1. CM AUKHUM : Kumthar ni a ni a, zawlnei inti, Tv Lalrinawma (Awmtea), s/o R. Dinliana, Samlukhai chuan Chief Minister, Pu Zoramthanga chu nasa takin a aukhum.
Awmtea hian Youtube channel pakhata a interview naa a sawi danin CM hi hmuh tumin an khua, Samlukhai atangin an rawn kal vang vang a, duty ten lo tidingin CM a awmloh thuin an lo chhang. Anni'n kumthar ni a hmuh ngei an duh si avangin an nghak. Chawhnu herah CM chu a lo haw ta. 'Lal Saula, Lal Saula' tiin a lo aukhum. An kal liam mai avangin a duh angin a au hmanlo. Hei vang hian alo chhuah leh mai beiseiin an lo nghaka, tlai lamah chuan a lo chhuak leh ta ngei a. A bul an rawn thlen hma, an lan theih tirh phat atangin 'Saula lalram a tawp anga, Davida, Lalpa hriakthih te an lo lang dawn. In ramah Zoramthanga a tawp anga, Davida, Ephraim lalram a mi te an rawn lang dawn,' tih leh 'Milem biate hnena ram thehtu' ti te in theihtawpin a lo aukhum.
CM te hi Motor hmang kal an niin an tlam liam puat mai si a, Awmtea chuan a duh ang a sawi zawh hmanloh avanga dam kimlo in a tuk, January ni hnih zanah Zarkawta a inkhawm lai chu puandum bahtirin a aukhum leh chiam bawk.
Awmtea hian chanchin a ngah ve hle. Bawng thisen a buaipui thul, ar thisen a buaipui thul. A nungchunga inphum a, nithum hnua thawhlehte a tum thul. Ama sawi dan takah leilung dan atang chuan hriatthiam a har a ni e.
2. THIRSAKAWR HMANGIN KOLKATA THLENG : Pu C. Pu Lalawmpuia, (Maawma) Dawrpui veng chu thirsakawr hmangin Kolkata thleng amahin a tlan thleng.
Pu Maawma hian a zin kawngah harsatna liantham a tawn loh thu a sawi a, taksa fit tha pangngai leh ruahmanna fel tak neia a kal avanga he thil hi ti hlawhtling thei niin a lang. Pu Maawma hian Kolkata thleng tur hian ni 20 thangin kms 1575.42 zet a tlan a ni.
Hetih lai hian kum 64-na hmang mek Pu Lalbiakthanga, Lawipu chuan ke ngatin Mizoram a fang chhuak a, Zotrek Adventure Club, East India Campers Adventure Club leh Mission Vengthlang Adventure Club te'n 'Save Tlawng River' project an siam hnuaiah Tlawng lui thian fai tur leh Tlawng humhalh a ngai tih tlangaupui turin Tlawng hnar ațanga Bairabi thleng zawh chhuak bawk.
3. TUIHLEUH SIAK : Aquatics Association of Mizoram (AAM) buatsaih in Mizoram chhunga a vawi khat na atan Inter Village/Local Council Swimming Championship chu Aquatics Complex, ITI Vengah a buatsaih a ni.
Inelna chi ruk, 50m Freestyle Men & Women, 50m Backstroke Men & Women, 50m Breaststroke Men & Women, 50m Butterfly Men & Women, 4x50m Relay Freestyle Men leh 50m Under 14 Freestyle Boys & Girls te a awm a ni.
Intihsiaknaah hian
Tlabung V/C chu champion,
Bungṭhuam V/C pahnihna leh Champhai Vengthlang North V/C te chu pathumna an ni bawk.
Hetihlai hian Inter Village/Local Council intihsiakna hi item dang engemawzatah neih a ni bawk.
4. MUMBAI JAIL TANG CHHANCHHUAK :Mizo tlangval rawlthar, Lalrinpuia, Table Tennis a National Championship/Tournament-ah tum 7 zet Champion tawh leh
International Medal pawh 8 ngawt dawnga Mizo ti hmingthatu, Mumbai Airport-a Narcotics Control Bureau te’n December 13, 2017 zing dar 4:30 a an man a, Mumbai Taloja Jail-a thubuai rip tak nen'a tang ta reng mai chuan Mizo mipui tanpuina azarah jail runthim a chhuahsan ta.
