1st. Friday : Lalremchhunga (36), s/o R. Sanghnuna (Traffic Police), Sihphir chu pneumonia natna avangin Synod Hospital, Durtlangah a boral. Lalremchhunga hian a nu leh pa, a nau te bakah a fanu pakhat a kalsan.
2nd. Saturday : Ni hnih awh Aizawla veng hmasate zinga mi, Tlangnuam veng kum 114-na lawmna chu khar a ni. A lawmna hi Tlangnuam Local Council hmalakna a neih a ni a, nilengin khawtlang huapin hun an hmang a, tlaiah ruai an ṭheh. Tlangnuam hi Lalchhinga leh a khua leh tuite’n kum 1905-a an din a ni a, anni hi Hriangmual (tuna Mission Veng)-ah an awm ṭhin. A tirah chuan a dintu leh awm hmasa Lalchhinga hming chawiin 'Lalchhinga Veng' tih a ni a, Lalchhinga hnu-a sap ho-in lal atana an ruat Paliana Hauhnar chuan 'Tlangnuam' tiin a hming a phuah thar a ni.
3rd. Sunday : May Lalbiaknungi ( 25), D/o Vanlalhruaia, Chaltlang chu Septicemia avangin a boral. May-i hi MZI leh LPS tangkawp in Onstage an buatsaih atanga mipui hriat hlawh ta kha a ni.
4th. Monday : Serlui bialtu MLA, Vice Chairman, Rubber and Allied Crops Development Board ni bawk, Pu Lalrinsanga Ralte chuan a bial chhunga Buhchangphai zirlai naupang kum 2019 HSSLC (Science) a pahnihna Lalduhawma chu Central / All India Service a in ziah tlin a tumna kawnga ṭanpuina atan cheng 1,00,000/- a hlan. Lalduhawma hi chhungkaw retheitak aṭanga lehkha zir niin IAS nih tum a ni a, a harsatna leh a tum hriain MLA hian a term chhungin (kum 5) kumtin cheng nuai khat (1,00,000/-) in a sponsore dawn a ni.
5th. Tuesday : Mizoram Governor 21-na atan PS Shreedharan Pillai chu Raj Bhawan-ah Guwahati High Court Chief Justice Ajay Lamba chuan rinawmna thu tiamtirin a la lut. Governor thar PS Shreedharan Pillai hi Kerala BJP President nilai niin politician hlun tak a ni.
6th. Wednesday : Khawzawl District lawmna inkhawm Khawzawl Field No.1-ah buatsaih a ni a, Chief Minister, Pu Zoramthanga chuan khuallian niin a hmanpui. Deputy Chief Minister leh bialtu MLA ni bawk, Pu Tawnluia chu khualzahawm a ni. District lawmna inkhawmah hian MLA dang engemawzat in an telpui bawk.
7th. Thursday : Sihphir - Zanlawn kawng siam ṭan tûr chungchângah Shri Raj Kumar, Officer Commanding & Shri Ayyanar, OIC, 74 RCC BRTF-te leh YASTD (Sihphir ṭhalai pawl), V/C (Sihphir & Sihphir Vênghlun) leh YMA OB's (Sihphir & Sihphir Vênghlun Branch)-ten kawng siam ṭanna tur Sihphir khaw tawntirh Mêl 9 kawng an enho a, hma lâk dân tûr leh kawng siam laia Traffic Control dân tûr te an sawi ho. Kawng hi WBM 75mm & Ready Mix BC 40mm phah tûr a ni. Contractor hi M/s Nidhi Creative Infrastructure Pvt. Ltd. a ni a, Nidhi company aiawh hian Shri Mukesh, Site Engineer pawh kawng enna-ah hian a tel bawk.
8th. Friday : PRISM pisa-ah MPC leh PRISM party aiawhte an ṭhukhawm a, an party pahnihte pawl pakhata inchhûnfin dan tur an ngaihtuah. Meeting hi PRISM general secretary, H Lalremsiama'n a kaihruai.
9th. Saturday : Governor, PS Sreedharan Pillai lehkhabu ziah pahnihte chu Sharjah International Book Fair (SIBF), Sharjah, United Arab of Emirates (UAE)-ah MP hlui AP Abdullakutty chuan a tlangzarh. Larsap lehkhabu ziahte hi 'Utharam Thedumbol' (Sap ṭawngin 'Searching for the Answer' tihna) tih leh, 'Anchadi Thottangal' tihte a ni a, he'ng lehkhabu pahnihte hma hian lehkhabu 101 lai a lo tichhuak tawh a ni.
