Skip to main content

NOVEMBER 2022, SIH(PHIR) DIARY



1st. Tuesday : Twin Market-ah gram sabha neih a ni. Inkhawm hi VEC Vice Chairman, Pu Lallura'n a kaihruai.


2nd. Wednesday :   Pathianni thleng awh tur 217 batch Lay Leaders' Training chu SMTC, Mission Vengthlangah neih tan a ni a, he hunah hian Venglai upa thlan thar pali an tel. Anni hi kum 2019 nemngheh te kha an ni.


3rd. Thursday :

Tv Lalrinchhana, kum 23 s/o Lalrawna, Chhanhim Veng chu ZMC, Falkawnah  'Accident' (kang) avangin a boral. 


4th. Friday : V/C te

kaihhruainain Twin Market-ah YMA, MUP, MHIP,

SR & AC, veng welfare, Kohhran hrang

hrang leh Kohhran thalai aiawh te

khawtlang sual dona kawnga tan lak

dan tur ngaihtuah in an  inrawnkhawm.


5th. Saturday : Sihphir Pastor Bial UPC hnuai-a Lay Auxiliary Department te chuan ni hnih awh tur Revival Meet chu Zanlawnah an nei tan.


6th. Sunday : Khawvel Sunday School ni a ni a, tualchhung kohhran hrang hrangah hman ve a ni.


7th. Monday : Chief Minister, Pu Zoramthanga chuan OP-12 Bio-fertilizer Production Unit, SEDP hnuaia Agriculture Department in a buatsaih chu Agriculture Research Farm, Neihbawi-ah a hawng a, Neihbawi rama field laih mek chu a tlawh nghal bawk.  


8th. Tuesday : Sihphir Branch YMA buatsaihin Mizoram Public Service Commission in 2022 competative exam a buatsaiha Mizoram Police Service (MPS) a in ziak tling, Tv Lalnunhlua (Hlutea) s/o Lalhriatpuia, Damveng, lawmpuina leh chawimawina hun YMA conference hall-ah hman a ni.

He hun hi Tv Vansangliana, Branch YMA secretary chuan a kaihruaia, Tv C Lalremsanga, Chairman Education cell, Br.YMA chuan hunserh a hmang thung.


9th. Wednesday : Tv Eddie Lalhmangaihzual, VCM chuan tunlai-a khawlai-a ui chhuak tam lutuk leh an tawp bawk si a veina thu chu Social Media kaltlangin a tarlang a, PET CLUB din a,  awmze nei taka ui vulh ṭha zawk nia a hriat thu a tarlang.


10th. Thursday :  V/C te ruahman angin Community Hall chu Branch Y.M.A. hnenah neitu nihna pek a ni. Lekha-ah hian VCP, Pu Lalropuia Pachuau chuan hming sign in, Secretary, Pu PC Lalrinliana chuan hriatpui tih hming a ziah hnan a, Tv Zohmingliana Hnamte, YMA President chuan dawngin, Tv Vansangliana Secretary chuan a hriatpuina hming a ziah hnan ve bawk.


11th. Friday : K Vanlalchhunga s/o

K Rohlira, Tamlo veng leh Lalremruati,

Muanna veng te chu Isua Krista

Kohhran Biak Inah an innei.


12th. Saturday : Sihphir Painter Club te chu YMA Conference Hall rawng hnawih in an hnatlang.


13th. Sunday : Lianchhungi, kum 87 m/o Joseph Lalsangzuala,  Dam veng chu tukin Asthma natna avangin an chenna Inah a boral.


14th. Monday : V/C huaihawtin khawtlang hnatlang hnatlang neih a ni a, khawchhungah hna pawimawh engemawzat thawh a ni.


15th. Tuesday :  Retailer I, II leh III-ah te ration buhfai sem tan a ni.


16th. Wednesday : Venglai KTP te chu  Durtlangah pandal structure load in an hnatlang.


17th. Thursday : Thianghlimi, kum 72 w/o Lalnuntluanga,  Kawn veng Civil Hospital, Aizawlah 'Lungna' avangin a boral a, Tv Lalrinsanga, kum 29 s/o Vanlalhruaii  Kawn Veng chu an chenna Inah "Accident" avangin a boral bawk.  


18th. Friday : V. Lalrindika leh Lalchawimawii, Kawnveng te inneih 23rd anniversary a ni a,

Social Media kaltlangin mi engemawzat in lawmpuina an hlan. Anni hian fa pathum an nei a ni.


