OCTOBER 2019, MIZO(RAM) DIARY

1st. Tuesday : Mizoram police-a CID (Special Branch) leh Champhai police te chuan Mualkawi leh Melbuk inkarah Tata Ace motor, MZ 04-1743 atangin heroin gram 324.6 leh a neitu, driver ni bawk, Robuaia (48), s/o Sangzuna(L), Champhai chu an man.

2nd. Wednesday : Lunglei khawchhungah ruang pahnih chhar a ni. Ruang an chhar te hi Lalchhuanawma (40), s/o Sanglura(L), Lunglawn leh F. Vanlalhruaia (42), s/o Lalrammawia(L), Zohnuai te an ni a, drug OD an nih rin an ni.

3rd. Thursday : Kum 2013 MLA inthlanpui neih dawna affidavid diklo thehluta puhna thubuai-ah CM hlui, Pu Lal Thanhawl chuan thiam a chang.

4th. Friday : Nihnih awh tur Anthurium Festival Reieka neih chu Chief Minister, Pu Zoramthanga'n a hawng.

5th. Saturday : Union Home Minister, Amit Shah chuan lehlangin Mizoram a rawn tlawh a, NEC-in Mizo High School Field-a North East Handloom and Handicrafts Exhibition an buatsaih chu a hawng.

6th. Sunday : Mizoram Baptist Kohhrana Pastor bial hrang hrang ten Zirtawpni atanga bial inkhawmpui an hman chu a tiak.

7th. Monday : Chief Minister, Pu Zoramthanga ho-in CM Cabinet Meeting Room-ah village level-a khawtlang inrelbawlna thuamthat chungchangah LAD hotu te nen sawiho a ni a, LAD Minister, Pu K. Lalrinliana bakah drafting committee member te an tel. Mizoramah hian V/C 534 a awm mek a, heta seat awm zat chu 2,260 a ni.

8th. Tuesday : Sports & Youth Services Minister, Pu Robert Romawia Royte chuan Kolasiba Regional SAI siam mek chu tlawhin an hnathawh dan a enfiah.

9th. Wednesday : Mara Thyutlia Py (MTP) Siaha Collage Vaih Branch chuan MTP Day pualin Siaha District Hospital tan thisen unit 34 an pe a, thisen petu te hi mipa 24 leh hmeichhia 10 an ni.

10th. Thursday : VOLCOMH buatsaihin Synod Conference Center-ah World Mental Health Day hman a ni a, MJA President, Zonunsanga Khiangte in a hmanpui. Inkhawmah hian kuminah Mizoramah mahni intihlum 35 an awm tawh thu tarlan a ni.

11th. Friday : Mizoram University-a NSS Unit chuan MZU Campus-ah blood donation campaign an huaihawt a, Aizawl Civil Hospital tan thisen 334 an pe. Thisen petu te hi mipa 265 leh hmeichhia 69 an ni.

12th. Saturday : Vairengte Poilice checkgate-a duty te chuan hnamdang pahnih Breeza car hmanga gate paltlang tumtu te hnen atangin pawisa lem cheng 41,01,500/- an man. Pawisa te hi cheng 2000/- leh 500/- note te an ni. Pawisa kengtu te hi thubuai siamsak nghal an ni.

13th. Sunday : Ningani atanga hman tan, Mizoram Presbyterian kohhran hnuai-a inkhawmpui lian ber dawt tu, Presbytery inkhawmpui chu a tiak.

14th. Monday : Art & Culture Minister, Pu R. Lalzirliana chuan Art & Culture Department hnuai-a Tribal Institute buatsaih, 'Mizoram Gazetteers Aizawl' tih lehkhabu chu a pisa-ah a tlangzarh. Lehkhabu hi phek 575 a chhah a niin Rs 400/- man a ni.

15th. Tuesday : GoAir Airline chu Aizawl (Lengpu) - Gauhati inkarah a thlawk tan. Thlawhtheihna hi Airbus 320 a niin a thlawkchhuak hmasa ber hi Chief Minister, Pu Zoramthanga'n a vailiam a ni.

16th. Wednesday : World Food Day a ni a, Mizoram hmun hrang hrangah hman ve a ni. Mizorama a hmanna pui ber Aizawlah chuan Agriculture directorate conference hall-ah hman a ni a, thupui chu 'Our actions are out future : Healthy diets for a zero hunger world' tih a ni.

17th. Thursday : Thawhlehni-a tan tak, YMA General Conference, North Vanlaiphai khua-a neih chu a tiak. Conference-ah hian hruaitu thar thlan a ni a, president atan president ni lai Pu Vanlalruata, Tuikual South chu thlan nawn a ni. Kumpuan thupui atan 'Zirna uar' tih thlan a ni a, conference lehpek thlengtu atan Bilkhawthlir Joint YMA thlan an ni.

18th. Friday : Mizo mipa zaithiam, C. Lalrinmawia (64) w/o Lalchhuanawmi (Thahmingliani), Chaltlang chu chawkawng cancer natna avangin a thi.

19th. Saturday : Lalsangzuala, MZU Mizo department-a associate professor lehkhabu ziah 'Vantirhkoh mittui' tih leh 'Duhmanga leh Dardini' tih te chu I & PR Director, Lallianpuii'n MZP Conference Hall-ah a tlangzarh.

