1st. Thursday : Lirthei dan bawhchhiaten dan hmasa aia sum tam zawk an chawi tawhna tur, The Motor Vehicle (Amendment) Act, 2019 chu Mizoramah hman tan a ni ta a, dan thar hman ni-ah Aizawl khawpui chhungah lirthei tlan chhuak a tlem hle.
2nd. Friday : All India Football Federation hruaitu thar tur Football House, New Delhi-ah thlan a ni a, AIFF President thar atan Kalyan Chaubey thlan a ni a; Mizoram Football Association Honorary Secretary, Lalnghinglova Hmar chu Executive Committee Member atan chuhtu awm loin a tling bawk.
3rd. Saturday : Mizo 'Palian Inchai Champion' June ni 7, 1971- a inelna buatsaih tan a nih atanga Champion hmasa ber, Vanlalkulha Ralte Lelhchhun (79), chu Trinity Hospital-ah a boral.
4th. Sunday : Ni hnih chama lo zin,
Union Minister, Smriti Zubin Irani chuan Durtlang leh Aizawl vệng hrang hranga home te tlawhin thawktute nen an inkawm. Hemi hnu hian New Delhi panin a haw leh ta.
5th. Monday : Zirtirtute Ni, (Teacher’s Day) a ni a, ram chhung hmun dangte rualin Mizoramah pawh zirlaiten an zirtirtute chawimawina hun uar takin an hmang a, Aizawlah chuan Minister ten zirna in hrang hrangah te an hman pui a ni.
6th. Tuesday : Ni thum awh tur, Mizoram Legislative Assembly thutkhawm vawi 10-na chu Speaker, Lalrinliana Sailo kaihhruaia tan a ni a, house-ah Paper hman a tlem theihna tura duan National e-Vidhan Application chu House ah hman tan a ni.
7th. Wednesday :
Mizoram sorkar chuan sorkar hnathawk nghet, group C leh D-te August 2022 thla hlawh tur chu a pe chhuak. Hetihlai hian Group A leh B-te hlawh pek chhuah hun tur erawh sawi theih a la ni lo thung.
8th. Thursday : Mizoram Legislative Assembly pariatna thutkhawm vawi 10-na, ni 3 chhung awh chu rorel tura chhawp chhuahte zawhfel a nih hnuah tihtawp a ni.
9th. Friday : David's kitchen, Chanmari Aizawlah, Mizo Youtuber Association din a ni a. President atan Pu Harry K. Zodinthara (Harry Khiangte, LPS Closeup) thlan a ni.
10th. Saturday : Champhai police, Chalbâwiha Junction Khankâwn Checkgate duty-te chuan heroin grams 158; sahbawn bâwm 13 chhûnga dah, international market-a nuai ₹ 79/- man hu chu lîrthei pakhat (Chevrolet)-a chuang – Lalrinpuii (37), Aizâwl Rângvamual kut aṭangin an man.
11th. Sunday : Mizoram Presbyterian Kohhran hnuaia Sunday School naupang te chuan inkhawmpui an hmang.
12th. Monday : DGP, Mizoram, Devesh Chandra Srivastva, IPS chuan khum 10 awmna Police Hospital building thar, 1st Bn. MAP Headquarters-ah a hawng. Building thar hawnna hun Police Hospital kawt zawla neihah hian Senior Police Officer, Dy SP chin chunglam bakah Armed Veng leh Armed Veng South Local Council te leh Police Hospital Staff te an tel a ni.
13th. Tuesday : Ni thum cham turin Union Minister of State for Rural Development, Consumer Affairs, Food & Public Distribution, Sadhvi Niranjan Jyoti chu Mizoramah a lo kal.
14th. Wednesday : Chief Minister, Zoramthanga chuan New Delhi-ah Prime Minister, Narendra Modi chu a chenna inah hmu in Mizoram mamawh hrang hrang te a thlen.
15th. Thursday : ZPM Gen. Headquarter-a Tawngtai Pawl buatsaihin Chaltlang Tourist Lodge-ah tawngtaia intuaitharna hun hman a ni. He hun hi hun hnihah then niin, hun hmasa hi Rev. Darchungnunga, VUC Member-in a kaihruai a, hun hnihna hi Rev. Dr. K. Thanzauva, Vice President, ZPM General Headquarter-in a kaihruai thung.
