** Tripura state chhunga awm mek, Mizoram atanga Tuikuk raltlante, an awmna hmuna an awm nghehna tura Home Ministry in ruahmanna a siam angin New Delhi-ah Union Home minister, Amit Shah kaihhruaina hnuaiah ziah a ni. Mizoram sorkar aiawhin chief secretary, Lalnunmawia Chuaungo-in hming a ziak. Inremna ziahna-ah hian Ministry of Home Affair lamin tel tura an sàwm angin chief minister, Zoramthanga leh Tripura chief minister, Biplab Kumar Deb te pawh an tel.
Inremna ang chuan Mizoram atanga Tripura-a chhuak, Tuikuk te chu an awmna hmun, Tripura-ah an awmnghet tawh dawn a ni.
Bru National Liberation Front (BNLF) ho in Lalzawmliana, Dampa Tiger Reserve forest-a guard hnathawk chu October 21, 1997 khan an kaphlum a, hemi ṭum hian hlau-in Mizorama Tuikuk mipui ten Mizoram an chhuahsan nual a, BNLF ho vek hian November 16, 2009 khan Bungṭhuam rawlthar an kahhlum leh avangin Tuikuk tam zawkin Mizoram an chhuahsan leh a, tun hi an thleng ta a ni.
Hetih lai hian electoral roll atanga paih erawh an la ni chuanglo cheu a, kan pute thil tih hian awmzia a nei thui lo palh ang tih erawh a hlauhawm khawp mai.
* Mizoramin a vawi khatna atana international level championship kan thleng. Ni thum awh FAI (Fédération Aéronautique Internationale) Category II International Paragliding Accuracy Championship, 2020 chu Serchhipah neih neih a ni.
He Paragliding Championship-ah hian Korea, Afghanistan, Kazakhstan leh India atangin an tel a, Mizo thalai pahnih an tel bawk. Hmeichhe category ah chuan Jin Hee Baek (South Korea), pahnihna Jae Ryun Ha (South Korea) leh pathumna Rupa Devi Karki (India) te an ni a. Mipa category ah hian pakhatna chu Byung Chang Jeun (South Korea) a ni a, pahnihna chu Igor Virshki (Kazakhstan) niin pathumna chu Vishal Kumar (India) a ni. Lawmman hi mipa leh hmeichhe category ah hian pakhatna in euro 2,000/-, pahnihna in euro 1,500/-, pathumna in euro 1,300/- an dawng a ni. Team intihsiakna-ah pakhatna Korea team, pahnihna Bir Billing leh pathumna 3K te an ni.
Player te hi round 8 in an in el a. Macedonia leh Slovenia atangin endiktu an lo kal a. Intihsiakna neih chhung hian competitor te zingah inhliam a awm lo a ni.
* Mizorama a hmasa ber atan Chaltlang khawtlangin ruang zalh (phûm)-na tura thlàn chhâwng an siam chu Chief Minister, Zoramthanga'n a hawng. CM, Zoramthanga chuan, Chaltlang khawtlangin mitthi phûmna tur ruahmanna thar siama an puitlin ta chu lawmawm a tih thu sawiin, "Mi kan pung zel a, khawpuia chêng kan pung zel bawk. Mitthi kan pun belh zel a, ram a ṭhang ve si lo a, ruahtui tam bawk nen, kan leite a nghet loin, thlànmual minte a tam phah hle. He'ng zawng zawng avang hian mitthi inphûm dan kalphungah ngaihtuahna thar kan neih a pawimawh a ni," a ti a; mitthi invui danah pawh ngaihtuahna thar hman ṭha a tih thu a sawi bawk.
Chaltlang thlân chhawrdawh hi Chaltlang YMA hmalaknaa siam a ni a, a siamna atana sum ruahman Rs. 29,73,000/- zinga Rs. 3,00,000/- chu Chaltlang YMA chhiatni ṭhatni fund aṭanga hman niin, a bâk zawng Rs. 26,73,000/- chu Urban Development & Poverty Alleviation department-in a tumsak a ni. January 24, 2019-ah in sakna tur hmun laih ṭan a ni a, October 26, 2019-ah siam zawh a ni.