20th. Sunday : Presbyterian kohhran chuan 'Nauhual ni' an hmang. Kohhran chhunga naute te chu Beginners department-a lut rual an nih hunah an in ziah luh ngei theih nan'a huallawk an ni.

21st. Monday : India ramah police duty lai-a thi te hriatrengna ni, 'Police Commememoration Day' a ni a, India ram hmun hrang hrangah hman a niin Mizoramah pawh Aizawl bakah district hrang hrangah hman ve a ni.

22nd. Tuesday :
Mizo National Front (MNF) chuan hmun hrang hrangah an party din champha vawi 58-na an  lawm. A lawmna pui ber Aizawla Mizo Hnam Runah chuan chief minister, president ni bawk, Zoramthanga'n a hmanpui. Thusawi-in chief minister chuan, "Pathian ṭanpuinain arsi (MNF symbol) a êng zual zel dawn," a ti. MNF din champha lawmna inkhawm hi vice president R. Tlanghmingthanga'n a kaihruai a, martar-te hriatrengna leh sûn na'n ngawi rengin minute khat chhung an ding a ni.

23rd. Wednesday : Mizoram police-a assistant sub-inspector (ASI), senior under officer leh junior under officer, Police Training School (PTS), Thenzawla training zo mi 205-te thlahna hun PTS-ah buatsaih a ni. Inkhawm hi PTS assistant principal Sai­dingliana Sailo-in kaihruaiin, principal HL Thangzuala'n training-a ti ṭhate hnenah lawmman a hlan.

24th. Thursday : Sports & Youth Services (SYS) minister, Robert Romawia Royte chuan a pisa-ah thuthar thehdarhtute a kâwm a, kum­in December thlaa neih tur Mizoram State Games logo leh mascot a tlangzarh nghal. MSG hi December 9-13 inkara neih tur a ni a, sport discipline 32 a awm dawn a ni.

25th. Friday : RS Traders LPS Comedian Search, Season 12th. chu zawhfel a ni ta a, Vanlalhruaia, Bawngkawn,   chu pakhatna a ni. A tawp zan hian  top 5 chin an inel a, mahse, top 5-ah hian mi paruk inelin minute nga chhung fiamthu thawhin an intihsiak phawt a, hemi hnu hian minute hnih chhung lehkha, thupui nei pawtin, an thupui pawhfuh sawizawmin inelna an nei leh a, Vanlalhruaia tluk zo hi an awm ta lo.

26th. Saturday : Vanglaini chanchinbu chuan Aijal Club-ah Zoram Titi vawi riatna a buatsaih a, thupui atan 'Social Media leh Mizote' tih a ni. Zoram Titi-ah hian kawng hrang hranga mithiam sawm bikte'n thupui hi an sawiho a ni. He hun hi Vanglaini joint editor Lalnghinglova Hmar-in kaihruaiin, Mizote'n social media kan hman danah a ṭha zawnga nghawng engemaw tal a neih beiseiin thupui atan 'Social Media leh Mizote' tih hi thlang an nih thu a sawi.
 
27th. Sunday : Mizoram UPC hnuai-a Ladies Auxi­liary Department-ten Zirtawpni zan aṭang a Govt. High School field, Sia­ha-a inkhawmpui an hman chu a ṭiak. Inkhawmpui rorelah hian inkhawmpui kum tina neih ṭhin chu kum 1 danah neih tawh, kum 2021-2022 chhunga thupui zir tura General LAD Executive Board in alo thlan 'Thih thlengin rinawmin lo awm rawh (Thupuan 2:10)' te, kum 2021 aṭanga zir theih tura hmalakte leh kum 2020-ah rampum huapa nileng ṭawngṭai leh te an pawm.Inkhawmpui-ah hian Mizo­ram hmun hrang hrang aṭangin palai 1,500 vel an tel a ni.

28th. Monday :
Mizo Zirlai Pawl (MZP) chuan Aizawl leh khaw dang ṭhenkhatah Zirlaite Ni, MZP din champha ni bawk an lâwm. Aizawlah chuan Dawrpui Multipurpose Hall-ah an hmang a, School Education Minister, Lalchhandama Ralte-in a hmanpui.

29th. Tuesday : SIRD & PR-in Durtlang Leitana vawk vulh, ar vulh leh pa khawi chungchanga ni thum awh Skill development and entrepreneurship chungchang training Sihphir YMA branch pahnih te tana buatsaih chu tan a ni ta. He hunah hian branch pahnihte atang hian member thlan bik 25 an tel a ni.

30th. Wednesday : Home Minister, Pu Lalchamliana chuan Champhai District Jail a tlawh a, Jail superintendent Zosangliana leh a thawhpuite'n lo dawngsawngin, Jail chhung an fanpui a, an dinhmun leh mamawhte an lo hrilh. Home Minister hi Champhai DC Alexander V Chongthu, additional SP Francis Lalnuntluanga Ralte leh sorkar official dangte'n an ṭawiawm a ni.

31st. Thursday : Gov't T.Robert High School, Bilkhawthlir chuan an school din champha kum 50 tlin an lawm. He hunah hian Pu Lalrinsanga Ralte, Bialtu MLA chuan khuallian niin a hmanpui a, Pu Zoensanga, Kolasib DC chu khualzahawm a ni. Jubilee puala Souvenier buatsaih chu khuallian hian a tlangzarh nghal.