1st. Thursday : National Voluntary Blood Donation Day a ni a, thupui chu 'Let’s donate blood voluntarily and contribute to the fight against Corona' tih a ni. He ní hi Mizoram hmun engemaw zatah hman ve a ni.
2nd. Friday : Rúlchàwm khaw chhungah lei a min a, in pathum a hnawl a, ina chengte an chhuah hman avangin thi leh hliam an awm lo. Lei minna hmun hi metre 100 bial vel a ni a, mimal in luah lai pahnih leh sorkarin khawsak harsate in saksakna scheme hnuaia in sak zawh thawkhat tawh, la luah si loh pakhat te an ni.
3rd. Saturday : KṬP, Dawrpui Vengthar West Branch-in Aizawl Civil Hospital tan thisen unit 32 an pe a, a petute mipa 28 leh hmeichhia 4 an ni.
4th. Sunday : Sihphirah leimin nasa tak avangin chenna in pahnih chu luah zui tlak lohin a chhiaa, lei hi min leh hlauhawma a awm avangin chhungkaw engemawzat chu community hall-ah an riak. Chhiatna thlenna hmun hi bialtu MLA, Chief Minister ni bawk, Pu Zoramthanga chuan a tlawh nghal a, tul leh mamawh hrang hrang te chu khawtlang hruaitu te a hlan nghal.
5th. Monday : Mizoram Synod-in secular college a din thar, Mizoram Christian College (MCC) chu Synod moderator, Rev. R Lalchangliana'n a hawng. He college-ah hian zirlai 228 an awm a, zirna an ṭan nghal.
6th. Tuesday : Ni hnih awh turin Aizawl Municipal Corporation (AMC) chuan Vanapa Hall-ah Aizawla local council member thlan tharte pualin training an buatsaih. LC training-a khuallian, PC Lalhmingthanga, AMC mayor chuan, LC member-te leh AMC hnuaia thawktute chu hnathawh inang an nih thu leh LC-in harsatna an tawh chuan AMC harsatna tawh a ni nghal tih a sawi a, "Municipal dang angin AMC hian thuneihna sang tak a nei lo chungin sorkarin subject a pek chinte chu ṭha takin a thawk thei zel a ni," a ti.
7th. Wednesday : Health & Family Welfare department chuan home quarantine atana inkaihhruaina thar an tichhuak a; RT-PCR hmanga swab sample test negative tawhte chu in lama inkhung hran a ngai tawh lo tih an tarlang.
8th. Thursday : MNF MLA-te'n press conference an nei a, hetah hian Assembly Speaker hnena ZLP leader, Lalduhoma an hêkna chu amah huat vang ni loin, dan an ngaih pawimawh vang zawk a nih thu an sawi a, an hekna thu hi CM in a hriatpui loh thu an sawi bawk!
9th. Friday : Cachar DC hoin Assam Forest department leh Police-te'n Thinghlun, Mamit district-a John Zolawma thlám an hâl a, a kuhva kûng tam tham tak an tichhe bawk. Sorkar leh mipui thin a khei hle.
10th. Saturday : Chief minister, Zoramthanga chuan Vaivakawn leh Bawngkawnah lirthei tlan theihna tur lei, flyover bridge siamna tura ruahmante a hmunah a tlawh a, hna thawh dan tur a enfiah. Chief Minister hi Planning Board vice chairman, H Rammawi, chief secretary, Lalnunmawia Chuaungo, additional chief secretary, JC Ramthanga bakah, UDPA leh PWD hotute'n an ṭawiawm.
11th. Sunday : Mizoram Synod hnuaia inkhawmpui lian ber dawttu, Presbytery inkhawmpui, October 8 a tan chu kohhran upa tharte nemnghehna leh upa thite sûnna inkhawm neih a nih hnu in a ṭiak.