Thlàn hi RCC building-a siam niin, thlan tur lei laih a ngaih lohna turin a chhâwnga siam a ni. Thlan in hi chhâwng nga a ni a, chhâwng tinah thlàn 27 dah niin, thlan 135 a awm a; a chhaka thlân 28 an siam belh nen a vaiin thlân 163 a awm. Thlan hnuaiah ft. 3X3-a zau leh thûk lei laih khuar a ni a, chutah chuan lei mê chhûng khatin, mitthi aṭanga tui chhuak híp kang thei tura ngaih a ni. Thlan malte chu pipe hmangin lei laih khuar nen zawm vek a ni bawk.
Vantlang thlanmual siam sorkar pawhin a lo ngaihtuah fo tawh thin a, khawpui dai hmun hrang hrang pawh a lo thlithlai tawh a ni.
* RFL Miss Mizoram 2020 chu R.Dengṭhuama Hall, Mualpui-ah ropui taka neih niin; Miss Mizoram Khawzawl District, Zirsangpuii chu Miss Mizoram 2020 atan thlan a ni. Miss atana thlan thar hi Miss Mizoram 2018, T Ramthanmawii'n crown a khum tir. Zirsangpuii d/o VL Beiseia hi Khawzawl khua a ni a, Aizawl Collage aṭangin BA (Education) a zo a ni. Feet 5 leh inches 5 a sang a niin kum 23 a upa a ni.
1st Runner Up chu Zomuanpuii Fanai a niin, 2nd Runner Up chu Lalmuansangi a ni thung.
Miss Mizoram 2020 hian lawmman pawisa fai Rs 1,70,000/- leh Yamaha Fascino 125 Fi scooter a dawng.1st runner up-in Rs 90,000/- dawngin, 2nd runner up in Rs 60,000/- a dawng bawk.Top 12-a tling, top 3-a inhlang kai ta lote pawhin Rs 10,000/- ṭheuh an dawng bawk.
Sub-title hi pali thlan a ni a, heng ho hian Rs 20,000/- lawmman a keng tel vek bawk.
* Nikum kumtawp lam khan China rama khawpui pakhat, Wuhan atangin natna hrik Novel Carona Virus (Covid-19) a darh huk mai a, China ram a ti ralkhel hle. Hun a kal zel a, China mai niloin khawvel ram hrang hrang a kangkai zel a, India hial a lo thleng ve ta.
India a lo thlen ve takah chuan rampumah Janata Carfew puan a ni a, hei hi lockdown in a zui.
Theihtawpin kan fimkhur chungin hri chuan bu a khuar zau zel a, Mizoram hial a lo thleng ve ta. Hri kai pakhat kan neih ve tak chinah phei chuan kan ralkhel takzet a, hmarchhak state zinga kai nei hmasa ber kan lo ni bawk nen, a hrehawm duh hle. Hmar chhak state-ah chuan darh ve zelin mitthi hial an awm ta. Hei erawh kan Mizo doctor, Meghalaya lama inbengbel ta a ni a, Mizo a nih naah a hrehawm lehpek hle. Nunna chan an awm chho ta zut zut a, Mizoramah pawh hrikai pakhat kan neih atanga thla hnih zet kan neihloh leh vang vang hnuah Kolasib district lamah mi 12 hmuhchhuah an ni ta thawt mai.
Darh zelin tunah phei chuan sang kan pel ta fe mai. Nunna chan pawh kan awm ta.
He hripui hian min tibuaiin min ti ralkhel takzet a, sorkar lam tan pawh chet lak dan thiam a har hle niin a lang. Sakhuana leh nunphung thlengin nasa takin min nghawng a ni.
Hetih mek lai hian United Kingdom lamah chuan Covid19 ai maha inkai darh awlsam zawk, UK Strain a darh leh chiam mai a, India ram hial a lo thleng leh tawh a ni.
* South Chawngtui khuaa Mizoram UPC Biak Inah zu bilh lai Pathianni zing ṭawngṭai inkhawma kal ten an hmu mauh mai!
South Chawngtui Branch YMA hian ruihhlo do in theih tawpin hemi lam hawi sub-committee hial siama hma an lak lai a ni a, hetia'ng thil a thleng ta mai hi pawi an tiin zahthlak pawh an ti takzet a ni.
Branch YMA chuan hma a la nghal a. Chawlhni zingkar a tang hian chaw in ei chhawkin, Biak Ina zu dahtu man chhuah tum hian a rukin an duty nghal a. Nileng leh zan lam thlengin uluk takin, a ruk thei ang berin, zu dahtu man chhuah tum hian Biak In bulah hian duty a ni. Hemi zan dar 11:00pm thleng hian man an neilo.
