SAKAWRHMUITUAI TLANG A KANG

Tunkar Thawhtanni khan Sakawrhmui tlang kham, tlak lam ram chu a kang chiam mai a, hemi thelh tur leh hmun dang kai tur vengin khawtlang mipui engemawzat thawhchhuah a ni. Sakawrhmuituai tlanga Gopi Chand Batminton khelhna tur a ruahman bul a ram thenkhat chu forest department lamin thing phunna atan an vat a, hemi an hal na lama he kangmei hi chhuak ta a ni. Forest department lam atanga thudawn danin ram hi zingkar boruak daih laia hal a nih chuan kangmei pawh a chhuahloh phah rin a nih avangin zingkar hma takah ram hi hal a ni a, mahse, a hmun a tlangsan bakah ni a kang that em avangin an rin aiin hnim a lo ro tha a, mei si thlawk a tam bawk nen kangmei hi a chhuak ta chiam mai niin a lang. Department lam mi leh sa ten theihtawp chhuahin mei hi thelh tum a ni na a, mihring an tamtawk lo bawk nen anmahni maia thelh mih an zuamloh avangin khawtlang mipui hi an pun ta a ni. Khawtlang mipui kan tel chinah chuan meilam te sialin a remchan dan angin hal khalh zel a ni a, chhuah lam ram chu venhim theih a ni. Chhuahlam ram venhim theih a nih avang leh tlak lam ram chu kham a nih avanga thelh ngaihna a awmloh avangin mi nawlpui chu chawhnu herah kan haw hlawm a, department mi leh sa thenkhat leh hnathawktu tlem azawng erawh chu boruak ngaichangin khawthim thleng an awm thung. Lungdai YMA hruaitu te lo thlengin an ram chin a nih tawh avang leh kangthelhtu lo awm te hah tawha an rin avanga lo chawl hahdam rih tura an tih avangin Sihphir lam atanga thawkchhuak te chu zan dar sarih velah an haw ve ta a ni. Hemi ni vek hian Pu P.C Lalthantluanga, R.O (Sadar), Aizawl Forest Range chuan Aizawl khawdai chhehvel Branch YMA 10 aiawh te a office-ah leng a sawmin meeting a neih pui a. Ramkang chungchang mai bakah ramngaw leh nungcha humhalh leh tih pun dan kawng a hmalak nan YMA pawimawh zia leh nasa lehzual a thawhho a tul thu te a sawi pui. He hunah hian branch president, Tv Zohmingliana Hnamte chu branch aiawhin a tel.