Skip to main content

CHHIATTAWH CHUNGCHANGA LAWMTHU SAWINA

 




Kan nau Robert Lalrinnunga'n December ni 27, 2020 a min boral san chungchangah khawtlang mipui te chungah kan lawm takzet a ni.


Thlahnih chuang zet natna khuma  mu a ni a, a nat tirh atangin tawngtai sakna a dawng nasa em em a, amah hrelo, khaw dang mi thlengin tawngtai puina a dawn bakah chinchang hriaa tawngtai tura rawn kal vang vang te, sakhaw hrang hrang rawngbawltu te hriakthih rawngbawlna nei tu te chungah kan lawm em em bawk a ni. Damdawi in lamah in kan theih a nilo chungin pawna lo awm pawh inhuam em em te, kan in lama min lenpui tute leh khaihlak hauh loa  kan ina rawn riahchilh hialtu a thiante leh pa valai thenkhat chungah te, tul leh mamawh kan neih apianga min tih sak zar zara Aizawl kal a ngaih chang pawh phutlet nei hauhloa tlan lawp lawp te, kan harsat hlaua sum leh pai min petu te chungah kan va lawm em. Pu Vanlalngaihsaka, Chaltlang, DC hlui te chhungkua, damlo in ni ve chunga sum leh paia min puihna leh tawngkaa min thlamuanna te, damdawi lei tur kan hmuh zawhloh tuma social media kaltlanga min zawnpui dan te kan ngaihtuah kirin kan va lawm em. Minister hlui, Pu H. Liansailova te oxygen kan duh hun huna ngaihhnathiam taka min hawh tir tute chungah  kan lawm takzet bawk e. Chief Minister te chhungkua leh Sihphir MNF party te thilpek vawi engemawzat min pe tute chungah kan lawm em em bawk. Khawtlang mipui, a hming mal malin kan sawi senglo, in mi ngaihsaknaah kan lawm. Kohhran hrang hrang hruaitu te, a sikul kalna hlui leh a thil zirpui zawng zawng bakah Sihphir khaw mi, hmun danga awm ta te leh kan mamawh thil dang min petu hrang hrang heng : oxygen concentration min hman tirtu Selesih branch YMA, hmanglo ila chuan cheng tam tak kan seng ngei ang. Awngphah manto min hmantir tu Pu Lianchungnunga, Neihbawi, Tv Eddie Lalhmangaihzuala VCM c/o Thangzuala, Tlangveng leh Pi Thangliani, Tlangveng te chungah kan lawm em em a, Pi Thangliani te phei chuan thil dang damlo mamawh tur min pek nual bakah damlo enkawl dan tur thurawn min pe in kan inah a khattawkin an rawn kal reng mai. In chungah kan lawm takzet a, kan dinhmun min zawt tu te pawh min ngaihven reng a ni tih kan hriat avangin kan lawm takzet a ni.


Damdawi in (LRM Hospital) kan awm laia min enkawltu nurse leh doctor fel leh biak nuam tak tak te bakah thawktu dang te chungah kan lawm em em a, a bikin ambulance driver kha i va han fel tak em! Remchan hun a innang fuh thei lo kan thinur lek lek laia hmel hlim leh biak nuam taka min chhawn tu te, kawng laka kan chuan nawm loh hlaua min vengthawng reng mai te leh in thlen hnu a, inhawn dawn lai'a rawn kir leh meuha oxygen bur thlak dan min han hrilh leh te khan thinlung takin min ngaihven tih a ti chiang ngawt mai. Damdawi ina kan awmpui te, damlo ni ve chunga min ngaihven zia leh damdawi hmun danga lam ngai min lamsak zung zung mai tu te, kan chhuah dawna min rawn zui hram tute chungah kan lawm lutuk.


Ka ni te zawng zawng bakah in tu leh fate thlengin min buaipuina zawng zawngah kan lawm a, ka nu (Feli) lama kan chhungte pawh kan nau-a nen thisena inzawmna nei miahlo chunga kan nau a nih avanga bangloa in mi ngaihtuahnaah kan lawm takzet bawk. Pu Lalmuanpuia s/o Zahmingliana, damdawi in awmna venga hnaia in lo awm avanga ngamtlaka kan tihbuai nasat zia che u leh chaw leh thingpui min hlui reng mai te kha kan lawmna tizualtu an la ni reng mai.


A boral hlima min lainattu lo pungkhawm te, kan buaipui ngai hauhloa, kan in min tihfel saktu te leh mamawh lo lamkhawm tu thalai te, tunthlenga min lenpuitu thenrual te chungah kan lawm takmeuh a ni.


Hlawh phut hauh loa, min enkawl saktu nurse, Nl Lalhminghlui leh damdawi lam mithiam dang, ngamtlaka kan koh nurse, Baby w/o Samama bakah health worker, Pu K. Lalchhuangliana leh Nl Mawitei te  te chungah kan lawm takzet bawk a ni. 


He'ng kan chunga in thatna zawng zawng te hi kan rul seng dawnlo che u a, Pathianin a let tam takin rul che u rawh se.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

THLAZING

  (Sawiremtlang editorial) August thla han hman meuh chuan chhum a zing phui chuai reng mai a, upa ten 'thlazing' an lo ti pawh hi a awm viau mai. Amaherawhchu, heta thlazing tih hi pi pu te thla hming pakhat emaw ti kan awm leh mai thin. Mizo thla chhiar danah chuan Thitin thla a ni tih i hria ang u khai. Hmanlai chuan mitthi te hi pialrala kal nghal mai loin kan velah hian an la tap thin a, August thla hian mitthi khua an pan thin nia an ngaih avanga thitin thla ti pawh an ni niin a hriat. Chuvangin, August thla hi Mizo thla chhiar dan chuan thitin thla tihna a ni a, thenkhat ten thlazing tia an sawi erawh thla hming ang niloin tun thla chu chhum a zing chuai reng mai an tihna a nih chu. Mizo thla chhiar dan hriat hi kan mawhphurhna ni ve in a langa, thla chhiar dan mai bakah an nunphung te pawh hi hriat ve hram hram I tum ang u. August thla chu a zo ruai chu a ni leh ta a, ni reilo te-ah Ber thla kan kan kai anga, derhken, nuaithang, anthur leh senhri nu ten par an chhuang l...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more