JANUARY 2024, MIZO(RAM) DIARY

 

1st. Monday : C Lalbiakzuala (34), Pângzâwl Ramrikâwn chu current-in a man hlum.

2nd. Tuesday : 

Ṭhaizâwl khaw bula 207 tripper che sualin a hmunah, a khalhtu Sângbîka (49), Lawngtlai New Vêngpui a thi.

3rd. Wednesday : Chief Minister, Pu Lalduhoma chu sawrkar thil pawimawhte ti tura Delhi-ah a kal. 

4th. Thursday : Pathian thu leh ram leh hnam ang pawh a Mizo te Arsi lian, Rev. Chuauthuama, kum 77 chu Ebenezer Hospital-ah heart attack avangin a boral.

5th. Friday : Pu Lalhriatpuia s/o Upa Lalduhawma Bûkpui chuan an in bula electric ban phawi tur mi a pui a. Thir ban hian electric hrui si palhin Pu Hriatpuia hi current hian manin damdawi in panpui a nih hnuah a boral. 

6th. Saturday :  Lalrinawma (17)  S/o C. Lathansanga, Haulawng chu an lui kalnaah khama tla in a chesualin a a boral. 

7th. Sunday : 

North-East India Open (Men & Women) Classic & Equipped Powerlifting Championship 2023, 5th - 7th January, chhunga Silchar, Assam a neihah Mizoram team Team Champion Lawmman an dawng a, Gold Medal 9 leh Silver Medal 2 an rawn hawn a ni. Hei mai bak ah hian Saron veng tlangval, Lalhmangaihsanga (Tetea) chu  Strongman of Northeast India a tan a thlan a ni bawk.

8th. Monday : Nagaland Deputy Chief Minister, Pu Y. Patton chuan Chief Minister, Pu Lalduhoma chu a chenna Bungalow-ah a tlawh a, inkawmna hun ṭha tak an nei.

Pu Y. Patton hian Pu Lalduhoma chu Mizoramah sawrkar thar chak tak a siam avanga a lawmpui thu a hrilh a, “Naga te leh Mizote hi thlahtute aṭanga unau leh inhnai tak kan niin a lang a, chuvang chuan kan tan pawh Chief Minister i ni,” a ti.  

9th. Tuesday : Mizoram Iskut Grower's Association (MIGA) hruaitute chuan Chief Minister, Pu Lalduhoma chu a pisaah an hmu a, Chief Minister Relief Fund atan cheng singkhat an pe.

10th. Wednesday : Zarkawt Venga RPS In chung ber (Assam type) aṭangin kangmei a chhuak a. Kangṭhelh pawl ten rang taka ṭhelhin hmun dang kang kai loin ṭhelh mih a ni.

11th. Thursday :

India rama faina inelna, Swachh Survekshan 2023 chu New Delhi-ah lawmman sem a ni a; Lunglei khawpuiin Clean City in the North East Zone Award (below 1,00,000 population) a dawng a, Aizawl khawpuiin Clean City Award a dawng bawk.

12th. Friday : Red Ribbon National Quiz Competition, Jaipur, Rajasthan-a  neihah Mizoram aṭanga tel Presbyterian English School, Republic Veng zirlai pahnihte chu pakhatna an ni a, lawmmanah Rs 1,00,000/- an dawng. National Quiz Competition-a pakhatna ni tate chu Zonunsangi, Class-VIII, d/o H Zahmingthanga, Republic Vengthlang leh Janet Malsawmpuii, Class-IX, d/o Lalrintluanga Ralte, College Veng, Aizawlte an ni. Anni hi an zirtirtu, Zonunpuii Khawl­hring leh Mizoram State AIDS Control Society aṭangin Joseph Lalnunmawia ten an hruai.

13th. Saturday :

Lalramropuia (25) s/o Lalrotluangi, Ramthar Veng, Aizawl chu  Leitlahniam, Hunthar Veng bulah a scooter (scooty) khalhin truck a sut avangin damdawi in panpui a nih hnuah a hliam tuar loin a thi. Lalramropuia hi nikhawhrelo (unconscious) anga awm thut ching nia sawi a ni a, a accident dan pawh CCTV atanga a lan dan chuan, truck kha a su bur a, a sut dawnah pawh engtinmah a che lo. A natna a chhuak leh a nia rin a ni.

14th. Sunday : Minister pawh lo ni tawh, K Lianchia (91), Electrict veng chu thawhah avangin an chenna inah a thi. A ni hi kum 1984 leh 1987-ah te khan PC party ticket-in Lungpho bial MLA atân thlan tlin a ni a. Kum 1998-ah Khawhai bial atangin MPC ticket-in thlan tlin a ni leh a, hemi tum hian MPC leh MNF sorkar intawmah Cabinet Minister niin, Health & Family Welfare leh Sericulture Department te a enkawl a ni.

15th. Monday :  Quarry Sang, Luangmual bulah hnamdang pahnih, mipa ve ve ruang chhar a ni. Ruang chharte hi rawra hera inhlawh, Jharkhand mi ve ve nia hriat an ni a,

January 2, 2024 atang khan an awmna chin hriatzui a ni loa, helai a thawk te hi thawh tur dang an hmuh chuan ngawi renga tlanbo an chin avanga chutiang tura ngaia an chhin pawh hi ngaihvenlo an ni. Ruang hi a chhe tawh hle. An thih chhan hriat ni lo mah se, pumpelh kawng an tih mai lirthei pawh kal theihna atangin an tla nia rin a ni. 

16th. Tuesday : Zaithiam, Ngurthangvela nupui, Nupuii, kum 91 chu an chenna in, Bethlehem Vengthlangah awmlai in a boral.