Beiseina sang tak nen'a a awm mek laiin, a awmna Delhi-a In luaha khawsa ve thin, a Mizo pui, amah duhsaktu leh hmangaihtu anga a ngaih, u ena a en Mizo nu pahnih te chuan ani Table Tennis thiam ta chu Mozombique, Africa lamah a thlawna zinna (to & fro - Air ticket free-in) an thian (mihang) te nena an buatsaih sak theih thu leh zin ngei tura an duhsak thu an hrilh a. A ni thalai tan chutianga a free-a zin thawven theihna hun remchang an nei ta chu an lawm hle mai. Phur takin Mozambique-ah chuan an zuk kal ta a. Hlim taka a zin a rawn hawn mek laiin a zinna lama miten an ngen anga an thil a hawnsak chu ruihhlo a lo ni si.Narcotics Control Bureau lam chuan an agent te kal tlangin Rinpuia thil kenah chuan ruihhlo a awm tih report an lo dawng thlap mai bawk nen. Mumbai Airport-ah an lo chang ran mai a. Sawi tawh angin man a tawk ta a ni.
Rinpuia thil tawn hi a pawi takzet a, a tan hrehawm mai piah lamah a hmachhawp a khaihlak vek phah a, amah leh ram tan a pawi takzet a ni.
A hma ngai tu nia ngaih Mizo nu pahnihte an demawm takzet a ni. Hetih mek lai hian Bangalore Mizo Association (BMA) chuan thuchhuah siamin, smuggling ti tura mahni Mizo puite bum ching an awm tih sawiin, hetiang thlemna leh bumna laka fimkhur turin Bangalore Mizote leh Mizo tute pawh an chah.
Mizote kan changkang ve ta in kan daihzai ta hle mai. Hetih mek laia a hnawksak zawng a khawsa an lo awm ve leh zel mai hi a pawiin hnam tan pawh a zahthlak takzet a ni.
5. GOOGLE TRANSLATE-AH MIZO ṬAWNG DAH : May ni 1 khan, Google-in Mizo ṭawng hi an Google Translate app-ah ṭawng thar 24 an dah belh duhte zingah an telh ve tih an puang a. Google-in “Zero-Shot Machine Translation” tia an koh, an machine learning model (software) hmangin Mizo ṭawng hi ṭawng danga translate (letling) thei turin an buatsaih tawh tihna a nih chu. A awmzia chu, Mizo ṭawng thu ziaka tar lan/pho chhuah (monolingual text) chi chu ṭawng danga letling thei turin an buatsaih tihna a ni. Amaherawhchu, contribute a ṭawng text hmanga an contribute a, kan tawng leh English chu Mizo-English dictionary a awm ang deuh hian a lang dawn tihna a ni.
Google Translate community page-ah June 2020 kum khan, Google user pakhat, “Vishesh Goel 1821” chuan Mizo ṭawng hi Google Translate app-a dah ve turin a lo request tawh a. Vote pawh 290 chuang a hmu a. Chu chu tunah hian Google Translate department lamin an tihlawhtling ta a ni.Tin, a phena hma la tu pawh engemawzat an awm bawk.
Hetianga Mizo ṭawng dah belh tura an buatsaih hi keini Mizo ṭawng hmangte leh hnam dang, Mizo ṭawng zir duh leh hrethiam duhte tan pawh kan ṭangkaipui dawn hle a, a hlawhtlin hunah phei chuan, YouTube-a Mizo ṭawng video upload-te leh kan Mizo ṭawng website-te hi Sap leh hnam dang ṭawngin kan translate thei ang a, Sap ṭawng leh hnamdang ṭawng te pawh kha Mizo ṭawng-in awlsam takin, vawi 2/1 click lekin kan translate thei tawh mai dawn a ni.
Amaherawhchu, kan tawng hi hnamdang tan a thluk delh delh chi leh thumal pakhat pawhin thu tam tak awmzia a neih theih avangin he step kai tur hian hmabak a la tam hle a. Mizo ṭawngah a kara thu tlazep chi hi kan nei ve nual a. Heng hi siam rem tur a la tam.Taima taka kan tih a ngai dawn a ni.