Hemi hnu hian zu dahtu hi Thingsai Police – ten an manchhuak. A ni hi Biak In bul lawk a awm hi a ni nghe nghe. A mah hi ruihhlo a tih nasat avanga a chhungte pawh ina an buaipui a niin khawtlang pawhin BLACK LIST- a an neih lai a ni nghe nghe.
Hetih lai hian Khatla South thlanmual chu suasam a niin alluminium kross pasarih ngawt tihchhiat a ni a, Champhai Bethel Adventist kohhran biak in chu naupang thenkhatin an lo khawih chiam mai a, Chalrang kohhran in an YMA park a tawngtaina hmun an siamah mipat hmeichhiatna hmang an lo awm bawk.
Engpawhnise, biak in bakah kohhran serh leh sang thil kher kher kan khawih chingpen ngam ta mai hi thil namai a ni lo tawp mai. Kristian hmun mai lo pawh niin sakhaw hran daih hmunhma pawh ni se sakhaw thil engpawh inzah sak hi a tul ngawt mai.
* Mizoram MP (Rajya Sabha), Donald Sapa Tlau term a lo tawp tak avangin MNF party candidate, K Vanlalvena (50) chu thlan tlin a ni.
Rajya Sabha MP inthlanah hian mi pathum, heng : Mizo National Front (MNF) K Vanlalvena, Indian National Congress (INC) Dr Lallianchhunga leh Zoram People's Movement (ZPM) candidate B Lalchhanzova te an ni. Heti hian MLA nei zingah BJP in candidate an neilo.
Rajya Sabha MP inthlanah hian ZPM Legislature Party leader, Lalduhoma'n vote a thlak hmasa ber a, Assembly speaker, Lalrinliana Sailo-in vote a thlak hnuhnung ber thung. Imthlanah hian vote 39 a tla a, BJP MLA, Dr BD Chakma chuan vote a thlaklo.
Tichuan, MNF party candidate, K Vanlalvena chu MNF MLA 27-te'n an vote vek avangin a tling ta a ni.
K Vanlalvena chuan thlan tlin a nih hlima thu thar thehdarhtu te zawhna chhangin an party innghahna 'Pathian leh kan ram tan' tih a nih angin Pathian leh Mizoram tan theihtawp a chhuah tur thu a sawi.
K Vanlalvena s/o K Lalzika hi January 14, 1970-ah East Lungdarah a piang a, a nupui H Lalhuapzauvi nen fapa pakhat leh fanu pahnih an nei.
* June ni 21, Pathianni tlai dar 4:17 a ni a, kan hnathawhna pu quarter-a kan awm laiin lir lo nghing ta chiam mai. A hlauhawm duh angreng khawp mai.
Hemi tuma lirnghing hi Aizawl district chhung Lat: 23.80N & Long: 92.96E-ah niin, lei chhungril 35km atangin a niin, 5.1 magnitude a na a ni. Thil tih chhiat a nei lemlo in a hriat. Hemi hnu hian khawchhak lamah lir a nghing ta malh mawlh mai. Biak in pawh tihchhiat a nei nualin a hriat. Mipui an thlabar takzeta, inchhungah pawh mu ngamloin tualzawlah an riak khawm tawp mai a ni. Hei hi tlawmngai pawl ten an riahpui a, kohhrana rawngbawltu te leh sorkar mi pawimawh engemawzatin hnemin tanpuina pawh an pe a ni.
* 2015 - '20 VC/LC ding mekte term a lo tawp tak avangin inthlan thar hun a ni. Amaherawhchu, hripui leng avangin term hi thla thum chhung pawhsei a ni. Eng emaw harsatna bik a awm a nih chuan state sorkarin thla 18 thleng VC/LC-te term pawtsei turin thuneihna a nei a ni.
Inthlanpui hi hripui leng vel avang hian a hun tura ruahmanah tih vek theih a ni lo a, veng hrang hrangin khuahkhirhna an kalpui leh thin avangin thawh thum laia neih a ni.
Inthlanna chu tluang taka zawhfel a ni ta a, a pumpuiah rorel lai MNF party chuan Local Council leh Village Council-ah te hnehna an chang. MNF hian Local Council seat 369 la in council 54 ah hnehna an changa, anmahni hnaih bertu INC chuan seat 122 lain council 5 ah hnehna an chang. Village Council-ah MNF chuan seat 1376 lain VC 327 an la a, INC chuan seat 613 lain council 98 ah hnehna an chang thung.
