1st. Tuesday : Lalbiakenga (41) S/o Saii, Falkland Branch YMA Covid-19 avangin ZMC ah a boral.
2nd. Wednesday : National Pollution Prevention Day a ni a, he ni pual hian Mizoram Pollution Control Board chuan (MPCB) chuan thuchah a tichhuak. He hunah hian Aizawl chu India rama state khawpui thianghlim ber a nih thu tarlan a ni.
3rd. Thursday : Ni hnih awh tur, Mizoram Science Congress 2020 chu chief minister, Zoramthanga'n video conferencing kaltlangin a hawng.Mizoram Science Congress hi Mizoram Science, Technology & Innovation Council (MISTIC), Mizoram Science Society, Science Teachers' Association Mizoram, Mizo Academy of Science, Biodiversity & Nature Conservation Network, Mizoram Mathematics Society leh Geology Society of Mizoram-te buatsaih a ni.
4th. Friday : Lai Autonomous District Council (LADC) chhungah member of district council (MDC) inthlanpui buatsaih a ni. Vote 83.68% a tla. LADC-ah hian MDC seat 25 a awm a, MNF-in seat 25, BJP-in seat 17 leh INC-in seat 14 an chuh a, Independent candidate 18 an awm bawk.
5th. Saturday : Krishi Vigyan Kendra (KVK) Kolasib chuan KVK Training Hall-ah 'World Soil Day' an hmang. He programme-ah hian Dr. Michelle C. Lallawmkimi, Senior Scientist & Head chuan programme a kaihruai a, Pu V. Vanlawma, District Officer, Land Resources, Soil & Water Conservation Department, Kolasib District chu Khuallian a ni.
6th. Sunday : ZMC Covid-19 Laboratory chu tihfai (cleaning & fumigation) a ni.
7th. Monday : Aizawl Municipal Corporation (AMC) sorkar term kal mek chu tawp dawn mah se, pawhsei a ni dawn lo. Hei vang hian Mizoram sorkar chuan AMC enkawltu turin AMC commissioner ni lai, K Laldingliana chu administrator atan a ruat.
8th. Tuesday : Mizoram sorkar chuan Inspector General of Police (Law & Order) ni lai LH Shanliana, IPS chu Additional Director General of Police (Addl. DGP) atan a dah. LH Shanliana hi AGMUT cadre, 1998 batch a ni.
9th. Wednesday : Dr Lalṭanpuia (43) s/o John Lianzauva (L) Kulikawn chu a áwmah vih a ni a; damdawi-inah hruai a nih hnuah a hliam tuarloin a thi. A vit tua puh, a nupui Mary Zothansangi chu police-in an man nghal.
10th. Thursday : North Vanlaiphai VC thlan ṭhat a ni a, mipuiin vote an thlâk zawh hnuah vote tlate chhiar nghal a ni. Inthlanah hian MNF candidate pali, ZPM candidate pakhat leh Congress party candidate pakhat an tling a; hmeichhia pakhat tih loh chu August 27, 2020-a inthlana tlingte vek an tling nawn.
11th. Friday : Covid-19 vei State Referral Hospital (ZMC)-a enkawl lai MK Roy (83), BSF camp, Durtlang North-a awm chu a thi a, Mizorama Covid-19 positive thi pasarihna a ni.
12th. Saturday : Canteen kual, Aizawlah bike, Stallone Lalhriatpuia (30), Saron Veng a mi khalh chu chesualin truck lehpelh a tumna lamah truck hnuaiah a inbarh luta, a hliam tuar loin a hmunah hian a boral nghal. .
13th. Sunday : State Referral Hospital-ah Covid-19 vei mi 12 an awm mek a, an zingah kum 60 chung lam mi pali leh kum 14 hnuai lam mi pakhat an tel. Mi 12 zinga pakhat chu ICU-ah enkawl niin, oxygen pek a ni a; mi dang zawng Isolation ward-ah awmin, mi pathum chu oxygen pek an ni.
14th. Monday : Cabinet minister, Dr R Lalthangliana chu eirûk thubuai pathumah Special Judge (Prevention of Corruption Act) Vanlalenmawia chuan thiam a chantir. April 19, 2012 khan MPCC mi leh sa Lalthanglura Ngurte chuan chanchinbua article chhuak behchhanin Dr R Lalthangliana lakah hian Anti Corruption Bureau (ACB)-ah FIR a thehlut a ni.
15th. Tuesday : Urban Development and Poverty Alleviation (UDPA)-in an sak thar, MINECO Multipurpose Hall chu UDPA changtu deputy chief minister, Tawnluia'n a hawng. Tawnluia chuan, National Urban Livelihoods Mission (NULM) aṭangin Mizoramah self help group 1,440 din a nih tawh thu sawiin, NLUM hmangin khawpuia mirethei chhungkaw nute an inpuih tawna tur thawhhona ṭha siam a nih thu a sawi.
16th. Wednesday : Salvation Army Territorial Outreach Mission Board meeting chu THQ Board Room-ah Commissioner, Lalzamlova TC kaihhruainain neih a ni. Meeting-ah hian Corps Missionary Board inkaihhruaina thar ruahman a ni a, Ramthim rawngbawlna hmachhawp hrang hrang leh thawktu lak thar chung chang sawi ho a ni bawk.
17th. Thursday : Home minister, Lalchamliana chuan Mamit district chhunga Assam leh Mizoram inrìnaa Mizo IR police duty-na hmun Thinghlun leh Medili a tlawh.
