Primary School I, Arpu a ni a, YMA chhang inthlan mek a ni. Finance Secretary atana thlan, Diktea tukverhah a zuanchhuah daih avangin inthlan buaipuitu te chuan a phatnaah ngaiin inthlan that a ni a, ka tling ta nawlh mai! Hemi kum YMA Day hian keini YMA chhang te chuan day hmanna hmun High School-ah hian dawr kan siam ve a, YMA day a ka kalna hmasa ber a ni nge nghe.
Phak ang tawk tawkin OB chanvo chu ka'n chelh ve naw naw a ni a, ka tihtur ka ti tlem hle. Thing delhloh, lung delh loh na na na chu YMA puitling member rual ka lo ni ve ta. 'Kumi'n chu YMA-ah inhmang ve tawh teh ang' ka intih rilruk rauh rauh laiin section committee member a ruatna ka dawng zet chuan min ti phur ngei mai. Sub-committee peng pakhatah min han ruat ta lehnghala, hetia'nga chanvo han neih hi midang chu an lawm lem hauhlo ang. Kei erawh ka lawm tlat a nih chu. General Conference kan kal dawn a, kawng lakah kan hruaitu ten rorel palai tur a ruat an kal kim theihloh avangin tlawngngaia tel thei tur an rawn zawng a, kan thianpa pakhat chuan fiamthu hian min lo rawt zauh pek a. Hruaitu te chuan an pawm ta mai. Rorel palaia tel tur pawha inngai ngailo kha rorelnaah ka thu ve ta ran mai. Hetiang inkhawmpui lian lutuka tel ve takah chuan sawi ve reng rengah tiin ka dingchhuak ve hial. Vawiin thlenga ka sawi a la ni ta nghe nghe a nih hi.
Theihtawp chhuaha ka inhman ve mek laiin Israel rama kal ka tum ve mauh mai. Israel Zofate zingah YMA kan din theih mial takin tiin life member ka ni ve ta hial. Life member han nih ve tak rupah chuan theih tlem hle mah se phak ang tawkah ka tang lehzual hle.
Aizawl veng pakhatah YMA duty ten an mi man pakhat chu dawpna lamah an tihlum nia ngaih theih turin thil a thleng tlat mai. Kut inthlak hi ka thlawp tihna ni lo mah se a tul chang a awm ve thei ni a ngai tu ka ni ve. Chuvangin, ti diklo ti hle mah ila, sawi tur ka neilo. Kutthlak tute tanin atanga an lo chhuak chawimawi na parthi an lo awrh tir kha erawh pawi ka tiin ka dem takzet. He thil thleng avang hian Padma Shree, Pi Khawlkungi'n a chawimawina dawn a hlan let a, YMA life member thenkhat pawhin an member nihna an bansan hial a nih kha. Hei hi hriain keipawh in 'ka life member nihna hi ka bansan ve mai dawn emmaw'nle?' tiin ka inkhap ve nasa hman hle. An nihna bansan tu te kha mi hlu tak tak an nih hlawm avanga Zoram khawvela mi lar tak tak an ni hlawm. Chu'ng ho kara keiin nihna lo bansan ve ngawt hian awmzia a nei dawna ka hriat leh takloh avangin ka rilru ka sawhsawn leh ta zawk a ni.
Section inthlan a lo huna, inthlan buaipuitu te chuan inthlan dan turah member te kan duh dan min rawn a. Nomination siam a inthlan kan rel thlu ta. Treasurer thlan a lo huna, nominate atan min rawt tu an awm tlat. Nominate dang an awm tak siloh avang chuan thlan buai ngailoin ka tling ta a nih chu. Hei hian min hruai tha hle thung a, Executive Committee member ah tel zuiin vawiin hi kan lo thleng ta a ni.
Ka thawhpui te lakah ka tlinlohzia ka inhre chiang hle a, kan tangkai lo viau chunga kan thiltih ve chhun min hmuh len saka min fak thin te hian min ti phur thin. Ka tih dikloh leh tih awmloh tak ka tih laia min khak hrehlo hruaitu tha tak hnuaia awm chu a thlamuan thlak takzet a ni.
YMA hi Mizoram a tlawmngai pawl lian ber angin kan sawi thin. A dik viau naa, tlawmngai pawl ang mai maiah chuan uiawm ka ti. Mizo hnam pawl ni zawk hialin ka hria. Kawng hrang hrangah sorkar kutke ber a ni a. An thu pawh sorkar pawhin an ngai pawimawh viau thin reng a ni. Hetih rual hian sorkar in a tih duhloh ti turin a nawr fo nia ngaih theih tur thil a thleng leh zeuh thin a, YMA lam lahin kan duh apiang tih tir mai kan tum niawma ngaih theih tur thil a awm ve leh zeuh thin bawk. Member vek kan ni a, chuvangin, a that leh kan mawi a, an changrel a sual deuh a lan chang pawhin deu mai loin kawng dik zawk kawhhmuhtu nih i tum theuh ang u.
YMA DAY CHIBAI VEK U.
Comments
Post a Comment