Skip to main content

JANUARY 2020, MIZO(RAM) DIARY


1st. Wednesday :  Zothankhuma (38) s/o H. Remtluanga, Saikhamakawn chu Dawrpui Vengthara a riahna ṭhenawmte garage-ah thi a hmuh a ni. Isaac Zothankhuma  taksa-ah hian hliam a awm nual nghe nghe.

2nd. Thursday : Kohhran hrang hrang ten kumthar lawmna ruai an theh.

3rd. Friday : Sialrothanga (L) leh Vanlalthangi (L), Sihphir tu leh fa hmun hrang hranga awm te chuan an hmangaih kalta te hriatrengna hun Sihphira an inpuiah an hmang.

4th. Saturday : Mizoram Governor, PS Shreedharan Pillai chuan Kozhikode, Kerala-a a chenna inah I-League khel tura zin, Aizawl Football Club team chu thingpui a inpui a, duhsakna a hlân. Larsap, PS Shreedharan Pillai chuan, Aizawl FC chu theihtawp chhuaha khel turin a fuih.

5th. Sunday : Presbyterian leh UPC kohhrante chuan Sunday School pâwl siam rem nî atân an hmang.

6th. Monday : Nikum December ni 10 khan Tlawng lui-ah mihring ke chhar a ni a, hei hi July 11, 2019-a Tlawng lui, Nghalchàwm kai-a tla, Lalfakzuala, Electric Veng, Aizawl ke a ni tih finfiah a ni.

7th. Tuesday : Mizoram Lok Sabha MP, C. Lalrosanga chu Citizenship (Amendment) Bill, 2019 (CAB) pass a nih hnuah a vawi khat nan   Mizoramah a rawn haw a; CAB thláwp zawnga vote a thlak avangin, a laka lungawi loh lantirna atan MZP-te'n pawndum nen Lengpui Airport-ah an lo hmuak.     

8th. Wednesday : School Education directorate-a thawkte chuan  Education Centre-ah an director, Lalzarmawii ho-in kum 2020 atan an inhlan thar.

9th. Thursday : Aizawl Municipal Corporation (AMC)-a thawktute chu kum 2020 atan an inhlan thar a, deputy chief minister, PuTawnluia'n hmanpuiin, fuihna thuchah a sawi.

10th. Friday : Disaster & Ma­nagement department chuan Hyve Hall-ah an hnathawh thlirlêtna leh inhlan tharna hun an hmang a, DMR minister, Lalchamliana’n a hmanpui. Lalchamliana chuan, department-a thawkte chu sorkar leh mipuite'n ṭangkai taka an chhawr theih na'n thawhhona ṭha vawng zel turin a chah.
 
11th. Saturday : Missionary Day a ni a, Baptist kohhrante chuan urhsun takin an hmang.

12th. Sunday :  Mizoram chhung leh pawna Presbyterian Pastor bial thuthmun hrang hrangah Pastor leh Pro-Pastor te lakluh an ni.  Tuntuma mi te hi Pastor atana a nemnghah thar 15, Probationary Pastor tanglai an awmna hmun siamrem 11 leh Pro Pastor lakthar mi 16 te  an ni.

13th. Monday : Serchhip DC atana ruat thar Dr Lalzirmawia Chhangte, IAS chuan a hna thar a chelh ṭan. Dr Lalzirmawia hian DC mawhphurhna lo chelh lailawktu addl. DC, ­Chuauhnuna hnen aṭangin charge a la a ni. Serchhip DC hian DC pisa-a thawktute leh official dangte nen inhmelhriatna hun a buatsaih nghal a ni. 

14th. Tuesday : Mizoram Public Service Commission Chairman atân, Pu Lalramthanga Tochhawng, IA&AS (Retired) chu Mizoram lârsâp, P.S. Sreedharan Pillai chuan rinawmna thu tiamtîrin a la lût.

15th. Wednesday : Mamit district chhûng, Hriphaw khua-ah Agriculture Minister, Pu C. Lalrinsânga ho-in 'Kut Hnathawktute Nî' hman a ni a, Hachhek bialtu MLA, Pu Lalrindika Râlte in a hmanpui.

16th. Thursday : Zorempuia (20), Lungpho chu Sêrchhîp Bîlzêlah ama lîrthei khalhah che sualin a hmunah a boral.

