Kan pipu te khan thukah thil an chhuan dawnin chhuanchhan atan lung pathum an hmang thin a, chu chu 'lungthu' an ti. Pathum a tlinloh chuan bel a chhuan theih meuh thin lo. Pathum hi nambar pawimawh tak a ni hrim hrim. Thil engemaw tih nikhuaah tan lak na'n 'khat hnih thum' tiin kan tang thin a nih hi. Chutia'ng bawkin lemchan lamah pawh a changtu pa chu a vawithumna turah meuh chuan hnehtu an ni tkangpui bawk.
Heti a nih avang hian thil chi hrang hrangah pathum chu 'lungthu kim' tiin kan sawi ta fo mai. Tuntuma kan thil sawi tum chu kum 2020 chhunga kan chhungkua atanga ruang pathum ngawt a chhuah chungchang hi a ni. Chu chu 'lungthu kim' tiin ka'n vuah ve ngawt mai.
1. January ni riat, Nilaini zing a ni a, ka ram riah na atangin ka nupui fon call a lo thleng a, ka nu fapa, David-a thih thu hriattirna a lo ni. Haw'n tur nge hna a tul si a, ka haw lo mai dawn? ti'a ka inkhap mek laiin a ruang chu ka pa inah a awm tur thu a rawn sawi leh ta. Haw'n ngei ngai ni'a hriain ka haw ta. David-a, kan unaupa chuan min kalsan a nih chu. Ama duhthlanna ngeiin ka pa inah a ruang hi lak a ni.
2. May ni 25, Thawhtanni tukthuan eikham hlim a ni a, hnathawk tura ka insiam mek laiin kan monu, BDi'n min rawn fon a, ka chhang chiah, Lalremtluanga mu an kaihthawh zawhloh thu hriattirna a lo ni. Rang takin ka pa inah ka phei nghal. A harh theih mai loh avangin Synod damdawi inah kalpui nghal a ni. Damdawi inah hian ni sawm a awm hnu in a boral. Ka pa in atangin kumkhat chhungin ruang pahnih ngawt a chhuak a nih chu. A rapthlak ka ti kher mai. Kum 1988 khan ka nu hian min boral san a, khatih lai khan naupang chhia mai ka la nih avangin ka la na tehchiam lo. Tunah kan unau zinga mi ngei kan han chan leh ta a ni a, rilru a na duh kher mai.
3. Kan unau zinga naupang ber, Robert Lalrinnunga (Nanunga) chuan December ni 27 khan min kalsan leh ta. Kumkhat chhunga in khat atanga hetizat zat an han boral mai hi keini a chhungte tan chuan a na ve thlawt a ni.
Nanunga hi kum 1996 February ni 23 khan a lo piang a, a sen lai atanga naupang fel tak niin a tap ngai meuhlo a, thawhhlima naute an tap mai thin ang te pawh a ni chu a tap ve mai mai lo. Nau inngaitlawm leh mi tawng tlem tak a ni bawk. Tlangval taima leh thawhhreh nei lo. A tul a nih chuan ram riah mai pawh hrehlo mi a ni. January ni 14 khan hna kan thawk dun a, hei hi kan hnathawh dun hnuhnung ber a ni ta. Tin, June ni 18 khan kan ram riahna-ah hna thawkin an rawn riak ve a, khum khata kan riah dun hnuhnung ber a ni ve thung. October ni khat khan a Aizawl kal turin kan kawtah motor a rawn changa, kan balhla thar te ka lo pe a, hei hi ka biak hnunung ber niin a aw ka hriat hnuhnung ber a ni ta nghe nghe.
Tunhma atangin khawlai a kan inhmuh tawh chuan biak lohin ka chhuah ngailo. October ni 15, Ningani tlaiah kan kawt a rawn kaltlanga, hemi tum hian ka lo be hauhlo! Mak pawh ka inti hle. A kalna pawh ka enzui zel a, mak ka inti angreng khawp mai. A rawn haw lam pawh ka lo hmu tho a, ka belo leh pek!
A damloh leh a buai dan engmah ka lo hrelo. Ka hriat leh hmasak ber chu damdawi ina kalpui a nih thu leh nikhaw hreloa a awm thu a lo ni! Damdawi inah hian zan 16 awmin doctor te chuan in lama in enkawl turin min chhuah. In lamah chuan theihtawpin kan enkawl ve ta. A mah a harh miau loh avangin a changin kan thlaphanga, a changin kan lawm thung. Thil a hriat leh hriatloh kan hriat miau loh avangin tawng pawh fimkhur a ngai hle. Bible te chhiar sakin hla te pawh kan play sak awl lo. Chutia'nga theihtawp chhuaha kan enkawl hnu chuan December ni 27, Pathianni chuan min kalsan ta.
Kum 2020 hi khawvel puma hripui leng avanga kumchhia a nih tawh tehlul nen, kan chhungkaw tan chuan kum chhia a ni lehzual awm e.
Comments
Post a Comment