1st. Saturday : Upate ni a ni a, sorkar mi pawimawh te chuan hmun hrang hrangah insem darhin an hmanpui hlawm. Chief Minister, Pu Zoramthanga chuan Zemabawk North YMA inah ah Zemabawk North Area-ah a hmanpui.
2nd. Sunday : Hnampa Mahatma Gandhi pian champha a ni a, sorkar hotu te chuan Aizawl a a limah zahna leh hriatrengna pangpar an dah.
3rd. Monday :
Hnampa, Mahatma Gandhi pian champha puala kum tina Faina Hapta hman thin chu MINECO junction-ah UD&PA changtu, Deputy Chief Minister, Tawnluia’n a hawng.
4th. Tuesday : Mizoram University-a Department of Mizo-in Mizo thu leh hla ruaipui an buatsaih a, Higher & Technical Education Minister Dr R. Lalthangliana’n hmanpui.
5th. Wednesday :
India rama force hrang hrangte paragliding intihsiakna nei turah, an unit aiawh a tel tura thlan, Zorinmawia Chawngthu (28) h/o Lalbiakzuali, Zemabawk chu practice flight an neihna ah chesualin a boral.
6th. Thursday :
Serchhip District-a State Public Information Officer (SPIO), State Assistant Public Information Officer (SAPIO) leh Department Appealate Authority (DAA) te tan Serchhip-ah Right to Information Acts, 2005 leh RTI Online Mizoram chungchang an zir ho.
7th. Friday : Pc Vanlalnghengi (kum 42) h/o Ricky Vanlalnghaka, Edenthar chu Septicemia avangin a boral.
8th. Saturday : Union Home Minister, Shri Amit Shah kaihhruai in Guwahati, Assam ah Hmarchhak State 8 te Chief Minister, Chief Secretary leh DGP te hovin ruihhlo tawlhruk leh ramchhung venhimna ‘Drugs Trafficking and National Security’ chungchang sawiho a ni. He hunah hian
Mizoram Chief Minister, Zoramthanga pawh telin thu a sawi ve nghe nghe.
9th. Sunday : Tunkar Thawhlehni a khanghu huan sâm fai tûra kal, Pu Lalpiangliana, Sâmthang chu thi a hmuh a ni.
10th. Monday : Mizorama a hmasa ber tûr, TB en dikna khâwl Culture & Drug Susceptibility Laboratory chu Falkâwn-a District TB Centre-ah Health Minister, Dr. R Lalthangliana’n a hawng.
11th. Tuesday : Pathianni aṭanga chin hriat lohva bo, Lalruatfela (47), Saitual chu Saitual ram, Sedaikâwn khâm hnuai-ah thi a hmuh a ni
12th. Wednesday : Mahindra Pikup 4x4 LPS Pro Muaythai khelh mekah flyweight - Round of 16-ah Joseph Vanlalhruaia Hunthar leh Joseph Vanlalhruaia vêk Phuaibuai te chu inkhelin Hunthar Joseph Vanlalhruaia hian hnehna a chang.
13th. Thursday :
Central YMA leh Art & Culture Deptt. tangdun buatsaih, AMC huamchhunga Branch YMA te pual “Ramngaih Hla” hmanga Zaipawl intihsiak chu Vanapa Hall-ah a hmawr bawk a ni ta a, he hunah hian 1-na chu Dawrpui Branch YMA niin, Rs. 100,000/- leh Certificate an dawng.
14th. Friday : Rulkual khua-ah current man avangin mi 3 in nunna an chan a, midang 2 in hliam an tuar bawk.Hei hi thing tlu in power line a vuak chhiat avanga department lamin khawtlang lam an pun avanga hnatlang a thawkchhuak te an ni a, line chhia an siam mek lai hian current (power) a rawn kal thut avanga chhiatna hi thleng ta nia hriat a ni.
15th. Saturday : Daniel Sailo, MCS chuan B. Zalawma, Tuikual North chu dengkhawng tak tak a tawngkhumin kut a thlak.
16th. Sunday : Tunkar Zirtawpni atanga tan, Masihi
Sangati Convention vawi 32-na Durtlang Kohhrana neih chu a tiak ta.
17th. Monday : Zofate puala Camping buatsaih, Rangvamualah tan a ni a, camper sang chuang zet an lut. Camping-ah hian Frederick Lalrindika chu speaker a ni ang.
18th. Tuesday : Ministry of Health and Family Welfare in data-in a tarlan danin ni 568 hnua hri kai hmuh loh ni hmasa ber a ni, Pathianni a sample test 10 ațangin hri kai thar an awm lo.
