JULY 2020, MIZO(RAM) DIARY

1st. Wednesday :  

Higher Secondary School Leaving Certificate (HSSLC) Examination 2020 chu Covid-19 hri léng leh inkhàrkhip vanga chawlhsan lailawk a nih hnuah,   chhunzawm a ni a; HSLC (Compartmental) Exam 2020 pawh buatsaih a ni bawk.

2nd. Thursday : Serchhip bawrhsap hna thawk turin   Kumar Abhishek chuan DC mawhphurhna a la ṭan. DC kal chhuak Dr Lalzirmawia Chhangte a thlak ang. Kumar Abhishek hi IAS 2016 batch, AGMUT cadre a ni a, October 2018 aṭangin Mizoramah awm ṭanin, CEO, West Phaileng SDO leh Aizawl additional DC-te a ni tawh.

3rd. Friday : Mizoram sorkara minister hlui, F Lawmkima (80), Kulikawn chu a thi.  

F Lawmkima hi kum 1993 MLA inthlanpuiah Suangpuilawn bialah thlan tlin a ni a, Lal Thanhawla kaihhruai Congress leh JD sorkarah kum 1994 aṭangin minister of state a ni.  

4th. Saturday : Nimina Thenzawl leh Buarpui inkar Tlawng luia tla hlum, Lalnunsanga (19) s/o Lalthanglawta, North Khawlêk chu   a tlakna aṭanga lui mawng lam ft. 200 vela hláah hmuh a ni. Lalnunsanga hi Tlawng lei dawh mek bulah inhlawhin a ṭhiante nen an riak a, luia an inbual laiin chesualin a tla ta a ni.

5th. Sunday : State Referral Hospital (SRH)-ah Covid-19 vei mi 15 dah luh thar a ni a, rinhlelh thilah mi dang pahnih dah luh a ni bawk. SRH-ZMC Covid-19 Bulletin tarlan danin, SRH-ah hian hripui vei mi 22 enkawl mek an ni a, an vaiin Isolation Ward-ah an awm a, harsatna lian nei an awm lo. Covid-19 vei ni lo mi pariat an awm bawk.

6th. Monday :   MHIP Day vawi 47-na a ni a, a pualin Mizoram hmun hrang hrangah hun hman a ni. MHIP General Headquarters president, Lalthlamuani chuan, tu leh fate tan, ram leh hnam tan theihtawp chhuah zel turin MHIP member-te a chah. MHIP hi July 6, 1974-a din a ni a, tunah hian sub-headquarters 10, block 23, joint 21 leh branch zawng zawng 732 a awm mek a ni.  

7th. Tuesday : Buhfai phur truck, Aizawl lam pana tlan,  MZ 09 - 1972 chu Sihphirah chesualin kawng thlangah a lum a, a khalhtu, R.Malsawmkima (40) s/o Rolala, Bungkawn Nursery Veng chu a hmunah a thi. Truck-ah hian driver chiah hi a chuang a ni. Sihphira mi tlawmngaite leh police-te'n an buaipui zui a ni.

8th. Wednesday : Leitlang Pictures kut chhuak, Zonet original series 'Rose' chu Zonet Zawlbukah premier a ni ta. Rose hi Thawhlehni leh Ningani zanah Zonet Zawlbukah leh Zonet Bawhbelah pek a ni ṭhin dawn a ni.

9th. Thursday : Governor, PS Sreedharan Pillai chuan Covid-19 dona atan Chief Minister's Relief Fund-ah June thlaa a hlawh (basic pay aṭanga 30%) Rs.    1,05,000/- a thawh

10th. Friday : Vanlalsiama, (2)   s/o Zorammawia, Sihphir chu an in bul tuikhuahah a tlahlum.

11th. Saturday : Higher & Technical Education Minister, Dr. R. Lalthangliana  chuan Sawrkar Laipui Unlock-2 inkaihhruaina (guidelines)-ah July ni 31 thleng zirna in zawng zawng hawn khap a nih avangin Mizoram University leh College te chu July thla chhung atana khar rih a nih dawn thu a sawi. Minister chuan Sawrkar Laipui thu leh hla ngaichang chung zelin heng zirna in hrang hrang hawn theih hun tur hi ruahman a la nih tur thu a sawi bawk.

