1st. Sunday : Champhai Zotlâng panna kawng ngîl pheiah bike-a mipa pathum inphur chu a che sual a, bike-ah hian New Champhai mi pahnih leh Khuangleng khuaa mi pakhat an ni a, New Champhaia mi pahnihte hi an boral.
2nd. Monday : Covid - 19 hri kai mi 24-te chu dam taka chhuahtîr an ni a; an zingah hian Dr. Vânlalṭanpuia, MLA pawh a tel.
3rd. Tuesday : Independent (ZPM) MLA, Pu Lalduhoma bân tûra MNF MLA-te’n an ngenna chungchângah Assembly Speaker, Pu Lalrinliana Sailo office-ah hearing neih a ni.
4th. Wednesday : Chhiahtlâng tlangvâl, Lalsângzuala (30) chu a ṭhiante nên an ramvahnaah a ṭhianpain kâp palhin a hmunah a thi.
5th. Thursday : Dârhawni (78) Dûrtlâng Leitan, Covid - 19 vânga Falkâwn Zoram Medical College-a enkawl mêk chu a thi.
6th. Friday : Remruatfela (7), Bûngkâwn Vêngthar, Aizawl chu Office Cooler current leak-in manin District Hospital, Champhai panpui a nih hnuin a hliam tuar lovin a boral.
7th. Saturday : Lawngtlai Vêngpui leh Bazar Vêng inrîna kawrtêah, Marvin Lalchhuansanga, (20) s/o Pachhûnga (L); Chandmari Lawngtlai ruang chhar a ni.
8th. Sunday : Union Home Secretary, Ajay Kumar Bhalla hmalakna leh kaihhruaiin Mizoram Chief Secretary leh Assam Chief Secretary ten video conferencing hmangin Assam-Mizoram buaina chungchangah meeting an nei a, ramri-a Mizoram Police duty te pui turin BSF te dah an ni anga, Assam lamin motor an dan te an chhuah nghal ang tiin thutlukna an siam.
9th. Monday : Mizoram Pradesh Youth Congress Committee (MPYCC) chuan minister of state, Lalruatkima lakah Cyber Crime Police Station, Aizawlah an general secretary, Ngurdingpuia Pachuau hmingin fi rst information report (FIR) an thehlut. FIR an thehluh chhan hi MPYCC chuan, Facebook-a thu dik lo thehdarh a nih vang a nih thu an sawi.
10th. Tuesday : Hranghlui zaithiam, Mizo hnam rohlu Zirkunga Hnamte (Zira Hnamte) chu kum 69 mi niin lung nâ vangin a thi.
11th. Wednesday : National Highway-306 kawngpui Lailapur, Assam-a dan a nih chungchangah Mizoram Pradesh Congress Committee (MPCC) president, Dr Lal Thanhawla chuan prime minister, Narendra Modi hnenah lehkha a thawn a; NH-306 kawngpui dan mekah a rang thei ang bera hma la turin a ngen.
12th. Thursday : Khawzawl Quick Response Team (QRT) member-te chu Khawzawl Hospital meeting hall-ah first aid pek dan zirtir an ni. He hun hi medical superintendent, Dr Frank Harris chuan a kaihruai a, medical officer, Dr Albert Lalhminghlua'n thupui hrang hrang hmangin thil pawimawhte a zirtir a ni.
13th. Friday : State Referral Hospital (ZMC)-a Covid-19 positive awm mek zinga ICU-a enkawl lai Lalthanga (70), Dinthar, Aizawl chu a thi. Amah hi October 22, 2020-ah a hritlang ṭan a, October 28-ah RAT hmanga a swab sample endiknaah Covid-19 positive a ni tih hmuh chhuah niin, tlaiah SRH-ah dah nghal a niin November 1-ah ICU-ah dah luh a ni a, November 4 aṭangin ventilator hmanga enkawl a ni.