12th. Monday : Mizoram State Commission for Protection of Child Rights (MSCPCR) chairperson, Sangzuali Vanchhawng chuan a pisaah RTE Helpline promotional video clip a tlangzarh. Video clip hi zirlai naupang, an zirnaa harsatna tawkte'n an biakpawh theihna tura MSCPCR-in RTE Helpline an siam mipuiin an hriat theihna tura a ruahman a ni.
13th. Tuesday : Peoples' Conference (PC) party president, Lalhmangaiha Sailo chuan thuchah tichhuakin, "Assam mi leh sate'n min nûthûri zuam reng mai chhan hi chu buh leh bâla kan intodelh loh vang te, state dangte nena inkalpawhna kawngpui ṭha kan neih loh vangte leh kawlphetha kan la tlâkchham vangte a ni ber,'' a ti.
14th. Wednesday : Lok Sabha MP, C Lalrosanga leh Rajya Sabha MP, K Vanlalvena chuan, Union Finance minister, Nirmala Sitharaman an kâwm a, Mizoramin HUDCO loan a bat ngaidam turin an ngen. Mizoram MP pahnihte hian chief minister, Zoramthanga'n HUDCO loan bá cheng vbc. 39.29/- ngaihdam dilna a lo thawn tawh leh phone hmanga a lo sawipui tawh chungchang an bawhzui a ni. Union Finance Minister chuan, a rang thei ang bera chinfel a tum thu a lo hrilh.
15th. Thursday : Senate of Serampore College hnuaia Bachelor of Divinity (BD) final year result a chhuak a; Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm thung.
16th. Friday : Lai Autonomous District Council (LADC)-a sorkarna chelh mektu, Congress Legislature Party chuan
BJP Legislature Party an din thu, deputy chairman, LR Dingliana Chinzah hnenah an thehlut a; LADC-ah BJP kaihhruai sorkar a piang. Kum 2015-a LADC inthlanpuiah seat 25 awmnaah INC-in seat 16 an la a, MNF-in seat pariat leh independent-in seat pakhat an chang. Congress kaihhruai LADC sorkar kal meka Congress MDC palite chuan tun hnai khan MNF an lo zawm tawh bawk.
17th. Saturday : Kolasib DC, Dr H Lalthlangliana chuan, chi leh chi inkara buaina lian zawk thleng palh thei venna turin Vairengte leh Lailapur inkar bakah, Saihapui V leh Phainuam chhehvelah mi panga aia tam punkhawm khapna thupek a chhuah.
18th. Sunday : Mizoram Pradesh Congress Committee (MPCC) president, Dr Lal Thanhawla chuan Mizoram leh Assam ramria buaina thleng mek chungchangah thuchah a tichhuak a; thil thleng chuan ramri chinfel kawngah nghawng ṭha a neih a beisei thu leh, Assam lam chêt dan chu a dem thu a tarlang.
19th. Monday : Horticulture changtu, chief minister, Zoramthanga hoin kum 2019-20 chhunga Horticulture department hmalakna leh kum kal mek 2020-21 chhunga hmalakna hrang hrangte thlirho a ni.
20th. Tuesday : Hrangbana College chuan an college-ah thisen pek rûnpui an huaihawt a, zirlai mipa 53 leh hmeichhia pakuate'n Aizawl Civil Hospital (ACH) tan thisen unit 62 an pe.
21st. Wednesday : Health minister, Dr R Lalthangliana hoa sorkar hotute leh pawl hruaitute ṭhukhawm chuan, Covid-19 inkài darh zel tur venna atan October 26, 2020 aṭangin chawlhkar hnih chhung AMC huamchhungah 'Covid-19 No Tolerance Fortnight' hman an rêl. Ṭhutkhawmah hian Covid-19 Medical Operational Team chairman, Dr ZR Thiamsanga, chief secretary, Lalnunmawia Chuaungo, sorkar official te, Mizoram Kohhran Hruaitu Committee leh Indian Medical Association hruaitute an tel.
22nd. Thursday : Lunglei North bialtu MLA, Dr Vanlaltanpuia chuan Covid-19 a kai tih hmuhchhuah a ni.
