RETHEITE NIHLAWHNA

 

(Sawiremtlang editorial)

Tlangval hausa tak pakhat chu Isua hnenah a lokal a, chatuan nunna a neih theihna tur a zawt a ni. Isua chuan chatuan nunna neih theihna tur kawng hrang hrang a lo hrilh. Tlangvala chuan, "Chung thu zawng zawng chu ka zawm thin, enge ka la bak?" a ti a, Isua chuan a neih zawng zawng hralha, pachhiate hnena pe tur leh a mah zui turin a sawm a nih kha. Tichuan, tlangvala chu lungngai takin a kalbo ta tih bible-ah kan hmu. (Mt 19:16-22) 

Tlangvala kalbo hnuin Isua'n mihausa tana vanram luh harsat tur zia hetiangin a sawi zui, "mi hausa Pathian rama luh aiin hriau benga sabengtung luh tlang a awl zawk" (chang 24)  tiin.

A ni lah taka, hausak na na na chuan duh duh an neiin an ti thei ta emaw tih mai tur a ni réng mai. An thil neihte kalsan chu thil har tak tur a ni reng a ni. Kar hmasa khan mi hausa te khawngaihthlak zia kan sawi tawh a. An thil neihte kalsana Isua hnung zui chu thil har tak a nih avangin kar hmasa a an khawngaihthlak thu kan sawi ai mah khan an lo khawngaihthlakawm ta a nih chu. Chuvangin, Lal Isua ngei pawh khan mi hausa vanrama luh ai chuan sabengtung tan meuh pawh hriau benga luh a awl zawk tur thu a sawi a ni. 

Chuvang tak chuan mi rethei te kan vannei ve ta thung. Kan retheih avangin kalsan tur kan nei tlem a, chuvangin, Pathian hnaihna chance kan nei tam zawk ta hle a ni. Chuvangin, mi rethei te hi mi vannei tak kan ni zawk ta awm e.