AUGUST 2021 MIZO(RAM) DIARY

1st. Sunday : Lockdown duhloh (protest) chu Vanapa Hall tualah neih a ni. 2nd. Monday : Sihphir VLTF chuan ZMC-ah kuang pahnih an pe. Tun dinhmunah damdawi in hian kuang 16 an nei mek a ni. 3rd. Tuesday : Dr. R. Lalthangliana, Health Minister chuan District Hospital, Kolasib sak that dan tur a hmuna kalin a en. 4th. Wednesday : Gauhati High Court, Divison Bench in Mizoram sorkar chu Lungleia covid-19 endikna khawl RT-PCR laboratory a rang thei bera din tur leh, Covid-19 hrikaite enkawlna tur Dedicated Covid Hospital tam zawk din thuai turin Mizoram sorkar a hriattir a, kar khat chhunga RT-PCR din theih dan tur ngaihtuahtu committee, member mi pali (4) aia tlem lo awmna din turin sorkar a hriattir bawk. Committee-ah hian Lunglei Sub-Hqrs YMA President leh Lunglei Thalai pawl Chief Organiser telh ngei turin a hriattir nghal bawk a ni. 5th. Thursday : Tun hnai-a Assam leh Mizoram ramri a buaina chinfelna tur thuchhuah intawm (Joint Statement) chu State pahnih aiawhten Aijal Club, Aizawl-ah an ziak. Mizoram aiawhin Home Minister, Pu Lalchamliana leh Home Secretary, Pu Vanlalngaihsaka ten hming an ziak a, Assam aiawhin Border Protection & Development Minister, Pu Atul Bora leh Border Protection & Development Secretary, Pu GD Tripathi ten hming an ziak bawk. 6th. Friday : Marine Pro Boxing Promotion, Mumbai hnuai-ah kan Mizo boxer NT Lalbiakkima leh Laldingliana ten fight neiin hnehna an chang ve ve. NT Lalbiakkima hi India mi, IBA Intercontinenal champion hmasa ber a ni. 7th. Saturday : Silchar leh a chhehvela Mizo motor tangkhang te chu Assam Police venhimna hnuai-ah Mizoram pana chhuahtir an ni a, amaherawhchu, Lailapur an thlenin mipuiin lo dangin motor te pawh nasa takin an suasam a, driver hliam tuar te pawh an awm. Hetiang a nih avang hian motor te hi Silchar Mizoram House-ah an let leh hlawm a ni. 8th. Sunday : Covid hripui avangin mi pali in nunna an chan. 9th. Monday : Sêrchhîp district-a Hmunzâwl branch YMA-te chuan damlo harsatna tâwk, Pu Vânlalruata-te hlo an thlawhsak a, hnatlâng member 80 chuang an thawk chhuak. 10th. Tuesday : Sample endikna chi khat, Flourescent Immunoassay hman tan a ni. 11th. Wednesday : Larsap, Haribabu-in chawlh a lak avangin a chawlh chhunga Mizoram hmui turin turin Brig Dr.BD Mishra (Rtd.), Arunachal Pradesh Governor ni lai chu rinawmna thu tiam tirin lak luh a ni. 12th. Thursday : Sihphir Venglai Branch KTP din champha vawi 30-na a ni a, hemi pual hian Synod hospital tan thisen unit 17 an pe a, thisen petute hi mipa 16 leh hmeichhia 1 an ni. 13th. Friday : Mamit district kal tlanga Tripura leh Assam aṭanga Mizoram châk lâk luhna kawng siam ṭhat, KDZKT road chu Tuidamah Chief Minister, Pu Zoramthanga’n a hawng. Kawng hi Tripura, Khedacherra khua aṭanga inṭanin Hachhek tlâng dung rawn zawh pheiin, Tuilûtkâwn Dampa Tiger Reserve thleng niin KM 84.50/89.5 a thui a ni. 14th. Saturday : Kumi'n India Independence day chu Pathiannia a tlâk avângin Lawngtlai district-a Vawmbûk khua chuan India Independence Day an hmang. 15th. Sunday : Ramchhung hmun dang te rualin Mizoram hmun tinah India ram in mahni a ro a inrel hranna ni champha vawi 75-na chu lawm a ni. A lawmna pui ber, Aizawlah chuan sipai Lammualah a lawm a niin, Chief Minister, Zoramthanga chuan hnam puanzar pawtparhin, mipui hnena thuchah a sawi. 16th. Monday : ZPM Leader, Pu Lalduhoma MLA lehkhabu ziah 'Barh luih ramri' tih chu ZPM Legislature party leader, Pu Vanlalhlana, MLA chuan a tlangzarh. Lehkhabu hi kum 2012 khan tlangzarh a lo ni tawh a, tun ami hi revised edition a ni. 17th. Tuesday : Tuirial bialtu MLA, Pu Andrew H. Thangliana (44) chu Ebenezer Hospital-ah a boral. 