MARCH 2022, KA DIARY

1st. Tuesday : Nimin lama ka sam mawng lam leh thlam thlang vel ka va sam leh. Zingkarah U Makhawa dawr ami hnathawh pheikhawk Rs 500/- in ka va lei. 2nd. Wednesday : Awm fangin inah ka awm. Ni za inhlawhna Rs 500/- kan la. Ka lawm hle. (Telegram fake send) 3rd. Thursday : Lo-ah banril hemin ka riaklut Susani by Florence LR Ralte ka chhiar tan. 4th. Friday : Ka hna ngai ka chhunzawma, ka haw. Zanah chanchinbu chhutnaah ka kal. 5th. Saturday : Inah ka awm. Pc-a hnena bike ka dah chu la zo chiahlo mah se a nun theih tak avangin ka la. A nun theih avang leh engine hawn ngaia a hriatloh avangin ka lawm hle. 6th. Sunday : Hripui avangin inkhawm a la awmlo. Inah ka awm nileng. Atei Reiekah a leng. 7th. Monday : Lo-ah banril hem tumin ka riaklut. Ka ban hem tum a har deuh avang leh thing zai tir ka tum deuh avangin ka chhunzawmlo. Chawhnu lamah thi gzai tur leh tui lak tur vel zawngin lo mawng lamah ka vak kual. 8th. Tuesday : Nimbu hmun ka sama, ka haw. Zanah Ni Lai dawrah ka leng. 9th. Wednesday : Inah ka awm nileng. 10th. Thursday : Au huan, Serkhan a mi halpuiin ka zu inhlawh. Zanah kan section YMA te V/C house-ah kumthar duangin kan committee. Mitthi buhfai dah nan in pathum ruat zingah kan in ka ti tel. Maawmi ten chengkawl an zuar. 11th. Friday : Huan ka vah hmasak zawk ka va hal. Zanah chanchin bu chhutnaah ka kal. 12th. Saturday : Forest hoin Sakawrhmuituai tlanga ram an vah, hal tura tih chu mei kawng sialin ka han inhlawh. Thenawm Atei leh Mesaka te unau hnih chu hripui lak ata an dam ta. 13th. Sunday : Hripui avangin inkhawm a la awmlo. Au Sawma te leh Nu Mawizuali te inah ka chhuak zuai tihloh chu inah ka tawm nileng. 14th. Monday : Tun Inrinni a forest ram, hna kan han thawhna kha zingkarah kan han hal. Mei kan chhuah avangin kan buai hle a, khawtlang kan pun hial. Khawtlang mipui an rawn thlen hnuah Adiki dawr, Kawnveng ah, chawhnu her zet tawhah chaw kan zuk ei. Inah ka phei zuai a, chumi hnuin Sakawrhmuituai ah chuan kan han chho leh. Kan thelh thei chuanglo. Zan dar ruk velah Lungdai ho an rawn thlenga, an ram chin a nih tawh avanga an ven tura an ngaih avang leh lo zuk chawl tura min tih avangin kan hawnsan. 15th. Tuesday : Nimina kan ram hala mau lawr sei deuhte tanin U Sangliana nen kan han inhlawh. Hawn lamin bike a chhiat avangin kan nawr haw tawp. PCa hnenah ka dah nghal. Maawmi Selesihah ar vulh training in a kal. Kristian Tlangau, March issue a lo thleng. February issue hi kan hmulo a ni. 16th. Wednesday : Kan section YMA te U Marina te in chhungin kan hnatlang. Maawmi Selesihah training in a kal leh. 17th. Thursday : Huan ka vah thar ka va hal. Maawmi Selesihah training in a kal leh a, zoin certificate nen a lo haw. Maawmi birthday vawi 47 na a ni a, hemi pual hian zanriah ei dawnin ka tawngtai. 