17th. Wednesday :  'Thihna luiral ka lo kai ta' tih hla phuahtu, PC Zoramliana (76) H/o HC Lalrindiki chu Selesih chu an chenna inah ah 'awmlai' in a boral.  

18th. Thursday :

Kolkata Ballygunge Mizoram house hralh tumna thu-ah dâwt hmanga amah puhtute man chhuah an niha, dan anga hremna pek an nih theihna turin Ramthansiama, Chief Minister hlui Pu Zoramthanga fapa chuan Aizawl District Court-ah Criminal Complaint a thehlut. Criminal Complaint a thehluhah hian Ramthansiama hian dâwta amah puhna hian amah bakah; a pa Chief Minister hlui, Zoramthanga pawh nasa takin a ti hmingchhia nia a hriat thu a sawi.

19th. Friday :

State Level Sub-Committee on Fire Prevention Committee chu  SAD Conference Hall-ah an chairman, Forest Minister, Lalthansanga hoin an thukhawm a, kumin chhunga kangmei ven hapta hman dan tur leh kumin thal chhova hmalak dan tur hrang hrangte an rel. Meeting chuan kangmei ven hapta hawnna chu February 5, 2024 ah Vanapa Hall-ah hman ni se, February 9 thleng hman ni se tiin a rel. He hapta chhung hian kangmei venna kawnga inzirtirna uar zawk a neih ni se an ti bawk.  

20th. Saturday :  Mizoram Youth Commission Chairman, Pu Malsawmzuala Ralte chuan MS Academy Khatla atanga MSSSB Combined UDC Exam 2023 a inziak tling mi 20 te hnenah lawmpuina a hlan. 

21st. Sunday : Hranghlui zaithiam, Lalhmangaiha (MALTA), kum 63, 

W/o Vanlalhliapi, Bethlehem veng chu cancer natna avangin an chenna inah a boral.

                     

22nd. Monday : Special Judge, (Prevention of Corruption Act) Dr HTC Lalrinchhana chuan sum tihchingpen thubuaia ni 19.1.2024 a thiam loh a chantir LADC CEM leh midang pathum bakah lehkha lem hmanga zirtirtu atan leh hna dang atana lak an nih avanga thiam loh a chantir mi 30 te hremna a puang. 

 

23rd. Tuesday : Burma sipai tangkhang pur tura thlawhtheihna rawn tum chu runway a a tlan laiin ding zoloin a tlanliam Thlawhtheihna-ah hian pilot nen mi 14 an chuang a, 8 in hliam an tuar a, mi 6 an him. Hliamte hi Lengpui damdawi inah lak nghal an ni.  

24th. Wednesday : Myanmar sipai thlawhtheihna Lengpui Airport-a January 23, Thawhlehni a chesual a hliam tuar te chu deputy speaker Lalfamkima, minister of state pahnih, B Lalchhanzova leh Lalnghinglova Hmar bakah, sorkar hotu dangte'n a hmunah an tlawh. Minister-te chuan, vanduaina thleng chu pawi an tih thu leh hliam tuarte an tawrhpui thu an sawi.

25th. Thursday :  Animal Husbandry & Veterinary Minister, Pu C. Lalsawivunga chuan Sihphir, Lungdai, Serkhan leh Nisapui khuaa Vawk leh Bawng vulhtute an dinhmun hrechiang turin a hmunah kalin a tlawh a, harsatna an tawh leh an hmalak dante enfiahin a kawm.

26th. Friday : Republic Day a ni a, India hmun dang ang bawkin Zoram hmun hrang hrangah hman ve a ni. A hmanna pui ber Aizawl a sipai lammualah chuan Governor, Dr Hari Babu Kambhampati chuan hnam puanzar a pawt parh. Thusawiin Larsap chuan mipuiin state hmasawn nana an beisei leh duhthusamte tihhlawhtlin a nih ngei theih nan sorkarin theihtawp a chhuah dawn thu a sawi.

27th. Saturday  : Thirsakawr hmanga India ram fang chhuah tum, Pu Vanlallawmzuala Varte chuan Mizoram tlan pelin Natkala, Tripura a thleng. Heti hian ni 25 aa tlan tan chu 235 Km a tlan thleng ta chiah a ni.

28th. Sunday : Kawnpui, Lungdai, Serkhan, Nisapui, Lungmuat khua ten Sentlang Power Transformer a chhiat avangin chawlh kar hnih chhung tui an Pump thei tawh loh avangin Lungdai Power Deptt. Office chu mipui thinrim kalkhawm ten a bang leh thildang an tichhia. Power Minister,  Pu F Rodingliana chuan Deptt. hotute a hmunah tir nghalin, Kawnpui Sub Station atanga Power pe kual-in tui pump theih dan tur an ruahman nghal.  

29th. Monday : Mizo Zirlai Pawl (MZP) General Headquarters chuan MZU Registrar leh Dean Students’ Welfare te hmuin, Meitei hel (Arambai Tengol) hnena silai mu man tur khawna hlantu, MZU hnuaia PhD ti lai, Teresa Nungthujam chu zirna a chhunzawm theih tawh lohna tura hmala turin a ngen.

30th. Tuesday : Parliament Library building-ah 'All party leader meeting' neih a ni a. He hunah hian MP, Pu K.Vanlalvena chuan thusawiin, Indo - Myanmar border fencing siam tumna awm hi thulh a tul thu a sawi.  

31st. Wednesday : ZPM General Headquarters executive chu Republic Veng Community Hall-ah an ṭhukhawm a, he hunah hian ZPM Gen. Hqrs. hruaitu thlan hun tur an rel a, inthlan hun atan February 15, 2024 an ruat.