14th. Saturday : Mizorama Covid-19 vei vanga enkawl mek zinga K Lalnuntluanga (34) s/o Dr K Lalremmawia, Durtlang chu a thi.
15th. Sunday : Mizoram sorkara minister of state hlui, K Thangzualla (87) h/o Denghliri, Chanmari, Pneumonia natna vangin a thi. February 1, 1933-a piang K Thangzualla hi engineer niin, April 1960-ah Bachelor of Engineering (Civil) a zo a, Mizo zinga BE hmasa ber dawttu a ni. November 1960-ah PWD-ah assistant engineer-in a lut a, July 24, 1990-ah chief engineer a ni ṭan a, April 1, 1994 aṭanga February 28, 1995-a a pension thlengin PWD secretary a ni. Sorkar hna aṭanga a pension hnuah MNF party-ah lutin, kum 1998 tàwp lama Mizoram Assembly inthlanpuiah Serchhip bialah MNF ticket-in a ding a, chutih laia chief minister, Lal Thanhawla hnehin thlan tlin a ni. State Planning Board-ah vice chairman a nih hnuah, kum 1999 aṭangin minister of state a ni a; Information Technology, Industry leh Sericulture department-te a enkawl.
16th. Monday : Rêngchhuana (79), Seling chu Covid - 19 vângin a thi a, Mizorama Covid - 19 kaihhnawiha thi 5-na a ni.
17th. Tuesday : November 11, 2020-a chin hriat loha awm Lalsiamthara (kum 2 leh a chanve) s/o C Zothanmawia, Vairengte chu Vairengte khaw rama Tuidaikhur luiah thia hmuh a ni.
18th. Wednesday : Mizoram Police chuan thuchhuah siamin, November 16, Thawhṭanni zan dar 7 vela Lalthanzauva Filling Station bula hnam dang driver kutthlaktu mi panga man an nih thu leh, Judicial custody (jail)-a awm turin Court-ah an thawn thu an tarlang.
19th. Thursday : Ministry of Jal Shakti hnuaia Department of Drinking Water and Sanitation chuan video conferencing kaltlangin World Toilet Day pualin hun an hmang a; Jal Shakti minister, Gajendra Singh Shekhawat-a'n a hmanpui. World Toilet Day hmannaah hian Swacch Bharat Mission (Grameen) hnuaia hmalaknate ngaihthlak a ni a, India ram puma a ti ṭha zual district 20 puan nghal a ni. District ti ṭha zual zingah Kolasib leh Serchhip district an tel.
20th. Friday : Aizawl Theological College (ATC) chuan an chapel-ah College Day leh zirlai chhuakte thlahna Valedictory Service an hmang a, zirlai 57 an thlah. Zirlai thlah turte fuihna thu sawitu Rev. R Lalchangliana, Synod moderator chuan, Kristiante hnapui ber chu Krista chanchin ṭha hril a ni tih theihnghilh ngai lo turin a chah. ATC-ah hian zirlai 181, zirtirtu 26 leh thawktu dang mi 18 an awm mek a ni.
21st. Saturday : Chief minister, Zoramthanga chuan Lengpui Airport thawm ṭhat hna thawh mek a hmunah a enfiah.
Chief Minister hi additional chief secretary, JC Ramthanga, Aviation principal consultant, J Lalhmingliana bakah, PWD leh PHE department hotute'n an ṭawiawm a ni.
22nd. Sunday : Indian Super League inkhel hmuhnawm takah FC Goa-in Bengaluru lakah goal hnih chhuah hmasa zet mah se an si phurh an sut zo a, 2-2 in inkhel an ṭin. Bengaluru lamah hian Mizo player, Lalthuammawia Ralte chuan bench a luah.