18th. Wednesday : Tuirial bialtu MLA, Andrew H. Thangliana'n chatuan ram a pan tak avangin Commissioner & secretary, Mizoram Legislative Assembly secretariat, H. Lalrinawma chuan 4-Tuirial assembly constituency (ST) chu bial ruak a ni tih a puang. 19th. Thursday : Power & Electric Department Minister, R.Lalzirliana hovin pawl hrang hrangten SAW Conference Hall, MINECO-ah electric bill chungchang an sawiho a, he hunah hian thla thum chhung bill lo kal pek harsatna nei te chuan a thla khat te te an pek theihna tur ngaihtuah ni se, an ti a. Electric bill sanna tariff erawh tih danglam theih a nih loh thu an tarlang. 20th. Friday : Bairabi bul, Zophai ram; Pu Ch. Chhunga leilet bul atanga Zophai IR outpost panna kawng pumpelh (divert-na) RCC hmanga Mizoram PWD in a thawh mek chu, Assam police 10 velin an tlawh a, hna thawh lai chawlhsan turin an hriattir a, Lei dawhna tur Rod phuar sa 5qtl vel chu ṭhiatin 207 (Mini Truck) in an phur bo. 21st. Saturday : Chief Minister, Zoramthanga chuan Olympian Nl.Lalremsiami chu Chief Hockey Coach atana nemngheh a nih thu Twitter kal tlangin a sawi. 22nd. Sunday : Vairengte khawtlang hruaitu te leh Lailapur khawtlang hruaitu te chu Lailapur-ah an inkawm a, Assam leh Mizoram ramri buai leh a kaihhnawih hrang hrangte an sawi ho. 23rd. Monday : Pu Lalengkima (36), Kawnpui chu Covid-19 vangin ZMC-ah a boral a, Mizorama Covid-19 vanga nunna chan 200-na chiah a ni. 24th. Tuesday : MPYCC te chuan Vanapa Hall tualah tunhnai-a Electric Bill sang uchuak lutuk an duhlohna lantirna atan electric bill thenkhat an hal. 25th. Wednesday : Olympic Tokyo 2020 a tel leh Indian Women’s National Hockey player, Olympian, Nl. Lalremsiami chu Lengpui Airport-ah rawn tumin, SAI hotute bakah Sport & Youth Services hotute chuan an lo dawng sawng a. Sport Minister, Robert Romawia Royte chuan Delhi atangin a rawn tawiawm bawk. 26th. Thursday : LADC-ah District Council MNF sorkar, Chief Executive Member, Manghmunga Chinzah kaihhruai chuan House-ah bukna a pal tlang zo lo. LADC Session-ah hian sorkar ding lai rintawk lohna motion hi MNF Member paliten theh lutin motion hi Chairman, V.Zirsanga kaihhruaina hnuaiah sawiho a ni a. Hemi hnu hian motion hi ban pharin buk a ni a. Motion thlawptu lamah member 12-in ban pharin, sorkar dinglai ring tawk lamah member 10-in ban an phar thung a. South Lungpher bialtu MDC Congress Member C. Lalmuanthanga chuan sorkar buknaah hian ban a phar ve lo thung. LADC Session-ah hian Elected Member 25 zingah dam lohna vanga Session kal thei lo Deputy Chairman tih loh chu an kal kim a ni. 27th. Friday : Kolasiba Pu Vanlalsiama Parte fapa te 3 - Pu Albert Vanlalhriata Parte (40), Pu Andrew Vanlalhruaia Parte (40) leh Tv William Parte (36) leh Pu Lalchhuanliana (k-60) te chu an tuizem siamna mau an phet tur Oxygen tlakchham avangin an boral. 28th. Saturday : Covid - 19 avangin mi parukin nunna an chan. 29th. Sunday : Vairengte-ah chuan Vai motor, truck leh Auto rickshaw an insu a, Auto rickshaw khalhtu in hliam na tak a tuar a, damdawi in lamah kalpui nghal a ni. 30th. Monday : Champhai-ah Maruti 800 MZ-04/7288 chuan kea kalna, Footpath Fencing chu na takin a su a. Lirtheia chuang mi 2, Lirthei khalhtu Zosangliana (35) S/o Vanlalchhuanga Varte, Zotlang leh Lalchhandama (34) S/o Ngurliana, Ngur, Champhai Zion Venga chengte chu vanduai thlak takin an boral. Car hi a brake a fail nia hriat a ni. 31st. Tuesday : Central YMA chuan Kumpuan Sub-Committee ruahmanna in kumin (2021) a MBSE hnuaia HSLC leh HSSLC Top -10 ( Mizo) te chawimawina hun Central YMA Hall-ah an hmang. He hun hi Tv Lalhmachhuana, Vice President (Kumpuan Sub- Comt Chairman ni bawk) in a kaihruai. Chawimawina pek te hi HSLC ah 13, HSSLC Arts- 16, Science- 13, Commerce- 10 an ni a, an vaiin 52 an ni. Lawmpuina thuziak leh pawisa fai Rs.1,000/- theuh hlan an ni.