1st. Sunday : April Fool a ni a, mi thenkhat chuan an ngamtlak deuhte fiamthu nen chawhpawlhin an biak bum a, thil pawi leh huatthlala sawi an awm rualin intihhlim nana hmang an tam hle.
2nd. Monday : 13th. March thlaa tan, Mizoram Legislative Assembly budget session chu a tiak. Session neih chhung hian report 11 present ani a, paper 19 pharh a ni. Resolution 81 atangin pahnih sawiho a ni a, pakhat zawk siamremin a pahnih a pawm a ni. Bill lut panga chu pawm vek a ni bawk.
3rd. Tuesday : Khualzin te hipna tura ruahman, India ram pawha la awm ngailo, sky walk siamna tur lungphum chu Tourism Minister, Pu John Rotluangliana'n Sakawrhmuituai tlangah a phum.
4th. Wednesday : Mizoram State Sport Council hmalakna a buatsaih, Phulpui khuaa Sport Centre chu bialtu MLA, Pu KS Thanga'n a hawng. Hen centre hi cheng nuai 394/- senga kum 2012 a sak tan a ni.
5th. Thursday : MLA hluite intel khawmna pawl, Former Legislature Association of Mizoram (FLAM) chuan Aijal Club-ah general body meeting an nei a, ram leh hnam a him lehzual theih nan nasa lehzuala hmalak an rel. Meeting hi an pawl president, KLRochama'n a kaihruai a ni.
6th. Friday : Ei leh bara Mizoramin hma a sawn theihna tura kawng hrang hranga sorkar, mimal leh pawl ang mawhphurhna fawng vuantu td intawhkhawmna, 'Mizoram Economic Conclave' chu Assembly Annexe-ah buatsaih a ni a, CM, Pu Lal Thanhawla'n a hawng.
7th. Saturday : LBS SUZUKI Unter Branch YMA Cricket Tournament vawi sawmna chu a hmawr bawk a ni ta a, hetah hian Ramhlun Venglai chu a vawili na'n Durtlang chu wicked thuma hnehin an champion.
8th. Sunday : Thenzawl daia Tourist Lodge bulah Lalngaihsaki (40) leh a fanu puaklai, kum khat mi chu motor-in a chilhlum.
9th. Monday : Khawzawl District Implementation Demand Committee bultumin Khawzawl mipuite chu Dinthar Bazar-ah an kalkhawma, resolution pass-in district headquarter atana Khawzawl puan tawh chu MLA inthlan puan hma ngeia ti puitling turin sorkar an phut.
10th Tuesday : PRISM Party chuan kumi'na MLA Election lo awm tura an party candidate tur mi sawmte chu Ignite Studio-ah an puanga, amaherawhchu, an dinna tur erawh tihfel a la ni lo thung. Inkhawm hi an party vice president, K. Tlanthanga'n a kaihruai a ni.
11th. Wednesday : Health department-a Food Safety Commissioner-in Mizorama tui in tur siama hralhtu, Zo Aqua tui siam te nikum August thlaa a thianghlim tawk loa an ngaih avanga hralh an phalsak loh chu EFRAC Laboratory, Kolkata-a endik a nih hnuah hlipin hralh phalsak anni leh ta.
12th. Thursday : Mizoram leh Assam inrinaa Inner Line Reserved Forest, sq km's. 509 huamchhung chu sorkar laipuia Ministry of Home Affairs ruahman angin Joint Verification Team te chuan enfiah hna an thawk tan. Ramri enfiahnaa Mizoram team te chu Environment, Forest & Climate Change-a conservation of forest Lalthlamuana Pachuau in a ho a ni.
13th. Friday : HPC (Democratic) te chuan CTI, Sesawngah an ralthuam te an tunga, an silai te chu Home Minister, Pu R. Lalzirliana hnenah an hlan. He hun hmanpuitu Chief Minister, Pu Lal Thanhawla chuan, HPC(D) thil duh te chu a tahtawla an tihhlawhtlin tur thu a sawi.
14th. Saturday : Kolasib leh a chhehvela in 17 chu thli leh rial in a ti chhia.
15th. Sunday : C.R.Kapzaua, New Serchhip Bazar Veng chu accident avangin a boral.
16th. Monday : Aizawl DC, Dr. A. Muthamma chuan Aizawl District chhunga zirlaite saptawng lama hma an sawn theihna tura buatsaih, Traning of Teacher's chu DC conference hall-ah a hawng. Traning chhung hian Aizawl district chhunga primary school leh high school thlan te atanga English teacher ten video conference hmangin saptawng zirtir chungchangah English Learning Foundation Chennai, an thawhpui dan tur an zir dawn a ni.
17th. Tuesday : Pachhunga University Collage a Mizo Department chuan Sikulpui, Serkawn, Lungleiah Nuchhungi thu leh hla zirchianna, 'National seminar on Understanding, The Children's Literature of Nuchhungi Renthlei : Approaches and Systems' tih an buatsaiha, Rev. Dr. CL Hminga chu khuallian a ni. Nuchhungi Renthlei hi Mizo thawnthu ziaka dahtu hmasa ber a ni.