Ṭan kan lak peih chuan sap ṭawng un pui pui pawh kan let thei ang a. Kan ṭawng upate pawh kan let thei ang. He step hi chu a harsa hle a, ṭawng tam takin an kai hlei thei bik lo. Chuvangin, kan theihna zawn theuhah theihtawp chhuah tlan a pawimawh ang.
6. THING RUAHSUR : Thenzawla thing pakhat, kangtek thing nia sawi atangin zan lamah ruah phingphisiau, ruahbing ang maiin a sur thin a, mipuiin mak tiin an en nasa hle.
An sawi hmangin thing atanga tui lo chhuak hi a tam hle a, a chang phei chuan kawngpuia luang tham khawpin a sur nia sawi a ni.
A bula cheng te chuan tunhma lamin hetianga he thing atanga tui a far hi hriat a ni ngai loh thu sawiin syr thin hunlai hi chuan zantin (karhnih chhung vel) hetiang hian tui hi a chhuak thin a, a chang chuan a tam viau thin a. Thing atanga tui lo chhuak hi ruah fang lian deuh tak ang te a awm bawk a, a tam ber chu ruah hmite sur angin a sur seng seng thin niin an sawi.
Forest Officer thenkhat chuan, thing, tui tichhuak thin hi a awm ve a, a bul vel ramah tui a tam tihna anih thu an sawi.
7. ZU ZUAR ENSAN : Thingdawl khua chhungkaw pakhat chu chhiat an tawh tumin khawtlang huapa buaipui (thlan laih leh in leh a vel buaipui) loin zu zuar ho in an buaipui veka, thlanlaihna-ah chuan thingpui aiah zu sem a nih hial thu sawi a ni.
Social Media kaltlanga kan hriat danin chhiat tawk chhungte hi zu zuar kumhlun annih avanga ensan niin an lang a, khawtlang hruaitu te erawh chuan ensan chiah an la nihloh thu sawiin ensan tur ang deuha ruahmanna an siam thu erawh an sawi. He thu hi chhiat tawk chhungte hian an lo hriat ve tho avangin ensan tawk ta-ah inngaiin thlan pawh khawtlang thlanmualah beisei ngam loin an inbulah an inphum mai niin an sawi.
Hei aimaha thu thinthawng chu ensan annih tak avang hian zu zuar pawl ten buaipui hna zawng zawng thawka thingpui aia zu hial an sem leh zuzuar pawl hial a ding nia lang hi a ni awm e.
8. DOCTOR THUBUAI : Sialsuk Doctor, Linda Labiaknungi chuan damdawi in canteen-ah pawisa tibo a insawiin damlo pakhat, canteen a lut chu ringhlelin doctor tih a mawilo in a oxygen hip lai phawi sakin damdawiin atangin a hnawtchhuak zui a, hei mai duhtawk loin kal pawh kal nawn tawhlo turin a ti hial niin thuthang a tam hle. He damlo hi a boral zui tak mai bawk si avangin sawi a tam hle.
A hnu-ah he doctor hi a hna atanga chawlh lailawk tir a ni. Doctor te hi damlo te tan hian an pawimawh em em a, an tawngkam khat lek hian mi a ti na in a tidam thei a, chuvangin, lungawilohna an nei a nih pawhin an tan insum theih a pawimawh lehzual hle awm e.
Hetih lai hian doctor pakhat chu Chief Minister, Pu Zoramthanga fanu chuan ama clinic ngei-ah kut a thlak riap mai a, a chhungten ngaihdamna thu chhuah vat mah se politic a inbeihna a thleng zui nasa hle.
9. DEBATE ROPUI : Dawrpui Multipurpose Conference Hall-ah Upa Dr.PC Biaksiama (Presbyterian) leh Rev Thangliansanga (MUPC) te chuan sakhuana chungchangah debate puitham tak an nei. He hun hian zan hnih zet awh in TV leh Youtube lamah live a pekchhuah a nih bawk avangin entu an thahnem hle.
