KA LAR EM?

 

Ziak mi lar pahnih, PL Liandinga leh Darrokima te khan fiamthu in lar zawk nih an inchuh thin. Puipunna hmuna an kal changin emaw mi tupawh an hmuhin a tu emaw zawk zawk kha miin an lo hriata pakhat an hriat veloh chuan a fala an awm hnuin an in tihtheih khum thin a nih kha. 

Anni pahnih hi chu sawi tak angin Zofate zingah thu leh hla lama tui inti tawh chin ik chuan hrelo kan awmlo hial awm e. Chutih rualin an eizawnna kawngah emaw laichin leh in thenawm khawvenna kawng te avang pawh a hria kan nual bawk awm e.

Lar dan hi chi hnih a chhe lam leh a tha lamin a awm thei ve ve a, a chhelama lar chu tuman kan duhin a rinawm loh. A tha lam zawng erawh chuan chaklo kan awmlo leh hial zawk awm e. Mi thenkhat lar tum luat avanga pawi khawih ta mai an awm a, thenkhat intih lar tum hrim hrim vang nia ngaih theih tura rem leh remlo pawha inla vai vung hmuh tur an awm leh zeuh thin bawk. 

Zai lam kawngah hian lar chak hi kan tam leh zual em aw a tih theih. TV lamin zaithiam an thlang fo a, hetiangah hian zaithiam lemlo, zai ve thei si, mi pangngai taka ngaih ni bawk si hi an awm leh nuk thin. Tin, hetianga tel chiah lo pawh music video siam ve ngawt te pawh lar chak avangin an awm nia sawi a ni lehzel. TV a lan vang emaw biakin a kan hming an puan avang emaw a lar ta viaua inngaih mai te pawh a awm thei bawk ang. 

Keipawhin milar nih chu ka chak ve khawp mai. Kan khua a chanchinbu/sawiremtlang editor ka nih avang hian lar ta viau a inngaih chang ka nei leh zeuh thin. Tumkhat chu ka lennaah kan chanchinbu banga an tar hi ka han hmu fuh a. In neitupa hnenah chuan Sawiremtlang chanchinbu a chhiar ngai leh ngailoh thu ka zawt a, a ni chuan a ngainat thu leh a chhiar vek zel thu leh a lo thlen hlan a nghahhleh em em thin thu in min chhang. Ka phur hman hle. A enkawltu te zinga ka tel ve thu leh enkawl buaithlak zia vel ka sawi lai chuan, “I lo tel ve reng a ni maw,” a ti ta he haw mai. Kan veng bawrah chuan chanchinbu avang ni kherlo pawhin min hre tlangpui turah ka ngai a. Veng thenawm ami te chuan hemi avang ringawt hi chuan lar ta viaua kan inngaih lai hian ka lo lar phah dawn hauhlo tih ka hmuchhuak chiang hle.

Lar hian pawimawhna lai a lo nei ve nual mai. Ballot box hunlai a V/C kan thlan khan tumkhat chu ballot paper ka ken te ka’n thlak kual den den a, a hmain vote tur ka ti fel vek naa polling booth chhungah chuan zamna a lo awm ve bawk nen, paper pakhat ka thlakna tur ka hre mai ta hauhlo mai. Muangchan a rem vak silo, lehlam ka hawia, ka mit la ber ka vote tawp ang tiin chumi tum chuan ka huan kawng zawhpui thin hming chu hmu fuhin ka vote a, a tling zui ta nghe nghe. Khmi tum khan ka kawngzawh pui thin pa kha keimahah chuan lar ber hek, ka vote phah ta a nih kha. Thildangah pawh nise, an lar loh miau chuan an that leh thatloh kan hre tlatlo. Chuvangin, mi tha tak tur te pawhin vote an hmuhloh phah fo a nih hi. Thuziah kawngah pawh a chunga mihring kan tarlan te ziah chu kan chhiar hmaih ngailo. Keini ziah ve ngawt erawh in mit a la mawh viau a nia. Mi mit la tur chuan lar khawpa ziah ve pawh a tul in a rinawm.

Engvanginnge pawl inthlanna reng rengah a ngai kan thlan fo kan tih chuan an thatna an larpui tawh vang a ni chawk. Chutiangbawkin, MLA tura MZP leh YMA vela inhmang thin kan thlan fo chhan pawh khatiang pawlah khan an thatna an lo larpui tawh miau alawm. Chuvangin, kan thatna lai hi thupbo mai loin kohhran leh  khawtlang tan a chhawrnaawm a nih ngei theih nan theihtawp chhuahin lar i tum ang u.