OCTOBER 2023, MIZO(RAM) DIARY

 

1st. Sunday : Biakpianga, kum 58 h/o Vanlalbiaki, Sihphir Venghlun chu an huanah inawkhlum a hmuh a ni.

2nd. Monday : Mahatma Gandhi piancham puala buatsaih, Raj Bhavan tuala buatsaih, The Grand Gandhi Jayanti Exhibition   chu Larsap, Dr Hari Babu Kambhampati chuan a hawng.

 

3rd. Tuesday : Kum 2018 MLA inthlana Palak Bial atanga MLA atana Congress Party ticket-a thlan tlin, KT Rokhaw chuan  MLA atanga banna Assembly Speaker Lalrinliana Sailo hnenah a thehlut. 

 

4th. Wednesday : MNF party chuan Vanapa Hall-ah MLA General Election 2023, lo awm tura an Candidate tur te an puang a, Campaign Kick-Off nghal a ni. Chief Minister leh party  President ni bawk, Zoramthanga chu bial ngai Aizawl East I ah a dingin Deputy Chief Minister, Tawnluia pawh Tuichangah a ding bawk ang.    Hming puan zingah MLA neih sa 28 zinga Home Minister Lalchamliana, Speaker Lalrinliana Sailo leh Siaha bialtu MLA, Dr K. Beichhua te chu MNF ticket in an ding tawh dawn lo a, P&E Minister leh Tawi bialtu ni lai Pu R. Lalzirliana bakah Sports Minister leh Aizawl East 2 bialtu Pu Robert Romawia Royte chu bial dangah an ding bawk dawn a ni.

5th. Thursday :   Chief Minister, Zoramthanga chuan MZU Auditorium-ah Leitlang Pictures siam Ambush, a war story a tlangzarh. He film-ah hian lemchanthiam mi 70 vel an inlan a, Mizorama film siam tawh zinga sum senna sang ber nia sawi niin darkar hnih leh minute 50 a sei a ni.

6th. Friday :   Khawhai Village Council chuan tunhnaia Inter Village Volleyball Champion an nih leh an Higher Secondary School Provisional Adhoc Grant in Aid a hlankai te chu an lawm. He hun hi Deputy Chief Minister, Tuichang bialtu MLA ni bawk Tawnluia chuan khuallian niin a hmanpui.

 

7th. Saturday :

CM development trophy, Aizawl east 1 constituency Arm Wrestling championship, Sihphir a neihah   Lalhmangaihzuala, Zemabawk chuan kg 80+ huanga khelin a pumpuiah chakber lawmman a la a, Champion of Champion lawmman hlu tak a la.

8th. Sunday : Presbyterian Kohhran hnuaia Presbytery hranng hrang te inkhawmpui chu a tiak.

9th. Monday : 

Election Commission of India (ECI) Commissioner,

Rajiv Kumar chuan Rang Bhawan Auditorium, Akashwani, New Delhi-ah Press conference koin state 5 te Assembly election hun tur chu a puang. Heng state panga zingah hian Mizoram pawh telin November 7 ah inthlanngin December 3-ah vote chhiar tura ruahman a ni.

10th. Tuesday : 

Zoram People’s Movement (ZPM) thlawptu MLA panga, heng : Aizawl North I bialtu MLA Vanlalhlana, Aizawl North II MLA Dr. Vanlalthlana, Aizawl South II MLA Lalchhuanthanga, Aizawl West III MLA VL Zaithanzama leh Aizawl South I bialtu MLA C Lalsawivunga te chuan Assembly Speaker, Lalrinliana Sailo hnenah danin a phut angin bânna an theh lut. Speaker chuan heng lehkha te hi a lo pawmsak nghal.

11th. Wednesday : Assembly Speaker, Lalrin­liana Sailo chuan MLA aṭanga bànna Assem­bly Commissioner hnenah a thehlut.

12th. Thursday : PYD (NEI), Bairabi bial chuan Bairabi Venghlun Sunday School hall-ah Kolasib District Hospital tan thisen unit 37 an pe a, petute mipa 23 leh hmeichhia 14 an ni.

13th. Friday : Fiamthu thiam, Lalngaihsaka, kum 44 s/o Seingama, Mualpui chu Civil Hospital-ah kawthalo avangin a thi.

13th. Friday : IPS officer 3 chu Election Commission of India remtihna angin hetiang hian  sawn kual an ni.

Hnahthial district SP, Vineet Kumar chu Champhai SP-ah sawn a ni a. Dingluaia AIG (Training chu) Siaha district SP-ah sawnin Cybercrime SP Shivendu Bhushan chu Hnahthial district SP-ah a awm dawn a ni.  

14th. Saturday : Kananlalrammawii w/o Lalramlawma, Chhiahtlang chuan Zoram Medical College-ah fa mipa hlir pathum a hring.

15th. Sunday : Mizoram Synod, Mizoram Sunday School Union hnuaia beginners department te chuan nau hual ni pualin hun an hmang.

Nau hual hi Nausen kum li hnuai lam, kum 4 a tlin huna Sunday School kal tura hual lawkna niin Pathian leh Kohhran tana lo hual lawkna anga ngaih a ni bawk.  

16th. Monday : All Indian National Congress (AICC) hruaitu Rahul Gandhi chuan zankhat riak turin Mizoram a rawn tlawh a, hemi pual (Bharat Jodo Yatra) hian Chanmari atanga Raj Bhavan thleng kawng an zawh. Pu Rahul-a chuan Congress party an sorkar chuan hnam leh sakhaw hrang hrangte an humhim dawn tih a sawi.

