Skip to main content

DECEMBER 2019, MIZO(RAM) DIARY



1st. Sunday : Lalhmachhuana (36), s/o Lalramzauva
ITI Veng chu a thi.

2nd. Monday : Assam Rifles chuan Mizo zirlai 14 leh zirtirtu 2 tan National Interactive Tour an buatsaih a, heta tel tur te hi Home Minister, Pu Lalchamliana'n 46th. Assam Rifles hmun atangin a vailiam. Tour hi December 2-14 chhunga neih tur a ni a, Delhi, Dehradun leh Missorie te an tlawh ang.

3rd. Tuesday : Pathianni thleng awh tur, Mizoram Presbyterian kohhran rorelna sang ber, Synod inkhawmpui chu Mission Veng kohhran biak inah tan a ni.

4th. Wednesday : MHIP General Headqquarter chuan Hnahthial Venglai YMA Hall-ah MHIP Sub-Headquarters, Hnahthial an hawng. He hun hi General Headquarter Vice President, Pi Saipuii'n  hmanpui.

5th. Thursday : Mizo pasalṭha hmingthang, Vana Pa hriatreng na'n Vana Pa Thlan Sub-Comtt. chuan Hnahlan rama Tuiṭoh luikamah hriatrengna lung an phun a, Art & Culture Dy. Director, Lalchuailova'n a hmanpui.

6th. Friday : MPCC President, Chief Minister hlui ni bawk, Pu Lal Thanhawla chuan party pisa-a amah chawimawina hunah CAB hi India ram Hindu rama siam tumna hmanrua a nih thu a sawi.

7th. Saturday : Armed Veng Pastor Bial KṬP te chuan Civil Hospital tan thisen unit 56 an pe a, a petu te hi hmeichhia 6 leh mipa 50 an ni.

8th. Sunday : UPC General Assembly, Zonuama Zirtawpni-a ṭan chu a ṭiak. Assembly-ah hian kumthar 2020 budget atan Rs vbc 12.69/- an pawm. Mizoram UPC-ah hian member 67,981 an awm a, pastor biak 75 a awm a ni.

9th. Monday : Lok Sabha-ah Citizenship (Amendment) Bill buk a ni a, mi 311 in thlawpin mi 80 in an thlawplo. A thlawp tu zingah hian kan MP, Pu C. Lalrosanga pawh a tel.

10th. Tuesday : Lunglei HPC Vice Chairman, Lawmawma Tochhawng, MLA chuan Haulawng leh Bualpui 'V' inkara YMA ten an humhalh lai, Vanva lui a tlawh a, group YMA hruaitu ten an lo dawngsawng.

11th. Wednesday : Rajya Sabha-ah Citizenship (Amendment) Bill buk a ni a, mi 125 in thlawpin mi 105 in an thlawplo. A thlawplo tu zingah hian kan MP, Pu Ronald Sapa Tlau pawh a tel.

12th. Thursday : MZP chuan Vana Pa Hall tualah tunhnai-a Parliament-a pass tak Citizenship (Amendment) Bill chu a pu luttu, Union Home Minister, Amit Shah leh Mizoram MP pahnih zinga hemi thlawptu zawk, C. Lalrosanga te lim chu an hal.

13th. Friday : Mizoram States Games chu tluang taka zawh a ni ta a, Aizawl East-I chu Gold 25, silver18 leh bronze 16 la in an champion.

14th. Saturday : Mizoram Primier League session 8 chu a hmawrbawk (final) a ni ta a, final-ah hian Aizawl FC chuan Electrict Veng FC chu 2-0 a hnehin an champion. Champion team hian lawmman pawisa fai Rs 6,00,000/- an dawng.

15th. Sunday : Sports and Youth Services Deptt. Director hlui, Pu Zoliana Royte, Khatla chu Ebenezer Hospital-ah a thi.

16th. Monday : Mizoram Youth Commission (MYC) leh Taipei Economic and Cultural Center, India te chuan Mizorama Taiwan Education Center hawnna turin inremna thuthlung an ziak. MYC aiawhin chairman, Vanlalṭanpuia, MLA in hming a ziak a,  Taipei Economic and Cultural Center aiawhin Peters LY Chen, Representative, Director, Education Division, Taipei Economic and Cultural Center India in hming a ziak thung.

