Kum 1994 khan keini ṭhianho chuan pawl kan indin a, pawl hming atan 'APOLLO' tih a ni. He pawl hi infiamna lampang item hrang hrang khawih a ni a, a bikin volley ball leh football hi khelh deuh a ni. Hockey te lah a thiam hlei hlei kan ni. Club hmingin khel chiahlo mah ila a tam zawk kha chu club member kan ni ṭhin. Kan pawl hi team ṭha ve tak kan ni ve na a champion em erawh kan nei khat viau. Pahnihna nih kan thiam riau mai a nih chu.
Infiammi te pawl din a ni na a, kan pawlah hian inkhel ve ngai reng renglo pawh kan awm ve tho mai. A ṭhahnemngai ngai pawh kan ni zawk mah awm'e. Hringnun lamah pawh inkhawm taima tak kan awm laiin ngaihtuah vak lemlo pawh kan awm. Pawl thiltih hona-ah erawh kan inpawh tlang hle. Inkhelh mai bakah chawei khawm, inhlawh leh thil dang pawh kan ti ho nasa hle. Amaherawhchu, 1999 kumtawp ni tlaia kan chawei khawm kha kan chaw ei khawm hnuhnung ber a ni ta a, pawl anga kan thiltih ho pawh a khat ta pharh mai.
Kum sangbi thar kan chuankai meuh chinah phei chuan pawl anga thiltih a awm thei ta meuhlo. Zirna leh eizawnna avang te in 'mahni seh seh mual hranah' tih ang deuhin mahni buai buaiin kan buai ta hlawm a, hengte vang hi a ni mahna, ṭhiat chuangloin kan ngawi ta reng a, club member hmundanga awm ho an rawn hawnkhawm lai denchhenin tunlai hmasawnna (whatsapp) hmang ṭangkaiin member ṭhenkhatin zanriah ei paha inkawm ho an rawt a, tun hi kan lo thleng ta a ni.
Zanriah kilho hi tunge thleng ang? tih kan ngaihtuah fe hnu-ah Pu Hruaia Ngente (Pu Vana, Tlangveng te chhungkua) in hneh takin min thleng ta a, anni hi 1999 kuma min thlengtu te tho kha an ni nghe nghe. Amah mai bakah a nu leh pa leh a fate chenin hmel hlim siahin min lo dawngsawng a, an lakah hian kan lawm takzet a ni. Kan eitur kan lakkhawm aṭangin kan phur tlang hle a, tuman awl bik tumloin mahni theihna zawn zawnah kan buai em em ṭheuh mai. Hei hian mize hrang hrang niin leh tlang hrang hranga cheng ni tawh mah ila kan lo la inlungrual zia a tilang chiang hle.
Chaw ei dawnah kan zinga mi, Pastor Johana'n hunserh a hman hnuin chaw chu kan eiho ta a, tunhma ang em chu ni tawhlo mah ila kan la ei thei tlang hle. Chawei pah leh chawei hma aṭangin mahni duh duh kan sawi a, thil hre ve viau a ka inngaih laiin kan hun hman tawh dan ka hriatreng takloh a lo tam ngei mai. Hetaṭang ringawt pawh hian kan hun hman hlawhtlin zia a lang awm'e.
Kan pawl member te hi sawi tawh angin mize hrang hrang kan ni a, eizawnna leh rawngbawlna kawngah pawh mi hmingṭha tak tak kan awm. Pastor, missionary, KṬP leader ni lai leh leader ni chunga over, evangilist, school principal, bial zaipawl conductor, sipai lal, auto rickshaw driver, sumdawng leh lonei mi thlengin kan ni nawk mai. Amaherawhchu, unau fel rual zingah pawh han boy deuh tawk an awm ṭhin ang hian kan club zingah pawh hian ruih theih thil ngaina riau pawh kan awm ve bawk.
Kan chawei khawm ṭum hian hnaṭul avangin member pali leh boral ta pakhat tihloh chu kan kim thei a, kawppui te rawn hruai tlem azawng an awm bawk. Kan ti ti na eng aṭangin tunṭuma kan kalkhawm kha kan indin tirh aṭanga a kum 25 na chiah a ni tih kan ngaihtuah chhuak a, 'Silver Jubilee a ni mai' te kan ti ta vel a. Kalkhawm te hian kan ṭhianpa boral ta Lalliantluanga Zadeng, Dinthar veng 2013, March ni 25 a min boral san tu chu ral ṭha kan ti tlang a, kan rel angin Nilaini zan inkhawm ban khan kan ral ta nghe nghe. Kum ruk liam hnu-ah kan ral ta chauh a nih chu.
Matluanga kha aw, a ngaihawm ṭhin. Goal vengtu a ni ṭhin a, goal ngei tura ngaih a save fo mai. Mahse, save tura ngaih a chhuah leh ṭhin mai pawh a. Hruaia ball throw te kha lehlam pawl te khan freekick ai mahin an huphurh ṭhin in ka hria. Goal thlengin vawm thei miau hek. A ni bawk hi a rough thei bawk. A palen deuh avang khan check rawn a hlawh ṭhin. Mi pathum chinin an bawr deuh kha chuan pakhat tal hi chu an vial ngawl ngawl zel. Patea inlak style theih dan te kha. Mipui ṭan te kha kan va hlawh ṭhin em. Ruihhlo laka buailo leh kohhran bel kan nih mi kan nih vang pawh a ni mahna.
APOLLO vul thar leh rawh se.
Comments
Post a Comment