17th. Tuesday : Hnahthial District Election Office leh Hnahthial College-a Electoral Literacy Club-ten Systematic Voter’s Education & Electoral Participation (SVEEP) pual Hnahthial College zirlaite tana essay inziahsiak an buatsaih result chu puan a ni a, third semester zirlai, Lalsiammawii pakhatna niin, lawmman Rs 3,500/- leh thuchei hlan a ni. Essay thupui hi 'Democracy-a vote thlak pawimawhna' tih a ni.

18th. Wednesday : Lunglei Chanmari-a Mangûra hotel-ah Bâwichungnâwn (kum 25 leh 30 inkâr), Lamka Manipur chu thîa hmuh a ni.

19th. Thursday : Assam Rifles leh Custom Department ṭang kawp chuan Zokhawthar leh Melbûk inkâr kawngah foreign cigarette bâwm 27 leh pack 22; foreign beer bâwm 47 leh foreign soju cases 13.15; a vaia chêng nuai 11.62/- hûa chhut chu an man.

20th. Friday : Hnamdang pasal nei, Meriam L. Hrangchal MLA General Election lo awm tura ding ve tur duhloh na lantir nan "Hnam humhimna kawngzawh" chu MZP ten an huaihawt. MZP thuchhuahin a tarlan danin ni 19th December, 2022 khan Party tinte hnamdang pasal nei candidate a dah lo turin ngenna a siam a, ni 21 August, 2023 khan Party tinte ngenna a thawn nawn leh vek a. Party hotute pawh hmuh an ni bawk.

21st. Saturday : ADVA Season Opening Tournament GSA ITI Veng Volleyball Court a khelh chu a hmawr bawk a ni ta a, final-ah (mipa) hian Chanmari West Sporting Club leh  Sihphir Volleyball Club ten khel in   Sihphir Volley Club chuan  25-22, 11-25, 25-27, 30-28, 17-15 in hnehna an chang. He tournament-ah hian Most Valuable player thlan niin hmeichhia-ah Hranbanyanzz atangin Jersey No 8 Remlalnghaki chu thlan a ni a, mipa lamah Sihphir Volleyball Club, Jersey No 3 Zomuanpuia chu thlan a ni bawk.

22nd. Sunday : Ni thum awh, Prathan Uttar Aizawl Padri Kshetra Sanmelan (Aizawl North Pastor bial) Thingsulthliah Kohhran Biak Ina neih chu a tiak. Inkhawmpui thupui chu 'A chhuang apiangin Lalpa chhuang rawh se' tih a ni.

23rd. Monday : Hualtu khuaa Pu Sangzika In (Assam Type) chu bungrua engmah chuh hman lohin a kangral. Pu Sangzika te hi nupa rek a awm niin in kan lai hian an awmlo a ni.

24th. Tuesday : YMA Inkhawmpui Lian vawi 74-na chu Biate a Zialung Run-ah palai lawm inkhawma tan a ni.

25th. Wednesday : MPCC President Lalsawta chuan Aizawl East-I huam chhunga Sihphirah an party campaign office a hawng. 

Lalsawta chuan BJP-in hmarchhakah Mizoram tih loh the sum hmanga a namthluk theih ho chu a namthlu vek tawh tih sawiin, 'Central BJP hian Mizoram BJP hi sorkar tir an tum vak lo, tul pawh an tih Io nih hmel. Mizo mipui hian Mizoramah BJP angin sorkarna siam khawpin kan vote tling dawn lo tih an hria. Chuvangin, an luhka atan regional party an rawn thlang chat,' tiin BJP chuan MNF an thawhpui mek a, ZPM te thawhpui leh turin an beisei mek niin a sawi. 

26th. Thursday :  

General Election, Mizoram Legislative Assembly, 2023 atana Independent-a Serchhip Assembly Constituency-a ding, Ramhlun-Edena leh a Election Agent Lalremmawia te chu Media Cell, CEO Office-ah koh niin Member te'n tunhnaia Social Media leh Chanchinbu kaltlanga thu thehdarh chungchangte bakah Election kaihhnawih Dan leh hrai chungchangte an sawipui. He hunah hian CEO Office Media Cell Member-te chuan vote thlak chungchanga media kaltlanga Ramhlun-Edena thu sawiin mipuiah nghawng tha lo a neih theih dante tarlangin ngenna an siam a; an ngenna ang hian vote thlak chungchanga thuchhuah/thusawi tawh loh an remti thu an sawi. 

27th. Friday :

Kawnpui Police Station-a duty te chuan SI Zoramawii hoin  rakzu an man. Zu hi Ingnis Car, MZ 01/B - 1066 atanga an man a niin, rambo polythene-a dah a ni.

28th. Saturday :    MZP bultumin Aizawl khawpui hmun hrang hrangah hnam dang dan lova khawsa dapchhuah hnatlang neih a ni a, Inner Line Permit (ILP) nei lo mi 78 chuang bakah kum tling lo hnathawka chhawr engemaw zat hmuhchhuah an ni bawk. Heng an mi man te hi thuneitute kutah an hlan nghal.

29th. Sunday :  

Bharatiya Janata Party (BJP) National President, Jagat Prakash Nadda chuan Assembly inthlanpui lo awm tura Mizorama an Candidate ten hnehna an chan theih na’na campaign pui turin Chawngte a tlawh.

30th. Monday :   Mualthuam 'S' khua a khua In 63 lai mai chu an Electric Current Disconnect sak an ni. An bill sang uchuak thei lutuk avanga bill pe theilo nia sawi a ni.

31st. Tuesday : Nomawii, kum 85, Pu Romawia nu, Sihphir chu alzeimer natna avangin an chenna inah a boral.