18th. Wednesday : DGP, Balaji Srivastava chuan MPRO hmun a tlawha, thawktu te nen thil pawimawh hrang hrang an sawi ho.
19th. Thursday : Sorkar laipuia Ministry of Home Affairs in Mizoram leh Assam ramri leh Inner Line Reserved Forest chhung enfiah tura a din, Joint Verification Team te chu Phaisen hnaih lam endik turin an kal khawm a, mahse, Mizoram leh Assam official te thu a inhmuh theih loh avangin endik a ni lo. Mizoram leh Assam official te chuan ramri endik hna chu thuneitu sang atanga ruahmanna thar a awm phawt loh chuan chawlhsan rih an tum.
20th. Friday : RS Traders Pro Volleyball League R. Dengthuama Indoor Stadium a khelh chu a hmawr bawk a ni ta a, final-ah hian Champion lai Hunthar veng chuan Aizawl pawn team awmchhun Tuichangral chu 25-21, 25-17 leh 25-22 a hnehin an champion. Champion team Hunthar hian nomawi bakah tangka fai cheng 1,00,000/- leh ticket share cheng 19,000/- an dawng a, an team atang hian spiker, blocker leh libero tha ber lawmman an dawng bawk.
2 1st . Saturday : Bairabi bul Tlawng luiah Siampuii (28) w/o Darthanmawia, Bairabi chu a tlahlum. Siampuii leh a pasal hi lawnglenga chuang anni a, an lawngin thil a sut avangin hetia'ng chhiatna hi a thleng ta a ni.
2 2nd. Sunday : Penticostal Youth Department General Conference Aizawl Tlangnuam khelmuala 'Thuthlung Run' a Ningani zana tan chu a tiak. Conference-ah hian district 11atangin palai 2,000 chuang an kal a ni. Conference thupui hi 'Thlarauah awm rawh u' tih a ni.
23th. Monday : Mizo Academy of Letters chuan an din champha an hmanga hetah hian nikum chhunga Mizo irawm chhuak lehkhabu tha ber lawmman chu 'Savun kawrfual' tih ziaktu Lalhmingchhuanga Zongte hnenah hlan a ni. Lawmman hian chawimawina thuchei leh cheng 5,000/- a keng a ni.
24th. Tuesday : Kar hmasa April ni 20 a Chakma Autonomous District Council (CADC) inthlana vote tla te chu chhiar a ni ta a, a pumpuiah MNF in seat la hnem berin seat 8 an la a, Congress 6 leh BJP 5 ten an dawt. CADC-ah hian bial 20 a awm a, Futuli biala candidate pakhat hnawl a nih avanga High Court a kal an awm avangin Gauhati High Court chuan a stay rih a ni.
25th. Wednesday : MPSC chuan MCS Junior Grade atana departmental officer te personal interview result a ti chhuaka, (rank indawtin) Agricultural Officer, Danny Lalchhuanawma, AH & Vety. Officer, Dr. Peter Malsawmtluanga, Police Dy. SP, Timothy R. Lalhmangaiha leh Saitual College Asst. Professor, Dr. Saithangpuia te an tling.
26th. Thursday :Mizoram Upa Pawl (MUP) chuan Synod Conference Centre-ah inkhawmpui an hmanga, thil pawimawh hrang hrang an ngaihtuah.
27th. Friday : Mizoram Youth Commission (MYC) huaihawtin Siamliana Hall, Mamitah 'Youth Summit & Road Show buatsaih a ni a, Mamit DC, Lalbiaksangi'n a hawng. He hunah hian stall 16 hawn a ni a, chu' ngah chuan zawhna hrang hrang zawh theih a niin, chu'ng zawhna te chu a hmunah hian chhan nghal zel a ni.
28th. Saturday : World Veterinary Day a ni a, AH & Vety. department leh Mizoram State Veterinary Council huaihawtin district hrang hrangah doctor ten a thlawna ran entirna an buatsaih. World Veterinary Day hi kum 2000 atanga hman tan a ni a, April Inrinni hnuhnung berah hman thin a ni. Kumi'n thupui chu 'Role of the Veterinary Profession in Suitanable Development to improve Livehood, Food Security and Safety' tih a ni.
29th. Sunday : Chief Secretary, Arvind Ray chuan Lunglei a tlawha, Lunglei DC ho a sorkar official te nen Circuit House-a an inkawm bakah Len Stadium Serkawn leh State Sports Academy, Zobawk siam mek te chu a en nghal.
30th. Monday : Zawlnuam police leh MZP headquarter, Zawlnuam te chuan an khuaa hnamdang awm te an enfiah a, ILP nei lo 18 leh ILP thi tawh 10 an man. He'ng an mi man te hi police te hian an khawm nghal vek a ni.
Comments
Post a Comment