Hripui avangin inthlan hi thawh li laia neih a nih laiin khaw pakhatah erawh thil thianghlim lo a awm avangin inthlan that a ni! Hetah hian results a danglam deuh na a, MNF member pakhat an inthlak tih loh chu a hmaa mi te an tling leh vek ani.
Hetih lai hian Aizawl Municipal Corporation (AMC) chu a term a tawp na a, pawhsei na dan a awmloh avangin in sorkar thar a pian leh hma zawng chu AMC commissioner atan administrator, K. Laldingliana'n a keng zui rih dawn a ni.
* Tuidam to Kawrtethawveng kawngpui laih thar, Tuidam atanga KM 1 velah, kopang lei rawn minah mihring ruhro tam tham tak hmuh a ni a. Leimin zinga ruhro tam tak awm chu an han chhar khawm a, luruh 16 zet leh mihring taksa bung hrang hrang ruh tam tak an chhar khawm a ni.
Lu ruh hi 16 an hmuh avang ngawt hian an zat hriat chian ngawt ngam a ni chuanglo. A chhan chu taksa bung hrang engemawzat zingah bàn ruh hi 82 ngawt hmuh a ni tlat. A tlem thei ang bera chhutin ban te hi mi pakhatin pahnih zel lo nei ta pawh ni se, mihring 41 chu an ni ngei tih a chiang.
An sawi zel dan chuan ruhro hi nikum lam pawh khan helai chiahlo-ah pawh hmuh a ni a, Zoram hmun dangah pawh hmuh a nih thu hriat tur a awm nual bawk.
Heng ruhro zingah hian Tuiburlu leh Saingho atanga siam bengbeh bakah Chempui a hmawr kun/kawm chi tuiek chhe tawh tak hmuh tel a ni a, hei vang hian Mizo an nih ngei rinna a lian hle.
Heng ruhro te hi uluk taka phum niin a lang a, lei chunglang atanga feet 8.5 vela thuk, a thlan khur thui lam pawh feet 12 vel zeta thui niin TV report atangin a rin thiam theih. Hlum bel keh them hmuh tur a awm nual avangin bel lian takah heng ruhrote hi dahin an phum a nih hmel.
* Cachar DC hoin Assam Forest department leh Police-te'n Thinghlun, Mamit district-a John Zolawma thlám an hâl a, a kuhva kûng tam tham tak leh a bula Ben David thlai an tichhe nual bawk.
He thil hi ramri chungchanga Assam lam ten min rawn chhaihna niin a langa, kan sorkar leh tlawmngai pawl thenkhat chechhuak nghalin lungawi lohna na takin an lantir.
Assam lamin an duhtawk mai lo. Kan inrina khaw hrang hrangah buaina an siam zel a, kan sipai te hial che chhuakin silai kah phalna hial an nei. Silai chu puak ta chiah lo mah se tharum thawhna nasa tak a thleng a, Mizo zingah hliam tuar engemawzat an awm. Assam lam atang phei chuan nunna chan te pawh an awm niin sawi a ni.
Hripui leng avanga buai lai a lo ni bawk nen, harsatna kan tawk nasa hle. Sorkar demna pawh a nasa leh hle. Kan sorkar lam pawhin theihtawp an chhuah niin a lang a, Silchar kawng kaltlang chauh nilo hmundang leh kawtchhuah dang pawh kal theih turin hma an la nasa hle.
** Durtlangah bankhur laiten an bankhur mawngah lung puk kawrawng thui zet an hmuchhuak. Puk hi Geologist ho-in an luh chhuah a, a measurement hetiang hi a ni :
A sei zawng (Mihring kal theih chin) = Feet 105. A san zawng = Feet 7. A zau zawng = Feet 4-5.
Bankhur an laihna hi Durtlang Ramthar venga Pi Tlingzovi in hmun a ni a, in hlui thiata a thara sak an tum mek lai a ni. A lung hi a chang tha pangngai tak a ni. Helai hmunah hian leilung che a lo awm tawh thin niin geologist te chuan an sawi.
** Lunglei hmeichhe naupang, kum li leka upa, Esther Hnamte (Esther Lalduhawmi Hnamte) d/o Lalrinenga Hnamte, Collage veng zai youtube a mi chuan ni sarih chhung lekin million view a nei hman. Hetia'ng record hi Mizo zingah chuan a hmasa ber a ni.