18th. Friday : Inah ka awm. Zanah chanchin bu chhutnaah ka kal. 19th. Saturday : Huanah mang ka va khawh. Zanah ka inkhawm. Hei hi January ni hnih hnu a jan inkhawm leh theih hmasa ber a ni. Kan zai thei ta hial bawk. Inkhawm banah AL, Dawngtea te inah kan section YMA OB te kan committee. 20th. Zing dar 3:30 velah zualko tlangau a awm. Chumi u a tih ri ka hria a, Biakin veng an ti ni maiin ka hre bawk. Mikhual ruang rawn lut tur nia ka ngaih avang leh an au zui kemloh avangin tho loin ka mu tlang. Zing kan thanharhin Maawmi n 'U Nia a thi emni?' a tih chuan tlangau awmzia min ti chiang nghal. Kan unaupa Nia chu internal bleeding avangin a thi a lo ni. Ka khawngaih hle. Zingkarah Pathian ram ka khawn. Chawhmaah Sunday School ka kal. Maawmi erawh a nawm meuhloh avangin a kallo. Inkhawm banah mitthi inah chuan ka kal. Chawhnuah Pathian ram committee room-ah kan chhiar. Mitthi awm avangin chawhnu inkhawm hi a awmlo a ni. Zanah khawhar inah hian ka kal leh. Hripui avangin program erawh a awmlo. Hriatpuia hri atangin a damm ta tih ka hriat in ka lawm hle. 21st. Monday : Huanah mang ka va khawh. Hliappuiah khualzin nu pakhat chu lungphuchawl in a thi. V/C house ah phurh thlak a niin kuang nen an veng, Chhinga vengah thlah a ni. Pi Hmangaihthangi, Laikunga nu chu thimhlimah a thi a, ka hriat veleh ka phei nghal. Ka chauh deuh avangin rei awmloin dar riat velah ka haw. U Thangliana sakawr pu, Serkhan a mi chu lungphuchawl in a thi tih ka hriatin pawi ka ti hle. Ka bikeah engine oil ka thun. 22nd. Tuesday : Chawhmaah mitthi inah ka kal. Zanah khawhar in hunah ka kal leh. Hri hi Chawlhni zana Task force in chhiatni inkaihhruaina a hma anga kalpui leh tawh tura a rel vang a ni. 23rd. Wednesday : Huanah bean zamna tur ka va siam. Maawmi SHG training in V/C house ah a kal. 24th. Thursday : Huanah bean zamna tur ka va siam. 'Covid active case zero a ni leh ta' tih article ka ziak. Toma leh Ahriatite an innei. 25th. Friday : Huanah bean zamna tur ka va siam. Zanah chanchin bu chhutnaah ka kal. Nimina ka article ziah chu chhuah turin ka dah. Arpua Pu Zaneiha tunu chu hlamzuih in a thi. 26th. Saturday : Huanah bean zamna tur ka va siam. Khua a dur deuh avangin chaw fak hmain ka haw. Tamlo venga Pu Lalkunga tupa chu hlamzuih in a thi. 27th. Sunday : Chawhmaah Sunday School ka n kala, zanah kan inkhawm leh bawk. Atein Chhanteate inah zanriah a ei. Chhunah khawhar in U Nia(Pu Tekawhate kawt) ah ka kal. 28th. Monday : Khua a nawmloh avangin inah ka awm. 'Thlawhnaa thlawh' tih thupuia hmangin article ka ziak tan. Mamite an lo chhuak. Gamchha min lo hawna, ka lawm hle. 29th. Tuesday : Huanah bean zamna tur ka va siam. 30th. Wednesday : Huanah bean zamna tur ka va siam. Chhanteate inneih champha a ni a, Atein zanriah a han ei. Sawmzuala leh Lalngaihsaki te an innei. 31st. Thursday : Huanah bean hmun tur ka va kap. Mera lu ka meh tir. Enkawli, U Sawma fanu leh U Thangmawia fanu ten thlangkhuan an dim. Mafaka nau Lalruatfela nimina a thih thu ka hruatin pawi ka ti hle.