Vawiin hi min hmangaihtu kan nu thih champha vawi 22-na (8.8.88) a lo ni leh ta reng mai. Rei tawh hle mah se, “Lusunnate chu khuareiin a hnem ngai e,” an tih chu kan unau hnenah chuan a thleng dik ve dawn lo a niang. Kan ngaih a zual zel mai.
Kannu kha khawvela nu fel berah kan ngai a, a hming Vanlalfeli tih kha a thiante’n (thenawm nu ho), “I nu kha chuan a hming a va pu zo tak em!” an tihte kha a dik kan ti ngawih ngawih.
Keini unau tan chuan a ni tluka nu tha kha an awm leh thei chuang awm lo e.
Kannu kha nu fel tak a nih piah lamah mi hlim thei leh fiamthu duh tak a niin mi nel pawh a hlawh hle a, ruihhlo (zu) ngaite pawhin an nel viau vek mai a ni.
Pathian tih mi a ni a, kanpa rinna kawnga a chak loh deuh lai pawhin bangloin a tawngtai thin.
Naupang hriatthiam zawngin a ti ti thiam em em a, naupanga thuchang, thil kan zawt sek sek mai thin a. Kan zawh ang ang chu tha takin min chhang zel mai mi a ni. Kan dil ang apiang min pawmsak veklo kha erawh a hun laiin kan hrethiam lo thin na a, kan hma ngaiin min lo enkawl thiam a, nakina kan tana tha turah chuan kan nat kha pawi a ti lo.
Nau a pai laiin mitliam natna a vei tlat maia, a hunlai chuan natna hlauhawm tak pawh a ni. Chu chu Pathianin a hruaina hmanruaah a lo hmang ta si.
A thih lai khan kan unau zinga upa ber pawh a rawlthar chhuak ek ek chauh a ni a, a te ber phei chu naute chei takin kan la chei. A thihni chuan lungngai mah ila, thiante leh min duhsaktute hmuh chuan kan theihnghilh rum rum. Chhungte lo pungkhawmin Rs 5/- min pe a, chu chuan waiwai bawm khat a man. Kan lei tawn tawn renga, rilru manganga awm mah ni ila kan hlim phian. Kha khan a fate hi kalsan hun kan la ni lo tih a tilang. Mahse, Pathian hian kan tana tha tur hlirin ro hi a lo rel a, kan duh dan erawh a ni vek kherlo tih pawh kan hre tawh. Mahse, kan ngaih erawh a la bang theilo chu a nih si hi.
'Nu, kan unaupa Lalremtluanga pawh a lo kal ve tawh kha. (3.6.2020) Nangni chu hlim takin Pa angchhungah thlamuang takin in leng tawh bik awm si a, in va awhawm tak em.'
Comments
Post a Comment