23rd. Friday : Hnahthiala PYD (NEI)-te'n Hnahthial Venglai YMA Hall-ah thisen pek rûnpui an huaihawt a, mipa 23 leh hmeichhia 5 ten Lunglei Civil Hospital tan thisen unit 28 an pe.
24th. Saturday : Serchhip Ṭhalai Pawl (SṬP) chuan Serchhip Bazar leh a chhehvelah Covid-19 laka mipui an him theih nan hmai tuamna (mask) an sem.
25th. Sunday : State Referral Hospital (SRH)-ah Covid-19 vei mi pakhat dah luh a ni a, ani nen hian hripui vei mi 53 enkawl mek niin, an zinga pathum chu ICU-ah enkawl an ni. SRH-ZMC Bulletin tarlan danin, ICU-a enkawl mi pathum zinga pahnih chu ventilator hmantir mek an ni a, pakhat dang pawh oxygen pek a ni.
26th. Monday :
Hnahthial leh Thingsai police bakah Hnahthial Electric Veng Branch YMA leh Lungleng Veng Branch YMA-te ṭangho chuan Hnahthial Electric Veng ADO bulah Methamphetamine mûm 39,000 (kg. 4.6) an man a, a neitua puh mi pahnih - Lalzamliana (30) s/o C Zarlianthang, Tuithiang leh Lalruatkima (35) s/o Lalkamlova (L), Armed Veng South, Aizawl ve vete bakah an phurhna lirthei, WagonR MZ-01 N-2644 an man bawk. Meth an man hi tualchhunga hralhna ang chuan Rs. 78,00,000/- man a ni.
27th. Tuesday : Serchhip District Child Welfare Committee (DCWC) chuan Serchhipa Covid-19 vei naupangte hnenah ṭanpuina pawisa an hlân. Serchhip DCWC hian tun hnaia an district-a Covid-19 vei hmuh chhuah mi pali hnenah Rs. 1,500/- ṭheuh an pe a, naupang pakhat, a nuin hripui a vei avanga CCC-a awm mek tan Rs. 500/- an pe bawk.
28th. Wednesday : Mizorama a hmasa ber ni turin
Covid-19 avanga thi an awm ve ta. Sangkhuma (66) h/o Lalthlamuani (c/o Thanzauva & Sons), Dawrpui chu State Referral Hospital (ZMC)-ah a covid-19 avangin a thi a ni. Amah hi October 17-ah hripui vei a ni tih hmuh chhuah a ni.
29th. Thursday : Kum 2015-a Sangliansiama, Republic Vengte chhungkuaa mi panga thattua puh, Laltlanchhuaha thubuai chu a tàwpna atan ngaihtuah (final hearing) a ni.
Laltlanchhuaha thubuaiah hian additional district & session judge, Dr HTC Lalrinchhana court-ah final hearing neih ni mah se, court chuan thutlukna a puang nghal lo a, thutlukna puan hun atan November 3, 2020 chawhma dar 11 a ruat a niin, thutlukna hi video conferencing hmanga puan tum a ni.
30th. Friday : Serchhip Chhim Veng mi leh tuna Aizawl Zarkawt-a khawsa mek, John Lalsangzuala nupui, Ruthi Lalhmangaihsangi chuan Aizawl Civil Hospital-ah an fa pangana turin mipa kg. 6 leh gram 220 a rit a hring a, Mizoram-a naupiang lian ber nia hriat a ni. Civil Hospital, Aizawl-a Gynae-cology Deptt. Head, Dr. Ngurbiakveli chuan an hriat leh tawn chinah tun tum ami hi Mizorama naupiang lian ber a nih thu sawiin, hemi hma hian kg 6 leh gram 200 a awm tawh thu leh tun tum ami hian hei hi a rawn khum tak thu a sawi.
31st. Saturday : Assam chief minister, Sarbananda Sonawal pian champha a ni a, chief minister, Zoramthanga chuan Twitter kaltlangin lawmpuina a hlân.
Comments
Post a Comment