17th. Friday : Mara Students Organisation Hqrs. Siaha chuan Siaha District chhûnga Govt. High School hrang hrangah zirtîrtu an indaih loh avângin HSLC leh HSSLC result-ah Siaha District chu a tichhe țhin ni'a an hriat avângin sâwrkar leh Zoram mipuite hriatpui atân kawng an zawh.

18th. Saturday : Pi Kamliani (71), Phûldungsei Phûlbial vêng, tûn thla ni 8 ațanga chin hriat loh a bo chu, Mizo dâna ni 7 zawn a nih hnûah Phûldungsei leh Pârvatui inkâr lui bulah dam taka hmuh a ni.

19th. Sunday : Zaithiam leh hla phuah thiam, Lalsangluaia Ren­thlei chu  Falkawn damdawi-inah a thi.

20th. Monday : Land Revenue & Settlement department officer-te chu an minister, Lalruatkima ho-in an department directorate conference hall-ah an inhlanthar a, an hma­chhawp hrang hrangte an sawiho nghal. Lalruatkima chuan thawhhona ṭha hnuai-ah lo chuan hmasawnna a thlen theih loh thu a sawi.

21st. Tuesday : Pilêr khua-a Pu Lalchhawra s/o Dêngdâwla (L) Assam type in, chhungkaw khat luah lai chu a kâng a; mihring thi leh hliam a awmlo na a, âr notê 15 leh ui 1 thiin pawisa fai ₹ 7,00,000 vêl a kâng thung.

22nd.Wednesday : Power & Electricity Department Minister leh bialtu MLA ni bawk, Pu R. Lalzirliana chuan Tuivawl Built-Up Steel Girder Lei, Saitual-Phûllên Road-ah a hawng.

23rd. Thursday : Central YMA Office Bearer-te’n Governor, PS Sreedharan Pillai-a Aizawl Raj Bhavan Conference Hall-ah kâwmin, ruihhlo do kawnga pui tûrin an sâwm.

24th. Friday : Hmeichhe naupang humhalhna Ni ‘National Girl Child Day’ chu ram chhûng hmun dang rualin Mizoramah pawh hman a ni.

25th. Saturday : Ranjit Chakma (30) s/o Meril Kanti Chakma, Chawngte (C) Kamalanagar-II hnên aṭangin Sap zu tam tham tak Chawngte (L) YMA duty te’n an man.

26th. Sunday : Ram pumah Republic Day vawi 71 - a lawm a ni a, Mizoramah pawh hmun hrang hrangah  hman a ni ve a ni. A hmanna pui ber, sipai lammuala neihah chuan Governor, PS Shreedharan Pillai chuan khuallian niin a hmanpui.

27th. Monday : Lalduhoma, MLA chuan ZPM pisa-a inkhawmah BJP kaihhruai sorkar laipui chu India ram economy chawisan aia BJP party sawhngheh leh tihhausak tum zawk niin a sawi.

28th. Tuesday : North East state-te football hmanga inelna sang ber, Dr T Ao Football final-ah Mizoram chuan   Sikkim 1-0 a hnehin an champion. Champion-na goal khungtu David Lalrinmuana chu man of the match-ah thlan a ni a, Zotuitlang rawlthar, Lalchungnunga Chhangte chu best player-ah thlan bawk.
Mizoram hi a lungthu kim nan Dr T Ao Football-ah an champion a, tun ṭuma an champion hma hian kum 2011 leh 2014 ah nomawi an chawi tawh bawk.

29th. Wednesday : Sorkar laipui-a Ministry of Information & Broadcasting hnuai-a Children's Film Society of India (CFSI) leh Mizoram Art & Culture department ten an buatsaih, ni thum awh tur, 'Children's Film Festival 2020' chu Vana Pa hall-ah ṭan a ni a, Art & Culture minister, R. Lalzirliana'n a hawng.

30th. Thursday : Legal Metrology enforcement staff-te chuan   ITI Veng leh MIZOFED pump bulah mi paruk hnen aṭangin petrol dan lo (black)-a zawrh litre 26.5 an man.

31st. Friday : Mizo film thar, 'Za­lênna' chu   Vanapa Hall-ah tlangzarh a ni. One Vision Media Ministry film siam 'Zalênna' hi Pathian thu zirtirna kengtel film a niin Mizoram buai lai behchhana film siam a ni. Script ziaktu leh director ni bawk hi Lalnunsiama (SVP)  a niin a chang­tupa hi zaithiam Andrew Laltlankima a ni.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more