Hetia'ng dinhmun a luah theih nachhan ber ni'a lang chu 'Maa Tujhe Salaam' tih a sak chu Chief Minister, Pu Zoramthanga'n tweeter kaltlangin a tweet-a, chu chu Prime Minister, Narendra Modi chuan lo hmu in a lo tweet chhawn vang niin a lang. India ram laili lama awmte pawhin an lawm hle a, comment leh like a pung chak hle a ni. Hnamdang reaction video pawh hmuh tur a awm nghal nual bawk. Phai lam chanchinbu lian ho pawhin an chhuah chiai chuai mai.
Governor pawhin lawmpuina pawisa fai cheng 5,000/- lai a pe nghe nghe. A video hi he hla neitu, AR Rahman pawhin karlo-ah a lo hmu ve a, a remtihna la hmasa lo a lo sa ve a nih avanga thinrim ngawt loin a lawmin a rilru a hneh hle zawka, biakpawh dan te a ngaihtuah hial zawk a ni.
Estheri hi zaithiam tak a ni reuh a, rimawi a man hle niin an sawi bawk. Fakna hla pawh a channel-ah hian en tur a awm nual a ni.
** Tunlai thalai smartphone khawih tam takina games kan khelh thin zinga kan khelh nasat ber pawl chu Carrom Disc Pool hi a nih a rinawm. Intihhlim na atan kan khel a, thenkhat phei chuan an chhiat phah hial ni pawhin a lang.
Amaherawhchu, Lunglei tlangval, J. Lalduhawma (Duduha Jinhlawng)-chuan online Carrom Disc Pool a khelhna atanga a pawisa hlawhchhuah atangin Scooter (gearless) a lei thei tlat.
Duduha hi Carrom Disc Pool, coins seller niin coin a hralhna atanga a lakluh hi a lo tlem lo hle. Mizoram chhunga coin lei duh ringawt pawh a supply seng lo zawk.
World No. 2 a ni pha hial a, coin a hralh bakah mi account atanga khelhsak a, World No 10 huang chhunga a awmtir atangin hlawh a nei nual bawk. Chutia'nga khelhsak tura ngenna chu a chhang seng lo hial a ni.
Hetih lai hian Bilkhawthlir lamah Mizo tlangval chhuanawm tak a awm bawk. Chuaungurpuia Pachuau (25) s/o PC Lalmalsawma chuan England rama football league sang ber, Premier League dawttu, Championship League a khel mek, Brentford Football Club ah Football Scout (Video Recruitment Consultant) hna tha tak mai a hmu.
Tv Chuaua hian a hna hi an khua a awm chungin a thawk thei dawn a ni. Computer, Phone leh Wifi hmangin a thawk ang. A hna ber tur chu Brentford FC 1st Team leh B Team te tana player tha khawvel huapa zawn kual a ni dawn a, chu chu Club Management lamah a report zel dawn a ni.
** Serchhip bialtu MLA, Pu Lalduhoma, ZPM legislator party leader leh opposition leader ni bawk chu Assembly Speaker, Pu Lalrinliana Sailo chuan India Constitution Tenth Schedule paragraph 2(2) leh ‘The Members of Mizoram Legislative Assembly (Disqualification on Ground of Defection Rules 1987-in thuneihna a pek angin a bàn.
Hei hi a chhan nia lang chu Pu Lalduhoma hi MNF MLA 12-ten an independent MLA ni chunga party (ZPM tan) tan a inhmang nasa lutuk ti a an hek vang a ni ber.
Heti hian Serchhip chu bial ruaka puan zui a ni a, hun remchang hmasa berah by-election awm tura ngaih a ni.
** Israel hnambo a inchhal Mizo 112 zet te chu Israel hnambo zawngtu pawl, Shavei Israel te chuan an rama awm (kir) turin an rawn hruai.
He'ng mite hian Israel hnam bo (10 tribes) zinga pakhat, Shevet Menashe an nih vangin Law of Return hmangin an kir leh dawn niin an insawi.
Tun tum hruaikirna-ah hian khawvel ram hrang hrang atangin an kal a, India ram atangin pawhin mi 7,000 vel an tel a ni.
Mizoram atanga kir turte hi group thumah inthenin Lengpui Airport atangin Delhi an pan phawt a, heta tang hian Israel thlawhna El Al in a rawn lam a ni.
Comments
Post a Comment