He debate hi Upa Dr.PC Biaksiama'n UPC Doctrine sawiselna lehkhabu pahnih ngawt a ziah ațanga rawn ințan nia sawi ani a, entu mipui ten bengvarthlak an ti hle.
Mizoramah hian kohhran hrang hrang a tam ta hle mai a, thenkhat chu kan inenliam mai mai theih laiin intai tak tak pawh kan awm nualin a lang. Tuntum debate pawh hi intai na atanga intan niin a lang a, bengvarthlakin hmuhnawm viau mah se hlawkpui tur erawh a awm tam viaulo niin a lang. Patling, sakhaw puithiam meuh tih atan chuan ho ti tu pawh an tam hle.
Lal Isua ringtute hi khawvelah ngaihdan hrang neiin, pawm dan inang vek lo mah ila Isua ringtu kan ni vek a, hrin khat, Lal Isua atanga chhuak vek kan ni. Vanram kan luhna tur chu Isua chauh a ni a. Doctrine lam hi vanram luhna kailawn a ni ber lo tih hriat thar leh a tul khawp mai.
10. ZIRLAI NAUPANG HREM : Champhai district a school pakhatah zirlai thenkhat chuan school-ah ken phal loh thil an ken luih avangin zirtirtu te chuan an vua niin hriat a ni.
Zirlai hrem tawk zinga nu leh pa thenkhat chuan zirtirtu te lakah hian thubuai an thehlut a. Hei vang hian School Principal leh Vice Principal chu Distict Jail-ah dah luh hial an ni.
Zirlai te chu naupang an ni a, naupang te chu thunun ngai anniin vuak emaw ben tul chang te pawh a awm thei ang. Hetiang hrethiam loa nu le pa thenkhat ten fate chhan kan tina lutuk thin hi chu chintawk hriat a tul hle in a rinawm.
Hetih mek lai hian Lunglei district chhunga School pakhatah ve thung chuan zirlai naupang pakhat chu an zirtirtu chuan saruakin a hawntir! Kan thudawn danin naupang hi zirtirtu ten an hrem avangin naupang nu chuan an school-ah chuan kaltir a tum tawhloh thu a sawi a, zirtirtu chuan chutiang a nih rau rau chuan tiin uniform neilo zirlai an lo awm bawk nen, a thuamhnaw chu a hlih sak ta mai nia sawi a ni. Hetianga a khawsak avang hian hotu liante beng thlengin zirtirtu pawh hi suspend zui a ni.
11. LUNG ZAI : July thla khan Mizorama a vawikhatna atan Trinity Hospital-ah lung zai (Heart Surgery) hlawhtling takin neih a ni a. Heta thawktu te hi Dr. Rahul Chandola, Cardio Thoracic and Vascular Surgeon (CTVS) (Super Specialist) leh a team te an ni a, he hunah hian mipa, kum 59 mi chu zaiin, Heart Bypass Surgery chi khat : Coronary Artery Bypass Graft Surgery hlawh tling takin an tih sak.
Hun rei tak atanga tum leh mitgiam te suangtuah, Mizoramah ngei lung natna zai theih a ni ta hi a hmasawnna ropui tak a ni.
Hetih lai hian Mizorama a hmasa ber tûrin TB en dikna khâwl, Culture & Drug Susceptibility Laboratory chu Falkâwn-a District TB Centre-ah bun a ni ta bawk.
12. MLA CASE NEI : BJP MLA awmchhun, Buddha Dhan Chakma leh CADC Chief Executive Member ni lai, Buddha Lila Chakma te chu midang 11 te nen kum 2013 leh 2018 inkara Chakma Autonomous District Council sum, Rs. 1.37/- crore eiruk thubuai-ah Special Judge Vanlalenmawia chuan thiamloh chantirin kum khat lungin tang tur leh cheng singkhat theuh chawi tura hrem an ni.
Mizoramah hian MLA eiruk thubuai nei hi engemawzat an lo awm tawh a, amaherawhchu, thiamloh chang tak erawh an la awmlo niin a lang.
13.VOLLEYBALL TOURNAMENT : Inter Branch YMA Volleyball Tournament chu Central YMA leh Mizoram Volleyball Association (MVA) tangkawp buatsaihin neih leh a ni a, hetah hian mipa lamah Hunthar branch chu champion in hmeichhe lamah Bungkawn branch an champion thung.