Tunah hian Positive 2,38,680 awm tawhin mi 723 in an thihpui tawh a, vei mek hi 50 an awm a ni.
19th. Wednesday : RIPANS Administrative Block hnuai a Academiv IV sak mekah hmeichhe 3 hnathawk lai chu kopang minin a delh a, mi pakhat (hnamdang) in nunna chanin midang pahnih te hian hliam na vaklo an tuar thung.
20th. Thursday :
Tv H. Lalchhanhima, kum 53, Kawrthah, mahni a in luah chu a chenna inah thi a hmuh a ni.
21st. Friday : Mizo zinga thisen pe tam ber ni mêk, Tv. C Lalremruata, Electric Veng, chuan a vawi 85 na atan Civil Hospital, Aizawlah thisen a pe.
22nd. Saturday : Mizo National Front (MNF) chuan kum khat chhung an lawm hnu in an party kum 60 tlin an lawmna chu an khar. Kharna inkhawm hi Vanapa Hall-ah neih a ni. Nikum October 22, 2021 khan kum 60 tlingin, a lawm hawnna hi nikum khan Vanapa Hall-ah ropui takin neih a ni a, kumin kumtluanin Jubilee pual hian hma lak a niin, vawiin October ni 22, 2022 hian a kharna hun, Vanapa Hall ah hman a ni ta a ni.
23rd. Sunday : Benjamin Biaknunzira s/o Lalrinzuala Pachuau, Ramhlun South, British Army tanglai chu London-ah Septicemia vangin a boral.
24th. Monday : Deputy Chief Minister, Tawnluia chuan Khawzawl District Volleyball Court thar chu a hawng. Volleyball Court thar hi Artificial Turf phah chhuah vek a ni a; Rs 32,15,000/– sen ral a ni.
25th. Tuesday : Mizorama la thleng ngai lo leh hriat theih china khawvêla la thleng ngai lo a thlengin Vana Pa Hall-a Mizo Writers Association (MWA) buatsaih, Lehkhabu Pho Rùnpui hawngtu, MWA Adviser, Pu R Lalrâwna chuan, a rualin lehkhabu 31 a tlángzarh! Hei hi khawvêl huap pawha a ruala lehkhabu tlángzarh tam ber tum nia hriat a ni.
26th. Wednesday : Khawkawn khuaa BADP Rs nuai 20/- senga sak, Community Centre chu bialtu MLA, L Thangmawia chuan a hawng. MLA chuan
Khawkawn khuain Community centre an nei ta chu a lawmpui thu a sawi.
27th. Thursday : Young Mizo Association (YMA) Rorel Inkhawm vawi 3-na chu Thingsulthliah khelmualah neih a ni.
28th. Friday : Mahindra Pikup 4x4 LPS Pro Muaythai 2022 chu a hmawr bawk a ni ta. R Dengṭhuama Indoor Stadium, Mualpui a inkhelah hian khuallian chu Dr Franklin Lalrinngheta, Dealer Principal, Mana Motors a ni a. Inelnaah hian Champion ten Rs 30,000 + kawnghren an dawng a ni.
29th. Saturday : Tuirial Airfield bula Lalnghakliana picnic spot bulah Tank lorry pakhat chu a let a, a oil phurh bua an dawh luih luih laiin kangmei a chhuah thut avangin mi 4 in nunna an chan a, hliam tuar engemawzat an awm bawk.
30th. Sunday : Imphal (Manipur) leh Lengpui (Mizoram) inkara thlawk tur Alliance Air Service chu biakhmuh theihna hmangin Union Civil Aviation Minister, Jyotiraditya Scindia chuan a hawng. Alliance Air Service thar hi Imphal leh Aizawl inkarah kar khata ni nga (5) service tura ruahman a ni a, hemi rual hian Hmarchhak State hrang hrang Assam, Manipur, Arunachal Pradesh, Meghalaya-ah te pawh Thlawhna service thar hi hawn nghal a ni bawk.
31st. Monday : DC Conference Hall, Kolasibah District AIDS Prevention & Control Committee, Kolasib chu an thutkhawma; he hunah hian Kolasib district-a HIV kai dinhmun te thlirletin HIV/AIDS chungchang inzirtirna neih nghal a ni. Thutkhawma tarlan danin June 2002 atanga September 2022 thleng khan Kolasib district chhung a thisen 84,519 endik tawh ah mi 1,683 chu HIV hrik kai an ni tih thu sawi a ni.
Comments
Post a Comment