10th. Sunday : Phunchawngah truck 1109, MZ-02/A-5541 Md. Ali Ahmed Barbhuiya, Rajnagar, Cachar District, Silchar a mi khalh chuan kawngsir mi in hulhliapa mihring lo dingte su-in hulhliap nen chuan a nawr chilh a, David Lalhruaitluanga (43) s/o Maj. Chawnglianthuama, Chaltlang chu a boral. Mi pakhatin hliam a tuar bawk. Truck khalhtu hi man nghal niin thubuai siam sak a ni.
11th. Monday : Mizoram Legislative Assembly-a Subject Committee II chuan Rashtriya Uchchatar Shiksha Abhiyan (RUSA) hnuai-a Aizawl College-in hma an laknate a hmunah enin an tlawh. Subject Committee II-ah hian Dr F Lalnunmawia chairman niin member Pu NK Chakma, Pu Lalchhuanthanga, Pu C Lalmuanpuia leh Pu Zothantluanga te an tel a, RUSA hotute leh Assembly Secretariat official ten an tawiawm. Commitee hi Aizawl College Principal Professor C Sangluaii leh staff ten an lo tawiawm a ni.
12th. Tuesday : Zoram Thar chuan Aijal Club-ah Zo fate insuihkhawmna atana rorelna inpui tur, Zofate Lairelna (Zofate Committee) an din. Inkhawm hi Zoram Thar general secretary, Lalruatfeli Hlawndo-in a kaihruai. Zoram Thar hotu Rev.Dr Zaichhawna Hlawndo-in thu a sawi bakah, thupui hrang hrang zirho a ni bawk.
13th. Wednesday : R. Chaldailova lehkhabu ziah, ‘Mizo pi pute nunkhua’ tih chu Ramhlun Indoor Stadium-ah Information & Public Relations minister, Lalruatkima'n a tlangzarh. Lehkhabu hi phek 192-a chhah niin, Rs. 200/- man a ni.
14th. Thursday : Vawi engemawzat naupang khuaikhema pawngsuala puh, ST Lalngamzova (32) s/o ST Hreunawna (L), Sihtlangpui, Lawngtlai district chu Lunglei District & Sessions Court chuan thiam loh chantirin thutlukna a puang a, kum sarih chhung táng tur leh Rs. 1,000/- chawi turin a hrem. Lunglei District Court-a special judge (POCSO) Joel Joseph Denga judgement order-a a lan danin, ST Lalramzova hian August 2015 thla vel khan naupang kumtling lo pakhat chu vawi engemawzat khawihin, a pawngsual ṭhin a ni.
15th. Friday : Kolasiba Supply kudama buhfai tam tham tak tichingpena puh, PL Zohmingliana, Kolasib DSCO hlui chu Kolasib District Court-a chief judicial magistrate, R. Lalduhawmi chuan thiam a chantir. Kolasib Chief Judicial Magistrate hian PL Zohmingliana chu Kolasib kudama buhfai tihchingpen chungchangah finfiahna chi hrang hrang en a nih hnu-ah Court-in a thiam lohna a hmuh loh thu a puang a ni.
16th. Saturday : Dapchhuah (Tut) khaw bul a Daplui Mamit kai lei dawh mekah hnathawk pahnih rod tun khawm tlu/chim in a delhhlum.
16th. Saturday : Dr. Zorammawia (59) s/o Thanseia (L), Zarkawt, Health department-a joint director (Dental), Mizo ha doctor zinga MDS hmasa ber ni bawk chu lungphu châwlin a thi a, vuiliam nghal a ni.
17th. Sunday : Salvation Army India Eastern Territory-a rorelna sang ber, Territorial Council November 15, Zirtawpni aṭanga Bethlehem Corps Central South Division-a neih chu a ṭiak.
18th. Monday : North East Students' Organisation (NESO) bultumin India hmarchhak state hrang hrang khawpui-ah Citizenship Amendment Bill (CAB) duh lohna lantir a ni a, Aizawlah pawh MZP huaihawtin Vanapa Hall kawtah sit-in protest huaihawt a ni.