Home Minister chuan, ramri buaina avangin sipaite'n Krismas leh kumthar pawh an chhungte bulah hmang thei loin ramri-ah an duty a ngaih thu a sawi a, "Ramrite uluk taka venhim a pawimawh," a ti.
18th. Friday : Hnahthialah chief minister, Zoramthanga, Horticulture department enkawltu chuan District Horticulture Office (DHO) a hawng. He hunah hian Chief minister chuan, mau chu Mizoram economy siamṭhatna tur a nih thu a sawiin Horticulture department a pawimawh thu a sawi a, "Thlaia Mizoram intodelhna tura hma latu an ni a, chu aia pawimawh chu bamboo (mau) hi a ni." a ti.
19th. Saturday : Khawbung JAC te chuan Burma zu BEDC fun engemaw zat an man a, chu chu an halral nghal.
20th. Sunday : NT Lalbiakkima chuan a professional boxing zinkawnga a hmasa ber atan Marine Pro Boxing Promotion Warrior Series 2020 chu Mumbai-ah khelin 1st Round-ah a khingpui chu TKO in a hneh.
21st. Monday: Siaha District Amotlah khua atanga December ni 16 atanga bo, North Vanlaiphai tlangval, Peter Lalchhanhima chu Saiha khawpui atanga hmar lam KM 35 vela hla Tuisumpui luiah dama hmuh a ni.
22nd. Tuesday: Covid 19 vei enkawlna CCC atanga negative result neia November ni 22 a chhuak, a tuk November ni 23-a chatuan ram a pan zui tak avanga a thih hnua a sample test positive, R. Hrangthanga, Police Training School (PTS), Thenzawl chu a thih chhan chhui chian a nih hnuah Covid19 vanga thi a nih thu sorkarin a puang.
23rd. Wednesday: Dr. C. Lalhrekima rawna Aizawl kal, chi hriatloha bo zui ta Lalhriata s/o Lalchullova, Kolasib chu Durtlangah dam taka hmuh a ni.
24th. Thursday: Government of India, Ministry of Agriculture & Farmers Welfare Secretary hnen atangin Mizoram Sawrkar chuan thu dawngin December 25, 2020 chhun dar 12:00 chiah chiahah PM Kisan Samman Nidhi Yogana instalment Rs. 18,000.00/- Crore lai mai chu Prime Minister of India, Pu Narendra Modi ngeiin India rama loneitute (Mizoram tiamin) hnena rawn release a tum thu an rawn hrilhna a ni. He thu hi Chief Minister chuan ngun taka a ngaihtuah hnuin, Prime Minister Pu Narendra Modi-a hnenah lehkha ziak nghalin Kristiante ni pawimawh ber Christmas ni ber khera sumfai rawn release an tum chu a hriatthiam loh thu leh, Mizoram Sawrkarin State Holiday-a a lo puan ve kan ni pawimawh tawpkhawka kan Kristian rinna pawtpeng thei zawnga Central Sawrkar ruahhmanna awm hi Mizorama Kristiante mai ni lovin, India rama Kristian zawng zawngte aiawhin a hun sawn mai turin a ngen nghal.
25th. Friday : Mualcheng khuaah Hrangzuala (75) leh a fapa Pu C. Laltlanchhunga (49) te chu hun rei tak dam lohna vanga enkawl an nih hnuin an thi. A fapa zawk hi nupui fanaute nen In hrang changin a awm tawh na a, vui dawnah inpui lama lak a ni.
26th. Saturday : Thenzawl leh Buarpui inkarah Getz Car MZ 01-D-9154, Imanuel Lalremruata khalh chu kawngthlang, kham awih meter 60 vela sangah a tlan liam a, Rodinliani w/o Lalnunthara, Thenzawl chu a hmunah a boral nghal. Car ah hian mi panga chuangin midang hi chuan hliam na an tuar lo thung.
27th. Sunday : Robert Lalrinnunga (24) s/o H. Lallura, Sihphir chu ngawr natna avangin an chenna inah a boral.
28th. Monday : Thangsuanliana (28) s/o Engkhawliana, Khawruhlian chu an lo vahnaaah an thing kihin a delh a, a hmunah hian a boral nghal.
29th. Tuesday : India rama Cooperative Bank zawng zawngte inthlunkhawmna – National Federation of State Cooperative Bank (NAFSCOB) chuan an hmunpui Mumbai-ah General Body Meeting an nei. He NAFSCOB General Body Meeting-ah hian kum 2020 – 2025 chhung atana hruaitu tur Board of Directors thlan nghal a ni a, hetah hian Mizoram Cooperative Apex Bank Chairman, Pi T. Lalmuanpuii chu Vice Chairman atan thlan tlin a ni. Pu Konduru Ravinder Rao, Chairman, Telengana State Cooperative Apex Bank Ltd chu Chairman a ni thung ang.
30th. Wednesday : Kolasib Sub Hqrs. YMA te ruihhlo man khawm 7,57,600/- cheng nuai sarih singnga sangsarih zaruk man hu chu vawiin khan Supply minister, Pu K Lalrinliana'n a hal ral.
31st. Thursday : Sihphir branch Kristian Ṭhalai Pawl chuan an Kohhran Centenary Hall atangin Live Programme an buatsaih. He hunah hian Upa C. Ngurthantluanga'n thuchah a sawi.
Comments
Post a Comment