1st. Thursday : Mizo Award 2022 chu zirna lama thawh hlâwk tak, Dr Tawnenga, Mission Veng, Mizoram Christian College Principal ni mek hnenah hlan a ni. Mizo Award hi Vanglaini chanchinbu buatsaih a ni.
2nd. Friday : Kum 2009 atanga kum hnih dana sem thin Vulmawi Award 2022 chu Saikuti Hall, Lungleiah sem a ni. Vulmawi Award 2022 ah hian Category 22 hnuaiah award hi sem a ni.
3rd. Saturday : KTP, Sihphir Vengthar Pastor Bial chuan Synod Hospital tan unit 24 an pe. Thisen petute hi mipa 21 leh hmeichhia 3 an ni.
4th. Sunday : Aizawl City Bus enkawltu pawl chuan, driver leh conductors te intuaitharna leh infuihtharna hun Vanapa Hall-ah an hmang. He hun hi Pu Rodingliana Chawngthu, SP Traffic Aizawl chuan khuallian niin a hmanpui. Khuallian chuan kan dan thar MVI Act-ah hian tisualtute tan in hriatthiamna a awm lova, dan kan bawhchhiat chuan kan chawi tur pawisa pawh tamtak ani tawh a, chuvangin, Driver leh Conductors te fimkhur tak leh mipui tan a rawngbawltu an nih zia hre reng chunga thawk turin a hrilh.
5th. Monday : Zemabawka Ebenezer Boarding School a kang a, a chhehvela in engemawzat a kang tel.
6th. Tuesday : Aizawla hmunpui nei, 2nd Assam Rifles leh Excise & Narcotics department tangkawp chuan Falkland Vengah heroin gram 236 an man a, a neitua puh mi pali an man nghal. Heroin an man hi Rs 1,18,00,000/- hû a ni a, Excise & Narcotics-ah thubuai an ziah luh nghal a ni.
7th. Wednesday : Rokimi (51) w/o Roliana (Liantea) leh a tupa, Mark Lalawmpuia (7)
Mamit Luangpawl te chu an chenna inah thi a hmuh an ni.
8th. Thursday :
Zoram Driver’s Union (ZDU) huaihawt Lirthei khalh fimkhur inzirtirna hapta Road Safety Week vawi 41-na chu Mizoram hmun hrang hrangah hman ţan a ni.
Road Safety Week hi tun thla ni 15 thleng kalpui a ni dawn a ni.
9th. Friday :
Chhandamna Kohhran (Salvation Church of India) inkhawmpui vawi 14-na Hmarveng Kohhran Kolasib-ah palai lawmna inkhawm neia tan a ni. Inkhawmpui hian Pathianni thleng a awh ang.
10th. Saturday : Zawlnuam daiah Burma kuhva ro phur motor paruk leh an kuhva phurhte a kang a, motor khalhtute erawh an him hlauh thung.
11th. Sunday : Bru Christian Fellowship, Aizawl te chuan Advance Christmas, Synod Conference Centre-ah an hmang a, BJP State General Secretary, Pu Malsawmtluanga'n a hmanpui.
12th. Monday : Central YMA hruaitute chuan Chief minister, Zoramthanga chu a office ah hmuin, 'Neih inang kawp' (LGBTQI) te tana shelter sa tura hmalakna kal mek chu an duh loh thu leh tihlawhtling lo tura an duh thu an thlen.
13th. Tuesday :
Minister, Dr. Beichhua chuan CM hnenah Minister atanga banna a thehlut.
14th. Wednesday : Serkhan-Bagha Road kawng siamnaa sum tam tham tak tihchingpen thubuaiah PWD Engineer-in Chief hlui Liansanga, Khatla leh Lianchungnunga, Chaltlang te chu Special Court (PC Act)-in thiam loh a chantir.
15th. Thursday : MLA hlui, Pu R Khawpuithanga (82), Tlângnuam chu Trinity Hospital-ah a thi. A ni hi kum 2003 khân Aizâwl South II-ah MNF ticket-a thlan tlin a ni.