19th. Tuesday : Ni thum awh tur, Mizoram Legislative Assembly pariatna session vawilina chu Assembly House-ah ṭan a ni. Session ṭan a nih hma-in Governor, PS Sreedharan Pillai ho-in House tualah member-te'n thla an la a ni. Session ṭan a nih hnu-ah MLA hlui thi ta, Thankima sûnna hun hman a ni bawk.
20th. Wednesday : Aizawl District Court chuan Vanlalnuna (39) s/o Biakthanga, Tahan C group, Myanmar chu a nupui Cheuzakimi a thah avangin a dam chhunga jail-a táng tur leh Rs. 3,000/- chawi turin a hrem. Vanlalnuna hian a pawisa chawi tur a pek loh chuan thla thum dang a tân belh ang. Vanlalnuna hian a nupui hi uire-ah puhin kum 2017 khan a that a ni.
21st. Thursday : Vaivakawn aṭanga Hunthar Veng panna kawngpui chu a thlang lama leimin ṭhin a min leh avangin a bal.
22nd. Friday : Mizo Academy of
Letters chuan Lalthangfala Sailo hnenah Mizo Academy Award 2019 an hlan. MAL hian kum thum danah Mizo Academy Award an pe ṭhin a, kuminah chuan MAL president hlui, Lalthangfala Sailo hnenah an hlàn a ni. Award hian medal, thuchei leh Rs. 20,000/- a keng tel.
23rd. Saturday : Kolasib thlanga Rengtekawn khua-ah chenna in pathum a kâng a, bungrua tlem azawng an chuh hman tihloh chu a kâng ral.
24th. Sunday : Minister, Dr R Lalthangliana chuan TNT, Zuangtui a tlawh a, ṭanpuina sum a hlan. TNT, Zuangtui-ah hian mi 1,855 an awm mek a, TNT awmna dang - Kolasibah mi 227, Lunglei-ah mi 270 leh Champhai-ah mi 353 leh Tahan, Myanmar-ah mi 320 an awm bawk.
25th. Monday : National Institute of Educational Planning and Administration leh Samagra Shiksha chuan Hotel Regency-ah ni nga awh tur 'Functioning of local authority and autonomous district councils under Sixth Schedule of the Constitution in management of elementary education in North Eastern States' hmangin workshop an buatsaih a, School Education director, Lalzarmawii'n a hawng. He hunah hian India hmarchhaka district council nei state aṭangin education officer 25 an tel a ni.
26th. Tuesday : Mizoram sorkar chuan MPSC chairman atan V. Lalremthanga, IAS 2002 batch a ruat. V. Lalremthanga hi MCS officer ṭhin, IAS-a kai a ni.
27th. Wednesday : Mizo ṭhalaite Japan-a hna an thawh theihna tura programme ruahman, Technical Intern Training Programme (TITP) chu Agriculture department conference hall-ah hawn a ni a, Dr ZR Thiamsanga, MLA-in a hmanpui. TITP hawnna inkhawm hi Mizoram Foundation Movement (MFM) director, R Vanlalzauva'n a kaihruai a ni.
28th. Thursday : Mizo National Front (MNF) party President thar atan chuhtu an awmloh avangin president ding lai, Chief Minister ni bawk, Pu Zoramthanga chu tlinga puan a ni.
29th. Friday : Planning & Programme Implementation Department hnuai-a Entrepreneurship Development Centre (EDS) buatsaih Mizoram State Outstanding Entrepreneurs’ Award sem a ni a. Home Minister, Pu Lalchamliana leh Chief Secretary, Pu Lalnunmawia Chuaungo ten an hmanpui.
Mizoram State Outstanding Entrepreneur, 2019 chu CB Rice Cake neitu Pu C.B Lalliankhuma hlan a ni.
30th. Saturday : Hyderabad khawpuia Serampore College (University) Convocation-ah Chief Minister hlui, Pu Lal Thanhawla chu Senate of Serampore in Kohhran leh khawtlang tana a thawhhlawk em avangin Doctor of Divinity ( Doctorate Degree) a hlan.
Serampore College (University) in lehkhaa an tarlan danin Pu Lal Thanhawla hi India ram, Hindu kulmuk tamna rama ram hruaitu lawkte zinga Kristian leader chhuanawm tak anga hriat a nih vang a ni.
Comments
Post a Comment