19th. Saturday : Tv Donald Lalhmangaihzuala, kum 42 s/o V.L Chhuanga,  Neihbawih chu an chenna Inah 'Lungphuchawl' in a boral.  


20th. Sunday : UPC-NEI, North Mizoram District Sunday School Conference vawi - 41 na chu North Mizoram District Chaltlang Bial chuan Bawngkawn Kohhran Biak inah an hmang a, Sihphir atang in bialtu Pastor, Rev. B Vanlalruata ho in kohhran hruaitu engemawzat an tel.


21st. Monday : Pu Lalngaizuala, Neihbawi te in chu misualin an rawka, pawisa engemawzat bakah an phone la thar tha tak an la.


22nd. Tuesday : Pu Lalnuntluanga h/o Thianghlimi (L) te chuan an chenna inah Pathian an chawimawi. He hunah hian chhungkhat laina leh thenrual thate an pungkhawm a, tlaiah chawhlui an kilho nghal.


23rd. Wednesday : Branch YMA te chu Chiahpui Resort, Lengpui ramah kumtawp committee neiin an kal.


24th. Thursday : Pu Zoramthanga Bialtu MLA, Chief Minister ni bawk chuan a bial fangin Sihphir min rawn tlawh a, Lal Rohrenga Hall- Kawnvenga hun hmanna-ah Pu Zoramthanga chuan thusawiin, "Hun chep tak karah ka bial te fan ṭul ka ti hle tawh a, Sihphir khua pawh hmasawnna hnathawh tawh leh thawh tur hrang hrangte hma chhawp a awm a ni", a ti.


25th. Friday : F. Lalchuailova, kum  54 f/o Lalramdina, Tamlo Veng chu vawiin Aizawl Civil Hospital-ah 'Thisen sang' avangin a boral.  


26th. Saturday : Sihphir leh Hmarveng Kohhran Hmeichhia te

chuan Kohhran Hmeichhe

ni an hmang. Kohhran hmeichhe ni hi November Zirtawpni hnuhnung ber a ni a, Sihphirah chuan bazar chaw lak ni te a nih avangin a hun hi an sawn a ni. Hetih lai hian Venglai kohhran erawh chuan an kohhran huamchhungah chhiattawk an awm avangin karleh lamah an hmang thung ang.


27th. Sunday : Sihphir Pastor Bial Kohhran

Pavalai Pawl ten Zirtawpni atanga Intawhkhawm an hman chu a tiak ta. He hunah hian  Speaker-ah Rev.

Lalsangbera, Director FG & CC an hmang a ni.


28th. Monday : T.C Lalmawia, kum 58 H/o R. Lalchhuanmawii, Dinthar veng chu Greenwood Hospital, Aizawlah 'Jaundice' natna avangin a boral.  


29th. Tuesday : Venglai Kohhran hmeichhia te chuan kohhran hmeichhe ni chu hlim takin an hmang a, tlaiah chawhlui an kilho nghal. Kohhran hmeichhe ni hi kar kalta Zirtawpni kha a ni na a, rokhawlhna avangin a hun hi sawn a ni.


30th. Wednesday : Venglai kohhrana Sakrament department zirlai mi 22 te chu kohhran puitling (dan zawhkim) turin bialtu Pastor, Rev. C. Sapkaia chuan a lalut a, an pual hian Lalpa zanriah sakrament a theh bawk.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

THLAZING

  (Sawiremtlang editorial) August thla han hman meuh chuan chhum a zing phui chuai reng mai a, upa ten 'thlazing' an lo ti pawh hi a awm viau mai. Amaherawhchu, heta thlazing tih hi pi pu te thla hming pakhat emaw ti kan awm leh mai thin. Mizo thla chhiar danah chuan Thitin thla a ni tih i hria ang u khai. Hmanlai chuan mitthi te hi pialrala kal nghal mai loin kan velah hian an la tap thin a, August thla hian mitthi khua an pan thin nia an ngaih avanga thitin thla ti pawh an ni niin a hriat. Chuvangin, August thla hi Mizo thla chhiar dan chuan thitin thla tihna a ni a, thenkhat ten thlazing tia an sawi erawh thla hming ang niloin tun thla chu chhum a zing chuai reng mai an tihna a nih chu. Mizo thla chhiar dan hriat hi kan mawhphurhna ni ve in a langa, thla chhiar dan mai bakah an nunphung te pawh hi hriat ve hram hram I tum ang u. August thla chu a zo ruai chu a ni leh ta a, ni reilo te-ah Ber thla kan kan kai anga, derhken, nuaithang, anthur leh senhri nu ten par an chhuang l...
Post a Comment
Read more