh Longpuighat inkara Tuichawng Lei chu Truck pakhatin a zawh laiin a chim. Truck hian kawng siamnaa hman tur lung hersawm a phur a, Lei lai vel a thlenin lei hian zo lovin a chim ta a ni. Truck driver hian hliam na vaklo a tuar.

 28th. Tuesday : R.K Liansanga, kum 77 h/o Pi Lalhmasawni, Sihphir chu Synod Hospital, Durtlangah kal thalo avangin a boral.  

29th. Wednesday : PC Party President, Pu Vanlalruata chuan Mizoram sawrkar sum chèt dan mak a tih thu thuchhuah (Press Statement) siamin a tarlang.

30th. Thursday : Lunglei Municipal Council (LMC) inthlan vawikhatna chu neih a ni a, he hunah hian  voters 40,548 atangin 30,111 (74.26%) vote a tla a ni. LMC inthlana vote tla te hi April ni 3 ah chhiar  a ni ang. 

31st. Friday : Mizoram Food Processing Industries Corporation Ltd (MIFCO) Board of Directors meeting vawi 91-na chu an chairman, Dr R. Lalthangliana, Minister, Commerce & Industries etc. hovin a pisa ah neih a ni a, he hunah hian an hmalaknate an thlirho bakah MIFCO chu Mizoram Food Processing Agency (MIFPA) tia thlak an rel bawk.