16th. Friday : Mizoram Police lal ber, Pu Devesh Chandra Srivastva, IPS, Director General of Police, chuan Serchhip a tlawh a. Serchhip SP Conference Hall-ah tlawmngai pawl aiawhte leh Village Defence Party (VDP) hruaitute nen inkawm ho in DIG chuan Mizoramah Police post hi za zela 33 vel zet a ruah mek thu a sawi.
17th. Saturday : Excise Check Gate, Vairengte-ah Truck AS- 01-LC- 2397 Cement phur atangin dan phal loh a Mizoram a tawlh luh tum, Gelatine, detonator leh Fuse wire tam tak man a ni a.
He Truck hi Sahib Ahmed Majumder (26) s/o Nihin Uddin Majumder, Rajghat, Bagha, Cachar Dist, Assam khalh niin an thil phurh te hi Truck Terminal, Aizawlah an inhlanchhawng dawn nia thudawn a ni bawk. Driver leh handyman te hi Police Station-ah lâk niin Case siam a ni.
18th. Sunday: Presbyterian Kohhran hnuaia senior department te chuan inkhawmpui an hmang hlawm.
19th. Monday : Bawngkawn atanga Durtlang Leitan thlen chhoh hma deuhah SML tipper chesualin, a khalhtu Lalrintluanga (35) s/o Laltlanliana, Durtlang a thi.
Tipper-ah hian a khalhtu bak midang chuang an awm lo a ni.
20th. Tuesday :
Tuikum bialtu MLA leh Assembly Deputy Speaker, Er. Lalrinawma chuan a bial chhung, Khawbel khuaah Martar te ni puala inkhawm a hmanpui a, Martar te hriatrengna lungphunah zahna chibai bukin pangpar a dah a, Khawbel Community Hall-a inkhawm neih hmanpui lehin mahni Hnam tana nunna hlan te ngaihnep an ni ngai lo tih a sawi bawk.
21st. Wednesday :
Cheng nuai 23.2/- senga Lairam Christian Medical Centre & Hospital-a bun, damlote hman tur Oxygen siam chhuahna khawl chu LADC CEM, V.Zirsanga chuan a hawng.
22nd. Thursday : Central YMA Hall, Tuikhuahtlangah YMA chanchinbu enkawltute tan traning a buatsaih a, he hunah hian I&PR Minister, Pu Lalruatkima chu khuallian a ni.
23rd. Friday : Zonet buatsaih, Mizo Idol 2022 atan T. Vanlalhmangaihi thlan a ni. Hunthar Veng nula Hmangaihi hian Rs. 2,00,000/- leh Yamaha Aerox scooter a dawng.
24th. Saturday :
Vaivakawn Zohnuai-a thlamual kaltlanga National Highway 54 pawhna kawng sial thar chu Pu Lalruatkima, bialtu MLA leh Minister ni bawk chuan a hawng. He kawng hi Airport lam kal turte tan Hunthar veng, lei tlahniam paltlang kher lova kalna kawng ṭha leh awlsam tak tura ngaih a ni.
25th. Sunday : Dr. Vanlaltanpuia, Chairman, Mizoram Youth Commission chuan Mizoram House, Sun Tower Building, GD Ambedkar Marg, Bhoiwada, Parel, Mumbai tlawhin thawktu te leh damlote leh a enkawltu (attendants) zawng zawng te tan zanriah a buatsaih sak.
26th. Monday : AH&Vety. Minister, Dr K.Beichhua chuan Nisapuiah bawnghnute dahkhawlna in leh khawl hmanga bawnghnute vawn thatna a hawng. Minister hi bialtu MLA, K. Laldawngliana leh official ten an tawiawm a ni.
27th. Tuesday : K. Lalmawizuala, kum 41 H/o Pi Lalnuntluangi, Sihphir chu an kawmthlangte gas khurah tla in a boral.
28th. Wednesday : Pu H. Lalfakawma, Herald for Christ founder chu a boral.
29th. Thursday : Kal thalo avanga hun rei tak ICU a enkawl anih hnuah Pi Lalhlimpuii, Lawipu BSUP cheng chu a na tuar lovin a boral. Pi Hlimpuii hian a pasal leh a fapa rualban lo te chu a kalsan.
30th. Friday : Kohhran hrang hrang ten beihrual inkhawm an hman thin chu a tiak ta.
Comments
Post a Comment