12th. Sunday : Kolasib Diakkawn Presbyterian Kohhran Committee-in ruahmanna a lo siam lawk tawh angin Baptisma Sacrament inkhawm a ni a, naupang 8 in baptisma an chang. Kolasib District Magistrate in a phalsak angin Sacrament inkhawmah hian baptisma chang naupangte leh an nu leh pate, Kohhran Committee member te bakah Kohhran Hmeichhia, Kristian Thalai Pawl leh Kohhran Pavalai Pawl atangin Office Bearer chin an tel. Nausen mipa 2 leh hmeichhia 6 te chu bialtu pastor Rev H Zaṭhuama'n baptisma chantirin thuchah a sawi nghal bawk a ni.

   

13th. Monday :   Chief minister, Zoramthanga pian champha, kum 76 na a ní a, mi langsar tak takte'n lawmpuina an hlân. 

14th. Tuesday : Journalist, Francis Paul (42) s/o Paul TK Donga, Zuangtui chu   lungphuchâwl (heart attack) vangin a thi a, a nupui leh a fate pali a kalsan. February 19, 1978-a piang Francis Paul hi Doordarshan Kendra, Aizawlah infiamna thuthar buaipuitu a ni a, kum 2010-ah Mizoram Journalists’ Association member atan lak luh a ni. MJA Gen.hqrs. leh district-a MJA-te chuan thuchhuah siamin, an ui thu an tarlang hlawm a ni.

15th. Wednesday :   Kolasib DC, Dr H Lalthlangliana hoin Zonal Exe­cutive Magistrate, Border Safety Monitoring Team leh Kolasib district-a task force hruaitute an ṭhukhawm a, ‘State dang mi chhawr laite’ tih leh ‘Mikhual chhinchhiahna’ tih chu sem a ni.

16th. Thursday : Associated Chambers of Commerce and Industry of India (ASSOCHAM) buatsaihin India ram pum huap webminar neih a ni a, Union minister of state for Fisheries, Pratap Chandra Sarangi khuallian niin, Mizoram Fishe­ries minister, K Lalrinliana pawh a tel. K Lalrinliana chuan, Covid-19 vangin Mizorama sangha khawitute'n harsatna an tâwk tih sawiin, "Sangha no khawi tur leh a chaw lak luh kawng­ah harsatna an tâwk nasa. Sangha dîl enkawl ṭhat theih loh a tam a, sangha thar a tlem phah a rinawm. Sorkar laipuiin PMMSSY scheme thar a siam behchhanin sangha khawia eizawnna leh a hralhna kawngah Mizoramin ngai a awh chho a, a hma aia lian zawk leh mumal zawka hmasawnna hmuh ka beisei," a ti.

17th. Friday : Lalhmachhuana Zofa lehkhabu ziah 'Mizo Lalte' tih chu   deputy chief minister, Tawnluia'n a pisaah a tlangzarh. Lalhmachhuana Zofa hi Diktawn magazine editor a ni.

18th. Saturday : Mizo Conference Adventist Choir (2018 - 2020) chuan music video pali- I hnenah, Chatuan hmun, Isu chawimawna sang ber leh Isu i felna leh thisente an tlangzarh a, Mizo Conference Youth Director, Pastor Thangliana Fanai chuan AWR Studio-ah Pathian hnenah a hlanin a tlangzarh. Video hi  Chiangtea Videography leh Beiseina Aw Production kut chhuak a ni hlawm.  

19th. Sunday : Minister, Robert Romawia Royte leh MLA, H.Biakzauva te’n Samthang, Farkawn, Khankawn leh Thekte te an tlawh.

20th. Monday : Serchhipa awm, 8th Assam Rifles sipaite leh an hnuaia Champhai lama awm AR sipaite chuan   Champhai leh Farkawnah Tree Plantation Drive an nei a, thei chi hrang hrang ṭiak 900 vel an phun. Thing/thei an phun hi a rah ei atan bakah, leimin leh leilung luang ral tur venna atana tih a ni.

