1st. Sunday : Biakpianga, kum 58 h/o Vanlalbiaki, Venghlun chu an khawsak lailawk mekna Chamdur bula an huanah a inawkhlum.
2nd. Monday : Khawvel
puma ‘Upa te ni’ a ni a, Sihphir
MUP te paw'n YMA Hall-ah
hlim takin an hmang a, tlai-ah chawhlui an kil zui nghal. He hun hi khuallian niin
Pu Er. Lalrosiama, EE
chuan a hmanpui.
3rd. Tuesday : Pu B.Lalawmpuia S/o B.Helluaia, Arpu Veng, LRM Hospital a enkawl mek chuan thisen var a mamawh angin thisen unit 5 pek a ni.
4th. Wednesday : Tozikpuii, kum 63 w/o Pu Khualhnuna, Arpu Veng chu Civil Hospital-ah Dengue natna avangin a boral.
5th. Thursday :
Multipurpose Indoor Hall chu Sports Minister, Pu Robert Romawia Royte chuan video conference hmangin a hawng. He indoor hall hi Mizoram State Sport Council ta leh enkawl tur a ni.
6th. Friday : Tv Lalhriatzuala Royte, kum 25 s/o Lalthlamuana Royte, Kawnveng chu an bualinah thi a hmuh a ni.
7th. Saturday : CM development trophy, Aizawl east 1 constituency Arm Wrestling championship, Rohrenga Hall-ah neih a ni a, Lalhmangaihzuala, Zemabawk chuan kg 80+ huanga khelin a pumpuiah chakber lawmman, Champion of Champion trophy hlu tak a la. He hunah hian infiammi 157 zet pungkhawmin VCP, Pu Lalnelawma chuan khuallian niin a hmanpui.
8th. Sunday : Subroto under-14 khelh mekah (semi final) W.Bengal leh Mizoram te intumin Mizoram hi 5-0 in an chak. Goal nga zinga goal hnih hi Sihphir naupang Isak-a khung a ni.
9th. Monday : KTP, Venglai branch te chuan fak leh chawimawi inkhawm an hmang. He hun hi Tv Lalrinnunga, asst leader chuan a kaihruai.
10th. Tuesday : Rohrenga Hall-ah niza inhlawhna chungchangah gram sabha neih a ni a, Mizoram Rural Bank lam chuan Financial & Digital Literacy Campaign an nei nghal.
11th. Wednesday : Khawtlangah natna hautak avanga damdawi in awm man pe theilo, chhungkaw pahnih te puala khawtlanga vehbur khawn tur hriattirna information mike atangin puan a ni.
12th. Thursday : Laltlankima s/o TC Lalmawia
(L), Dintharveng leh H. Lalrinsangi,
Ramhlun South te chu Sihphir Presbyterian
Kohhran Biak Inah an innei.
13th. Friday : Sihphir
Teachers Association (STA) memberte
chuan Sihphir Venghlun Futsal Ground-
ah sport an nei a, hun remchangah chhunzawm leh an tum.
14th. Saturday : Chawngbawla Section YMA leh Neihbawi Welfare tangkawp chuan hnatlangin Cold Storage hulhliapah mahni a parawl, kum upa leh hriselna pan ve tawh tak, Pu Laibuaia chenna tur sak an tum chu bul an tan ta.
15th. Sunday : YMA in, Pu H. Rokunga, Dinthar veng ten dawr atana an luah lai chu mi tu tih hriatloh ten rawkin dawr bungrua cheng tam tak man hu an la chhuak. Dawr hi a kalhna ti chhiain an lut a ni.
16th. Monday : Little buds School a Class VIII zirlai te chu Shillong leh Guwahati fang turin an chhuak.
17th. Tuesday : Little Buds School, Primary Level te chu RT Picnic sport-ah an Picnic.
18th. Wednesday : Khawtlang duhloh zawng an tih avanga khua atanga hnawhchhuah lailawk, K. Lalnithanga leh
Zolianmawii te nupa, Arpu te chuan hnawhchhuah
an nihna hun tiam a ral tawh avangin an awmna ngaia
awm dilna khawtlang hruaitu (SR & AC) hnenah an thlen.
19th. Thursday : ITI Volleyball Court a ADVA 1st Division Season Opening Tournament khelh mekah Sihphir V C team te chuan (Semi-Final) Matty VC (ITI) te chu khelin 3-2 (20-25, 25-20, 25-21, 18-25, 15-10) hnehna hlu tak an chang.
20th. Friday : Venglai Kohhran pavalai pawl te chuan Nisapui KPP an tlawh. Nisapui KPP hi Zirtawpni zanah an inkhawm thin a ni.
21st. Saturday : ADVA Season Opening Tournament GSA ITI Veng Volleyball Court a khelh chu a hmawr bawk a ni ta a, final-ah (mipa) hian Chanmari West Sporting Club leh Sihphir Volleyball Club ten khel in Sihphir Volley Club chuan 25-22, 11-25, 25-27, 30-28, 17-15 in hnehna an chang. He tournament-ah hian Most Valuable player, mipa leh hmeichhe lamah te thlan a ni a, mipa lamah Sihphir Volleyball Club, Jersey No 3 Zomuanpuia chu thlan a ni.
22nd. Sunday : Pratham Uttar Aizawl Padri Kshetra Sanmelan, Aizawl North Pastor bial (inkhawmpui) Thingsulthliah Kohhran Biak Ina neih mekah Venglai Kohhran te chu chawhma inkhawmah an zai.
23rd. Monday : Tv Vanlalchhuanga, kum 33, Pu Lalthakima fapa, Tlangveng chu City Hospital Aizawlah Internal Bleeding avangin a boral.
24th. Tuesday : Venglai Kohhran Sacrament department te chuan Synod hmun hrang hrang te an fang kual.
25th. Wednesday :
Isua Krista Kohhran Hmeichhia Rising Day a ni a, kohhran hall-ah hlim taka lawmin tlai-ah chawhlui an kilho nghal.
26th. Thursday : Sangneihkima leh Lalramthangi te nupa, Arpu veng te chuan an inneih kum 50 na, diamond jubili an lawm. Pu Sangneihkima te nupa hian fa 6 leh tu 18 an nei mek a ni.
27th. Friday : Venglai KṬP te chu Sialhawk branch tlawh turin an kal.
28th. Saturday : KṬP, Sihphir Branch te chu ATC-a Kross siam
mekah an hnatlang.
29th. Sunday : Selesih kawn atang Sihphir panna, By Pass Road khuar nasa zual chu kawng siam mek tu, contractor ten an an repair.
30th. Monday : Election Commission of India (ECI)-in Mizoram Legislative Assembly Inthlanpui lo awm tura vote thlak tura polling station pan thei lo (absentee voter) – kum 80 chunglam (senior citizen) leh vohbik (person with disability – PwD)-te tana postal ballot hmanga mahni in chhung luma vote thlak theih dan (home voting) a ruahman angin tualchhung mi thenkhat ten vote an thlak.
31st. Tuesday : Nomawii, kum 85, Pu Romawia nu, Tamloveng chu alzeimer natna avangin an chenna inah a boral.
Comments
Post a Comment