Inelna-ah hian Joint YMA, Group YMA emaw sûb-headquarters YMA anga tel theih a ni lo. Zoram pawn erawh branch khat aia tam atanga inlak phalsak an ni thung. Tin, mahni vote thlakna branch ngeiah lo chuan khelh theih a nilo bawk. Hei vang hian ID (Adhar Card) pawh an endik uluk hle. Hetih rual hian dan dik tawk lo a khel nia ngaih theih tur branch engemawzat an awm tlat mai a, endiktuten hlauh zawng emaw duhsak zawng an nei nia ngaih theih tur thil a awm bawk nen, sawi zui a hlawh nasa in team tel zawng zawngte dawn tur (a chaklo apiang ten an lak nghal) dawng duh lo branch pawh an awm nual. Hei vang hian tournament buatsaih tawhloh emaw insiam danglam ngai ti an tam hle.
14. COMMONWEALTH GAMES-AH MIZO CHE THA : Kumi'n zet chu Zofate tan chanchin tha ani awm e. Commonwealth Games Birmingham, England rama khelhah Mizo pahnih telin medal an dawng ve ve. Jeremy Lalrinnunga Ainawn Veng chuan Weightlifting, 67kgs category-ah India tan gold medal a la a, men's 67kg category 140kg snatch-ah Commonwealth Games record thar a siam bawk.
Hetih rual hian Lalremsiami Hmar, Kolasib telna India Hmeichhe Hockey Team chuan bronze medal an la bawk.
India tan'a medal hlawhchhuaktu Mizo thalai pahnih te hi Mizoram an lo hawnin airport-ah sorkar in a lo hmuak a, a hnu in Vanapa Hall-ah chawimawi lehin Jeremy Lalrinnunga chu cheng nuai 25/- an hlan a, Lalremsiami hi cheng nuaih 7,50,000/- an hlan bawk.
Hetianga kan Mizo thalai ten lawmman hlu tham tak an dawng hi Zofate tan chuan hmasawnna ropui tih loh rual a ni lo.
15. LALNU, ROPUILIANI THLALAK TARCHHUAK :
Assam sawrkar chuan kan Mizo lalnu ropui, Lalnu, Ropuiliani lim chu Amrit Udyan, Hengrabari, Guwahati, Assam hmunah mawihnai takin an din a, Independence Day khan a thlalak bawk hi India rama a lawmna pui ber an neihna hmun Delhi-a Red Fort-ah lianpuiin an târ kuau bawk.
Ropuiliani hi kum 1828 vel khan a piang a, unau pariat zinga a palina a ni. A pa hi Lal ropui, Lalsavunga a ni.
Kum 1847 khan chhim lam Lal ropui Vandula nen an innei a, a pasal hian a boral san hnu-ah amah hian ro a rel chhunzawm ta a ni.
Vailian vawi hnihna-ah khan Mizo lal tam tak an tlawm a. Hetih lai hian a ni chu tlawm ve duhloin Bawrhsap, Tarmita chuan sipai tam tak hruaiin August ni 8, 1893-ah a fapa Lalṭhuama nen an man ta a ni. Tichuan, January ni 3, 1895 ah a tanna jail, Chitagong-ah a thi ta a ni.
Hetianga hmeichhia lehnghal tlawm ve duh miahlo mai hi a ngaihsanawmin a ropui takzeta, a thlalak tarchhuaha a awm pawh hi thil mak a ni awmlo e.
16. BIAKIN SUASAM : Dt. 22.9.2022 khan Mizoram UPC biakin pakhat chu naupang pakhatin a suasam chiam mai a, thil tihchhiat pawh a nei nual nia hriat a ni.
Tunhnai-ah biakin sakhaw thil khawih hriat tur an awm ta zeuh zeuh mai. Sual hnathawh avang nia ngaih theih a nih rual hian a chhunga cheng mipui te pawh hi kan inenfiah a tul viau niin a lang.