23rd. Monday : Covid-19 vei, a negative tawh tih finfiah hlim, R Hrangthanga (40) s/o R Ngurchhawna, Thenzawl Vengchhak chu a thi. A thih hnu hian hri a kai nia rinna a awm avangin TrueNAT-PCR hmangin test leh a ni a, Covid-19 a lo vei! Delhi-ah Covid-19 vei, Lalduhawmi (55) w/o C Lalchuangkima, ITI Veng, Aizawl chu a thi bawk.
24th. Tuesday : Prime minister, Narendra Modi hoin state hrang hrang chief minister-te'n video conferencing hmangin Covid-19 chungchang an sawiho a, CM, Zoramthanga pawh a tel. State hrang hrang hmalakna leh Covid-19 vaccine hman a nih theih veleha mipuia pek dan tura sorkar laipui ruahmanna sawiho a ni.
25th. Wednesday : Union minister, Kiren Rijiju chu LADC-a MDC inthlanpuiah an party (BJP) tan a campaign pui turin Mizoram ah a lo kal. Union Sports minister hian Lengpui Airport a rawn thlenin airport-ah Mizoram Sports minister, Robert Romawia Royte nen an inkâwm.
26th. Thursday : C Lalhluna lehkhabu ziah, 'Duhlian ṭawng, Mizo ṭawng' tih chu School Education minister, Lalchhandama Ralte-in a pisaah a tlangzarh. Minister chuan, Zo hnahthlak hnam hrang hrangte ṭawng vanga an inchemhàr lek lek laite a awm tih sawiin, "Zo hnahthlakte hi tlemin danglamna awm hret hret mah se, inpawm tawn a, rorelna pakhat hnuaia kan awm theih hun tur ngaihtuah a ngai," a ti.
27th. Friday : ZPM Legislature Party (ZLP) leader, Lalduhoma, Serchhip bialtu MLA chu Assembly speaker, Lalrinliana Sailo chuan MLA aṭangin bàn a nih thu a puang. Lalduhoma hi MNF MLA 12-in Indian Constitution 10th Schedule Para 2(2) a bawhchhia nia ngaiin bàn turin speaker hnenah hian an ngen a ni.
28th. Saturday : Jolyn Malsawmsanga (15) S/o Lalmuankima Chhangte te ṭhiandun leng chuan Pukpui (Lunglei) motor chhe dahna chunga lo awm naupang current-in a lo man lai chu hmuin an chhan chhuak.
29th. Sunday : Phaizau VC leh an khuaa pawl dang zawng zawng (all NGO)-te telna Joint Committee chuan thuchhuah siamin, an bialtu MLA, H Lalzirliana leh, an khua leh Mamita MNF hruaitute'n an humhalh lai, Tut luiah bomb hmangin sangha an man tih an tarlang a; dan an bawhchhiat avangin Phaizaua MNF unit hruaitute chu Rs. 10,000/- cháwi turin an hriattir.
30th. Monday : YMCA North East Region Virtual Regional Election meeting chu Health Minister, Dr R.Lalthangliana Office Chamber-ah neih a ni a, YMCA North East Regional Chairman (2020-2022) thar atan Dr.R Lalthangliana chu lakluh a ni. Dr R.Lalthangliana chuan, "India ramah Kristiante kan la tlem hle a, 2001 census-ah 2 or 3 % lek kan ni a, 2005 census-ah 6 % World Christian Database atang chuan kan lo tling ve ta a, YMCA hian theihtawp chhuahin India rama Kristiante himna tur leh in unauna nghet zawk kan neih theih nan hma a lo lak tawh țhin angin hma kan la chhunzawm zel dawn a ni." a ti. YMCA North East Regional hruaitu tharte lakluhna inkhawm hman zawh hnu hian YMCA North East Regional Chairman thar Dr.R.Lalthangliana kaihhruainain Executive meeting hmasa ber neih nghal a ni. Dr R.Lalthangliana hian a Minister hmasak khan term hnih zet chu Chairman nihna hi a lo chelh tawh bawk.
Comments
Post a Comment