21st. Tuesday : Commisioner, Lalkiamlova lehkhabu ziah 'Fairel bel' tih chu   Booth Mansion Hall-ah Agriculture minister, C Lalrinsanga'n a tlangzarh. Minister chuan, lehkhabu ṭangkai tak, kut hnathawktute mai ni lo, mipui mimirin an hman ṭangkai theih tur a nih thu a sawi.

22nd. Wednesday : Mizoram Rajya Sabha MP thar, K Vanlalvena chu   Rajya Sabha House chamber, Delhi-ah rinawmna thu tiamtira lak luh a ni. K Vanlalvena rual hian state 20-a Rajya Sabha MP atana thlan thar mi 60-te lak luh an ni bawk.

23rd. Thursday : Mizoram Synod rua­hman angin, ni hnih awh Mizoram Presbyterian Kohhrana pastor bial hrang hrangte chuan Bial Inkhawmpui an ṭan a, Covid-19 léng vangin Bial Inkhawmpuiah hian vantlang inkhawm a awm lo a, palai tur pawhin palai ni sate bakah, kohhran tin aṭangin mi pahnih zel ruat a ni.  

24th. Friday : Mizoram Youth Commission (MYC) chairman, Dr Vanlalṭanpuia, MLA chuan Lunglei Zohnuaia North Eastern Council (NEC) sum, nuai 871/- sênga din tur Lunglei Science Centre & Digital Planetarium lungphùm a phúm.

 

25th. Saturday : Central YMA-in district thar pathuma YMA sub-headquarters din dan tur zir chiang tura study group a dinte chuan Hnahthial an tlawh a, district chhunga group YMA hruaitute nen an inkâwm. Study group convener Prof. Lalnuntluanga, CYMA general secretary chuan, CYMA-in district thar pathum - Hnahthial, Saitual leh Khawzawlah YMA sub-headquarters hawn a remti tawh tih a sawi.

26th. Sunday : Seraphic Choir chuan music video thar 'Kan leng za tawh ang' tih chu H Zothanmawia (L)-te inah Chhinga Veng pastor PB Mankima chuan a tlangzarh. 'Kan leng za tawh ang' tih hla hi ku. 2015-a boral ta, H Zothanmawia hriatrengna atana a nupui, Parteii phuah a ni a, Seraphic Choir manager, Lalchhandama chuan a thluk hi a siam thung.

27th. Monday : Mizorama Covid-19 hripui laka invenna leh sipai duty dan chungchangah Lok Sabha MP, C Lalrosanga chuan   Mizoram bialtu Border Security Force (BSF) inspector general Sunil Kumar, Silchar leh DIG Kuldeep Singh-te a bia a; BSF-te state páwn aṭanga Mizorama an luh dan leh an inkhung hran danah fimkhur lehzual turin a hrilh. 

28th. Tuesday : Health Minister, Dr R.Lalthangliana chuan mobile food testing laboratory (Food Safety on Wheels) chu MINECO kawtzawla programme tawi buatsaihah mipui hman theih turin a tlangzarh. Mobile Laboratory-ah hian Food products chikim test theih ni lo mah se, nitina ei leh in mamawh zualpui test theih tura ruahman a ni.

 

29th. Wednesday :   District hrang hrangah district bawrhsap, district election officer (DEO) ni bawkte'n kumina village council leh local council inthlana hman tur electoral roll an tlangzarh a; political party hrang hrang leh tlawmngai pawl aiawhte an tel. Electoral roll-ah hian January 1, 2020-a kum 18 tling chin thun a ni.

30th. Thursday : Lalrosanga (30) S/o Hampairai, Belthei chuan a nupui Mandriboti (27) chu a sat hlum. Thil thlen chhan hi an nupa hi inhnial deuhin,  an pa thin thawk thut chuan a nupui chu chempuiin a taksa hmun hrang hrangah na tak takin a sat a, Lunglei damdawiin panpui nghal ni mahse,  kalkawngah a hliam tuar loin a boral ta a ni. 

 31st. Friday : IAS (Rtd), Clement Liankunga (69), Chaltlang chu zunthlum avangin Aizawl Hospital-ah a boral. Pu Liankunga hi Khawbel khawchhuak niin kum 1985 khan IAS  atan hian a inziak tling a, Bihar Cadre niin pension thlengin a awm zui.