MAY 2022, MIZO(RAM) DIARY

1st. Sunday : Mizoram Police-te chuan Kelsih daiah puakthei leh ralthuam thahnem tham tak bakah ralthuam phurhna atana pickup truck pahnih leh a lirthei neitu leh khalhtu ni bawk mi 2 an man. He'ng ralthuam phurtu a rinhlelh pickup truck neitu leh khalhtu ni bawk te hi Lalbiaktluanga, kum 42, Mualpui Bethel veng leh Zoremsanga, kum 42, Tlangnuam West te an ni. Kulikawn Police Station-ah thubuai ziahluh a nghal a ni. 2nd. Monday : Chief Minister, Pu Zoramthanga chuan Zemabawka Bus dinkhawmna siamna tur hmun remchang a en. Chief Minister hi PWD Architect-te leh khawtlang hruaitute’n tawiawmin Bungbangla-a hmun remchang awm thei an lo thlithlai tawh chu a hmunah an enfiah a ni. 3rd. Tuesday : Lengpui Airport-ah Union Minister of State For Minority Affairs, Pu John Barla leh Sports Minister, Pu Robert RomawiaRoytete chu inkawmin Mizoram hmasawnna tur hrang hrangte an sawi dun. 4th. Wednesday : Fundamental Baptist kohhran te chuan Civil Hospital tan thisen unit 29 an pe. Thisen petu te hi mipa 25 leh hmeichhia 4 an ni. 5th. Thursday : Mizoram Presbyterian Kohhran hnuaia Kristian Thalai Pawl (KTP) General Conference vawi 59-na chu Kolasib Diakkawn Field-ah neih tan a ni. 6th. Friday : Zan khat riaka lo zin, India President, Pu Ram Nath Kovind chuan Mizoram chhuahsanin New Delhi a pan a. President hi Thuampui Helipad atangin Governor Dr Hari Babu Kambhampati, Chief Minister Pu Zoramthanga leh mi pawimawh dangten an thlah a, Lengpui Airport atangin Home Minister, Pu Lalchamliana leh official ten an thlah bawk. 7th. Saturday : IOC chuan eirawngbawlna Gas man chu ram pumah Rs 50/- zelin a tisang leh. 8th. Sunday : Mizoram chhunga Kohhran Thalai Pawl zinga inkhawmpui lian ber Kristian Thalai Pawl (KTP), General Conference vawi 59-na, Ningani zanna tan chu a tiak ta. 9th. Monday : Transport department chuan atang hian Aizawl leh Behliangchhip (Tripura) inkarah Mizoram State Transport (MST) bus a tlantir tan a, ticket pakhat Rs 476/- man a ni ang. 10th. Tuesday : Chakma Autonomous District Council Budget Session neih mekah Chief Executive Member, Rashik Mohan Chakma chu rin tawk lohna motion pu lutin paihthlak a ni. 11th. Wednesday : Aizawl District Bawrhsap, Dr Lalhriatzuali Ralte hovin District Level Task Force on Covid-19, Aizawl District chuan Review Meeting an nei a. He hunah hian Covid-19 dinhmun leh School Inspection Team te hmalak dan tur te sawi ho a ni. CMO (Aizawl East leh West) ten Covid-19 dinhmun leh vaccination coverage report an pe a. District Education Officer, Aizawl pawhin report a pe a. Covid-19 hripui leng mek laka mipui kan himna tura District Level Task Force in hma a lak dan tur chungchang te pawh sawiho a ni. 12th. Thursday : Information & Communication Technology (ICT) Department in a buatsaihin ‘Government Online Excellence Awards 2021-2022’ hlanna leh ‘Web Monitoring System’ leh ‘Online Domain Registration System’ tlangzarhna neih a ni a. Larsap Hari Babu Kambhampati chu khuallian niin, ICT Minister Robert Romawia Royte chu khualzahawm a ni thung. 13th. Friday : Lelte chanchinbu editor, C. Dinthanga lehkhabu buatsaih, C. Dinthanga hla te tih lehkhabu chu Aijal Club-ah tlangzarh a ni. 14th Saturday : ZPM Party PAC member, TBC Lalvenchhunga chuan Lunglei Press Club-ah chanchinbu mite kawmin, "Kan hriat theuh angin Mizoram sawrkar chuan kumin chhûng ngeia Lunglei Municipal Council inthlan buatsaih a tum thu UD&PA changtu, Deputy CM-in a sawi nawn leh avângin keini ZPM Party chu kan theihtawpin kan inbuatsaih nghâl a. Municipal din tûra Ward Delimitation pawh tihfel a la ni lo chung leh a thlang thei tu tur electoral roll pawh ruahmanna felfai la awm lo, thuneihna a ken chin tur emaw ruangam, executive body pawh la peih loh, sum leh pai mamawh atân budget-ah cheng nuai 80/- chauh dah nimahse keini party chu inthlan hmachhawn thei turin kan theihtawpin kan inbuatsaih a ni", a ti. 15th. Sunday : Champhai Police te chuan random checking neiin, Mualkawi khaw daiah heroin, sahbawn bawm 5 a thuhruk, grams 62 a rit, local market-a ₹ 2.5/- lakhs