17. A RUALA LEHKHABU TLANGZARH TAM : October 25, 2022 khan Mizorama la thleng ngai lo leh hriat theih china khawvêla la thleng ngai lo thlengin Vana Pa Hall-a Mizo Writers Association (MWA) buatsaih, Lehkhabu Pho Rùnpui hawngtu, MWA Adviser, Pu R Lalrâwna chuan, a rualin lehkhabu 31 a tlángzarh! Hei hi khawvêl huap pawha a ruala lehkhabu tlángzarh tam ber tum nia hriat a ni.
Hêng lehkhabu 31 zingah hian chhut nawn pakua a awm a, english a zuak pakhat a awm bawk.
Tunlai lehkhabu buatsaih harsat tawh em em laia hetiang zat zat lehkhabu thar kan han hmu hi Zofate tan chuan malsawmna ropui tak a ni awm e.
18. KHUALTHA KAN THLENG : Ni hnih chamin India President Droupadi Murmu chuan Mizoram a rawn tlawh. Mizoram University (MZU) convocation vawi 17-na a hmanpui bakah MZU hnuaia college hrang hrang building sak tharte a rual a hawngin MZU Auditorium-ah hmeichhe zirlai leh zirtirtute bakah self help group member-te a kawm bawk.
Murmu-i hian convocation a hmanpui zawhah MZU atang vekin Aizawl Government College, Mualpui Campus chhunga Rs vaibelchhe 12 senga sak, Administrative and Academic buildings te, Pachhunga University College chhunga Rs nuai 456.64 senga sak Cluster of Academic Blocks te, Rs nuai 350 senga Tribal Girl Students’ Hostel building sak thar leh Rs nuai 350 senga Rural Tribal Girls’ Hostel building thar, Sairang a mite a ruala a hawn leh bakah Rs vaibelchhe 25 senga sak, Indian Institute of Mass Communication (IIMC) : North Eastern Regional Campus a hawng bawk.
President hian Eighth Mizoram Legislative Assembly Special Session a hmanpui bawk.
President in thlan a nih atanga reiloteah min rawn tlawh hi a lawmawm takzet a, khualtha kan thleng a tih loh theih awmlo e.
Hetih mek lai hian Denmark band lar tak mai, Michael Learn To Rock (MLTR), kum 1988 ka ding tawh te chuan kan Zawl khawpuiah ngei concert hlawhtling takin an rawn nei bawk.
19. NGHAKUAI CHIAH RUNPUI : Sialsuk Branch YMA chuan a huhova nghakuai chiah runpui an buatsaih. He hunah hian Zoram hmun hrang hrang atangin thalai an fuankhawm a, a kal ten an hlimpui hle niin a hriat.
Hetiang thil hi Mizoramah a la awm ngailo a, hetiang tih nachang hria, Sialsuk khawtlang hruaitu te an fakawm hle mai a, veng thenkhatin an lo chhunzawm ve zat pawh thil lawmawm leh intihhmuh tlak tak niin a lang.
20. PALIAN INCHAI : Palian inchai, title fight chu Dawrpui Multipurpose Centre-ah neih a ni a, champion lai, Lalsangliana, Upper Republic chuan thawh sawmah thawh kua a la in, 20-0-in amah chotu, Lalnunfela, Salem veng lakah a title a humhim.
Dawrpui Multipurpose Centre, Aizawla inchai-ah hian minute 30 chhung an hun an hmang a, Upper Republic pa chak Sangliana'n harsa lo takin amah ang bawka kum 31 mi Fela a nuai hneh a, vawi 14 a nawr chhuah aṭangin point 14 a thawk chhuak.
2014 khan Salem Veng chhuantawlawl Fela'n kum thum champion a nih hnu-ah Sangliana lakah chiang takin title a hloh a; kum riat hnuah lak kir leh tum mah se tharum leh kawng hrang hrangah a khan chuang lo. Bawhbeh pangngai pumpelhin a inveng tluan thei na a, point khat mah hmu lovin thawh sawm a hmang ral.
21. INTERNATIONAL TOURISM MART : Mizoram a a vawikhatna atan ni thum awh, International Tourism Mart (ITM) chu hlawhtling taka hman a ni.
ITM hi India hmarchhak state te'n, Tourism lama hmasawnna a neih theihna tura Ministry of Tourism in a buatsaih thin a ni a, "hmarchhak state 8 zingah Mizoram chu ITM la thleng ve lo awmchhun a ni nghe nghe.