16th. Friday : Covid-19 vei enkawl lai mi pakhat chu dama chhuahtir a ni a, heti hian Mizoramah hripui vei an awm rih lo a, hripui lakah a fihlim ta. June 1, 2020 hnu, kum 2 leh thla 6 hnua Covid-19 positive an awm loh vawi khatna a ni.
17th. Saturday : Kolasib Anglers Society-in a vawi khatna atân ‘Luia nungchate humhalh’ tih thupui hmangin Tuichhuahenah Kolasib Fishing Competition buatsaih a ni a; Pu Sâwmzuala, Bîlkhawthlîr chuan dârkâr nga chhûngin sangha kg. 13 chuang manin pakhatna lâwmman a dawng.
18th. Sunday : Mizoram Gorkha-te zînga pâwl lian ber Mizoram Gorkha Youth Association (MGYA) chuan Tuma Resort, Bûng Bangla-ah inkhâwmpui (conference) vawi 46-na an hmang.
19th. Monday : Ram chhûng hmun dangte rualin district hrang hrangah sawrkâr ṭha neih theih nâna hma lâkna, chawlhkâr khat awh tûr (Good Governance Week) hawn a ni.
20th. Tuesday : Raj Bhavan tualzawlah Governor, Dr Haribabu Kambampati chuan Cabinet Minister ruat thar mi pali te chu rinawmna thutiam tirin ala lut. Cabinet Minister thar lakluh te hi K Lalrinliana, Lalchhandama Ralte, Lalruatkima leh Er Lalrinawma te an ni a, Minister of State nilai 3 bakah Deputy Speaker ni mek te an ni.
21st. Wednesday : September ni 19, 2022-a Central Jail, Aizâwl aṭanga tlân chhuak – JK Lalsangzuala (36), Lunghauka, Lawngtlai district-a mi chu Lobo Outpost Team (Siaha district)-te chuan Niawhtlângah an man.
22nd. Thursday : Mara Autonomous District Council (MADC)-a Chief Executive Member (CEM) thar atân Pu M Laikaw lâk luh a ni.
23rd. Friday : Mizoram police-te’n hâlpuah eng emaw zât, Rs. 8,000/- man hû chu Aizâwl Republic Vêngah C. Vânlalhriati (23), Aizâwl Chawlhhmun kut aṭangin an man.
24th. Saturday : Hâlpuah eng emaw zât, Rs. 4,000/- man hû leh a neitu nia puh – Zathangi (37), Hnahthial Electric Vêng hnên aṭangin Mizoram police-te’n an man.
25th. Sunday : Ngopa Chhim veng Kohhran KṬP ten Krismas puala an Biak In kawta ran in lem an sak chu a kang.
26th. Monday : Football coach, Pu Nicky Malsawmtluanga, Kum 38, Chhinga Veng chu Kawrthah Damdawi Inah awmlaiin a boral.
27th. Tuesday : I&PR Minister, Pu Lalruatkima'n Rangvamuala Operation Kingdom Ministry (OKM) Home tlawhin țanpuina sum leh blanket 180 a pe. Home enkawltu, Pi Lalruatpuii te nupain Minister hi lo dawngsawngin ram hruaitute leh mi inpe tak tak ten OKM Home pawimawhna hriaa an ngaihsak țhinnaah lawmthu an sawi.
28th. Wednesday :
Chief Minister, Pu Zoramthanga chuan Sihphir Venghluna Futsal Ground chu a hawng a, GSA buatsaih, Sihphir Town Futsal Tournament a hawng nghal.
29th. Thursday : Law & Judicial Minister, Pu T.J. Lalnuntluanga chuan a chenna In, Champhai Kahrawt Vengah Zokhawthar kaltlanga Myanmar nena insumdawntawnna tihchangtlun dan tur chungchang Champhai District Bawrhsap Pu James Lalrinchhana leh SP Pu Lalrinpuia Varte te a sawipui.
30th. Friday : Zokhawthar to Aizawl sumo MZ-01G/6395, mi 8 chuanna chu Chhungte daiah chesualin kawng thlang lengkirah a tlan liam a, chuang zianga mi 5 an boral.
31st. Saturday : Kum 2022 chhunga ni hnuhnung ber a nih avangin tlang hrang hrang atangin nitla tur mi tam takin an thlirliam.
Comments
Post a Comment