leh international market-a ₹ 31/- lakhs man hu chu, Lalrintluangi (46) d/o Zaithuama, Zokhawthar kut atangin an man. 16th. Monday :12th. MADC sorkarna chu MNF & INC Jt. Legislature Party sorkarna a piang ta. CEM atan Pu H. Malvina, Phura Bialtu (INC) a ni ang a, Dy. CEM atan Pu H. C. Lalmalsawma Zasai (MNF) Amotlah bialtu a ni thung ang. 17th. Tuesday : Mizoram Board of School Education (MBSE) chuan kumin-a pawl 10, High School Leaving Certificate (HSLC) Exam result chu tichhuakin Exam hmachhawntu zirlai 17,417 atangin mi 12,304 (70.64) in hlawhtlinna an chang a, Comparmental Chance nei mi 185 an awm bawk. Tin, zirlai pass vekna School 98 awmin fail vekna School 15 a awm thung! 18th. Wednesday : Dawrpui Multipurpose Centre-ah Myanmar ram atanga sual sipai te thuneihna pawnglak avanga buaina namen lo chhuak avanga mahni sahimna zawnga Mizorama rawn raltlan Aizawla awm te chuan Aizawl Civil Hospital a a mamawhte apiang hman theih turin thisen pek runpui an nei a, an thupui chu "Thisen pe in, Mizoram mipuite hmangaihna chhanglet rawh" tih a ni. Thisen petute hi mipa 36 leh hmeichhia 12 an ni. 19th. Thursday : Pickup no AS01 MC 6254, driver, Anjit Kumar Singh s/o BS Kumar Singh chuan fimkhur lo taka motor a khalh avanga midangin an tawrh a vanga Keifang leh a vela mipui thinrim chuan driver hi hnukchhuakin motor hi a lo in kam silo a, a lir zui. A tlakna a sanglo na in a chhe ve hle in a lang. 20th. Friday : Hnahthial-a Community Service hmang mek Lunglei Nursing School Principal, zirtirtute leh General Nursing and Midwifery (GNM) kum thumna zirlai naupangte chu Hnahthial District Bawrhsap Pu R. Lalremsanga chuan lengah sawmin DC Conference Hall-ah inkhawmna hun an hmang. He hunah hian Hnahthial District Bawrhsap Pu R.Lalremsanga chuan Hnahthial District dinhmun leh damdawi in dinhmun tlangpui a hrilhfiah. 21st. Saturday : Law & Judicial Minister, Pu T.J. Lalnuntluanga chuan Tuipui khuaa Boxing Hall sak mek chu a hmunah tlawhin a enfiah. 22nd. Sunday : Doctor lar, Dr.Thangchungnunga (68) h/o VL Rammawii (L), Dawrpui chu Gout, Spine Infection, psoas Abcess leh Septicemia avang te in Civil Hospital ah a boral. 23rd. Monday : School Education Minister, Pu Lalchhandama Ralte chuan Mizoram Middle School Teachers Association (MSTA) Silver Jubilee MSTA Office, Teachers Inn, Zarkawta lawmna hun a hmanpuinaah sorkar school-a lut duh naupang an pung zel a, hmun thenkhatah phei chuan dawhkan siambelh hial a ngai tawh tih a sawi. 24th. Tuesday : H Vanlalvena (49) w/o Lalbiakmawii, Sihphir chu kal thalo vangin LRM Hospital-ah a boral. 25th. Wednesday : Sakawrhmuituai tlangah EF&CC, Village Council te leh Japan company (JICA) ten hmalak tawhna leh hmalak zel dan tur an en ho. 26th. Thursday : Thinghlun khuaa ruahsur avânga ramhnuai a tawmhulna zawnga khur a awm naupang pahnih chu an tawmna lei chimin a delh a, Lalromawia (12) s/o Tluanga chu lei chim avang hian a boral. 27th. Friday : Pi Lalhlunthangi (71) w/o Ralliana Tlungvel chu lungna avangin a boral. Vui anih dawn laiin a pasal Ralliana (75) chu a boral ve leh. 28th. Saturday : Special Narcotics PS team (CID Crime) te chuan Heroin, grams 25.32 a rit, International market-a nuai ₹ 13/- man hu chu, Lalnuntluangi (38) w/o F. Lalthlamuana, Hunthar veng, kut atangin, Hunthar vengah an man. 29th. Sunday : Kawnpui-ah lung tla buaipuia duty, Pi Ramdingliani Pautu (Mampuii) JE, PWD, Thingdawl Sub-Div Santro, MZ 01 L 8551 kawng sira a dah chu a chhan hriat lohin a kâng. A kan chhiat lutuk hmain thelh mih a ni. 30th. Monday : Save Chite Lui Coordination Committee chu an Chairman, Dr Renu Sharma, Mizoram Chief Secretary hovin Chief Secretary’s Conference Hall, MINECO ah member te an thukawm. 31st. Tuesday : MBSE in HSSLC 2022 Result a tichhuak a; Lalrohlui Ralte, Synod HSS (Arts); Simon Lalremsiama Shangliang, St. Pauls HSS (Science) leh Mercy Laltlansangi, Oikos HSS(Commerce) te chu stream tina Topper theuhte an ni. Kumin HSSLC ah hian zirlai exam tura inlan 11908 awmin, passed 9773 an awm a, failed 2068 an awm thung. Pass percentage hi 82.07% a ni.