He hun hi AR Ground-ah Union Minister of Tourism, Pu G. Kishan Reddy chuan a hawng a, tichuan, AR Ground, R. Dengthuama Hall, Raj Bhavan leh Reiek Tourist Resort-ah te hlawhtling taka hman a ni.
Hetiang hun chhungkua, naupang, puitling, tleirawl, hnamdangten lungrual taka hman theih buatsaih a ni hi thil lawmawm tak a ni.
22. 𝐌IZO AWARD : Vanglaini chanchinbu buatsaih, kum thum dana sem thin, Mizo Award chu Dr. Tawnenga, Mission Veng, Aizawl hnenah hlan a ni.
Mizo Award 2022 dawngtu Dr. Tawnenga hi zirna lama mi thawhhlawk tak niin, tunah hian Mizoram Christian College Principal a ni mek a, Pachhunga University College-ah kum eng emaw zat Principal a lo ni tawh bawk.
He Mizo award hi Brig Thenphunga Sailo, Dr. Sangthankima leh Prof.Joy Lalkrawspari Pachuau te hlan an lo ni tawh a ni.
23. ZOFATE CAMPING : October ni 17 atanga December ni 3 thleng khan
Rangvamualah ram pum huap, Zofate chhanchhuahna camping neih a ni a, camping hi tum sarih zet neih a niin camper hi sang chuang an awm ziah a ni.
Camping hi Zofate Chhanchhuahna Camping duhtute ruahman a ni a, kohhran leh pawl hrang hrang aiawhte he pawlah hian an tel a ni.
Tichuan, Zoram pum huap a nih angin tha leh zung pawh mi hrang hrang hnen atangin dawn a ni a, kohhran hrang hrang, zirlai pawl, YMA branch hrang hrang, sumdawng hausa, politician etc.te hnatlanga fehchhuakin thilpek mahni remchan ang angin pek khawm a ni. Camping-ah hian Speaker atan Tv Frederick Lalrindika, Bethel Ministry hman a ni. 'Zofate pual' tih a nih angin ruihhlo ngaite, zu ngawl veite bakah thlarau damna duh mi pangngai takte an lut hlawm a ni a, tisa leh thlarau damna chang engemawzat an awm.
24. CABINET SIKSAWI : Chief Minister, Pu Zoramthanga chuan Minister, Dr. K. Beichhua chu chawlhtîr in Deputy Speaker tanglai, Er. Lalrinawma chu Cabinet Minister atan a ruat. Pu Lalrinawma rual hian Minister of State tanglai, Pu K. Lalrinliana, Pu Lalchhandama Ralte leh Pu Lalruatkima te chu Cabinet Minister atan lakluh nghal an ni a, Minister kaisang pathum te hian Minister of State an nih laia an department chan theuh te an chang chhunzawm anga, Cabinet Minister lakluh zinga Minister thar awmchhun, Er. Lalrinawma chuan Dr. K. Beichhua chan ho zawng (Social Welfare & Tribal Affairs Department, Excise & Narcotics Department, Sericulture Department leh Animal Husbandary & Veterinary Department) te a chang thung dawn a ni.
Heti hian Pu Zoramthanga kaihhruai MNF sorkar-ah chuan Cabinet Minister 9 leh Minister of State 2 an awm dawn ta a ni.
25. COVID19 : Nikum December ni 31 thleng khan Mizoramah hri kai tawh zawng zawng zat hi 1,41,665 an ni a, mi 544 in an thihpui tawh bawk. Kuminah (2022) pawh nasa taka buai chho lehin nunna chan pawh kan awm leh nual mai.
Amaherawhchu, June 1, 2020 hnu, kum 2 leh thla 6 hnuah Covid-19 positive an awm loh vawi khatna atan December ni 13 atang khan hrikai awm belh loin a awmchhun pawh December ni 16 khan dama a chhuah avangin Mizoramah hripui vei an awm rih lo a ni. Heti hian kumtawp ni thlengin positive tawh hi mi 2,38,964 niin mi 726 in an thihpui tawh bawk.
Comments
Post a Comment