Nimin Zirtawpni kha Lal Isua, kan sual te min tlan tura a nunna a hlan ni champha a ni a, chutiangbawkin, naktuk Pathianni lo thleng tur khi chû a thihna hneha a thawhlehna ni champha chu a ni thung. He’ng hunpui kan hman mek te hi ringtu te tan chuan tihtakzeta hman a pawimawh hle.
Eden bawhchhiatna avangin keini Adama thlah te hi mi sual, boral mai tur kan ni a, chu chu zahngaihna a khat kan Pathian chuan ngaingam loin a fapa mal neihchhun Isua Krista chu a rawn tir a, a thilsiam mihringte a a rawn chang mai duh hi a aia ropui leh hlu hi thil dang a awm thei lo ang. Keini mi sualte tan chuan phu lo chunga chhandamna kan channa a nih avangin bangloa lawmthu sawi awm kan ni. He ni hi tunhma deuh kha chuan chawlhni angin kan hmang vak lemlo a, inkhawm ni atan kohhran ho in kan hman thin tho rualin hnathawh kha kan tim lemlo niin a lang. ‘Lui kal an hlawhtling duh’, ‘vaimim tuh a tha duh bik’ ti ang zawng te in kan sawi mai thin a, tunah erawh chuan mi tam zawk chuan chawlhni ang deuhthaw in kan serh ta a, thil awm tak pawh niin a lang.
Naktuk Pathianni lo thleng tur pawh khi chû a thihna chu hneha a thawhlehna ni champha a ni ve thung a, Muslim ho chuan an lal Mohammed-a thlan an tlawhin a ruang a awm ngei tih an hriat avangin ropui an tiin Kristian te min diriam nan te hmangin kan Pathian thlan a ruak bik chu min hmusit hle thin. Amaherawhchu, Lal Isua kha thihna atang khan tho leh lo selang chuan a lo pian kan lawm te, amah chawimawia tumkau kan chawi te, a thihna tawmpuia kan lo tuarpui ve te khan awmzia a nei lo ang.
Thihna pawhin a ngam loh Lal Isua ringtu kan ni hi lawm nachang hria ila, a tana nung zui zel turin min chah ang ngei khan mahni inphatin nitin kross pu in i zui zel ang u.
Comments
Post a Comment