17th. Tuesday : Home leh Information & Technology Deptt. hmalakna a siam, Inner Line Permit Portal chu Police Headquarter-a Arya Mess-ah Home Minister, Pu Lalchamliana'n a hawng.

18th. Wednesday : Tourism Deptt. chuan AR Lammualah Winter Festival an huaihawt a, Dy. CM, Pu Tawnluia'n a hawng. He hunah hian hnam lam chi hrang hrang bakah Mizo ziarang pholang thei thil te entir a ni a, zaithiam engemawzat an zai bawk.

19th. Thursday : Governor, PS Sreedharan Pillai chuan kan hma lawka Krismas leh kumthar lo thleng tur chu Mizo mipui te hlim taka hmang tura a duhsakna thu a chhuah.

20th. Friday : Parliament Session-a tel, Rajya Sabha MP, Pu Ronald Sapa Tlau chu a lo haw a, Mizo mipui tamzawkin kan duhloh, CAB a thlawploh ngam avangin MZP te chuan Lengpui Airport-ah lo hmuakin tawllohpuan an lo bahtir. Hetih lai hian MP pakhat, Pu C. Lalrosanga erawh Delhi-ah a la cham rih thung dawn a ni.

21st. Saturday : Lalthanmawia (52), S/o Vanthuama, Dawrpui  (Zion Street) chu Stroke avangin a thi.

22nd. Sunday :
Laldingngheta Sailo (37) s/o 
Tlangthankhuma Sailo (L) Chaltlang Venglai, Aizawl chu Stroke avangin a thi.

23rd. Monday : Home Minister, Pu Lalchamliana'n Armed Venga District Jail a tlawh a, táng mek zinga convict tawhte ngenna angin, an tàn hun chhung tur ni nga a pawh tâwisak an nih tur thu a puang. Minister chuan, tángte chu an sual vang hrim hrima táng an nih a rin loh thu leh thil an tihsual vanga táng an nih a rin thu sawiin, thil tihsual an neihte sim a, an chhuah hunah pawh thil sual ti tawh lo tur leh nun dan dika an nun theih nan rilru siam turin a fuih. Home Minister hian Krismas ruai buatsaihna turin thawktute hnenah sum engemawzat a hlan nghal.

24th. Tuesday :
Excise & Narcotics department enforcement-te'n Phunchawng leh Rangvamual chhehvelah dan lo a zu siam leh zuar dap beihpui an thlak a, rakzu litre 200 an man bakah, zu bilh lai ṭín 2010 leh zu siamna hmun pariat an ti chhia.

25th. Wednesday : Krismas ní a ni a, Mizoramah kohhran hrang hrangin hlim takin an lawm. Kohhrante chuan Krismas hi an serh a, chawhma aṭangin inkhawm an nei a ni. Kohhran tam zawk chuan Krismas lawmna ruai an ṭheh lo a, kohhran ṭhenkhat erawh chuan ruai an ṭheh nghal a ni.

26th. Thursday : Mizorama kohhran tam berin Krismas lawmna ruai an ṭheh.  

27th. Friday :
Sialsuk khua-in an khaw tlangah ni thum awh tur lehkhachaih chaih rûnpui (Kite Festival) an buatsaih a, Tourism minister, Robert Romawia Royte-in a hmanpui. 

28th. Saturday : Excise & Narcotics department enforcement-te'n Aizawl dáia zu  siamna hmun an dap a, zu siamna hmun 16 an luhchhuah a, rakzu litre 320, zu bilh lai ṭín 1,930 leh zu siamna bél 51 an man.

29th. Sunday : Mizoram Presbyterian Kohhrana tualchhung kohhran hrang hrangte chuan Sunday School kai ṭha lawmman an sem.

30th. Monday : Aizawl Police Station-ah tang 7 kawlin, zuruih vanga man 4 leh rukruk vanga man 3 an ni.

31st. Tuesday : Amberly Vanlalmalsawmi (4) d/o Lalngaihsaka, Maubuang, Aizawl district chu Kolasib Diakkawnah Bolero car-in a chíl a, Kolasib District Hospital panpui a nih laiin a hliam tuar loin a thi.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more